TSAROANAO nan̈ino anjeliny Zan̈ahary araiky nanjary Satana Devoly? Fotony izy tia ten̈a. Tiany izy tompoenolo, ke zen̈y nahavy izy loso nanohitry Zan̈ahary. Nisy anjely hafa koa ma nan̈araka Satana? Ia. Baiboly mikaiky iro io ‘anjeliny Satana’ na demony.​—Apokalypsy 12:9.

Anjely ratsy na demony aby io ma mba mino Zan̈ahary? Baiboly mivolan̈a fa ‘demony aby io mino fa Zan̈ahary misy.’ (Jakoba 2:19) Ke iro mavozo, fotony haindro fa mbala hisaziny Zan̈ahary iro tamy raha ratsy jiaby nataondro. Ino ma raha ratsy nataondro?​—

Baiboly mivolan̈a fa nialandro anjely aby io plasindro tandan̈itry tan̈y, avio iro niova olombelon̈o ke nandeha tambony tany tatỳ. Iro nan̈iry mare hanambady man̈angy maro tsara sora tambony tany tatỳ. (Genesisy 6:1, 2; Joda 6) Karakory ma olo mifanambady zen̈y?​—

Lelahy araiky ndreky man̈angy araiky izikoa fa mifanambady, manjary mavesatra man̈angy io. Fa anjely tsy nimboany Jehovah manambady. Tiany Zan̈ahary baka izikoa lelahy araiky ndreky man̈angy araiky fivadiany fo mifanambady. Amy zen̈y, iro roe afaka mikarakara tsarabe zanakandro.

Fa anjely aby io ndraiky izikoa fa niova olombelon̈o ke nanambady man̈angy tambony tany tatỳ, iro niteraka tsaiky befatiarin̈y. Iro io koa kafiry mare, avio iro nampijaly olo. Ke Zan̈ahary nan̈ano safodrano nandripahan̈a olo befatiarin̈y aby io ndreky olo jiaby ratsy fan̈ahy. Fa Noa ndraiky nirahiny nan̈amboatra sambofiara, han̈avotan̈a iro olo vitsy nan̈ano ny marin̈y. Sambofiara io sambo maventy oe. Jesosy nivolan̈a fa ten̈a ilain̈y mangala onon̈o raha nandalo tamy Safodrano in̈y.​—Genesisy 6:3, 4, 13, 14; Lioka 17:26, 27.

Hainao nan̈ano karakory anjely ratsy aby io izikoa fa navy Safodrano? Nialandro vatan̈anolombelon̈o in̈y, baka io iro nimpody tandan̈itry tan̈y. Fa iro fo efa tsy anjeliny Zan̈ahary eky. Iro nanjary anjeliny Satana, na demony. Ke nan̈ano akory fo basy zanakandro, iro olo aby befatiarin̈y in̈y? Iro naty tamy Safodrano tao. Naty koa zay olo jiaby tsy nan̈araka volan̈a Zan̈ahary.

Rango tamy Safodrano in̈y, demony aby io efa tsy nambelany Zan̈ahary hanjary olombelon̈o. Fa nata atsika tsy afaka mahita iro, demony aby io mbala mifen̈y fo mitariky olo han̈ano raha ratsy. Iro mampisy korontan̈a lombolombony taloha, fotony iro nadoso tandan̈itry tan̈y, ke natsipy tambony tany tatỳ.

Hainao nan̈ino atsika tsy afaka mahita demony aby io? Fotony iro io tsy hita maso. Iro io ten̈a misy ankitin̈y. Volan̈iny Baiboly fa Satana ‘mamitaka tany jiaby misy olo’, ke demoninany aby io man̈ampy izy amy zen̈y.​—Apokalypsy 12:9, 12.

Ke atsika koa ma mety ho voafitakany Devoly ndreky demoninany aby io? Ia. Izikoa atsika tsy mitandrin̈y azondro edy. Fa ndray zen̈y, atsika tsy tokony havozo. Jesosy nivolan̈a karaha ty: ‘Devoly tsy manan̈a fahifan̈a aminaka.’ Izikoa atsika mifen̈y harikitry Zan̈ahary fo, izy hiaro atsika amy Devoly ndreky demony aby io.​—Jaona 14:30.

Ten̈a raha maventy hahaizantsika ino raha tsy manjary tadiaviny demony aby io ataontsika. Ke diniha tsarabe ino izio. Ino raha ratsy nataony demony aby io taminiro navy tambony tatỳ? Talohany naviany Safodrano, iro nanambady man̈angy aby io. Kanefa anjely tsy nataony Zan̈ahary han̈ano zen̈y. Amy zioty koa, tiany demony aby io olo tsy han̈araka lalàn̈any Zan̈ahary momba firaisan̈a. Araka hevitrinao, azovy tokony hifanambady? Marin̈y valinteninao, olo fivadiany fo.

Aminandra izioty, misy tsaiky lelahy ndreky tsaiky man̈angy sasany efa man̈ano firaisan̈a kanefa iro mbala tanora oe. Ratsy raha zen̈y. Baiboly mikoran̈a momba ‘raha mahalelahy.’ (Levitikosy 15:1-3) Baiboly koa mikoran̈a momba raha mahaman̈angy. Misy antony manokan̈a namoron̈any Jehovah iro io, ke olo fivadiany fo afaka hankafy raha zen̈y. Ravoravo mare demony aby io izikoa olo man̈ano raha tsy imboany Jehovah atao. Ohatra, tiandro demony aby io izikoa tsaiky lelahy ndreky tsaiky man̈angy mifampisaoma raha mahalelahy na mahaman̈anginy araiky. Tsy tiantsika foeky han̈ano raha hamparavoravo demony aby io.​—

Misy raha hafa koa tiany demony aby io kanefa izio halany Jehovah. Hainao ino izio? Olo kafiry. (Salamo 11:5) Olo kafiry zen̈y olo ratsy jery sady tia mampijaly olo. Aza adin̈a fa zen̈y raha nataondro zanakandro demony aby in̈y, iro olo befatiarin̈y in̈y zen̈y.

Tiandro demony aby io koa mampavozo olo. Ndraikindraiky iro man̈ano sary olo efa naty, ke mety alaindro tahaka firaka amy feonolo aby efa naty io. Baka amy raha ataondro zen̈y, loso maro olo voafitaka ke mino fa olo maty aby io mbala velon̈o fo sady afaka mikoran̈a aminolo. Nohony raha ataondro demony aby io zen̈y, maro olo manjary mino fisiany lolo.

Ke atsika ten̈a mila mitandrin̈y fo baka tsy ho voafitakany Satana ndreky demoninany aby io. Baiboly mampitandrin̈y karaha ty: ‘Satana man̈ano karaha anjeliny mazava, mpanomponany koa man̈ano karaha zen̈y.’ (2 Korintianina 11:14, 15) Ny marin̈y aminany, demony aby io tsy manjary. Alo zahavantsika karakory ataondro mitariky atsika han̈araka raha ataondro.

Baka aia ianaranolo raha maro momba hakafirianan̈a ndreky fan̈anaovan̈a firaisan̈a amy fomba ratsy baka io hian̈a ndreky lolo? Baka amy filma ndreky programo sasany amy tele, na koa aminy ordinatera ndreky jeux video, aminy internet, ndreky amy boky mampitokiky. Araka hevitrinao, raha aby io ma mahavy atsika harikitry Zan̈ahary sa harikitry Devoly ndreky demony aby io?​—

Fahitanao izy, azovy tia atsika mitandren̈y ndreky mizaha raha tsy manjary? Satana ndreky demoninany aby io. Ke ino basy raha mila ataontsika? Raha tsara ndreky man̈ampy atsika hanompo Jehovah fo tokony vakiantsika, tandrin̈esantsika ndreky zahavantsika. Asa anao mahazo onon̈o sasany amy raha tsara aby zen̈y?​—

Izikoa raha tsara fo ataontsika, tsisy antony tokony havozoantsika demony aby io. Jesosy mbala matanjaka lavitry tozay iro, sady iro mavozo izy mare. Tandraraiky zay, nisy demony nivolan̈a tamy Jesosy: “Anao ma navy handeha handripaka zahay?” (Marka 1:24) Ho ravoravo mare atsika lera Jesosy handripaka Satana ndreky demoninany aby io, tsy zen̈y? Fa mandrapavianizen̈y, matokisa fa Jesosy hiaro atsika baka atsika tsy azony demony aby io izikoa atsika mifen̈y harikitry izy ndreky Babany andan̈itry an̈y.