TEN̈A mahagaga ndraikindraiky raha ataony Jehovah hiarovan̈a tsaiky mbala tsy mahavita miaro ten̈a. Izikoa anao mandeha ambanivolo, mety ho hitanao fomba araiky han̈anaovany Jehovah raha zen̈y. Fa amy voanalohany, mety tsendriky azonao onon̈o raha io.

Hitanao misy voron̈o latsaka marikitry anao iô. Karaha mijaly mare fahitanao izy. Sarisaritiny fo elatranany araiky. Fa izikoa anao mitady han̈aton̈o izy, ke tihanambotro izy, milefa edy izy. Avio tampoko tio, loso izy nitilin̈y. Kaiky tsy narary aby elatranany in̈y! Hainao ma ino dikany raha nataony voron̈o in̈y?​—

Kaiky nasitriny voron̈o io tan̈aty ahitrahitry marikitry tany nahitanao izy in̈y zanany, tsao hitanao ke hampijalinao. Zen̈y nahavy izy nan̈ano sarisary narary in̈y avio anao nindesiny niala lavitry tany nisy zanany. Mba hainao koa ma azovy afaka miaro atsika karaha ataony renimboron̈o miaro zanany io? Amy Baiboly, Jehovah ampitovisin̈y amy papango araiky mampianatra zanany madiniky in̈y.​—Deoteronomia 32:11, 12.

Jesosy Zanakany Jehovah ten̈a tiany. Taminizy tandan̈itry tan̈y, Jesosy anjely matanjaka karaha Babany. Izy nahavita nikarakara ain̈inany tompiny. Fa tamy Jesosy nanjary zazamena tambony tany tatỳ, izy nila olo niaro izy.

Baka ho tanteraka fikasan̈any Zan̈ahary momba Jesosy tambony tany tatỳ, Jesosy tsy maintsy nahaibe ke nanjary olo lavorary ndreky matotro tsara. Fa talohany hahatantirahany raha zen̈y, Satana nitady fomba hamonoan̈a Jesosy taminizy mbala hely. Asa tianao ho hay tantara tsara momba raha nataony Jehovah hiarovan̈a Jesosy, avio raha nataony Satana?​—

Tsy ela tafarany Jesosy teraka, nisy lakintan̈a nataony Satana nazava be tamy lan̈itry tantin̈iana. Nisy lelahy aby pandiniky lakintan̈a aby zay nan̈araka lakintan̈a io. Ke iro nan̈ano dia lavitry nandeha ta Jerosalema. Iro koa fa navy tao, iro nan̈ontany aia tany nitirahany araiky hanjary panjakany Jiosy io. “A Betlehema” ho iro olo aby io, fotony haindro fa zen̈y raha volan̈iny Baiboly.​—Matio 2:1-6.

Heroda panjaka ratsy fan̈ahy panjakany Jerosalema tamy zen̈y. Izikoa fa ren̈iny fa nisy panjaka vaovao vo teraka ta Betlehema, tanàna tsy lavitry tio, karaha ty nivolan̈iny tamindro pandiniky lakintan̈a aby io: ‘Tadiava tany misy tsaiky zen̈y, baka io mimpodiana aminaka atỳ anaro man̈ambara izio.’ Hainao ma nan̈ino tiany Heroda ho hay aia tany misy Jesosy? Fotony izy nafana fô Jesosy ke tihamono izy foeky.

Akory eky hiarovany Zan̈ahary Zanany io? Izikoa fa hitandro pandiniky lakintan̈a aby io tany nisy Jesosy, izy namezandro kadô maro. Baka io amy zay, Zan̈ahary nampitandrin̈y iro pandiniky lakintan̈a aby io baka tamy nofy fa iro tsy mila mimpody aminy Heroda an̈y. Ke iro koa fa nody, iro niomba lalan̈a hafa, fa tsy nandalo ta Jerosalema eky. Izikoa fa ren̈iny Heroda fa tsy nimpody iro pandiniky lakintan̈a aby in̈y, neloko mare izy. Nitady fomba hamonoan̈a Jesosy fo Heroda. Ke ino raha nataony? Nirahiny nivonen̈a tsaiky lelahy taon̈o aroe mijotso jiaby ta Betlehema. Fa Jesosy fa tsy tao.

Hainao karakory nilifasany? Fotony tafarany nandihanandro pandiniky lakintan̈a aby in̈y, Jehovah nampitandrin̈y Josefa vadiny Maria, fa iro nila nilefa ta Ezipty tan̈y. Tsisy raha vitany Heroda natao tamy Jesosy tan̈y. Taon̈o maromaro tafara tatỳ, Josefa ndreky Maria avio Jesosy izikoa fa niala ta Ezipty, Zan̈ahary nan̈amia fampitandreman̈a hafa koa tamy Josefa. Tamy nofy, izy nivolan̈a tamy Josefa mila mifindra a Nazareta. Voaro tsarabe Jesosy tan̈y.​—Matio 2:7-23.

Hitanao ma karakory nataony Jehovah niaro Zanany io? Azovy mety hitanao mitovy amy zanaka voron̈o aby nasikitriny mamandro tan̈aty ahitrahitry in̈y? Azovy olo hitanao mitovy tamy Jesosy taminizy mbala hely in̈y? Anao, tsy zen̈y? Misy olo koa mitady han̈ano raha ratsy aminao. Hainao azovy izio?​—

Baiboly mivolan̈a fa Satana io mira lion mitreron̈o mitady handrapaka atsika. Matetiky zanaka biby ten̈a kindreny lion. Ke karaha zen̈y koa, matetiky tsaiky ten̈a kindreny Satana ndreky demoninany aby io. (1 Petera 5:8) Fa Jehovah fatatra mare mandilatra Satana. Ke vitany Jehovah miaro tsaiky tia izy aby io, fotony iro io zanany. Vitany miaro iro amy raha ratsy jiaby ataony Satana amindro.

Tamy Toko faha-10 tamy boky ty atsika nahita fa misy raha tiany Devoly ndreky demoninany aby io hataontsika. Azonao onon̈o ino izio? Tiandro atsika efa han̈ano firaisan̈a, kanefa raha zen̈y tsy tiany Zan̈ahary. Azovy zaraiky fo ma olo afaka man̈ano firaisan̈a? Lelahy araiky ndreky man̈angy araiky efa be, sady iro efa fivadiany.

Mampalahelo fa, misy olobe sasany tia man̈olan̈a tsaiky. Manjary man̈araka raha ataondro zen̈y koa iro tsaiky aby io. Iro loso mampiasa raha mahalelahy na mahaman̈angy io amy fomba ratsy. Karaha zen̈y raha nandalo efa ela, tamy tanànany Sodoma tan̈y. Baiboly mivolan̈a fa olo tamy tanàna io tao “rango amy tsaiky lelahy firaka tamy matoelahy” nitady hanambady lelahy aby namangy Lota.​—Genesisy 19:4, 5.

Karaha Jesosy nila piaro in̈y, anao koa mila harovan̈a amindro olobe ndreky tsaiky hafa mitady han̈olan̈a anao. Matetiky iro io mety han̈ano sary kamaradinao. Ndray anao aby mety hamezandro raha, izikoa anao mivolan̈a fa tsy han̈ambara olo raha ataondro aminao io. Iro io tia ten̈a, mira Satana ndreky demoninany aby io fo. Raha mamparavoravo iro fo tadiavindro. Tsy ino izio fa han̈olan̈a tsaiky. Zen̈y raha tsy manjary foeky!

Hainao karakory ataondro man̈ano raha zen̈y? Iro mety hikasikasiky raha mahalelahy na mahaman̈angy anao. Na koa nindro foeky hampikasihindro amy ninao iô. Aza ambela foeky misôma raha mahalelahy na mahaman̈angy anao, ndray zokinao izio na zandrinao na mamanao na papanao, na olo hafa.

Karakory hiarovanao vatan̈anao aminolo man̈ano raha ratsy karaha zen̈y? Voanalohany, kaza misy olo ambela hisôma raha mahalelahy na mahaman̈angy anao. Izikoa misy olo mitady han̈ano zen̈y aminao, volàn̈a mare karaha ty: “Mivoleza! Ambarako anao niany!” Izikoa volan̈iny fa baka aminao nahavy izio, aza iken̈a fa zen̈y tsy marin̈y. Ndray azovy ndray azovy olo io, ambarà olo raha nataony io! Ambarà fo izy, ndray izy mivolan̈a fa raha nataonaro io sekirenaro roe. Ndray izy mivolan̈a han̈amia anao kadô tsara na koa mampitahotro anao, milifasa fo avio ambarà olo izy.

Anao tsy mila mavozo. Fa ndray zen̈y, anao mila mitandrin̈y tsarabe. Ry olobenao izikoa fa mampitandrin̈y anao momba olo na tany tsy tokony himboanao, tandrin̈esa volan̈andro. Izikoa anao man̈ano zen̈y, iro olo ratsy fan̈ahy aby io tsy hahavita han̈ano raha ratsy aminao.