Azovy ma lelahy aby amy sary io?... Matio, Marka, Lioka, Jaona, Petera, Jakoba, Joda ndreky Paoly. Iro io nahita raha nataony Jesosy, ke iro io amy zay nanoratra tantarany Jesosy. Zen̈y raha hizahavantsika izioty.

Telo amindro lelahy aby nanoratra tantarany Jesosy io apostoly. Asa hainao azovy iro io?... Matio, Jaona ndreky Petera. Matio ndreky Jaona ten̈a nahay Jesosy. Maro raha nisoratindro momba Jesosy. Apostoly Jaona  ndraiky nanoratra Apokalypsy, boky amy Baiboly ao, ndreky Jaona Voanalohany, Jaona Faharoe ndreky Jaona Fahatelo. Apostoly Petera nanoratra taratasy aroe amy Baiboly ao: Petera Voanalohany ndreky Petera Faharoe. Amy Petera Faharoe ao, apostoly Petera mikoran̈a raha nivolan̈iny Jehovah momba Jesosy. Tamy zen̈y, Jehovah nivolan̈a karaha ty: ‘Io edy zanako e. Tiako zanako io. Ravoravo zaho manan̈a izy.’

Misy lelahy araiky koa amy sary io nanoratra raha momba Jesosy. Marka an̈arany. Tio izy tamy Jesosy nisamborinolo in̈y, ke hitany raha jiaby nataondro izy. Lioka ndraiky araiky dokotera io. Jesosy koa fa naty, izy nanjary kristianin̈y.

Aroe amindro lelahy nanoratra Baiboly io mbala zandriny Jesosy. Azovy eky an̈arandro io?... Jakoba ndreky Joda. Taloha iro tsy nino Jesosy. Iro io nivolan̈a fa izy very jery. Iro fo nanjary kristianin̈y tafara tatỳ.

Misy lelahy araiky mbala tsy nikoran̈intsika tio, fa nanoratra Baiboly hitanao amy sary io. Paoly an̈arany. Izy taloha tsy kristianin̈y. Saoly an̈arany tamy zen̈y. Izy tsy tia Kristianin̈y foeky. Nampijaly iro fo asanany. Ino fo raha nampiova izy?... Tandraraiky, Paoly tamy zen̈y tamy lalan̈a, izy naharen̈y feony Jesosy baka tandan̈itry. Jesosy nan̈ontany Paoly: ‘Nan̈ino ma olonaka ampijalinao?’ Tafaranizen̈y, Paoly nanjary kristianin̈y. Izy nanoratra boky 14 aby amy Baiboly ao, baka amy Romanina firaka aminy Hebreo.

Atsika mamaky Baiboly isanandra, tsy zen̈y?... Famakian̈a Baiboly io ahaizantsika raha maro momba Jesosy. Tsy mba tianao hianatra tantarany Jesosy zen̈y?...