Atsika koa fa mikoran̈a aminolo raha momba Jehovah, iro mety ho meloko na hikotran̈a atsika. Izikoa atsika ataonolo karaha zen̈y, atsika mety ho voly hivolan̈a aminolo raha momba Jehovah. Efa nisy olo nan̈ano karaha zen̈y taminao?... Baiboly mitantara lelahy araiky tia Jehovah. Nisy fotoan̈a izy tsaiky voly nikoran̈a raha momba Jehovah. Jeremia an̈arany. Atsika hizaha tantaranany.

Jeremia tamy zen̈y mbala tsaiky lelahy. Jehovah nan̈iraka izy hivolan̈a taminolo fa hisaziny Jehovah iro koa mbala man̈ano raha ratsy. Jeremia navozo. Izy nivolan̈a tamy Jehovah: ‘Zaho Jehovah tsy mahay mivolan̈a zen̈y amindro e! Tsaiky  hely karaha ataoko ty!’ Jehovah amy zay nivolan̈a taminany: ‘Anao aza mavozo. Zaho han̈ampy anao.’

Loso Jeremia nivolan̈a iro olo aby io fa iro koa mbala man̈ano raha ratsy, iro hisaziny Jehovah. Olo aby io ma nitandren̈y volan̈a Jeremia?... Iro tsy nitandren̈y. Sasany neloko mare taminany, sasany nikotran̈a izy. Sasany efa mila hamono izy foeky. Karakory eky nataony Jeremia?... Izy navozo. Volan̈iny karaha ty: ‘Zaho voly hikoran̈a aminolo raha momba Jehovah.’ Voly ankitin̈y ma izy?... Izy tsy voly, fotony izy ten̈a tia Jehovah. Jeremia nikoran̈a taminolo raha momba Jehovah fo, ke Jehovah niaro izy.

Tandraraiky, Jeremia nalatsakandro tan̈aty lavaka lalin̈y feno godra, fotony iro mila hamono izy. Jeremia tamy zen̈y tsisy hanin̈y ndreky rano foeky. Jehovah niaro izy fo, ke izy tsy naty!

Karakory han̈anovanao karaha Jeremia in̈y?... Jeremia ndray navozo, izy tsy voly nikoran̈a taminolo raha momba Jehovah. Anao koa mikoran̈a aminolo raha momba Jehovah, anao mety havozo, izikoa iro mikotran̈a anao na masiaka anao. Izikoa anao tsy voly mikoran̈a raha momba Jehovah, mira Jeremia in̈y, Jehovah hiaro anao koa.