MARO olo mino fa misy raha tsy hita maso ndreky tsy mahay maty an̈atiny ain̈intsika ao. Iro mieritreritry fa olo araiky koa fa maty, vatan̈a fo maty fa fan̈ahy mandeha ankoatra. Mahateky tany maro finoan̈a io, ke maro olo gaga izikoa fa mahay fa Baiboly tsy mampianatra zen̈y. Izikoa Baiboly zahan̈a, man̈ano karakory ma olo koa fa maty?

Mety azonao onon̈o fa Baiboly tamy voanalohany tan̈y nisoratin̈y tamy volan̈a hebreo ndreky griky. Amy Baiboly gasy, nefesh ndreky psykè io “olo”, “fahin̈ana”, “biby”, ndreky “fan̈ahy.” Mandilatra 800 volan̈a aroe io amy Soratra Masin̈y, ke raha tiany volan̈iny amizio: 1) olo, 2) biby, ndreky 3) fahin̈anolo na fahin̈ana biby. Atsika hizaha toko ndreky andininy mankamarin̈y zen̈y.

Olo. ‘Tamy faha Noa tan̈y, olo [ psykè] vitsy, valo fo nindesiny sambofiara, ke tafita soamantsara baka tamy rano.’ (1 Petera 3:20) Ry Noa fivadiany, zanany telo lahy ndreky vadindro telo lahy io tiany volan̈iny amy psykè io. Karaha ty koa koran̈iny Eksodosy 1:5: ‘Fitopolo olo [nefesh] jiaby nateraka Jakoba.’ Dikanizen̈y, nisy 70 taranaka Jakoba. Olo koa dikany nefesh ndreky psykè io amy toko ndreky andininy hafa, karaha Eksodosy 12:4; Josoa 11:11; Romanina 13:1; ndreky 2 Petera 2:14.

Biby. Karaha ty tantara momba famoron̈ana raha jiaby: “Zan̈ahary nivolan̈a karaha ty: Irarian̈a rano lalin̈y ho feno raha manampahin̈ana [nefesh], baka io irarian̈a ho hisy biby mitilin̈y aminy habakabaka lan̈itry ambony tany. Ke Zan̈ahary baka tio koa nivolan̈a karaha ty: Irarian̈a ho feno raha manampahin̈ana ambony tany eto, samy amy karazany, biby fitarimin̈y, ndreky biby mandady ndreky biby an̈aty ala, samy amy karazany; raha jiaby zen̈y nanjary nisy.” (Genesisy 1:20, 24) Aminy andininy aby io, nefesh volan̈a hebreo ivolan̈ana loko, biby fitarimin̈y ndreky biby an̈aty ala jiaby. Karaha zen̈y koa voron̈o ndreky biby hafa, nefesh ivolan̈ana izy amy Genesisy 9:10 ndreky Levitikosy 11:10, 46.

Fahin̈ana. Ndraikindraiky, fahin̈ana handikan̈a nefesh ndreky psykè io. Jehovah nivolan̈a karaha ty tamy Mosesy: ‘Naty olo jiaby nitady han̈adoso fahin̈ananao [nefesh] in̈y.’ (Eksodosy 4:19) Volan̈iny Baiboly fa Rahely koa fa teraka Benjamina, izy ‘nafaka fahin̈ana’ [nefesh] (naty  izy).’ (Genesisy 35:16-19) Karaha ty koa nivolan̈iny Jesosy: “Zaho piambin̈y ten̈a tsara. Piambin̈y ten̈a tsara zen̈y mahafoe ain̈inany [ psykè] han̈avotan̈a ondrikondriky.” (Jaona 10:11) Jesosy nan̈amia olo fahin̈ananany na psykè. Hitantsika baka amy toko ndreky andininy aby io fa fahin̈ana dikany nefesh ndreky psykè. Karaha zen̈y koa hitantsika amy Mpitsara 5:18; Matio 10:39; Jaona 15:13; ndreky 1 Jaona 3:16.

Izikoa fa maro raha hainao momba Baiboly, ho hitanao fa Baiboly koa fa mikoran̈a nefesh ndreky psykè io, tsisy fivolan̈ana “tsy mety maty” na “mandrakizay” miaraka aminany. Ambarany Soratra Masin̈y fa fan̈ahy [nefesh] io mety maty. (Ezekiela 18:4, 20) Zen̈y mahavy Baiboly mivolan̈a fa olo maty, nefesh maty. Izikoa olo araiky maty, efa tsisy raha velon̈o eky aminany.—Mpitoriteny 9:5, 10.

Amy Baiboly sasany, dikany volan̈a hebreo roah ndreky volan̈a griky pneoma io “fan̈ahy”, “fahin̈ana.” Izikoa zahan̈a volan̈a nanoratan̈a Baiboly tamy voanalohany tan̈y, izio angovo mamelon̈o raha jiaby manampahin̈ana ambony tany eto. Ohatra, karaha ty voasoratra amy Salamo 104:29: ‘Izikoa adosonao angovo mamelon̈o [roah] izy, afaka fahin̈ana izy, ke mimpody fotaka.’ Amy Lioka 8:55 koa mivolan̈a fa “nimpody aminany fahin̈ananany [ pneoma], ke niaraka tamy zen̈y izy nahavita niangana.” Izikoa toko ndreky andininy io zahan̈a, baka amy roah ndreky pneoma io mahavy vatan̈antsika velon̈o. Izikoa tsisy izio, maty vatan̈a. Zen̈y mahavy Baiboly Fandikan-tenin’ny Tontolo Vaovao mandika roah io ‘fahin̈ana’ fa tsy ‘fan̈ahy.’ Karaha ty nivolan̈iny Zan̈ahary momba Safodrano tamy faha Noa: ‘Zaho han̈ano safodrano ambony tany, baka raha jiaby manampahin̈ana [roah] ho ripaka tsisy tavela ambany lan̈itry.’ (Genesisy 6:17; 7:15, 22) Dikanizen̈y, roah ndreky pneoma io angovo tsy hitany maso mamelon̈o raha jiaby manampahin̈ana.

 Vatan̈a io tsy velon̈o izikoa tsisy angovo mamelon̈o io, mira radio araiky tsy velon̈o izikoa maty jiro na lany pily. Aleva onon̈o baka radio hely araiky. Izikoa asianao pily izy, alefanao, man̈ano karakory ataony? Man̈ena radio io. Izikoa lany pily, maty radio io. Karaha zen̈y koa, prizy koa fa adoso, maty radio. Vatan̈antsika io mira zen̈y fo. Mila angovo mamelon̈o izy baka mahavita mihetsiketsiky. Angovo mamelon̈o io fo tsisy raha vitany, mira pily in̈y. Marin̈y tsarabe raha nivolan̈iny panoratra salamo fa vatan̈a io koa fa tsisy angovo mamelon̈o io, “maty” ndreky “mimpody amy fotaka nangalan̈a izy.”

Karaha ty koran̈iny amy Mpitoriteny 12:7 momba olo maty: ‘Fotaka io [niasan̈a vatan̈anany] himpody fotaka karaha taloha, fa fan̈ahy [roah] in̈y himpody amy Zan̈ahary nan̈amia izy.’ Izikoa fa miala amy vatan̈a angovo mamelon̈o izy io, vatan̈a io maty, ke mimpody amy fotaka niasan̈a izy in̈y. Angovo mamelon̈o in̈y mimpody amy Zan̈ahary nan̈amia izy. (Joba 34:14, 15; Salamo 36:9) Zen̈y tsy mivolan̈a fa angovo mamelon̈o io manonga amy Zan̈ahary an̈y. Raha tiany volan̈iny amy zen̈y, olo araiky koa maty, Jehovah zaraiky fo mahavita mamelon̈o izy. Jehovah baka tompiny fahin̈ana io, ke izy zaraiky fo mahavita man̈amia angovo mamelon̈o olo araiky naty in̈y, baka izy ho velon̈o ndraiky.

Ten̈a mankahery mahay fa Jehovah hamelon̈o olo jiaby naty ampasan̈a an̈y! (Jaona 5:28, 29) Izikoa fa avy fotoan̈a zen̈y, iro hamiany vatan̈a vaovao. Hasiany angovo mamelon̈o ndraiky vatan̈andro, baka iro ho velon̈o. Misora hamparavoravo raha zen̈y!

Izikoa tianao hahay dikany “fan̈ahy” io, zahava bokikely Inona no Mitranga Rehefa Maty Isika? (malagasy), ndreky boky Fandresen-dahatra Miorina Amin’ny Soratra Masina, pazy 159-163 ndreky 433-438, naboakany Vavolombelon̈o Jehovah.