1, 2. Ino ivolan̈ana fa Baiboly io kado tsara baka amy Zan̈ahary?

ATSIKA jiaby ravoravo, koa fa mahazo kado baka amy kamarady. Matoa kamaradintsika io nan̈amia raha atsika, mbala tiany atsika. Zen̈y mahavy atsika mankasitraka mare, koa fa mahazo kado.

² Atsika ten̈a mankasitraka Zan̈ahary, fotony izy nan̈amia atsika Baiboly. Maro raha koran̈iny Baiboly ao tsy hitantsika amy boky hafa. Tamy Baiboly fo nahaizantsika fa Zan̈ahary niasa raha jiaby andan̈itry an̈y ndreky ambony tany eto. Ambarany atsika raha tokony hatao, izikoa fa misy raha manahiran̈a. Ambarany ao koa fa Zan̈ahary mbala han̈ano tany ty paradisa. Tsara mare kado namiany Zan̈ahary atsika io!

3. Nan̈ino ma Jehovah nan̈amia atsika Baiboly? Nan̈ino ma atsika ravoravo manan̈a Baiboly?

³ Kado tsara koa Baiboly io, fotony baka ao ahaizantsika Jehovah tsarabe. Matoa izy nan̈amia izio, tiany atsika hahay izy. Ravoravo atsika manan̈a Baiboly io, ­fotony izio ten̈a man̈ampy atsika han̈aton̈o Zan̈ahary.

4. Nan̈ino ma atsika mivolan̈a fa maro olo manan̈a Baiboly?

⁴ Maro olo misy Baiboly, na izy feno zen̈y na izy tsy  feno. Izikoa atao konty, aminolo zato, olo folo fo tsisy Baiboly. Nadika amy volan̈a mandilatra 2 600 koa izio. Isaka ­herin̈iandra, mandilatra antapitrisany Baiboly zarain̈y amy tany maro, baka io mbala maro koa iasaindro pan̈amboatra izio an̈y. Zen̈y mivolan̈a fa Baiboly io tsy mira boky hafa.

5. Ino ivolan̈ana fa volan̈a Zan̈ahary amy Baiboly ao?

⁵ “Baka amy fan̈ahy masin̈y Zan̈ahary” koa Baiboly io. ( Vakia 2 Timoty 3:16.) Ino ma dikanizen̈y? Koran̈iny Baiboly fa baka amy fan̈ahy masin̈y Zan̈ahary nahavitanolo nanoratra izio. (2 Petera 1:21) Izio mira matoelahy araiky nan̈iraka zafiny nanoratra taratasy in̈y. Matoelahy io mivolan̈a raha soratin̈y, zafiny manoratra. Ke taratasiny dadilahiny izio koa fa vita, fa tsy ninany. Karaha zen̈y koa Zan̈ahary. Olo nirahiny nanoratra Baiboly io, fa izy tompiny volan̈a. Dikanizen̈y, “volan̈a Zan̈ahary” amy Baiboly ao fa tsy volan̈anolo.—1 Tesalonianina 2:13.

6, 7. Nan̈ino mahagaga filaminany raha koran̈iny Baiboly io?

⁶ Mandilatra 1 600 taon̈o nanoratan̈a Baiboly io. Tsy mira fotoan̈a niain̈anolo nanoratra izio ndreky asandro. Nisy tamindro io pamboly, pan̈arato, piambin̈y ondrikondriky. Sasany paminan̈y, pitsara ndreky panjaka. Dokotera Lioka nanoratra Filazantsara. Ny raha mahagaga, mifan̈araka fo raha nisoratindro rango amy voanalohany firaka amy farany. *

⁷ Genesisy, boky voanalohany amy Baiboly, mikoran̈a raha nahavy atsika olombelon̈o mijaly. Apokalypsy, boky farany amy Baiboly, mikoran̈a fa mbala hanjary paradisa tany jiaby. Tantarainy Baiboly raha nandalo tan̈atiny 4 000 taon̈o. Izio ahitan̈a raha efa nataony Zan̈ahary ndreky raha mbala hataony, baka fikasan̈anany tanteraka. Hitantsika baka amy zen̈y fa ten̈a milamin̈y fomba nanoratan̈a Baiboly io. Zen̈y koa man̈ambara fa baka amy Zan̈ahary ankitin̈y izio.

8. Ino ivolan̈ana fa marin̈y raha koran̈iny Baiboly amy resaka siansy?

⁸ Marin̈y koa raha koran̈iny Baiboly amy resaka siansy. Tamy faha Israelita aby io, iro namian̈a lalàn̈a mikasiky fahasalaman̈a. Tamy zen̈y, izikoa fa misy amindro io misy aretin̈y mifindra, tsy naharo aminolo jiaby fa natokana lavitry. Amy bokiny Levitikosy amy Baiboly ao ahitantsika zen̈y. Taloha tan̈y koa, nisy olo nivolan̈a fa tany ty fisaka, kanefa Baiboly efa nivolan̈a fa tany ty boribory. (Isaia 40:22) Baiboly koa mivolan̈a fa tany ty mihevaheva. Marin̈y raha zen̈y! (Joba 26:7) Baiboly io ndray tsy bokiny siansy, marin̈y raha koran̈iny mikasiky  siansy. Marin̈y ankitin̈y fa Baiboly io baka amy Zan̈ahary.

9. a) Ino ivolan̈ana fa tantara amy Baiboly ao marin̈y ndreky atokisan̈a? b) Baka aminjovy Baiboly io, izikoa tantara an̈aty ao zahan̈a?

⁹ Tantara jiaby amy Baiboly ao marin̈y aby. Baiboly koa fa mitantara raha, koran̈iny koa raha jiaby momba olo in̈y, ndreky fehitrinany. * Olombelon̈o koa fa mitantara raha momba fiain̈ananany, matetiky raha ­tsara nataony fo tantarainy fa tsy hadisovan̈anany. Olo nanoratra Baiboly io ndraiky koa fa nitantara raha momba iro, tsisy raha nasitrikindro. Karaha ataony Mosesy, izy nitantara hadisovan̈anany, amy Nomery boky nisoratiny amy Baiboly ao. (Nomery 20:12) Zen̈y koa ivolan̈ana fa baka amy Zan̈ahary ankitin̈y Baiboly io.

10. Ino mahavy atsika mivolan̈a fa mahatsara atsika raha koran̈iny Baiboly?

¹⁰ Ilain̈y Soratra Masin̈y jiaby io, fotony baka amy fan̈ahy masin̈y Zan̈ahary. Natao hampianaran̈a izio, han̈anaran̈a, han̈itsian̈a ny tsy mety, ndreky hamalavalan̈a olo han̈ano ny marin̈y.” (2 Timoty 3:16) Dikanizen̈y, mahatsara atsika raha koran̈iny Baiboly, fotony baka amy Jehovah, Zan̈ahary niasa atsika. Izy ten̈a mahay raha an̈atiny eritreritrintsika ndreky raha an̈atiny fontsika an̈y, mandilatra atsika. Izy koa ten̈a mahay raha mampasambatra atsika ndreky raha tsy tokony hataontsika.

11, 12. a) Ino aby ma raha nikoran̈iny Jesosy taminizy nan̈ano Toriteny Tan̈abony Bongo in̈y? b) Ino koa raha hafa koran̈iny Baiboly? Nan̈ino ma raha koran̈iny tsy mety lany daty?

¹¹ Amy Matio toko faha-5 firaka toko faha-7 misy ­Toriteny Tan̈abony Bongo nataony Jesosy. Maro raha  tsara nampianariny an̈atinizio. Nikoran̈iny raha mampasambatra atsika, raha tokony hatao koa fa misy tsy fankazahoan̈a amy naman̈a, raha tokony hivolan̈iny koa fa mivavaka, baka io resaka vola ndreky fanan̈ana. Mbala mahatsara atsika firaka izio man̈araka raha nikoran̈iny tamy zen̈y.

¹² Amy Baiboly ao koa mikoran̈a raha momba tokantran̈o, asa ndreky fiarahamonin̈y. Atsika koa man̈araka  raha koran̈iny Baiboly, atsika hahita hatsaran̈a. Karaha ty raha nirahiny Zan̈ahary nisoratiny paminan̈y Isaia: “Zaho Zan̈aharinao Jehovah, mampianatra anao raha hahatsara anao.”—Isaia 48:17.

13. Ino aby ma raha nirahiny Jehovah nivolan̈iny paminan̈y Isaia mikasiky Babylony?

¹³ Baiboly mikoran̈a raha maro mbala ho avy. Maro amindro io efa niboaka. Taloha tan̈y, Jehovah nan̈iraka paminan̈y Isaia nivolan̈a fa ho ravan̈a tanànany Babylony. (Isaia 13:19; 14:22, 23) Nivolan̈iny akory fomba hamparesy tanàna io. Nambarany fa ho hisy maramila hiditry amy tanàna io, kanefa tsisy ady. Ten̈arano mikodidin̈y tanàna io koa hihen̈y be. Nambarany koa fa Kyrosy an̈aran̈a panjaka handresy tanàna io, kanefa olo io tamy zen̈y tsendriky honohono ho teraka.—Vakia Isaia 44:27–45:2.

14, 15. Akory ahitan̈a fa marin̈y raha jiaby nisoratiny Isaia mikasiky Babylony in̈y?

¹⁴ Roanjato taon̈o tafaranizen̈y, tamy 5 Oktobra 539 T.K. *, alin̈y andra tamy zen̈y, nisy maramila nitoby marikitry Babylony. Azovy sefondro maramila aby io? Kyrosy, panjaka persianin̈y. Ho ravan̈a marin̈y ma tanàna io? Karakory fo hidirandro ao, kanefa tsisy ady?

¹⁵ Nisy fety ta Babylony tamy zen̈y. Olo tao efa tsy navozo nitafihinolo, fotony nisy lakoro vato fatatra nikodidin̈y tanàna io. Fa Kyrosy fetsy. Naviliny lalan̈a rano io, ke nihen̈y be nety nitsahan̈a. Akory amy zay nidirandro tamy tanàna io? Tsy hay antony, fa varavaran̈a tanàna io tamy zen̈y niban̈aban̈a.

16. a) Han̈ano karakory ma hiafarany Babylony nivolan̈iny paminan̈y Isaia? b) Karakory Babylony io izioty?

 ¹⁶ Nambarany paminan̈y Isaia fa tanàna io ho lemby. (Isaia 13:20) Dikanizen̈y, tanàna io tsy vitany ho resy fo, fa tsy ho hisy olo foeky hipetraka an̈y. Amy zioty, tanàna io an̈y amy 80 kilometara atsimony Bagdad an̈y Irak, tsisy olo mipetraka. Lemby ankitin̈y tanàna io.—Isaia 14:22, 23. *

17. Nan̈ino mahatsara atsika mahay fa raha jiaby nivolan̈iny Zan̈a­hary tanteraka aby?

¹⁷ Mankafatatra finoan̈antsika mahay fa raha jiaby nivolan̈iny Zan̈ahary tanteraka aby. Sa karakory? Jehovah koa nan̈antanteraka raha nivolan̈iny taloha tan̈y, dikanizen̈y,  mbala hitantirahiny koa volan̈anany han̈ano tany ty paradisa. ( Vakia Nomery 23:19.) Atokisantsika tsarabe fa ho hisy marin̈y fiain̈ana tsisy farany nivolan̈iny Zan̈ahary rango ela zen̈y, fotony Zan̈ahary tsy mahay mavandy.—Titosy 1:2. *

18. Ino raha nivolan̈iny apostoly Paoly mikasiky “volan̈a Zan̈ahary”?

¹⁸ Hitantsika tamy toko ty fa Baiboly tsy mira boky hafa. Volan̈a an̈aty ao tsy mifanohitry, marin̈y amy  resaka siansy ndreky tantara. Izio koa tsy mety lany daty, baka io raha jiaby nambarany tanteraka aby. Zen̈y nahavy Apostoly Paoly nivolan̈a fa ‘velon̈o ndreky mahery volan̈a Zan̈ahary.’—Hebreo 4:12.

19, 20. a) Karakory ahaizan̈a raha an̈atiny jerintsika ndreky fontsika? b) Anao koa mankasitraka Zan̈ahary nan̈amia Baiboly io, tokony hataonao karakory izio?

¹⁹ Anao koa maharaka mamaky Baiboly, mangala onon̈o tsarabe raha vakinao ao, hahaitsara fo toetrinao. Atsika mety hivolan̈a fa tia Zan̈ahary, kanefa fan̈arahantsika raha ianarantsika amy Baiboly ahaizan̈a raha ten̈a an̈atiny jerintsika ndreky an̈atiny fontsika.

²⁰ Atsika tokony hamaky ndreky hianatra Baiboly, fotony izio baka amy Zan̈ahary ankitin̈y. Anao koa manohy mianatra Baiboly fo, hazava aminao tsarabe raha tiany Zan̈ahary hatao amy tany ty. Zen̈y koa ahitan̈a fa anao mankasitraka Baiboly, kado baka amy Zan̈ahary io. Ho hitantsika amy Toko faha-3 amy boky ty raha handeha hataony Zan̈ahary amy tany ty, baka fikasan̈anany tanteraka.