1, 2. Nan̈ino ma vavaka io ten̈a tokony ho raha maventy amintsika? Nan̈ino ma atsika mila mahay raha koran̈iny Baiboly momba vavaka?

TSISY dikany tany ty izikoa ampitovisin̈y amy raha jiaby niasainy Jehovah. Amy Jehovah, “Pan̈amboatra lan̈itry ndreky tany”, olo ambony tany mira teteny rano. (Salamo 115:15; Isaia 40:15) Kanefa Baiboly mivolan̈a fa “Jehovah tsy lavitry zay olo mikaiky izy, olo mikaiky izy eraka ny marin̈y. Izy han̈amia zay raha irinolo mavozo izy. Iro koa fa mikaiky mila vonjy, izy mamonjy iro.” (Salamo 145:18, 19) Mba diniha hely baka zen̈y! Zan̈ahary Farany Mahery io tsy lavitry atsika, sady von̈ono hitandren̈y atsika, izikoa atsika “mikaiky izy eraka ny marin̈y.” Ten̈a manan̈a tombony atsika afaka mivavaka aminany!

² Misy raha koa tsy maintsy ataontsika, izikoa tiantsika tandrin̈esany vavakantsika. Ho vitantsika han̈ano zen̈y izikoa haintsika raha koran̈iny Baiboly momba zen̈y. Vavaka io amy zay han̈ampy atsika hihavan̈a tsarabe amy Jehovah.

3. Ino antony araiky hivavahantsika amy Jehovah?

³ Atsika tokony hivavaka amy Jehovah, fotony izy man̈iraka atsika han̈ano zen̈y. Karaha ty volan̈iny amy Baiboly ao: “Aza atao misy raha mampatahotro anaro, na ino zen̈y na ino, fa amy raha jiaby, koràn̈a amy Zan̈ahary fo raha tianaro hangatahin̈y, amy vavaka ndreky fangatahan̈a mare ndreky fankasitrahan̈a izy. Fiadanan̈a Zan̈ahary, amiany aminy an̈aran̈a Kristy Jesosy, bebeny eritreritry jiaby, hiambin̈y fonaro ndreky sain̈inaro.” (Filipianina 4:6, 7) Atsika tokony hazoto hikoran̈a amy Jehovah, fotony tsisy hatsaran̈a mandilatra mikoran̈a amy Zan̈ahary, Pitondra raha jiaby io!

4. Nan̈ino ma vavaka io mankatsara fihavan̈antsika amy Jehovah?

⁴ Atsika koa mivavaka amy Jehovah isanandra, atsika hanjary kamaradinany. Karaha ataony olo aroe kamarady, tsy isaka araiky misy raha angatahin̈y fo iro mikoran̈a. Iro mikoran̈a hevitrindro, raha momba iro, ndreky raha jiaby an̈atiny fondro. Karaha zen̈y koa ataontsika koa fa  mivavaka. Anao efa nianatra raha maro momba izy, an̈atinizen̈y toetrinany ndreky raha hataony. Efa hainao koa fa izy ten̈a misy ankitin̈y. Anao koa fa mivavaka, anao mety mikoran̈a aminany raha jiaby an̈atiny fonao ndreky an̈atiny jerinao. Jehovah hanjary Babanao ankitin̈y, baka io anaro ho loso kamarady mare.—Jakoba 4:8.

5. Ino ahaizantsika fa tsy vavaka jiaby zay tandrin̈esany Jehovah?

⁵ Vavaka jiaby ma tandrin̈esany Jehovah? Tamy faha paminan̈y Isaia, Israelita aby io tsy nan̈araka volan̈a Zan̈ahary, ke Jehovah nivolan̈a: “Ndray man̈ano vavaka maro anaro, zaho tsy hitandren̈y, fotony tan̈anaro feno lionolo.” (Isaia 1:15) Mety baka amy raha ataontsika mety hahavy Jehovah tsy hitandren̈y vavakantsika. Ke izikoa tiantsika tandrin̈esany Jehovah vavakantsika, atsika mila man̈araka raha volan̈iny momba vavaka.

6. Ino raha voanalohany takiny Zan̈ahary, baka vavakantsika tandri­n̈esany? Karakory ahitan̈a fa atsika mino Zan̈ahary ankitin̈y?

⁶ Raha voanalohany takiny Zan̈ahary amintsika, atsika mila mino izy. ( Vakia Marka 11:24.) Apostoly Paoly nivolan̈a: “Izikoa tsy raha baka amy finoan̈a, tsisy raha mety atao eky hazahoan̈a sitraka amy Zan̈ahary, fotony zay olo man̈aton̈o izy tsy maintsy mino fa izy misy sady pamaly hatsaran̈a zay olo mitady izy mare.” (Hebreo 11:6) Mila hita amy raha ataontsika fa atsika ten̈a mino izy, fotony finoan̈a zen̈y tsy vitany mino izy misy ndreky mahavita mamaly vavaka fo, fa atsika mila man̈ano raha tiany koa isanandra.—Jakoba 2:26.

7. a) Nan̈ino ma atsika tokony han̈aja Jehovah, koa fa mivavaka? b) Karakory ahitan̈a fa atsika manetry ten̈a ndreky mivavaka baka amy fo?

⁷ Olo koa man̈aton̈o Zan̈ahary, tsy maintsy manetry ten̈a ndreky mivavaka baka amy fo. Maro antony tokony  han̈ajantsika Jehovah. Karaha ataonolo araiky mikoran̈a amy panjaka, izy mila man̈aja mare, fotony iro tsy mira. (Salamo 138:6) Tokony mandilatra zen̈y fan̈ajantsika Jehovah, fotony izy ‘Zan̈ahary Farany Mahery.’ (Genesisy 17:1) Tokony ho hita amy fomba fikoran̈antsika aminany fa atsika manetry ten̈a, baka io ikentsika toeran̈a tanany. Ke atsika tokony han̈ano vavaka baka amy fo, fa tsy han̈ano vavaka tsianjery na volan̈a araiky mimpodipody fo.—Matio 6:7, 8.

8. Karakory han̈anovantsika raha mifan̈araka amy vavakantsika?

⁸ Atsika tsy maintsy mifen̈y man̈ano raha mifan̈araka amy raha angatahintsika, izikoa tiantsika tandrin̈esany Zan̈ahary vavaka ataontsika. Ohatra, olo araiky koa mivolan̈a amy Jehovah: Mba amia zahay niany hanin̈y sahaza zahay niany”, izy tokony hiasa baka mahazo hanin̈y io. (Matio 6:11; 2 Tesalonianina 3:10) Atsika koa fa mangataka amy Jehovah han̈ampy atsika hiala raha ratsy mahazatra atsika, atsika tsy maintsy miala raha jiaby mety han̈antsory atsika han̈ano zen̈y. (Kolosianina 3:5) Atsika izio hizaha valiny fan̈ontanian̈a momba vavaka.

9. Tokony havantan̈a aminjovy vavakantsika, baka io atao aminy an̈aranjovy?

⁹ Tokony havantan̈a aminjovy ma vavaka io? Jesosy koa fa nampianatra pianatranany hivavaka, izy nivolan̈a: “Anao Babanay andan̈itry an̈y.”(Matio 6:9) Dikanizen̈y, vavaka jiaby tsy maintsy havantan̈a amy Jehovah, fa atao aminy an̈aran̈a Jesosy. Zen̈y han̈aboahantsika amy Jehovah fa man̈eky toeran̈a tanany Jesosy atsika. Efa nianarantsika tamy Toko faha-5 fa Jehovah nan̈iraka Jesosy tambony tany teto han̈avotro atsika amy fahotan̈a ndreky fahafatesan̈a. (Jaona 3:16; Romanina 5:12)  Izy nataony Pitsara ndreky Pisoron̈obe. (Jaona 5:22; Hebreo 6:20) Zen̈y mahavy Soratra Masin̈y man̈iraka atsika han̈ano vavakantsika aminy an̈aran̈a Jesosy. Karaha ty volan̈iny: “Zaho lalan̈a, fahamarin̈ana ndreky fiain̈ana. Tsisy olo mahavita man̈aton̈o Baba andan̈itry an̈y, izikoa tsy mandalo aminaka.” (Jaona 14:6) Hitandren̈y vavakantsika Jehovah, izikoa izio havantan̈antsika aminany fo, baka io ataontsika aminy an̈aran̈a Jesosy.

10. Atsika koa fa mivavaka, nan̈ino ma Jehovah tsy nan̈ano lalàn̈a momba fitsanganan̈a ndreky fipitrahan̈a?

¹⁰ Atsika koa fa mivavaka, tokony hitsangana sa kara­kory? Jehovah tsy nan̈ano lalàn̈a momba zen̈y. Baiboly mivolan̈a fa mety fo zay ataontsika, na atsika mipetraka na mitsangana na mandohaliky. (1 Tantara 17:16; Nehemia 8:6; Daniela 6:10; Marka 11:25) Atsika koa fa mikoran̈a amy Jehovah, fontsika ten̈a zahany fa tsy atsika mitsangana na mipetraka. Atsika mety mivavaka na aia na aia tany misy atsika. Atsika koa mety man̈ano vavaka mangin̈y. Jehovah maharen̈y atsika fo na atsika tsy mivolan̈a mare.—Nehemia 2:1-6.

11. Ino aby raha mety koran̈intsika koa fa mivavaka?

¹¹ Ino aby ma raha mety koran̈intsika koa fa mivavaka? Baiboly mivolan̈a karaha ty: “Zay raha angatahintsika aminany, izikoa mifan̈araka amy sitraponany, izy mitandren̈y atsika.” (1 Jaona 5:14) Hitantsika baka amy zen̈y fa atsika mety mikoran̈a raha jiaby mifan̈araka amy sitrapony Zan̈ahary. Koràn̈a aminany koa raha mampiasa loha anao ndreky raha ilainao. Mivavaka amy Jehovah io mira mikoran̈a amy kamarady. Atsika tsy tokony hihafahafa hikoran̈a amy Jehovah raha an̈atiny fontsika. (Salamo 62:8) Atsika mety mangataka fan̈ahy masin̈y aminany, baka tsy ho voantsory han̈ano raha ratsy. (Lioka 11:13) Atsika koa mety mangataka izy han̈ampy atsika hahay hanapakevitry ndreky angovo hindesin̈y miady amy fiain̈ana sarotro. (Jakoba 1:5) Atsika koa tafan̈ano raha tsy mety, atsika  mangataka Jehovah hamafa helokontsika, baka amy soron̈o nataony Jesosy. (Efesianina 1:3, 7) Tsy tokony hadin̈antsika koa mivavaka momba havantsika ndreky olo fiangonan̈a araiky amintsika.—Asan’ny Apostoly 12:5; Kolo­sianina 4:12.

12. Atsika koa fa mivavaka, ino raha tokony hikoran̈intsika voanalohany?

¹² Atsika koa fa mivavaka amy Jehovah, tokony ho raha mikasiky Jehovah koran̈intsika voanalohany. Atsika ten̈a tokony hisaotra ndreky han̈amia voninahitry izy, fotony maro hatsaran̈a amiany atsika. (1 Tantara 29:10-13) Ahitantsika zen̈y vavaka nampianariny Jesosy. ( Vakia Matio 6:9-13.) Volan̈iny ao fa atsika tokony hangataka baka an̈aran̈a Zan̈ahary hankamasin̈iny. Atsika koa tokony hangataka Fanjakan̈any Zan̈ahary ho avy, baka sitrapony Zan̈ahary hatao ambony tany eto karaha andan̈itry an̈y. Atsika koa fa mivavaka, mety mangataka raha ilaintsika. Izikoa raha momba Jehovah koran̈intsika voanalohany, ho hita tsarabe fa atsika tsy tia ten̈a.

13. Izikoa Baiboly zahan̈a, tokony ho karakory halavasany vavaka tandrin̈esany Jehovah?

¹³ Karakory ma halavasany vavaka tandrin̈esany Zan̈a­hary? Baiboly tsy man̈ano fitsipiky momba halavasany vavaka ataontsika, na manokan̈a zen̈y na lera atsika misolo ten̈a olo. Izikoa olo araiky mivavaka alohany hihina, mety ho fohiky fo vavaka ataony. Fa izy koa mikoran̈a raha manahiran̈a izy, mety ho lava. (1 Samoela 1:12, 15) Jesosy tsy nankasitraka vavaka lava nataonolo sasany, fotony iro niavon̈o ndreky nan̈ambony ten̈a. (Lioka 20:46, 47) Tsy manaitry Jehovah foeky vavaka karaha zen̈y. Vavaka baka amy fo tadiaviny. Dikanizen̈y, miankin̈y amy raha misy ndreky raha ilaintsika fo halavasany vavaka ataontsika.

14. Ino ma dikany “mivavaha fo” zen̈y? Nan̈ino zen̈y mankahery atsika?

 ¹⁴ Isaka ino atsika tokony hivavaka? Baiboly mandrisiky atsika karaha ty: “Mivavaha fo”, “mahareta mivavaka” ndreky “aza voly mivavaka.” (Matio 26:41; Romanina 12:12; 1 Tesalonianina 5:17) Zen̈y tsy mivolan̈a fa atsika hivavaka rango maraindrain̈y firaka alin̈y andra, fa Baiboly man̈iraka atsika hivavaka isanandra, ke hisaotra Jehovah aminy hatsaran̈a jiaby amiany atsika, ndreky hangataka izy hitariky atsika amy raha jiaby hataontsika ndreky hangataka angovo baka aminany. Mankahery atsika zen̈y, fotony haintsika fa Jehovah von̈ono hitandren̈y vavakantsika. Ke atsika koa mankasitraka Babantsika andan̈itry io, atsika hahita fotoan̈a fo hikoran̈ana aminany isanandra.

15. Nan̈ino ma atsika tokony han̈ano “Ameny” amy farany vavaka manokan̈a na vavaka ataonolo?

¹⁵ Ino ma dikany an̈anovan̈a “Ameny” koa fa vita vavaka? Dikany “Ameny” zen̈y “marin̈y ankitin̈y zen̈y” na “irarian̈a raha zen̈y ho tanteraka.” Hita amy Soratra Masin̈y fa mety mivolan̈a “Ameny” amy farany vavaka manokan̈a na vavaka ataonolo. (1 Tantara 16:36; Salamo 41:13) Atsika koa fa man̈ano “Ameny” amy farany vavaka manokan̈a na ataonolo hafa, dikanizen̈y atsika man̈eky raha nivolan̈iny tamy vavaka in̈y.—1 Korintianina 14:16.

16. Atsika koa fa mivavaka, ino raha atokisantsika?

¹⁶ Jehovah ma mamaly vavakantsika? Ten̈a zen̈y! Atsika matoky fa Jehovah ten̈a mamaly vavaka baka amy fo ataonolo antapitrisa erantany, fotony izy “Pitandren̈y vavaka.” (Salamo 65:2) Isankarazany raha ataony Jehovah hamalian̈a vavakantsika.

17. Ino ma ahaizan̈a fa Jehovah mampiasa anjelinany ndreky olonany, koa fa mamaly vavaka?

 ¹⁷ Jehovah koa fa mamaly vavakantsika, izy mampiasa anjelinany ndreky olonany. (Hebreo 1:13, 14) Misy olo nivolan̈a fa izy koa fa baka nivavaka tamy Zan̈ahary han̈ampy izy hahay raha ten̈a ampianariny Baiboly, nisy Vavolombelon̈o Jehovah nikonkon̈o tran̈onany. Zen̈y ahitan̈a fa anjely aby io mitariky asa fitorian̈a. (Apokalypsy 14:6) Jehovah mety handrisiky Kristianin̈y araiky han̈ampy atsika, amy fotoan̈a ten̈a ilantsika izy.—Ohabolana 12:25; Jakoba 2:16.

18. Karakory hamaliany Jehovah vavaka ataontsika?

 ¹⁸ Zan̈ahary Jehovah mampiasa fan̈ahy masin̈y ­ndreky Baiboly hamalian̈a vavakantsika. Izikoa fa misy raha mitsapa jery atsika, Zan̈ahary mety han̈amia hevitry atsika ba­ka amy Soratra Masin̈y, ndreky angovo indesintsika miaritry ze­n̈y. (2 Korintianina 4:7) Jehovah mety hampiasa toro lalan̈a amy Baiboly izikoa atsika efa mivavaka baka izy han̈ampy atsika hahay hanapakevitry. Mety han̈ampy atsika koa fan̈anovan̈a fianaran̈a manokan̈a ndreky famakian̈a boky ndreky gazety naboakany fandaminan̈a, karaha ataony boky ty. Atsika koa mety haharen̈y hevitry tsara koa fa mivory, na koa mety hahazo torohevitry baka aminy antipan̈ahy.—Galatianina 6:1.

19. Ino ma raha tsy tokony hadin̈antsika, izikoa vavakantsika karaha tsy mivaly?

¹⁹ Vavakantsika tsy voatery malaky hivaly. Zen̈y tsy mivolan̈a fa Jehovah tsy hamaly vavaka. Tsy tokony hadin̈antsika fa Jehovah koa fa mamaly vavaka, amy fotoan̈a nifidiny ndreky amy raha mifan̈araka amy sitraponany. Izy mahay raha ilaintsika ndreky fotoan̈a han̈amezany izy. Ndraikindraiky atsika ambelany ‘mangataka, mitady ndreky mikonkon̈o’ fo. (Lioka 11:5-10) Izikoa atsika maharidraha, ho hitany fa atsika ten̈a man̈iry  hahazo raha angatahintsika, baka io atsika ten̈a manan̈a finoan̈a ankitin̈y. Mety tsy ho azontsika onon̈o koa fomba hamaliany Jehovah vavakantsika. Izikoa atsika mivavaka momba raha mitsapa jery atsika, Jehovah mety tsy han̈adoso zen̈y, fa atsika hamiany angovo baka mahavita miaritry.—Vakia Filipianina 4:13.

20. Nan̈ino ma atsika tokony hivavaka isanandra?

²⁰ Mankasitraka Jehovah atsika, fotony izy ndray niasa raha jiaby, izy tsy lavitry atsika, izikoa mifan̈araka amy sitraponany vavaka ataontsika! ( Vakia Salamo 145:18.) Ke atsika tokony hivavaka isanandra, fotony voninahitry maventy mivavaka aminany. Atsika koa man̈ano zen̈y, atsika ho tsara fihavan̈ana amy Jehovah ­Pitandren̈y vavaka io.