1. Izikoa atsika man̈ano fanompoan̈a mifan̈araka amy raha takiny Zan̈ahary, ino hatsaran̈a ho azontsika?

JEHOVAH ten̈a tia atsika, ke ambarany atsika lalan̈a mahatsara atsika. Izikoa fanompoan̈a ataontsika mifan̈araka amy raha takiny, atsika ho sambatra ndreky hahavita hiary raha maro mety hanahiran̈a. Izy koa han̈ampy ndreky hitahy atsika. (Isaia 48:17) Fivavahan̈a mandilatra zato karazany man̈ano mampianatra ny marin̈y momba Zan̈ahary, kanefa tsy mitovy raha ampianarindro ndreky raha volan̈indro fa takiny Zan̈ahary amintsika.

2. Karakory ahaizanao fomba tokony hanompoan̈a Jehovah? Ino ohatra han̈azavanao zen̈y?

² Karakory ahaizanao fomba ten̈a tokony hanompoan̈a Jehovah? Raha ten̈a ampianariny Baiboly momba fivavahan̈a marin̈y fo mila hainao. Ty misy ohatra araiky: Maro olo man̈ano vola sandoko. Izikoa anao irahin̈y hangala onon̈o vola sandoko jiaby, akory ataonao? Anao hitady karazan̈a vola sandoko jiaby amy donia ty? Tsy ho vitanao han̈ano zen̈y. Vola ten̈a marin̈y fo mila alenao onon̈o, amy zen̈y anao tsy voafitaka. Karaha zen̈y koa fivavahan̈a io. Ho hainao han̈avaka fivavahan̈a diso, izikoa anao mianatra raha ahaizan̈a fivavahan̈a marin̈y.

3. Izikoa volan̈a Jesosy zahan̈a, ino raha tsy maintsy ataontsika baka Zan̈ahary ravoravo?

 ³ Tokony hifan̈araka amy raha takiny Jehovah fanompoan̈a ataontsika. Maro olo mivolan̈a fa fivavahan̈a jiaby tiany Zan̈ahary. Baiboly tsy mampianatra zen̈y. Tsy voatery ho marin̈y fivavahan̈a araiky, ndray mivolan̈a fa efa Kristianin̈y. Jesosy nivolan̈a karaha ty: “Tsy zay olo mivolan̈a aminaka: ‘A Tompoko anao, a Tompoko anao’, hiditry amy Fanjakan̈any lan̈itry, fa zay olo man̈ano sitrapony Babako andan̈itry an̈y.” Izikoa tiantsika han̈ano raha hamparavoravo Zan̈ahary, tsy maintsy mifen̈y atsika mianatra ndreky man̈ano raha irahiny atao. “Tsy pan̈araka lalàn̈a” nivolan̈any Jesosy olo tsy man̈ano sitrapony Zan̈ahary. (Matio 7:21-23) Fivavahan̈a diso io mira vola sandoko fo. Izio mamitaka ndreky tsy mahatsara atsika.

4. Jesosy koa fa nikoran̈a lalan̈a aroe, ino raha tiany volan̈iny? Man̈aia ma lalan̈a aroe io?

⁴ Tiany Jehovah hahazo fiain̈ana tsisy farany aby olo jiaby. Ndray izy man̈ano zen̈y, atsika tsy maintsy man̈ano fanompoan̈a mifan̈araka aminany ndreky man̈ano raha tiany isanandra, baka ho velon̈o tsisy farany amy Paradisa. Raha mampalahelo, tsy maro olo man̈eky han̈ano zen̈y. Ke Jesosy nivolan̈a karaha ty: “Midira amy varavaran̈a tery. Maventy sady malalaka lalan̈a mandeha amy fandripahan̈a, ke maro olo man̈araka izy. Maletry varavaran̈a mandeha amy fiain̈ana tsisy farany. Tery koa lalan̈a man̈an̈y. Vitsy fo olo mahita izy.” (Matio 7:13, 14) Olo araiky koa man̈araka fivavahan̈a marin̈y hahazo fiain̈ana tsisy farany, fa izy koa ndraiky man̈araka fivavahan̈a diso, hofoaty. Tsisy olo tiany Jehovah hofoaty. Zen̈y mahavy izy mbala man̈ambela olo hianatra raha momba izy. (2 Petera 3:9) Arakaraka fomba anompoantsika Zan̈ahary fo hahavelon̈o na hahafaty atsika.

5. Karakory ahaizan̈a fivavahan̈a marin̈y?

⁵ Karakory ahitan̈a “lalan̈a mandeha amy fiain̈ana” io? Jesosy nivolan̈a fa hita baka amy raha ataonolo araiky fivavahan̈a arehany. Karaha ty nambarany: “Baka amy voany hahaizanaro tsarabe iro. ... Tsara voany kakazo tsara jiaby.” (Matio 7:16, 17) Dikanizen̈y, baka amy raha inoanolo amy fivavahan̈a marin̈y ndreky raha ataondro isanandra ahaizan̈a iro. Ndraikindraiky iro mety ho tafan̈ano raha tsy mety, fa iro fo mifen̈y man̈ano sitrapony Zan̈ahary. Atsika hizaha raha tsiota ahaizan̈a fivavahan̈a marin̈y.

6, 7. Karakory fahitany olony Zan̈ahary Baiboly io? Ino raha nataony Jesosy tokony harehan̈a?

⁶ Baka amy Baiboly raha jiaby ampianarindro. Baiboly mivolan̈a karaha ty: “Ilain̈y Soratra Masin̈y jiaby io, fotony baka amy fan̈ahy masin̈y Zan̈ahary. Natao hampianaran̈a izio, hampianaran̈a, han̈itsian̈a ny tsy mety, ndreky hamalavala olo han̈ano ny marin̈y, ke hahavy olony Zan̈ahary hanjary mahay tsarabe ndreky ho ampy fitaovan̈a aminy asa tsara jiaby.” (2 Timoty 3:16, 17) Karaha ty koa nambarany apostoly Paoly: “Zahay koa fa nan̈ambara volan̈a Zan̈ahary taminaro, tsy nataonaro karaha volan̈anolo, fa nataonaro eraka ny ten̈a marin̈y, volan̈a Zan̈ahary, miasa koa an̈atinaro pino.” (1 Tesalonianina 2:13) Dikanizen̈y, raha inoan̈a ndreky raha ataonolo amy fivavahan̈a marin̈y tsy tokony baka aminy hevitrinolo ndreky fombandrazan̈a, fa tokony ho baka amy Baiboly.

⁷ Jesosy Kristy koa fa nampianatra, Volan̈a Zan̈ahary fo nampianariny. Jesosy koa fa nivavaka tamy Jehovah, karaha ty nivolan̈iny: “Volan̈anao zaraiky fo marin̈y.” (Jaona 17:17) Jesosy nino Volan̈a Zan̈ahary, ke raha jiaby nampianariny ndreky nataony nifan̈araka tsarabe tamizio. Matetiky izy koa fa han̈ampody Volan̈a Zan̈ahary, volan̈iny: “Karaha ty voasoratra ao.” (Matio 4:4, 7, 10) Olony  Zan̈ahary aminandra izioty koa tsy mampianatra hevitrindro. Baka amy Baiboly aby raha jiaby ampianarindro, fotony iro mino fa izio Volan̈a Zan̈ahary ankitin̈y.

8. Karakory ma manompo Jehovah zen̈y?

⁸ Iro mivavaka amy Jehovah zaraiky fo, ndreky mampianatra olo an̈aran̈a io. Jesosy nivolan̈a karaha ty: “Jehovah Zan̈aharinao zaraiky fo tsy maintsy andohalifanao ndreky an̈anovanao fanompoan̈a masin̈y.” (Matio 4:10) Dikanizen̈y, Jehovah zaraiky fo tsy maintsy hivavahan̈a. Olo manompo Jehovah zen̈y koa mampianatra olo an̈aran̈a io ndreky raha jiaby momba izy. Karaha ty volan̈iny Salamo 83:18: “Anao, araiky manan̈a an̈aran̈a Jehovah, anao zaraiky fo Farany An̈abo amy tany jiaby.” Jesosy koa nampianatra olo an̈aran̈a Zan̈ahary io. Ahitantsika zen̈y vavakanany ty: ‘An̈aranao efa nampianariko olo namianao zaho baka amy zao tontolo zao ty.’ (Jaona 17:6) Aminandra izioty koa, olo ten̈a pivavaka jiaby mampianatra olo an̈aran̈a Zan̈ahary, raha mbala hataony ndreky toetrinany.

9, 10. Karakory ahitan̈a fa ten̈a Kristianin̈y zen̈y mifankatia ankitin̈y?

⁹ Iro ten̈a mifankatia ankitin̈y. Jesosy nivolan̈a karaha ty: “Baka amy zen̈y ahaizanolo fa anaro pianatranaka marin̈y, izikoa anaro mifankatia.” (Jaona 13:35) Kristianin̈y taloha tan̈y ten̈a nifankatia. Olo mifankatia zen̈y tsy man̈avaka olo. Fitiavan̈a karaha zen̈y mahavy olo manjary mira pirahalahy tsy fankafoe in̈y. ( Vakia Kolosianina 3:14.) Olo amy fivavahan̈a diso tsy fankatia karaha zen̈y. Nan̈ino ma atsika mivolan̈a zen̈y? Iro mifamono, fotony iro man̈avakavaka. Tsy karaha zen̈y ataonolo ten̈a Kristianin̈y. Iro tsy mety ­mangala raha fiadivan̈a hamonoan̈a olo fivavahan̈a araiky amindro, na hamonoan̈a olo hafa. Baiboly mivolan̈a: “Karaha ty ahitan̈a tsarabe zay olo zanaka Zan̈ahary ndreky olo zanaka Devoly: Olo jiaby tsy man̈ano ny marin̈y, tsy baka amy Zan̈ahary. Karaha zen̈y koa olo tsy tia rahalahiny. ...  Atsika tokony hifankatia, fa tsy karaha Kaina, baka aminy araiky ratsy in̈y, ke namono rahalahiny tsisy hinakinaka.”—1 Jaona 3:10-12; 4:20, 21.

¹⁰ Atsika koa ten̈a tia olo, misy raha hafa koa tokony hatao. Atsika mila mandany fotoan̈a, angovo ndreky fanan̈ana han̈ampian̈a naman̈a ndreky hankahery iro. (Hebreo 10:24, 25) Ten̈a Kristianin̈y zen̈y man̈ano ny marin̈y ndreky mifan̈ampy izikoa fa misy raha manahiran̈a. Iro man̈araka raha volan̈iny Baiboly, ke iro ‘man̈ano ny tsara aminolo jiaby.’—Galatianina 6:10.

11. Nan̈ino ma atsika mila mino fa baka amy Jesosy hamonjiany Zan̈ahary atsika?

¹¹ Ten̈a Kristianin̈y koa mino fa baka amy Jesosy hamonjiany Zan̈ahary olo jiaby. Baiboly mivolan̈a karaha ty: “Tsisy olo hafa hazahoan̈a famonjian̈a, fotony tsisy an̈aran̈a hafa ambaniny lan̈itry namian̈a olo hazahoan̈a famonjian̈a.” (Asan’ny Apostoly 4:12) Hitantsika tamy Toko faha-5 fa Jesosy nan̈ano soron̈o ain̈inany han̈avotan̈a olo man̈araka volan̈a Zan̈ahary. (Matio 20:28) Izy koa nifidiny Jehovah natao Panjakany Fanjakan̈a andan̈itry an̈y ndreky hitondra tany jiaby. Zen̈y mahavy Zan̈ahary man̈iraka atsika han̈eky Jesosy ndreky han̈araka raha nampianariny, izikoa tiantsika hiain̈y tsisy farany. Karaha ty fivolan̈any Baiboly izy: “Zay olo mino Zanaka io manan̈a fiain̈ana tsisy farany. Zay olo tsy man̈eky Zanaka io ndraiky tsy hahita fiain̈ana.”—Jaona 3:36.

12. Karakory ma tsy an̈isany donia ty zen̈y?

¹² Iro tsy an̈isany donia ty. Jesosy koa fa nitsarainy Pilato, karaha ty nivolan̈iny: “Fanjakan̈anaka tsy an̈isany donia ty.” (Jaona 18:36) Iro io efa olony Fanjakany Zan̈ahary, ke iro tsy man̈ano politiky ndreky tsy mety miady, na aia na aia tany misy iro. Iro tsy mandrova olo han̈ano politiky, fa iro tsy mitandatsaka hifidin̈y, baka io tsy mifidy. Iro ndray tsy man̈ano politiky, iro man̈aja lalàn̈any fanjakan̈a. Ino  mahavy iro man̈ano zen̈y? Fotony Baiboly man̈iraka iro ‘han̈eky manampahifan̈a.’ (Romanina 13:1) Izikoa fanjakan̈a man̈iraka iro tsy han̈araka lalàn̈any Zan̈ahary, iro man̈ano karaha nataondro apostoly taloha tan̈y. Iro nivolan̈a karaha ty: “Zan̈ahary fo tsy maintsy arehanay volan̈a fa tsy olo, fotony izy pitondra zahay.”—Asan’ny Apostoly 5:29; Marka 12:17.

13. Aminy olony Zan̈ahary, karakory ma fahaizandro Fanjakan̈any Zan̈ahary io? Ino ma raha hataonizio?

 ¹³ Ambarandro olo jiaby fa Fanjakan̈any Zan̈ahary zaraiky fo han̈adoso raha jiaby manahiran̈a atsika. Jesosy efa nivolan̈a fa “hambara amy tany jiaby misy olo antsendriky vaovao tsara mikasiky Fanjakan̈a ty, baka firenena jiaby ambony tany maharen̈y, zay vo avy farany.” (Matio 24:14) Pianatra Jesosy tsy mandrisiky olo hitavandra fanjakan̈anolombelon̈o, fotony Fanjakan̈any Zan̈ahary zaraiky fo antinaindro hamaha raha jiaby manahiran̈a olombelon̈o. (Salamo 146:3) Jesosy koa fa nampianatra olo hivavaka, izy nan̈iraka iro hangataka faviany Fanjakan̈a io. Karaha ty nivolan̈iny: “Irarian̈a ho avy Fanjakan̈anao. Irarian̈a hatao ambony tany eto koa sitraponao, karaha andan̈itry an̈y.” (Matio 6:10) Baiboly efa nivolan̈a fa Fanjakan̈a andan̈itry an̈y io “hanorotoro ndreky han̈afoan̈a fanjakan̈a jiaby io, ke izio zaraiky fo ho tavela mandrakizay.”—Daniela 2:44; Apoka­lypsy 16:14; 19:19-21.

14. Aminao manokan̈a, fivavahan̈anjovy ahitan̈a raha jiaby ahaizan̈a fivavahan̈a marin̈y?

¹⁴ Izikoa raha jiaby ahaizan̈a fivavahan̈a marin̈y in̈y zahan̈a: Fivavahan̈anjovy man̈araka raha volan̈iny Baiboly ndreky mampianatra olo an̈aran̈a Jehovah? Fivavahan̈anjovy ten̈a mifankatia, mino Jesosy, tsy an̈isany donia ty ndreky man̈ambara aminolo fa Fanjakan̈any Zan̈ahary zaraiky fo antinain̈y hamaha raha manahiran̈a atsika? Fivavahan̈anjovy man̈ano raha jiaby zen̈y? Hita tsarabe fa Vavolombelon̈o Jehovah man̈ano zen̈y.—Vakia Isaia 43:10-12.

15. Atsika koa efa mino Zan̈ahary, ino koa raha mila ataontsika?

¹⁵ Misy olo mivolan̈a: ‘Zaho efa mino Zan̈ahary.’ Tsara zen̈y, kanefa mbala misy raha hafa koa tokony hatao, izikoa tiantsika hamparavoravo Zan̈ahary. Baiboly mivolan̈a  fa demony koa mba mino Zan̈ahary. (Jakoba 2:19) Fa iro fo tsy man̈ano sitrapony Zan̈ahary. Zen̈y mahavy Zan̈ahary tsy mankasitraka iro. Izikoa tiantsika hahazo sitraka amy Zan̈ahary, atsika tsy maintsy mino fa izy misy, baka io man̈ano sitraponany. Atsika koa tsy maintsy miala amy fivavahan̈a diso, ndreky man̈araka fivavahan̈a marin̈y.

16. Izikoa atsika nan̈ano raha fataony fivavahan̈a diso taloha, ino raha tokony hataontsika?

¹⁶ Apostoly Paoly nivolan̈a fa atsika mila misaraka amy fivavahan̈a diso. Volan̈iny karaha ty: “ ‘Ke miboaha anaro, misaraha aminany’, ho Jehovah, ‘aza mikasiky raha maloto eky, amy zen̈y zaho handray anaro.’ ” (2 Korintianina 6:17; Isaia 52:11) Dikanizen̈y, olony Zan̈ahary tsy tokony han̈ano raha fataony fivavahan̈a diso foeky.

17, 18. Ino ma Babylony Be zen̈y? Nan̈ino anao mila ‘miboaka ao malaky’?

¹⁷ Baiboly mivolan̈a fa “Babylony Be” ivolan̈ana fivavahan̈a diso jiaby erantany. * (Apokalypsy 17:5) Izio mampatsiaro atsika tanànany Babylony taloha tan̈y. Tafarany Safodrano tamy faha Noa tan̈y nisiany fivavahan̈a diso io voanalohany. Baka tan̈y niboahany raha maro ampianariny fivavahan̈a ndreky fombandro. Ohatra izio, maro fivavahan̈a mino Zan̈ahary tokana olo telo zen̈y. Baiboly mivolan̈a mazava fa Zan̈ahary marin̈y araiky fo, Jehovah an̈arany. Jesosy Kristy io Zanany. (Jaona 17:3) Iro olo ta Babylony tan̈y koa nino fan̈ahy tsy maty zen̈y, ke olo koa fa maty zen̈y, ampijaliny Zan̈ahary tsisy farany. Aminandra izioty koa maro fivavahan̈a mampianatra fa olo koa fa maty, fan̈ahinany tsy maty fa mety hijaly amy motrobe.

¹⁸ Fivavahan̈a ta Babylony io nahateky tany jiaby, ke zen̈y antony ivolan̈ana fivavahan̈a diso jiaby Babylony Be zen̈y. Zan̈ahary nivolan̈a fa ho tampoko hiravan̈anizio.  (Apokalypsy 18:8) Mazava aminao amy zay nan̈ino anao tsy maintsy miala amy Babylony Be io? Tiany Jehovah hiboaka ao malaky anao, diany mbala izio.—Vakia Apokalypsy 18:4, 8.

19. Anao koa manompo Jehovah, ino aby raha ho azonao?

¹⁹ Anao koa miala amy fivavahan̈a diso, olo sasany mety tsy ho tia anao eky. Fa anao koa manompo Jehovah miaraka aminy olonany, ho maro hatsaran̈a ho azonao. Anao ho mira pianatra Jesosy taloha tan̈y, nahatindry raha maro han̈arahan̈a izy, ke hahazo rahalahy ndreky anabavy kristianin̈y maro. Anao hahazo havan̈a maro ten̈a tia anao amy tany jiaby. Anao koa han̈anten̈a “fiain̈ana tsisy farany amy donia ho avy” ry. ( Vakia Marka 10:28-30.) Ndray olo aby tsy tia anao niala finoan̈anao, mety mbala hianatra Baiboly andra araiky an̈y, ke hanompo Jehovah koa.

20. Ino aby raha ho azonolo man̈araka fivavahan̈a marin̈y?

²⁰ Baiboly mampianatra fa tsy ho ela fitondrasan̈a Zan̈ahary han̈adoso donia ratsy ty, han̈ova tany jiaby ho paradisa, ke ny marin̈y fo hanjaka amy zen̈y. (2 Petera 3:9, 13) Ho tsara ankitin̈y fiain̈ana amy zen̈y! Araiky fo fivavahan̈a ho tavela amy zen̈y. Ten̈a tsy ho matiantoko anao izikoa rango izioty man̈ano raha hiarahan̈a aminolo ten̈a manompo Jehovah.