1, 2. Ino aby raha mampijaly olo? Ino fan̈ontanian̈a apetrakanolo maro baka amy zen̈y?

NISY ady tamy tany araiky namono olo maro, an̈atinizen̈y man̈angy ndreky tsaiky andrivony niaraka nalevin̈y tamy lavaka araiky. Lakroa jiaby natsatoko man̈odidin̈y fasan̈a io samy nisy soratra karaha ty: “Raha nan̈ino?” Olo mijaly ten̈a matetiky man̈ontany karaha zen̈y. Ohatra lera misy ady, antambo, aretin̈y, na havandro nivonenolo, na ravan̈a tran̈o, na raha hafa mampalahelo mare. Tiandro ho hay dikany mahavy iro mijaly karaha zen̈y.

² Nan̈ino ma tsy adosony Jehovah jaly io? Izikoa Jehovah farany mahery, tia atsika, misain̈y ndreky tia rariny, nan̈ino ma tanintsika ty mbala feno olo tsy fankatia ndreky tsy tia man̈ano ny rariny? Asa anao mba efa nieritreritry karaha zen̈y?

3, 4. a) Ino ivolan̈ana fa tsy diso atsika izikoa man̈ontany antony mahavy Zan̈ahary mbala tsy man̈adoso jaly io? b) Karakory fahitany Jehovah raha ratsy ndreky raha mampijaly atsika?

³ Diso ma atsika izikoa man̈ontany antony mahavy Zan̈ahary tsy man̈adoso jaly io? Misy olo mieritreritry fa olo tsy ampy finoan̈a ndreky tsy man̈aja Zan̈ahary fo man̈ontany zen̈y. Atsika koa mamaky Baiboly, ho hitantsika  ao fa nisy olo nanan̈a finoan̈a sady navozo Zan̈ahary koa mba nan̈ontany karaha zen̈y. Ohatra, paminan̈y Habakoka nan̈ontany Jehovah karaha ty: “Nan̈ino ma zaho ampahitanao raha ratsy, karaha zahanao fo raha ratsy mandalo io? Nan̈ino ma olo mamono olo ndreky olo mandrava fo man̈odidin̈y zaho, baka io nan̈ino koa misy olo mankany ndreky mimalo?”—Habakoka 1:3.

⁴ Neloko ma Jehovah, koa fa nan̈ontaniany Habakoka zen̈y? Ehe. Nirahiny Jehovah nisoratin̈y amy Baiboly volan̈a Habakoka jiaby io. Jehovah baka tio nan̈azava tsarabe taminy Habakoka raha handeha hataony, baka finoan̈anany hanjary fatatra tsarabe. Karaha zen̈y raha tiany Jehovah hatao aminao. Aleva onon̈o volan̈a Baiboly ty: ‘Izy mikarakara anao.’ (1 Petera 5:7) Bebeny tsy fitiavanolo raha ratsy ndreky jaly tsy fitiavany Zan̈ahary izio. (Isaia 55:8, 9) Ke ino ma mahavy jaly mahaimare fo?

5. Ino ndraikindraiky raha volan̈indro pitariky fivavahan̈a mahavy jaly io, kanefa ino raha ten̈a ampianariny Baiboly?

⁵ Maro olo man̈ontany pitariky fivavahan̈a dikany mahavy olo mijaly. Matetiky pitariky fivavahan̈a aby io  mivolan̈a fa Zan̈ahary mandahatra raha jiaby, an̈atinizen̈y raha ratsy. Iro koa mivolan̈a fa raha mifototro Zan̈ahary zen̈y tsy takatra jery. Izy fo mahavy olo maty na tsaiky io na olobe, fotony iro in̈y zen̈y alainy aminany andan̈itry an̈y. Kanefa nianarantsika taloha tan̈y in̈y fa Zan̈ahary Jehovah io tsy mampijaly olo. Baiboly mivolan̈a karaha ty: ‘San̈atria Zan̈ahary han̈ano ny ratsy. San̈atria izy Farany Mahery han̈ano raha tsy marin̈y!’—Joba 34:10.

6. Ino mahavy olo mieritreritry fa baka amy Zan̈ahary fo mahavy jaly io?

⁶ Ino ma mahavy olo man̈amia tsin̈y Zan̈ahary izikoa fa mijaly? Fotony ankamarozanolo mieritreritry fa Jehovah, Zan̈ahary Farany Mahery io, mamehy donia ratsy ty. Tsy haindro fa Satana Devoly ten̈a mamehy izy ty. Tsotra kanefa ten̈a maventy raha nianaranao tamy Toko faha-3 tamy boky ty.

7, 8. a) Akory ahitan̈a fa olo amy donia ty mangala tahaka jeriny Satana? b) Ino ivolan̈ana fa baka amy fahotan̈a ndreky “fotoan̈a tsy ampoizin̈y” koa mahavy olo mijaly?

⁷ Baiboly mivolan̈a karaha ty: ‘Donia misy atsika ty ambany fahifan̈any araiky ratsy in̈y.’ (1 Jaona 5:19) Akory hevitrinao, tsy zen̈y raha hitanao man̈odidin̈y anao? Donia ty mangala tahaka jeriny Satana, “mamitaka tany jiaby misy olo.” (Apokalypsy 12:9) Satana io ratsy fan̈ahy, mamitaka ndreky kafiry. Izy mamehy donia ratsy ty, ke olonany aby io koa ratsy fan̈ahy, mamitaka ndreky kafiry, mira izy fo. Zen̈y antony araiky mahavy jaly mahaimare fo.

⁸ Hitantsika tamy Toko faha-3 tamy boky ty antony faharoe. Mijaly atsika, fotony Adama ndreky Eva koa fa tsy nan̈araka volan̈a Zan̈ahary, olo jiaby nanjary panota ndreky tsy lavorary. Matetiky olo miady hitondra, ke zen̈y mahavy ady ndreky fampijalian̈a olo ndreky jaly io. (Mpitoriteny 4:1; 8:9) Raha fahatelo mahavy olo mijaly koa, “fotoan̈a tsy ampoizin̈y.” ( Vakia Mpitoriteny 9:11.)  Tsendriky Jehovah mitondra, ke zen̈y mahavy izy tsy miaro donia ty. Olo araiky koa sendra amy tany handalovany antambo na takatra raha tsy ampoizin̈y, izy mety hijaly.

9. Nan̈ino atsika matoky fa misy antony mahavy Zan̈ahary mbala tsendriky man̈adoso jaly io?

⁹ Mankahery atsika mahay fa tsy baka amy Zan̈ahary mahavy olo mijaly. Tsy baka aminany koa mampisy ady, pangalatra ndreky pamono olo, fampijalian̈a olo ndreky raha ratsy, karaha ataony sikilony ndreky horohorontany. Ndray zen̈y, mila haintsika antony mahavy Zan̈ahary mbala tsendriky man̈adoso raha aby io. Izy mahavita man̈adoso jaly io, fotony izy Zan̈ahary Farany Mahery. Ke nan̈ino fo izy mbala tsendriky man̈ano raha? Tsy maintsy misy antony matoa izy mbala man̈ambela jaly io, fotony Zan̈ahary io fitiavan̈a.—1 Jaona 4:8.

10. a) Ino raha nivolan̈iny Satana momba Jehovah? b) Karakory nan̈anovany zen̈y?

¹⁰ Izikoa tiantsika ho hay antony mahavy Zan̈ahary mbala tsendriky man̈adoso jaly io, mila haintsika antsendriky raha nahavy jaly io. Satana koa fa nitaon̈o ry Adama tsy han̈araka volan̈a Zan̈ahary, nisy adihevitry maventy niboaka. Satana tsy nivolan̈a angovony Jehovah, fotony hainy tsarabe fa izy tsy mahadin̈y angovony Jehovah. Nataony raha mahavy olo hisalasala amy zony Jehovah hitondra. Nivolan̈a izy fa Zan̈ahary io mavandy, baka io misy raha mahatsara olonany kanefa tsy amiany iro. Amy Satana, Zan̈ahary io tsy mahay mitondra. ( Vakia Genesisy 3:2-5.) Tihivolan̈a Satana fa Zan̈ahary tsy ilain̈y foeky amy fiain̈ana. Satana ten̈a nanohitry zonany hitondra.

11. Nan̈ino ma tsy niaraka Satana ndreky ry Adama nivadiky efa nivoneny Jehovah edy?

¹¹ Adama ndreky Eva tsy nan̈araka volan̈a Jehovah. Mety  ho karaha ty raha tiandro volan̈iny: ‘Zahay tsy mila Jehovah mitondra zahay. Zahay zaraiky fo mahavita manapakevitry amy raha tsara ndreky ratsy.’ Karakory nataony Jehovah nandamin̈y zen̈y? Ino raha hataony Jehovah baka anjely ndreky olo jiaby hahita fa diso volan̈a Satana in̈y? Akory ahitan̈a fa Jehovah ten̈a mahay mitondra ankitin̈y? Misy olo mivolan̈a fa tokony niaraka Satana ndreky ry Adama nivadiky efa nivoneny edy, baka io izy niasa olo hafa. Tsy zen̈y raha nataony, fotony tiany Jehovah taranaka Adama ndreky Eva fo hameno tany ty ndreky hipetraka tamy Paradisa tao. (Genesisy 1:28) Jehovah man̈atanteraka fikasan̈anany fo. (Isaia 55:10, 11) Izikoa niaraka iro nivadiky efa nivoneny edy, tsy ho hita ny marin̈y momba zony Jehovah hitondra io.

12, 13. Izikoa ohatra io zahan̈a, ino nahavy Zan̈ahary nan̈ambela Satana hamehy donia ty ndreky olombelon̈o hifampitondra?

¹² Atsika hangala ohatra. Papianatra araiky mampianatra pianatranany han̈ano kajy sarotro. Nisy pianatra mahay araiky nitsangana nivolan̈a fa diso raha nataony papianatra io. Tsy vitanizen̈y fo, fa izy nan̈ano mahay mandilatra  papianatra io. Pianatra sasany mieritreritry fa pianatra io ten̈a mahay, ke iro nan̈araka izy. Ino raha tokony hataony papianatra io? Mety han̈ano karakory pianatra sasany tsy naditry, izikoa niaraka iro pianatra aby io tsy nan̈araka volan̈anany efa niroasiny edy? Mety hieritreritry iro fa diso ankitin̈y papianatra io, sa karakory? Iro mety tsy han̈aja papianatra io, fotony iro mety hieritreritry fa papianatra io tsy matoky fahaizan̈anany. Karakory fo izikoa pianatra io irahiny man̈ano kajy io firaka amy farany?

¹³ Karaha ataony papianatra io koa raha ataony Jehovah. Tsy Satana ndreky ry Adama fo tafiditry tamy koran̈a io, fa anjely maro nahita raha nandalo io koa. (Joba 38:7; Daniela 7:10) Baka amy fahaizany Jehovah mandamin̈y adihevitry io hahavy olo ndreky anjely aby io mbala hanompo izy na tsy hanompo izy eky. Ino amy zay raha nataony? Nambelany Satana hitondra. Nambelany koa olo hifampitondra, fa ambany fahifan̈any Satana.

14. Ino mahatsara Jehovah nan̈ambela olo hifampitondra?

¹⁴ Papianatra io efa mahay fa tsy mety raha nataondro pianatra naditry aby io. Fa iro nambelany han̈aboaka hevitrindro, baka ho hitanolo jiaby fa izy manan̈a ny marin̈y. Moramora amindro pianatra tsy maditry aby io amy zay han̈eky fa papianatrandro io fo ten̈a mahay. Ke izikoa afara an̈y izy hanapakevitry handroaka pianatra maditry aby io, hazava amindro antony. Karaha zen̈y koa nataony Jehovah. Hainy fa mahatsara olombelon̈o ndreky anjely tsy mivadiky mahita fa tsy mahomby Satana ndreky fitondrasan̈anolombelon̈o natsangany. Amy zen̈y iro han̈eky marin̈y mira paminan̈y Jeremia, nivolan̈a karaha ty: “Haiko tsarabe izioty Jehovah fa olombelon̈o tsy mahay lalan̈a imboany. Olo koa tsy natao hitondra fiain̈ananany manokan̈a.”—Jeremia 10:23.

15, 16. a) Nan̈ino ma jaly io mbala ambelany Zan̈ahary mitohy fo? b) Nan̈ino Jehovah tsy nisakana raha ratsy mandalo?

¹⁵ Nan̈ino ma jaly io ambelany Jehovah mitohy ela be karaha io? Nan̈ino tsy sakanany raha ratsy mandalo io? Aleva onon̈o baka raha aroe tsy nataony papianatra in̈y. Voanalohany, izy tsy nisakana pianatra in̈y tsy han̈azava hevitrinany. Faharoe, izy tsy nan̈ampy pianatra in̈y han̈ano kajy sarotro io. Misy raha aroe koa tsy ataony Jehovah. Voanalohany, izy tsy misakana Satana ndreky iro pan̈araka izy, fa ambelany iro hankamarin̈y hevitrindro. Tsy maintsy fotoan̈a elaela vo mahavita zen̈y. Tan̈atiny andrivony taon̈o loso zay, olombelon̈o nanangana karazan̈a fitondrasan̈a maro. Maro koa raha efa vitanolombelon̈o, amy resaka siansy, kanefa mahaimaro fo olo masikiny, olo tsy man̈ano ny marin̈y, pangalatra ndreky pamono olo ndreky miady. Hita izioty fa fitondrasan̈anolombelon̈o tsy mahomby.

¹⁶ Faharoe, Jehovah tsy nan̈ampy Satana hitondra donia ty. Fotony izikoa isaka raha ratsy mandalo zay sakanany fo, dikanizen̈y miaraka miasa fo iro. Ndray olombelon̈o fo mety hieritreritry fa iro mahavita ten̈a. Izikoa karaha zen̈y nataony Jehovah, izy manjary pavandy mira Satana, kanefa Jehovah ‘tsy mahay mavandy.’—Hebreo 6:18.

17, 18. Hataony Jehovah karakory ma raha ratsy jiaby baka amy fitondrasan̈anolombelon̈o ndreky baka amy Satana?

¹⁷ Mbala ho vitany Zan̈ahary fo ma han̈adoso raha ratsy jiaby nisy, rango taloha tan̈y firaka izioty? Aleva onon̈o fa Jehovah farany mahery. Dikanizen̈y, vitany han̈adoso raha mampijaly atsika. Efa zen̈y edy raha tiany hatao. Hitantsika tamy raha nianarantsika taloha tan̈y in̈y, fa tanintsika efa robaka ty mbala hivoany Paradisa. Amy zen̈y, zay olo mino vidipan̈avotan̈a nataony Jesosy in̈y tsy hofoaty eky, baka io olo naty aby in̈y hivilomin̈y. Zan̈ahary amy zay  han̈iraka Jesosy “handravan̈a asany Devoly.” (1 Jaona 3:8) Raha jiaby zen̈y hataony Jehovah amy fotoan̈a mety. Ravoravo atsika fotony Zan̈ahary tsy nekineky nanapakevitry. Baka amy zen̈y nahavy atsika mahay ny marin̈y ndreky manompo izy amy zioty. ( Vakia 2 Petera 3:9, 10.) Aminandra izioty, Zan̈ahary mitady olo ten̈a man̈iry hanompo izy, ndreky man̈ampy iro hiaritry raha jiaby mety hampijaly iro amy donia ty.—Jaona 4:23; 1 Korintianina 10:13.

¹⁸ Misy olo mieritreritry karaha ty: ‘Nan̈ino ma tsy nataony Zan̈ahary man̈araka bekonany fo ry Adama, baka iro tsy nahavita nivadiky eky? Hotrizay atsika tsy nijaly foeky?’ Atsika mila mangala onon̈o kado tsara namiany Jehovah, baka mahay valiny fan̈ontanian̈a io.

19. Ino kado tsara namiany Jehovah atsika? Nan̈ino ma atsika tokony hankasitraka izio?

¹⁹ Efa hitantsika tamy Toko faha-5 tamy boky ty fa olombelon̈o nataony Zan̈ahary manan̈a safidy. Nan̈ino ma zen̈y an̈isany raha ten̈a tsara? Zan̈ahary niasa biby maro, fa iro io fo tsy mahavita mifidy raha tiandro hatao. Mba karakory eky atsika koa nataony Zan̈ahary karaha zen̈y? Tsy tiantsika baka e! Ravoravo atsika mahavita mifidy zay raha tiantsika, an̈atinizen̈y toetry tiantsika, fomba fiain̈anantsika, ndreky namantsika. Tiantsika atsika mba manan̈a safindintsika. Karaha zen̈y koa Zan̈ahary, tiany atsika hifidy raha tiantsika.

20, 21. Tokony hampiasaintsika amy fomba karakory ma kado namian̈a atsika io? Nan̈ino atsika tokony han̈iry han̈ano zen̈y?

 ²⁰ Tsy tiany Jehovah atsika izikoa tiren̈y fo hanompo izy. (2 Korintianina 9:7) Hangala ohatra baka atsika: Ino ma raha ten̈a mamparavoravo raimandreny, zanany misaotra izy baka amy fo sa zanany tiren̈y vo mahay misaotra izy? Atsika koa mila mandiniky tsarabe: Hataonao karakory kado namiany Jehovah anao io? Satana ndreky ry Adama tsy nankasitraka izio. Iro nanohitry Jehovah. Anao ke? Karakory hataonao?

²¹ Ampiasà amy fomba tsara safidy namiany anao io. Amy fomba karakory? Antapitrisany olo manohan̈a zony Jehovah hitondra io aminandra izioty, ke anao mety man̈ano karaha zen̈y. Iro tsy vitany man̈ano raha mamparavoravo Zan̈ahary fo, fa aboakandro amy raha ataondro koa fa Satana mavandy, baka io fitondrasan̈anany tsy mahomby. (Ohabolana 27:11) Ho vitanao koa han̈ano zen̈y, izikoa anao mifidy fomba fiain̈ana mamparavoravo Zan̈ahary. Ho hitantsika amy toko fan̈araka ty raha zen̈y.