Ino ma mahavy Satana ndreky demoninany aby io mifen̈y mare mamitaka olo? Fotony tiandro atsika hivadiky hiaraka amindro. Atsika tadiavindro hivavaka amindro. Tiandro atsika hino vandindro ndreky han̈ano raha halany Jehovah. Ankamarozany raha aby zen̈y misy ifandraisany amy fomba atao aminolo maty.

Ten̈a tsy mora maty havan̈a zen̈y. Tsy diso izikoa olo malahelo mare amy fotoan̈a zen̈y. Lazarosy kamaradiny Jesosy koa fa naty, Jesosy “nitomoan̈y.”​—Jaona 11:35.

Maro fomba ataonolo izikoa fa misy olo maty, ary raha zen̈y miovaova arakaraka tany. Maro amindro io tsy mifanohitry amy toro lalan̈a Baiboly. Kanefa misy sasany amindro ndraiky, mifototro amy fomba fihevitry fa olo maty mbala velon̈o salakady afaka mahita olo velon̈o. Favozoan̈a tsao tsy mahazo rady amy fan̈ahinolo maty io mahavy olo miambimpaty, mitomoan̈y mare lera misy faty, ndreky man̈ano fandiven̈ana maresaka. Kanefa olo maty “efa tsisy raha hainy” eky. Dikanizen̈y, lan̈iany olo man̈ano fomba aby io man̈aparitaka vandiny Satana.​—Mpitoriteny 9:5.

Misy fomba sasany koa mifandray amy finoan̈a fa olo maty afaka man̈ampy olo velon̈o ndreky afaka man̈ano raha ratsy amindro, izikoa iro tsy man̈ano raha tadiavinolo maty io. Amy tany sasany, olo man̈ano fety ndreky soron̈o fo an̈atiny 40 andra na taon̈o araiky afarany nifatesanolo araiky. Izio zen̈y man̈ampy olo maty io ‘manonga’ ankoatra an̈y. An̈isany fomba mahazatra olo koa man̈atitry hanin̈y ndreky rano ampasan̈a an̈y.

Ratsy fomba aby io fotony man̈aparitaka vandiny Satana momba olo maty. Ikeny Jehovah ma izikoa atsika man̈ano raha misy ifandraisany amy fomba mifototro amy fampianaran̈any demony? Tsy ikeny!​—2 Korintianina 6:14-18.

Panompony Zan̈ahary marin̈y tsy man̈ano fomba manohan̈a vandiny Satana. Iro mifen̈y ho be fitiavan̈a ke man̈ampy ndreky mankahery olo velon̈o. Haindro baka fa olo araiky koa fa maty, efa Jehovah fo afaka mamelon̈o izy.​—Joba 14:14, 15.

Misy olo sasany mifandray mivantan̈a amy demony na koa baka amy pisikidy. Fifandraisan̈a amy fan̈ahy ratsy ikahian̈a zen̈y. Pamosavy, pan̈ano mazỳ, pisikidy, moasy ndreky pan̈ano tromba io mbala samby tafiditry amy fifandraisan̈a amy fan̈ahy ratsy.

Baiboly mandrova olo tsy han̈ano raha aby io. Karaha ty ho izy: “Anaro aza … man̈ano sikidy, na man̈ano mazỳ, na man̈ano mahay raha mbala ho avy, na man̈ano aody, na pivolan̈a ozon̈o famosavian̈a, na olo mandeha amy pan̈ano tromba na pan̈ambara raha mbala ho avy, na olo mikoran̈a aminolo maty. Mampangaroharo Jehovah olo man̈ano raha aby io.”​—Deoteronomia 18:10-12.

Nan̈ino ma Jehovah mampitandrin̈y atsika mare be karaha zen̈y momba raha aby io?

Matoa Jehovah mampitandrin̈y atsika amy fomba jiaby misy ifandraisany amy fan̈ahy ratsy io, izy mitady raha mampatsara atsika. Tiany atsika ke izy miasaloha amintsika, salakady hainy fa hijaly lan̈iany olo mifandray amy demony.

An̈isanizen̈y Nilda, baka a Brezily. Izy pan̈ano tromba. Ten̈a nirobatiny demony aby io mare fiain̈ananany. Karaha ty nambarany Nilda: “Fan̈ahy aby io niditry taminaka, man̈iraka zaho man̈ano raha. Ndraikindraiky zaho mahazo onondraha fa ndraikindraiky efa tsy zaho foeky mikomandy raha ataoko, ke zaho loso nisy problemo aratsain̈y. Mare loatra raha ataony demony aby io aminaka ke nanjary robaka jerinaka. Zaho nihina aody mampadonto, baka io zaho nigiaka ndreky nifima fo. Raha zen̈y nahadin̈y taon̈o maro.”

Fa nohony fan̈ampiany Jehovah ndreky panomponany, Nilda loso nafaka tamy fampijalian̈a nataony demony aby io. Tsara mare fiain̈ananany amy zioty. Karaha ty ho izy: “Raha volan̈iko aminolo jiaby, aza man̈ohatra mifandray amy fan̈ahy [ratsy] foeky, nata indraiky fo.”