Karaha ty raha nitantarainy Dauda baka a Sierra Leone: “Zaho tombo tamy tanàna hely araiky tamy faritry avaratra tan̈y. Tamy zaho mbala hely, fianakavian̈anaka ndreky fianakavian̈a araiky zay niady tany. Iro samy nan̈ano tompiny. Ke mba handaminan̈a problemo io, nikahiandro lelahy pan̈ano aody zay. Namiany lelahy io fitaratra lelahy araiky zay, baka io nisaraon̈any lamba fotsy. Nangorohoro mare sady potapota hevoko lelahy tan̈aty lamba fotsy io baka tio. Izy koa fa nizaha tamy fitaratra io, ho izy: ‘Misy matoelahy hitako avy baka ao! Izy misikiny lamba fotsy. Izy lava salakady efa matoe, fan̈evanany efa fotsy, baka io izy vonkoko mandeha.’

“Dadilahy olo volan̈iny zen̈y! Izy baka tio nanjary taitaitry mare sady niafatrafatra karaha ty: ‘Mavia atỳ anaro mizaha, izikoa tsy inoanaro raha volan̈iko zen̈y!’ Fa zahay tsisy nasaky nizaha! Nisy ravindraha ndreky rano tan̈aty sajoa hely zay, nafafifafiny lelahy pan̈ano aody io taminany, baka hampakalma izy.

Baka tamy lelahy nitana fitaratra io nivolan̈any ‘dadilahy’ fa fianakavian̈anany tompiny tany io. Izy nivolan̈a tamy dady fa efa tsisy raha tokony hampiasaloha izy eky fa izy afaka miasa tsara amy tany io. Nikeny fianakavian̈a araiky io koa fitsaran̈a zen̈y. Ke nilamin̈y problemo io.”

Raha karaha zen̈y matetiky pohisy an Afriky Andrefa an̈y. Antapitrisany olo an̈y ndreky amy faritry maro hafa erantany koa, mino fa olo koa fa maty mandeha ankoatra, ke an̈y iro afaka mizaha ndreky man̈ampy olo ambony tany atỳ. Marin̈y ma zen̈y? Mbala velon̈o fo ma iro olo efa naty aby in̈y? Izikoa tsy marin̈y zen̈y, azovy fo basy iro man̈ano sary fan̈ahinolo maty aby io? Ten̈a ilain̈y mahay valiny fan̈ontanian̈a aby zen̈y. Izio iankin̈any fahin̈anantsika.