Anjely aby io misy ankitin̈y! Iro io tsy hitantsika. Amindro io misy ny tsara, fa misy koa ny ratsy. Iro io ma olo efa navy velon̈o tambony tany teto baka io naty?

Ehe! Olo araiky koa maty, izy tsy mandeha antany tsy hita maso zen̈y, karaha fiheveranolo maro. Akory hahaizantsika zen̈y? Zen̈y raha volan̈iny Baiboly. Izio bokiny fahamarin̈ana baka amy Jehovah, Zan̈ahary marin̈y. Jehovah niasa olombelon̈o, ke hainy tsarabe man̈ano karakory atsika izikoa fa maty.​—Salamo 83:18; 2 Timoty 3:16.

Baiboly mivolan̈a fa Zan̈ahary koa fa niasa Adama, lelahy voanalohany, izy namboariny “baka amy fotaka.” (Genesisy 2:7) Izy napetrany Zan̈ahary tamy zaridain̈y Edena, tamy tany Paradisa. Izikoa Adama nan̈araka lalàn̈any Jehovah, izy tsy naty foeky fa mbala velon̈o tambony tany teto fo firaka izioty. Fa Adama izikoa fa kinia tsy nan̈araka lalàn̈any Zan̈ahary, karaha ty raha nivolan̈iny Jehovah taminany: “Anao hanjary fotaka, fotony fotaka niasan̈a anao. Anao fotaka, baka io hanjary fotaka koa.”​—Genesisy 3:19.

Ino ma dikanizen̈y? Taia ma Adama talohanizy niasainy Jehovah baka tamy fotaka? Tsendriky nisy. Izy tsy fan̈ahy tandan̈itry tan̈y ke navadiky olombelon̈o. Ke Jehovah izikoa fa nivolan̈a fa Adama “hanjary fotaka”, tiany volan̈iny fa Adama hofoaty. Adama tsy nandeha tamy tany tsy hita maso. Izy koa fa naty, izy nimpody tsisy. Dikany fahafatesan̈a zen̈y tsy miain̈y.

Fa karakory ndraiky iro olo maro efa naty aby in̈y? Nanjary tsisy koa ma iro in̈y? Karaha ty volan̈iny Baiboly:

• “Tany araiky imboan̈a fo iro io [na biby na olo]: Iro samy baka tamy fotaka, avio iro samy himpody fotaka ndraiky koa.”​—Mpitoriteny 3:20.

• ‘Olo maty tsisy raha hainy eky.’​—Mpitoriteny 9:5.

• “Samy efa foan̈a aby ndray fitiavan̈anany, ndray raha halany, ndray fialon̈ananany.”​—Mpitoriteny 9:6.

• “Amy Fasan̈a handihananao an̈y, efa tsisy asa na eritreritry na fahaizan̈a na fisiany jery eky.”​—Mpitoriteny 9:10.

• “Izy mimpody amy fotaka niasan̈a izy. Andranizin̈y fo eritreritrinany efa foan̈a edy.”​—Salamo 146:4.

Sarotro aminao ma man̈eky raha volan̈iny andininy aby io? Izikoa zen̈y, iritrireta baka ty: Amy fianakavian̈a maro, lelahy miasa hamiloman̈a vadiny ndreky zanany. Fa izikoa lelahy io maty, matetiky loso mijaly mare vadiny ndreky zanany. Ndraikindraiky aby iro tsisy vola hividianan̈a hanin̈y. Mety han̈araraotro iro koa olo tsy tia lelahy io. Ke diniha ty: ‘Izikoa mbala velon̈o antany tsy hita maso an̈y lelahy io, nan̈ino izy tsy mamelon̈o vadiny ndreky zanany eky? Nan̈ino iro tsy arovany eky?’ Fotony volan̈iny toko sy andininy aby tio in̈y, lelahy io efa tsisy eky, ke efa tsisy raha vitany. Marin̈y ankitin̈y zen̈y.​—Salamo 115:17.

Ke dikanizen̈y ma olo maty efa tsy ho velon̈o eky? Ehe, tsy zen̈y. Mbala hikoran̈a momba familoman̈a olo maty atsika afara an̈y. Fa olo maty efa tsy mahay raha ataonao. Iro tsy mahita anao, tsy maharen̈y anao, avio koa tsy mahavita mikoran̈a aminao. Tsisy antony tokony hatahoranao iro, fotony iro tsy mahavita man̈ampy anao sady tsy mahavita man̈ano ratsy aminao.​—Mpitoriteny 9:4; Isaia 26:14.