Handeha hadosony Jehovah raha ratsy jiaby nataony Satana. Jesosy nataony Jehovah Panjaka amy tany jiaby. Ambany fitondrasan̈anany, tany jiaby ty hanjary paradisa.​—Daniela 7:13, 14; Lioka 23:43.

Ty raha hampan̈antinainy Jehovah:

• HO TREKA HANIN̈Y: “Tany hamokatra. Zan̈ahary, ia, Zan̈aharintsika hitahy atsika.” “Tany hahavokatra mare. Nata an̈abony bongo mbala hahavokatra fo.”​—Salamo 67:6; 72:16.

• TSISY ADY EKY: “Mavia, zahava asany Jehovah. Ten̈a mahagaga raha nataony ambony tany eto. Izy mampijanon̈o ady amy tany jiaby.”​—Salamo 46:8, 9.

• TSISY OLO RATSY FAN̈AHY EKY: “Olo pan̈ano ratsy haripaka. ... Teteky io, tsisy olo ratsy fan̈ahy eky; anao handiniky tany nipitrahany, fa izy efa tsy ao eky.”​—Salamo 37:9, 10.

• TSISY EKY ARETIN̈Y, ALAHELO NDREKY FAHAFATESAN̈A: “Amy zen̈y, olo gila hahita, olo maren̈iny haharen̈y. Olo malemy vity hahavita han̈aniky bongo mira serfa in̈y, baka io olo moa hihira mare.”​—Isaia 35:5, 6.

  “Ke Zan̈ahary foeky amindro io. Izy hamafa ranomaso jiaby amy masondro, fahafatesan̈a tsy ho hisy eky, alahelo tsy ho hisy, tarain̈y tsy ho hisy, tehotehoko tsy ho hisy, fotony zen̈y efa kabaro taloha.”​—Apokalypsy 21:3, 4.

Jehovah tsy mira Satana ndreky demony aby io. Izy tsy mavandy foeky. Ho tanteraka aby raha jiaby nampan̈antinainy. (Lioka 1:36, 37) Anao tiany Jehovah, salakady tiany anao hiain̈y amy Paradisa handeha ataony zen̈y. Ke izikoa tianao hahay raha maro momba iro fahamarin̈ana maro tsara an̈aty Volan̈a Zan̈ahary ao, mivolàn̈a amy Vavolombelon̈o Jehovah. Izikoa fahamarin̈ana io arehanao amy fiain̈ananao, anao ho afaka amy vandy, finoanoampoan̈a, ndreky tsy fahaizan̈a. Andra araiky an̈y, anao ho afaka aminy ota ndreky fahafatesan̈a. Jesosy nivolan̈a: “Anaro hahay ny marin̈y, ke ny marin̈y io hankafaka anaro.”​—Jaona 8:32.