1. Azovy tokony han̈ambara fomba tokony hanompoan̈a Zan̈ahary?

MARO fivavahan̈a man̈ano mampianatra ny marin̈y momba Zan̈ahary. Tsy mira raha ampianarindro fivavahan̈a aby io momba azovy Zan̈ahary zen̈y, ndreky fomba tokony hanompoan̈a izy. Akory fo ahaizantsika fomba tokony hanompoan̈a Zan̈ahary? Jehovah zaraiky fo tsara man̈ambara zen̈y amintsika.

2. Akory ahaizanao fomba tokony hanompoan̈a Zan̈ahary?

² Jehovah nan̈amia atsika Baiboly, ahaizantsika fomba tokony hanompoan̈a izy. Tohiza fianaranao izio, fa izy han̈ampy anao hahazo hatsaran̈a baka amy raha ampianariny, fotony izy ten̈a mikarakara anao.—Isaia 48:17.

3. Ino raha tiany Zan̈ahary ataontsika?

³ Olo sasany mivolan̈a fa fivavahan̈a jiaby ikeny Zan̈ahary, kanefa tsy zen̈y raha nampianariny Jesosy. Hoizy: “Tsy zay olo mivolan̈a aminaka: ‘A Tompoko anao, a Tompoko anao’, hiditry amy fanjakan̈any lan̈itry, fa zay olo man̈ano sitrapony Babako andan̈itry an̈y fo.” Dikanizen̈y, atsika mila mianatra ino ma sitrapony Zan̈ahary, ndreky mila man̈ano izio. Ten̈a raha maventy izio, fotony olo tsy man̈araka volan̈a Zan̈ahary nampitovisiny Jesosy aminolo pamono olo, “tsy pan̈araka lalàn̈a.”—Matio 7:21-23.

4. Ino raha nivolan̈iny Jesosy momba fan̈anovan̈a sitrapony Zan̈ahary?

⁴ Jesosy efa nampitandrin̈y fa atsika koa tihan̈ano sitrapony  Zan̈ahary, maro raha mety hisakana atsika. Nivolan̈iny: “Midira amy varavaran̈a tery. Maventy sady malalaka lalan̈a mandeha amy fandripahan̈a, ke maro olo man̈araka izy. Maletry varavaran̈a mandeha amy fiain̈ana tsisy farany. Tery koa lalan̈a man̈an̈y. Vitsy fo olo mahita izy.” (Matio 7:13, 14) Lalan̈a maletry io, na fivavahan̈a tiany Zan̈ahary, avian̈a amy fiain̈ana tsisy farany. Lalan̈a malalaka io ndraiky, fivavahan̈a tsy tiany Zan̈ahary, mengo amy fahafatesan̈a. Tsisy tiany Jehovah hofoaty atsika. Olo jiaby amiany fotoan̈a hianaran̈a raha momba izy.—2 Petera 3:9.

5. Akory hahaizanao olo man̈araka fomba tokony hanompoan̈a Zan̈ahary?

⁵ Nivolan̈iny Jesosy raha ahaizantsika olo man̈araka fomba tokony hanompoan̈a Zan̈ahary. Mila dinihintsika tsarabe raha inoandro ndreky raha ataondro. Jesosy nivolan̈a: “Baka amy voany hahaizanaro tsarabe iro.” Nivolan̈iny koa: “Tsara voany kakazo tsara jiaby.” (Matio 7:16, 17) Zen̈y tsy mivolan̈a fa tsy man̈ano diso foeky olo, koa fa manompo Zan̈ahary. Iro fo mifen̈y mare man̈ano ny tsara. Hizahavantsika ino aby raha ahaizan̈a olo man̈araka fomba tokony hanompoan̈a Zan̈ahary.

6, 7. Nan̈ino fomba tokony hanompoan̈a Zan̈ahary tokony hiorin̈y amy Baiboly? Ino raha ianarantsika tamy raha nataony Jesosy?

⁶ Tokony hiorin̈y amy Baiboly fomba fanompoan̈a Zan̈ahary. Baiboly mivolan̈a: “Ilain̈y Soratra Masin̈y jiaby io, fotony baka amy fan̈ahy masin̈y Zan̈ahary. Natao hampianaran̈a izio, han̈anaran̈a, han̈itsian̈a ny tsy mety, ndreky hamalavalan̈a olo han̈ano ny marin̈y, baka olony Zan̈ahary hanjary mahay tsarabe ndreky ho ampy fitaovan̈a aminy asa tsara jiaby.” (2 Timoty 3:16, 17)  Apostoly Paoly nanoratra tamindro Kristianin̈y aby tamy zen̈y: “Zahay koa fa nan̈ambara volan̈a Zan̈ahary taminaro, tsy nataonaro karaha volan̈anolo, fa nataonaro eraka ny ten̈a marin̈y, volan̈a Zan̈ahary.” (1 Tesalonianina 2:13) Baiboly, na Volan̈a Zan̈ahary zaraiky fo ioren̈any fivavahan̈a marin̈y, fa tsy hevitrinolo, na fombandrazan̈a, na raha hafa.

⁷ Baka amy Volan̈a Zan̈ahary raha jiaby nampianariny Jesosy. (Vakia Jaona 17:17.) Matetiky izy nanon̈ono raha koran̈iny Soratra Masin̈y. (Matio 4:4, 7, 10) Olony Zan̈ahary koa man̈araka raha nataony Jesosy, ke raha jiaby ampianarindro baka amy Baiboly.

8. Ino raha nampianariny Jesosy momba fivavahan̈a amy Jehovah?

⁸ Jehovah zaraiky fo tokony hivavahan̈a. Salamo 83:18 mivolan̈a: “Anao, araiky manan̈a an̈aran̈a Jehovah, anao zaraiky fo Farany An̈abo amy tany jiaby.” Tiany Jesosy ho hainolo azovy ten̈a Zan̈ahary, ke nampianariny iro an̈arany Zan̈ahary. (Vakia Jaona 17:6.) Jesosy nivolan̈a: “Jehovah Zan̈aharinao zaraiky fo tsy maintsy andohalifanao ndreky an̈anovanao fanompoan̈a masin̈y.” (Matio 4:10) Man̈ano raha nataony Jesosy io koa atsika, fotony atsika olony Zan̈ahary. Jehovah zaraiky fo ivavahantsika, atsika mampiasa an̈aranany, baka io mampianatra olo an̈aran̈a io ndreky raha tiany hatao amintsika.

9, 10. Akory an̈aboahantsika fa atsika mifankatia?

⁹ Mila mifankatia. Nampianariny Jesosy hifankatia pianatranany. (Vakia Jaona 13:35.) Atsika ndray samy amy tany faviany, na samy amy fombanany, na manan̈a na tsy manan̈a, atsika tokony hifankatia mira olo kibo araiky. (Kolosianina 3:14) Dikanizen̈y, atsika tsy mandeha miady ndreky tsy mamono olo. Baiboly mivolan̈a:  “Karaha ty ahitan̈a tsarabe zay olo zanaka Zan̈ahary ndreky olo zanaka Devoly: Olo jiaby tsy man̈ano ny marin̈y, tsy baka amy Zan̈ahary. Karaha zen̈y koa olo tsy tia rahalahiny.” Nivolan̈iny koa: “Atsika tokony hifankatia, fa tsy karaha Kaina, baka aminy araiky ratsy in̈y, ke namono rahalahiny tsisy hinakinaka.”—1 Jaona 3:10-12; 4:20, 21.

¹⁰ Atsika mifan̈ampy ndreky mifankahery, ke mampiasa fotoan̈antsika, angovontsika, ndreky fanan̈anantsika. (Hebreo 10:24, 25) Atsika ‘man̈ano ny tsara aminolo jiaby.’—Galatianina 6:10.

11. Nan̈ino atsika man̈eky fa Jesosy lalan̈a mengo amy Zan̈ahary?

¹¹ Mila man̈araka volan̈a Jesosy fotony izy lalan̈a mengo amy Zan̈ahary. Baiboly mivolan̈a: “Tsisy olo hafa hazahoan̈a famonjian̈a, fotony tsisy an̈aran̈a hafa ambaniny lan̈itry namian̈a olo hazahoan̈a famonjian̈a.” (Asan’ny Apostoly 4:12) Nianarantsika tamy Toko faha-5 fa Jehovah nan̈iraka Jesosy nan̈amia ain̈inany hamonjian̈a olo tia man̈araka volan̈a. (Matio 20:28) Jehovah efa nifidy Jesosy Panjaka, hanjaka amy tany jiaby. Zen̈y mahavy Baiboly mivolan̈a fa izikoa tiantsika ho velon̈o tsisy farany, atsika mila man̈araka volan̈a Jesosy.—Vakia Jaona 3:36.

12. Nan̈ino atsika tsy man̈ano politiky?

¹² Tsy man̈ano politiky. Jesosy tsy nan̈ano politiky. Koa fa nitsapa jery izy Pilato, pitondra romanin̈y, izy nivolan̈a: “Fanjakan̈anaka tsy an̈isany donia ty.” (Vakia Jaona 18:36.) Tsy man̈ano politiky mira Jesosy koa atsika, fotony tsy mivadiky amy Fanjakan̈any Zan̈ahary andan̈itry an̈y. Ndray izy man̈ano zen̈y, Baiboly man̈iraka atsika han̈eky “manampahifan̈a”, na iro fanjakan̈a misy izioty. (Romanina 13:1) Atsika man̈araka lalàn̈any  fanjakan̈a amy tany misy atsika. Izikoa mifanohitry amy lalàn̈any Zan̈ahary izio, atsika man̈ano karaha nivolan̈indro apostoly ty: “Zan̈ahary fo tsy maintsy arehanay volan̈a fa tsy olo, fotony izy pitondra zahay.”—Asan’ny Apostoly 5:29; Marka 12:17.

13. Ino raha momba Fanjakan̈any Zan̈ahary mila koran̈intsika aminolo?

¹³ Mino fa Fanjakan̈any Zan̈ahary zaraiky fo mahavoavaha raha jiaby manahiran̈a olombelon̈o. Nivolan̈iny Jesosy fa hambara erantany “vaovao tsara mikasiky Fanjakan̈a ty.” (Vakia Matio 24:14.) Tsisy fanjakan̈anolombelon̈o mahavita raha mbala hataony Fanjakan̈any Zan̈ahary. (Salamo 146:3) Nampianariny Jesosy hivavaka karaha ty momba Fanjakan̈a io atsika: “Irarian̈a ho avy Fanjakan̈anao. Irarian̈a hatao ambony tany eto koa sitraponao, karaha andan̈itry an̈y.” (Matio 6:10) Koran̈iny Baiboly fa Fanjakan̈any Zan̈ahary io handripaka fanjakan̈anolombelon̈o jiaby, fa “izio zaraiky fo ho tavela mandrakizay.”—Daniela 2:44.

14. Azovy hitanao man̈araka fomba tokony hanompoan̈a Zan̈ahary?

¹⁴ Fahitanao izy: ‘Azovy mampianatra raha baka amy Baiboly? Azovy man̈ambara an̈arany Zan̈ahary aminolo? Azovy olo ten̈a mifankatia? Azovy mino fa Zan̈ahary nan̈iraka Jesosy hamonjy atsika? Azovy tsy man̈ano politiky? Azovy man̈ambara fa Fanjakan̈any Zan̈ahary zaraiky fo mahavoavaha raha manahiran̈a atsika?’ Vavolombelon̈o Jehovah zaraiky fo.—Isaia 43:10-12.

15. Ino raha mila ataontsika, koa tiantsika ikeny Zan̈ahary fanompoan̈antsika?

¹⁵ Tsy ampy foeky mino fa Zan̈ahary zen̈y misy, fotony demony aby io koa mba mino zen̈y, fa iro fo tsy  man̈araka volan̈a Zan̈ahary. (Jakoba 2:19) Koa tiantsika ikeny Zan̈ahary fanompoan̈antsika, atsika mila mino izy ndreky man̈araka volan̈anany.

16. Nan̈ino atsika mila miala amy fivavahan̈a diso?

¹⁶ Atsika mila miala amy fivavahan̈a diso, koa tiantsika ikeny Zan̈ahary fanompoan̈antsika. Paminan̈y Isaia nanoratra karaha ty: “Miboaha baka aminany ao anaro. Ataova raha hampadio anaro.” (Isaia 52:11; 2 Korintianina 6:17) Zen̈y mahavy atsika tsy man̈ano raha momba fivavahan̈a diso foeky.

17, 18. Ino ma “Babylony be” zen̈y? Nan̈ino anao mila miala ao malaky?

¹⁷ Ino ma fivavahan̈a diso zen̈y? Izio lan̈iany fivavahan̈a mampianatra olo fomba fanompoan̈a tsy mifan̈araka amy Volan̈a Zan̈ahary. “Babylony Be” ikahiany Baiboly iro io. (Apokalypsy 17:5) Nan̈ino eky? Tafarany Safodrano tamy faha Noa, ta Babylony tan̈y naviany fampianaran̈a raha tsy marin̈y. Niparitaka erantany raha diso nampianarindro io. Ohatra, olo ta Babylony tao nivavaka tamy fitambarany zan̈ahary telo. Maro koa izioty fivavahan̈a mampianatra zan̈ahary tokana olo telo, kanefa Baiboly mampianatra fa Jehovah zaraiky fo Zan̈ahary marin̈y, baka io Jesosy io Zanany. (Jaona 17:3) Olo ta Babylony tan̈y koa nino fa olo koa maty, fan̈ahinany tsy maty, ke mety mijaly amy motrobe zen̈y. Tsisy marin̈y zen̈y.—Zahava Fan̈azavan̈a 14 ndreky 17, baka io 18.

¹⁸ Zan̈ahary efa nivolan̈a fa efa marikitry fotoan̈a handripahan̈a fivavahan̈a diso jiaby. (Apokalypsy 18:8) Zen̈y mahavy atsika mila miala ao malaky. Tiany Jehovah anao tsy hijijy tamban̈a han̈ano zen̈y.—Apokalypsy 18:4.

19. Hataony Jehovah akory anao, koa tapakevitry hanompo izy?

 ¹⁹ Anao koa tapakevitry hiala amy fivavahan̈a diso, ke hanompo Jehovah, kamaradinao na fianakavianao sasany mety tsy hahay zen̈y, ke iro mety hampijaly anao. Jehovah tsy han̈ary anao. Anao hahazo fianakavian̈a antapitrisany ten̈a tia anao, baka io ho velon̈o tsisy farany amy donia vaovaony Zan̈ahary. (Marka 10:28-30) Iro kamaradinao ndreky fianakavian̈anao sasany nanohitry anao aby in̈y mety mbala hianatra Baiboly koa.

20. Nan̈ino ma anao ten̈a mila man̈araka fomba tiany Zan̈ahary hanompoan̈a izy?

²⁰ Efa ten̈a marikitry Zan̈ahary handripaka olo ratsy fan̈ahy jiaby, baka io Fanjakan̈anany hanjaka amy tany jiaby. (2 Petera 3:9, 13) Haravoan̈a tsisy ambaka izy eky amy zen̈y! Olo jiaby han̈araka fomba tokony hanompoan̈a Jehovah. Dikanizen̈y, aza mijijy tamban̈a man̈araka fomba tokony hanompoan̈a Zan̈ahary.