1, 2. Tiany Jehovah han̈ano karakory tokantran̈o jiaby?

JEHOVAH naviany vadian̈anolombelon̈o voanalohany. Baiboly mivolan̈a fa izy niasa man̈angy voanalohany, baka io ‘nindesiny tamy lelahy niasainy in̈y.’ Haravoan̈any Adama tamy zen̈y! Ke nivolan̈iny: “Ty zalahy ten̈a taolan̈a baka amy taolan̈anaka ndreky nofotro baka amy nofotronaka ankitin̈y.” (Genesisy 2:22, 23) Zen̈y ahaizantsika fa tiany Jehovah ho sambatra olo fivadiany.

² Raha misy ndraiky, maro vadian̈anolo tsy sambatra zen̈y foeky. Amy Baiboly misy toro lalan̈a momba raha tokony hataonolo tsiaraikiaraiky an̈aty tokantran̈o, baka izio hahomby ndreky ho sambatra.—Lioka 11:28.

3, 4. a) Tokony hataony lelahy karakory ma vadiny? b) Nan̈ino ma olo fivadiany tokony hifan̈ambela hadisovan̈a?

³ Baiboly mivolan̈a fa vady tsara lelahy araiky, izikoa izy tia ndreky man̈aja vadiny. Vakia kony azafady Efesianina 5:25-29. Lelahy tokony ho tia vadiny fo, hiaro izy, hikarakara izy, baka io tsy han̈ano raha mampalahelo izy.

⁴ Karakory fo basy tokony hataony lelahy, izikoa vadiny tafan̈ano raha tsy mety? Karaha ty koran̈iny Zan̈ahary: “Tiava fo vadinaro, fa aza meloko mare amindro.” (Kolosianina 3:19) Aza adin̈a fa anaro koa mba mety ho tafan̈ano raha tsy mety. Izikoa tianaro Zan̈ahary  han̈ambela hadisovan̈anaro, anaro mila man̈ambela hadisovan̈a vadinaro. (Matio 6:12, 14, 15) Izikoa olo fivadiany mazoto mifan̈ambela hadisovan̈a, ho sambatra tokantran̈ondro.

5. Nan̈ino ma lelahy tokony han̈amia voninahitry vadiny?

⁵ Lelahy irahiny Jehovah han̈amia voninahitry vadiny. Lelahy tokony handiniky tsarabe raha ilainy vadiny. Ten̈a maventy raha zen̈y. Izikoa lelahy mampijaly vady, tsy tandrin̈esany Jehovah vavakanany. (1 Petera 3:7) Amy Jehovah, olo tia izy fo ten̈a tiany, fa tsy baka aminizy lelahy na man̈angy.

6. Ino ma dikany “nofotro araiky” zen̈y?

⁶ Jesosy nan̈azava fa olo fivadiany zen̈y “tsy aroe eky, fa hanjary nofotro araiky fo.” (Matio 19:6) Iro samy tsy tokony hivadiky amy vadindro foeky. (Ohabolana 5:15-21; Hebreo 13:4) Iro fivadiany tokony tsy ho tia ten̈a amy resaka fan̈anovan̈a firaisan̈a. (1 Korintianina 7:3-5) Tokony ho tsaroany lelahy fa ‘tsisy olo tsy tia ain̈inany tompiny, fa izy tia ndreky mamelon̈o izio.’ Dikanizen̈y, izy tokony ho ten̈a tia vadiny. An̈abony raha jiaby, tiany man̈angy izikoa vadiny tsara fan̈ahy aminany ndreky tia izy.—Efesianina 5:29.

7. Nan̈ino tokantran̈o mila lohany?

⁷ Tokantran̈o jiaby samy mila lohany, hitariky tokantran̈o amy lalan̈a hampasambatra izy. Baiboly mivolan̈a karaha ty amy 1 Korintianina 11:3 ao: “Ke tiako ho hainaro fa Kristy lohany lelahy jiaby, lelahy lohany man̈angy, baka io Zan̈ahary lohany Kristy.”

8. Karakory ma man̈angy man̈aja vadiny mare zen̈y?

⁸ Lelahy jiaby koa mety tafan̈ano hadisovan̈a. Ndray  zen̈y, hahita hasambaran̈a fo tokantran̈o, izikoa man̈angy io von̈ono han̈ampy izy amy fanapahankevitry raisiny ndreky miaraka miasa aminany fo. (1 Petera 3:1-6) Baiboly mivolan̈a: “Man̈angy mila man̈aja vadiny mare.” (Efesianina 5:33) Akory ndraiky izikoa lelahy io tsy man̈eky raha koran̈iny Soratra Masin̈y? Man̈angy io mbala mila man̈aja izy mare fo. Baiboly man̈ambara: “Anaro man̈angy mila man̈eky vadinaro fo, ndray izy tsy man̈araka volan̈a masin̈y io, baka izy voataon̈onaro tsy amy volan̈a, fa amy raha tsara ataonaro, fotony hitany fa anaro madio fitondranten̈a ndreky man̈aja izy mare.” (1 Petera 3:1, 2) Fitondranten̈a tsarany man̈angy io mety han̈ampy vadiny handiniky ndreky han̈aja finoan̈any man̈angy io.

9. a) Ino raha tokony hataony man̈angy, izikoa tsy tiany hevitriny vadiny? b) Ino torohevitry momba man̈angy koran̈iny Titosy 2:4, 5?

⁹ Ino raha mety hataony man̈angy, izikoa tsy tiany hevitriny vadiny? Izy mety man̈azava hevitrinany ampan̈ajan̈a. Ohatra, Saraha nivolan̈a raha tsy tiany Abrahama,  fa Jehovah fo nivolan̈a taminy Abrahama: “Tandrin̈esa izy.” (Genesisy 21:9-12) Mahalan̈a misy lelahy kristianin̈y manapakevitry han̈ano raha tsy mifan̈araka amy raha koran̈iny Baiboly zen̈y, ke zen̈y mahavy man̈angy tokony han̈eky fanapahankevitry vadiny. (Asan’ny Apostoly 5:29; Efesianina 5:24) Vady tsara koa man̈angy araiky, izikoa mahakarakara tokantran̈o. (Vakia Titosy 2:4, 5.) Man̈angy mazoto miasa karaha zen̈y hajainy vadiny ndreky ry zanany, baka io ho tiandro mare.—Ohabolana 31:10, 28.

10. Ino raha koran̈iny Baiboly momba olo miombiky ndreky misaraka?

¹⁰ Ndraikindraiky olo fivadiany malaky manapakevitry hiombiky na hisaraka. Baiboly ndraiky man̈ambara fa “man̈angy tsy tokony hiala vadiny”, baka io “lelahy koa tsy tokony hiala vadiny.” (1 Korintianina 7:10, 11) Mety misy antony maventy hahavy olo hiombiky, fa mila mandiniky tsarabe iro vo manapakevitry han̈ano zen̈y. Akory ndraiky momba fisarahan̈a? Koran̈iny Baiboly fa araiky fo antony mety hisarahan̈a: Izikoa araiky aminolo fivadiany man̈ano firaisan̈a aminolo tsy vadiny.—Matio 19:9.

11. Ino raha ten̈a ilainy tsaiky, mandilatra raha jiaby?

¹¹ Anaro raimandreny, manokàna fotoan̈a mahampy hiarahan̈a amy zanakanaro. Tsara tsaiky ankilany babany ndreky reniny, baka io mandilatra raha jiaby, iro mila ampianarin̈y raha momba Jehovah.—Deoteronomia 6:4-9.

12. Ino raha tokony hataony raimandreny hiarovan̈a zanakandro?

¹² Doniany Satana ty man̈ody ratsy fo, ke olo sasany  mila handrobaka iro zanakantsika aby io, ndreky masaky man̈olan̈a tsaiky. Misy raimandreny men̈atra mikoran̈a raha momba zen̈y amy zanakandro. Anaro raimandreny edy mila mampitandrin̈y zanakanaro momba olo aby pan̈olan̈a io, ke mila mampianatra iro hiaro ten̈a. Arova zanakanaro. *—1 Petera 5:8.

13. Karakory tokony hampianarany raimandreny zanany?

¹³ Andraikitriny raimandreny mampianatra zanakandro han̈araka volan̈a. Karakory tokony han̈anovandro  zen̈y? Iro tsaiky aby io mila anarin̈y, fa raimandreny tsy tokony hasiaka loatra na ho kafiry. (Jeremia 30:11) Ke izikoa raimandreny mbala meloko, iro tsy tokony han̈anatra zanakandro. Iro tsy tokony han̈ano volan̈a “mira tomboko saboa”, baka io koa tsy tokony handratra zanakandro. (Ohabolana 12:18) Ampianara zanakanaro hahay nan̈ino iro mila man̈araka volan̈a.—Efesianina 6:4; Hebreo 12:9-11; zahava Fan̈azavan̈a 30.

14, 15. Nan̈ino tsaiky mila man̈araka volan̈anolobendro?

¹⁴ Jesosy nan̈araka volan̈a Babany andan̈itry an̈y fo, ndray tamy fotoan̈a sarotro. (Lioka 22:42; Jaona 8:28, 29) Jehovah koa man̈iraka tsaiky han̈araka volan̈a raimandreny.—Efesianina 6:1-3.

¹⁵ Anaro tsaiky, areha fo volan̈anolobenaro, ndray hitanaro karaha sarotro. Tsarova fa anaro koa man̈ano zen̈y, ho ravoravo aminaro Jehovah ndreky raimandreninaro. *—Ohabolana 1:8; 6:20; 23:22-25.

16. a) Akory ataony Satana hitaon̈o tanora han̈ano raha halany Jehovah? b) Nan̈ino anao mila mifidy naman̈a tia Jehovah?

¹⁶ Devoly mety handrosoko kamaradinao ndreky tanora hafa, hitaon̈o anao haditry. Hainy baka fa mety ho sarotro tsy man̈araka raha ataony kamarady zen̈y. Ohatra, Dina zanaka Jakoba nikamarady taminolo tsy tia Jehovah. Nandrobaka fiain̈anandro jiaby tran̈o araiky raha nataony io. (Genesisy 34:1, 2) Ke izikoa anao mikamarady aminolo tsy tia Jehovah, iro mety handrisiky anao han̈ano raha halany. Tsy anao zaraiky fo halahelo izikoa  anao man̈ano zen̈y, fa ry havanao ndreky Zan̈ahary koa. (Ohabolana 17:21, 25) Zen̈y mahavy anao mila minaman̈a aminolo tia Jehovah fo.—1 Korintianina 15:33.

17. Ino andraikitriny tsiaraikiaraiky an̈aty tokantran̈o?

¹⁷ Izikoa olo tran̈o araiky samy man̈araka torohevitriny Jehovah, maro raha tsy ho voa iro. Anaro lelahy, tiava tsarabe vadinaro. Anaro man̈angy, hajà ndreky ikia vadinaro. Aleva tahaka man̈angy koran̈iny Ohabolana 31:10-31. Anaro raimandreny, ampianara zanakanaro, baka ho tia Jehovah. (Ohabolana 22:6) Anaro babany tsaiky, tarita tsarabe fianakavian̈anaro. (1 Timoty 3:4, 5; 5:8) Anaro tsaiky, areha volan̈anolobenaro. (Kolosianina 3:20) Tsarova fa olo tran̈o araiky samy mety ho tafan̈ano raha tsy mety, ke mahaiza manetry ten̈a ndreky man̈ambela hadisovan̈any naman̈a. Ten̈a tsara kony torohevitry Baiboly momba olo tsiaraikiaraiky amy tokantran̈o!