1, 2. a) Ten̈a mahay olo malaza araiky ma anao, izikoa fa mahay an̈aranany? Hazavà. b) Azovy fahaizanolo Jesosy?

MARO olo malaza ambony tany eto. Mety misy amindro io hainao an̈aran̈a. Fahaizanao an̈aranolo malaza araiky zen̈y tsy mivolan̈a fa ten̈a hainao izy. Mety tsy ho hainao raha jiaby momba fiain̈ananany ndreky toetrinany.

² Anao mety efa naharen̈y momba Jesosy Kristy, ndray efa kadiriny 2 000 taon̈o zay nialany tambony tany teto. Maro ndraiky olo tsy mahay izy tsarabe. Sasany mivolan̈a fa izy lelahy tsara fan̈ahy, sasany man̈ano izy paminan̈y. Misy koa mivolan̈a izy Zan̈ahary. Azovy fo fahaizanao izy?—Zahava Fan̈azavan̈a 12.

3. Nan̈ino anao ten̈a mila mianatra momba Zan̈ahary Jehovah ndreky Jesosy Kristy?

³ Ten̈a ilainao mahay ny marin̈y momba Jesosy. Nan̈ino ma? Baiboly mivolan̈a: “Baka iro ho velon̈o tsisy farany, iro mila mianatra momba anao, Zan̈ahary tokana sady marin̈y, ndreky Jesosy Kristy irakanao.” (Jaona 17:3) Izikoa anao mahay ny marin̈y momba Jehovah ndreky Jesosy, anao mety hiain̈y tsisy farany amy paradisa ambony tany eto. (Jaona 14:6) Fahaizanao Jesosy io koa han̈ampy anao, fotony izy modely ten̈a tsara amy fahaizan̈a miain̈y ndreky fahaizan̈a miaramonin̈y aminolo. (Jaona 13:34, 35) Tamy Toko Voanalohany atsika nianatra ny marin̈y momba Zan̈ahary.  Izioty atsika hianatra raha ampianariny Baiboly momba Jesosy.

4. Ino ma dikany “Mesia” ndreky “Kristy” zen̈y?

⁴ Taon̈o maro talohany nitirahany Jesosy, Jehovah efa nivolan̈a tamy Baiboly tao fa handefa Mesia, na Kristy. “Mesia” io baka amy volan̈a hebreo, fa “Kristy” io baka amy volan̈a griky. Dikany Mesia ndreky Kristy zen̈y, Zan̈ahary nifidy Mesia nampan̈antinain̈y io ndreky nan̈amia izy toeran̈a manokan̈a. Baka amy Mesia hahavy raha jiaby nampan̈antinainy Zan̈ahary ho tanteraka. Jesosy koa afaka han̈ampy anao rango izioty. Talohany Jesosy teraka, maro olo nan̈ontany: ‘Azovy ma Mesia io?’

5. Pianatra Jesosy aby io ma nino fa izy Mesia?

⁵ Pianatrany Jesosy aby io tsy nisalasala fa izy ankitin̈y Mesia nampan̈antinain̈y. (Jaona 1:41) Ohatra, Simona Petera nivolan̈a tamy Jesosy: “Anao Kristy.” (Matio 16:16) Akory hahavy atsika hatoky tsarabe fa Jesosy ankitin̈y Mesia?

6. Akory nataony Jehovah, baka nahaizanolo nazoto nandiniky fa Jesosy io Mesia?

⁶ Ela be talohany nitirahany Jesosy, iro paminan̈iny Zan̈ahary aby io efa nanoratra raha maro tokony hahaizanolo Mesia. Ty misy ohatra: Asa anao izioty hirahin̈y handeha hitsena olo tsiary hitanao, amy tany feno olo. Tsy ho sarotro aminao hahay olo io, izikoa ambara anao raha mombamomba izy. Jehovah koa nampiasa paminan̈y aby io han̈ambara raha hataony Mesia ndreky raha jiaby hahazo izy. Baka amy faminanian̈a aby io tanteraka nahaizanolo nazoto nandiniky fa Jesosy io Mesia.

7. Ino faminanian̈a aroe man̈ambara fa Jesosy io Mesia?

 ⁷ Ty misy faminanian̈a aroe momba Mesia. Voanalohany, 700 taon̈o talohany Jesosy teraka, Mika naminan̈y fa Mesia io ho teraka amy tanàna hely araiky a Betlehema. (Mika 5:2) Tan̈y ankitin̈y Jesosy teraka! (Matio 2:1, 3-9) Faharoe, Daniela naminan̈y fa Jesosy hanjary Mesia, amy taon̈o 29. (Daniela 9:25) Mbala aroe amy faminanian̈a maro man̈ambara mazava fa Jesosy ankitin̈y Mesia nampan̈antinain̈y hitantsika in̈y.—Zahava Fan̈azavan̈a 13.

8, 9. Nisy nino tamy batisany Jesosy, ke man̈ambara fa izy Mesia?

⁸ Nataony Jehovah nazava tsarabe fa Jesosy io Mesia. Izy nivolan̈a tamy Jaona pan̈ano batisa raha hahaizan̈a Mesia io. Jesosy amy zay koa fa nataony Jaona batisa tamy Ten̈aranony Jordana, tamy taon̈o 29, hitany raha nivolan̈iny Zan̈ahary in̈y. Karaha ty koran̈iny Baiboly: “Jesosy koa fa vita batisa, izy nanonga baka tan̈aty rano tao. Lan̈itry nibian̈a, ke hitany Jaona fan̈ahy masin̈y Zan̈ahary karaha pizin̈y, nijotso tan̈abony Jesosy. Tio fo, nisy feo koa baka tandan̈itry nivolan̈a: ‘Io Zanako ten̈a tiako sady zaho koa mankasitraka izy.’ ” (Matio 3:16, 17) Jaona koa fa nahita raha io ndreky naharen̈y feo in̈y, hainy fa Jesosy marin̈y Mesia. (Jaona 1:32-34) Taminandra nandatsahany Jehovah fan̈ahy masin̈y tamy Jesosy, izy nanjary Mesia. Izy nifidiny Zan̈ahary, natao Pitariky ndreky Panjaka.—Isaia 55:4.

 ⁹ Faminanian̈any Baiboly ndreky volan̈a Jehovah, baka io raha nambarany tamy Jaona pan̈ano batisa in̈y man̈ambara fa Jesosy marin̈y Mesia io. Baka aia fo ma Jesosy? Olo karakory ma izy? Zahavantsika raha koran̈iny Baiboly momba zen̈y.

10. Ino ma raha ampianariny Baiboly momba fiain̈any Jesosy, talohany naviany tambony tany teto?

¹⁰ Baiboly mampianatra atsika fa Jesosy niain̈y  tandan̈itry tan̈y, ela be talohanizy nandeha tambony tany teto. Mika nivolan̈a fa Mesia io ‘efa nisy rango ela.’ (Mika 5:2) Matetiky koa Jesosy nivolan̈a fa izy niain̈y tandan̈itry tan̈y, talohanizy nateraka nanjary olombelon̈o. (Vakia Jaona 3:13; 6:38, 62; 17:4, 5.) Ndray talohany naviany tambony tany teto, Jesosy efa nanan̈a fifandraisan̈a manokan̈a tamy Jehovah.

11. Nan̈ino ma Jesosy ten̈a tiany Jehovah?

¹¹ Jesosy io ten̈a tiany Jehovah, fotony izy voanalohany raha niasainy. Zen̈y mahavy Baiboly mivolan̈a fa izy “talan̈olo amy raha jiaby niasain̈y.” * (Kolosianina 1:15) Jesosy io koa ten̈a tiany Jehovah, fotony tsisy naman̈a Jehovah niasa izy. “Zanany lahitokana” ivolan̈any zen̈y amy Baiboly ao. (Jaona 3:16) Izy zaraiky fo koa nampiasainy Jehovah niasa raha jiaby. (Kolosianina 1:16) “Ny Teny” koa ikahian̈a Jesosy, fotony Jehovah nampiasa izy nitondra hafatra ndreky toromariky handeha amindro anjely aby io ndreky aminolombelon̈o.—Jaona 1:14.

12. Ino ahaizantsika fa Jehovah ndreky Jesosy io tsy mira?

¹² Olo sasany mivolan̈a fa Jehovah ndreky Jesosy io mira. Tsy zen̈y raha ampianariny Baiboly. Koran̈iny ao fa Jesosy io niasain̈y, ke dikanizen̈y izy nisy fanombohany. Jehovah ndraiky efa nisy fo letrizay. Izy niasa raha jiaby. (Salamo 90:2) Jesosy io Zanaka Zan̈ahary, fa izy tsiary ty ho mira amy Zan̈ahary zen̈y. Baiboly mampianatra fa Baba bebe toizay Zanaka. (Vakia Jaona 14:28; 1 Korintianina 11:3.) Jehovah zaraiky fo “Farany  Mahery.” (Genesisy 17:1) Tsisy mahadin̈y angovonany.—Zahava Fan̈azavan̈a 14.

13. Nan̈ino Baiboly mivolan̈a fa Jesosy io “sorany Zan̈ahary tsy hita maso”?

¹³ Jehovah ndreky Jesosy Zanany io niaraka niasa mare tan̈atiny antapitrisany taon̈o, talohany niasan̈a lan̈itry ndreky tany. Iro ten̈a nifankatia ankitin̈y! (Jaona 3:35; 14:31) Jesosy nangala tahaka toetriny Jehovah, ke zen̈y mahavy Baiboly mivolan̈a fa Jesosy io “sorany Zan̈ahary tsy hita maso.”—Kolosianina 1:15.

14. Karakory nataony Jehovah nahavy Zanany ten̈a tiany io nateraka nanjary olombelon̈o?

¹⁴ Jesosy ndray Zanaka ten̈a tiany Zan̈ahary, izy nan̈eky antsitrapo hiala tandan̈itry tan̈y, nateraka nanjary olombelon̈o tambony tany teto. Akory nampety zen̈y? Jehovah nan̈ano fahagagan̈a namindra fahin̈any Jesosy tan̈aty kibony man̈angy virjiny araiky, Maria an̈arany. Izikoa zen̈y zahan̈a, tsy olombelon̈o babany Jesosy. Maria koa fa teraka, lavorary zanany, ke an̈arany tsaiky io natao Jesosy.—Lioka 1:30-35.

15. Akory hahavy anao hahay tsarabe Jehovah?

¹⁵ Hahay raha maro momba fiain̈any Jesosy ndreky toetrinany anao, izikoa mamaky amy Matio, Marka, Lioka ndreky Jaona. Filazantsara ivolan̈ana iro boky aby zen̈y. Jesosy io mira Babany andan̈itry an̈y fo, ke anao koa mamaky raha momba izy, anao hahay raha maro momba Jehovah. Zen̈y nahavy Jesosy nivolan̈a karaha ty: “Zay olo nahita zaho mira nahita Baba andan̈itry an̈y.”—Jaona 14:9.

16. Ino ma raha nampianariny Jesosy? Baka aminjovy ma raha nampianariny io?

 ¹⁶ Maro olo nikaiky Jesosy “Papianatra.” (Jaona 1:38; 13:13) “Vaovao tsara momba Fanjakan̈any Zan̈ahary” an̈isany raha ten̈a nampianariny. Ino ma Fanjakan̈a io? Izio Fanjakan̈a andan̈itry an̈y, hanjaka amy tany jiaby ndreky hitahy olo man̈araka volan̈a Zan̈ahary. (Matio 4:23) Baka tamy Jehovah raha jiaby nampianariny Jesosy. Izy nivolan̈a: “Raha nampianariko in̈y tsy baka aminaka, fa baka aminy araiky nan̈iraka zaho in̈y.” (Jaona 7:16) Hainy Jesosy fa tiany Jehovah olo haharen̈y vaovao tsara momba Fanjakan̈any Zan̈ahary hanjaka amy tany jiaby io.

17. Taia Jesosy nampianatra? Nan̈ino ma Jesosy nifen̈y mare nampianatra olo?

¹⁷ Taia Jesosy nampianatra? Tamy zay tany nahitany olo. Izy nampianatra tantanambe, tambanivolo, ta bazary, tamy tany fivavahanolo, ndreky tantran̈onolo. Izy tsy niambiny olo han̈aton̈o izy. Matetiky izy fo nan̈aton̈o olo. (Marka 6:56; Lioka 19:5, 6) Nan̈ino ma Jesosy nifen̈y mare ndreky nandany lera ndreky angovo nampianatra olo? Fotony hainy tsarabe raha tiany Zan̈ahary ataony, baka io koa izy nan̈araka volan̈a Babany andan̈itry an̈y fo. (Jaona 8:28, 29) Baka amy Jesosy nahinakinaka olo koa nahavy izy nitory. (Vakia Matio 9:35, 36.) Hitany baka iro pitariky fivavahan̈a aby io tsy nampianatra olo ny marin̈y momba Zan̈ahary ndreky Fanjakan̈anany. Nifen̈y mare izy nikoran̈a taminolo farany maro, fotony tiany iro haharen̈y vaovao tsara io.

18. Ino aby toetriny Jesosy ten̈a tianao?

¹⁸ Jesosy tia olo ndreky tia nikarakara iro. Izy tsara  fan̈ahy ndreky tsy niavon̈o. Ndray tsaiky madiniky tia nikoran̈a taminany. (Marka 10:13-16) Jesosy nahay nandanjalanja fo. Halany raha tsy rariny, baka io halany koa olo man̈ano risoriso. (Matio 21:12, 13) Tamy zen̈y, olo tia nampijaly man̈angy ndreky tsy nan̈aja iro foeky. Jesosy ndraiky nan̈aja man̈angy ndreky tsara fan̈ahy tamindro fo. (Jaona 4:9, 27) Jesosy koa nanetry ten̈a mare. Tandraraiky, alin̈y andra tamy zen̈y, izy nanasa vitindro pianatranany aby io, kanefa zen̈y raha tokony ho nataony ampiasa.—Jaona 13:2-5, 12-17.

19. Ino ohatra ahitan̈a fa Jesosy nahay raha nilainolo ndreky tia nan̈ampy iro?

¹⁹ Jesosy nahay raha ten̈a nilainolo, ke tiany nan̈ampy iro. Ahitan̈a zen̈y taminizy nampiasa angovo namiany Zan̈ahary izy, ke nan̈ano fahagagan̈a nampajanga olo. (Matio 14:14) Ohatra, nisy lelahy boka nan̈aton̈o izy nivolan̈a: “Izikoa tianao han̈adio zaho, ten̈a ho vitanao zen̈y.” Hainy Jesosy jaliny lelahy io ndreky raha niaretany. Izy nahinakinaka mare, ke tiany han̈ampy olo boka io. Nampariny amy zay tan̈anany, nikasihiny lelahy io, baka io izy nivolan̈a: “Tiako. Anao madiova.” Janga ankitin̈y lelahy io! (Marka 1:40-42) Asa mba hitahitanao haravoan̈any lelahy io tamy zen̈y?

20, 21. Nan̈ino ma Jesosy ten̈a modely tsara amy fan̈arahan̈a volan̈a Zan̈ahary?

²⁰ Jesosy ten̈a modely tsara alain̈y tahaka amy fan̈arahan̈a volan̈a Zan̈ahary. Ndray ino ndray ino raha nahazo izy, ndray izy tsy tianolo, izy tsy nivadiky tamy Babany andan̈itry an̈y foeky. Ohatra, Satana nitsapa finoan̈any Jesosy, fa Jesosy tsy nanota. (Matio 4:1-11)  Fianakavian̈anany sasany tsy nan̈eky fa izy Mesia, ke iro nivolan̈a fa ‘efa nisy avoa jerinany.’ Jesosy mbala nan̈ano asany Zan̈ahary fo. (Marka 3:21) Ndray izy efa nila hivonendro, izy mbala tsy nivadiky tamy Zan̈ahary fo. Izy tsiary namaly ny ratsy nataondro.—1 Petera 2:21-23.

²¹ Jesosy niaritry marary taminizy nivonenolo, fa izy mbala tsy nivadiky tamy Jehovah fo. (Vakia Filipianina 2:8.) Diniha raha niaretany talohany nifatesany. Izy nisamborindro, nisy vavolombelon̈o vandivandy nivolan̈a fa izy zen̈y nan̈asaha, nisy pitsara tia risoriso nan̈asazy izy, olo maro nan̈adroadro izy, baka io maramila nampijaly izy ndreky namantsiky izy taminy hazofijalian̈a. Koa fa hofoaty, izy nivolan̈a: “Vita!” (Jaona  19:30) Telo andra nifatesany, Jehovah namelon̈o izy, ke izy nanjary anjely. (1 Petera 3:18) Koa fa afaka herin̈iandra vitsivitsy, izy nimpody tandan̈itry tan̈y, ‘nipetraka tankavanan̈a Zan̈ahary’, niambin̈y Zan̈ahary han̈ano izy Panjaka.—Hebreo 10:12, 13.

22. Ino raha ho azontsika, baka amy Jesosy tsy nivadiky tamy Babany andan̈itry an̈y?

²² Baka amy Jesosy tsy nivadiky tamy Babany andan̈itry an̈y mahavy atsika izioty man̈anten̈a hahazo fiain̈ana tsisy farany amy paradisa ambony tany, efa nivolan̈iny Jehovah in̈y. Hianarantsika amy toko fan̈araka ty, nan̈ino Jesosy naty in̈y mety hahavy atsika ho velon̈o tsisy farany.