ANAO koa mizaha gazety, tele, na mitandren̈y radio, matetiky misy koran̈a famonoan̈a olo, ady ndreky fampitahoran̈a fo ao. Anao koa mety marary na mety efa naty havan̈a.

Man̈ontania karaha ty:

• Efa ty ma raha tiany Zan̈ahary hatao zaho ndreky ry havako?

• Aia mety mahavoavaha raha manahiran̈a zaho?

• Ten̈a fiadanan̈a zen̈y ma raha mbala ho hisy?

Mahafapo valiny fan̈ontanian̈a aby io amy Baiboly.

• Olo tsy haneteko, tsy hatoe, baka io tsy hofoaty eky.—Apokalypsy 21:4

• “Olo malemy vity hahavita han̈aniky bongo mira serfa in̈y.” —Isaia 35:6

• “Olo gila hahita.” —Isaia 35:5

•  Olo maty hivilomin̈y. —Jaona 5:28, 29

• Tsisy olo harary eky. —Isaia 33:24

• Olo jiaby ho ampy hanin̈y. —Salamo 72:16

Anao mety hivolan̈a fa tsy marin̈y raha koran̈iny amy voanalohany amy boky ty. Zan̈ahary nivolan̈a fa ten̈a tsy ho ela izy han̈atanteraka raha aby zen̈y ambony tany eto. Baiboly man̈azava akory han̈anovany zen̈y.

Mbala mandilatra zen̈y raha koran̈iny Baiboly. Izio man̈ambara raha mila haintsika, baka atsika ho sambatra ankitin̈y ndreky hankafy fiain̈ana rango izioty. Aleva onon̈o ino aby raha mampiasa loha anao izioty. Mety ho raha momba vola zen̈y, na anao mety tsy salama, na anao mety efa naty havan̈a. Baiboly mety man̈ampy anao hiatriky raha aby zen̈y, baka io koa hankahery anao, fotony izio mamaly fan̈ontanian̈a aby ty:

• Ino ma mahavy jaly io?

• Akory ataontsika hamaha raha manahiran̈a atsika?

• Akory hampasambatra tokantran̈o?

• Man̈ano karakory ma olo koa fa maty?

• Mbala hifanojy iro havantsika efa naty aby in̈y ma atsika?

• Nan̈ino atsika matoky fa ho vitany Zan̈ahary han̈ano raha jiaby efa nivolan̈iny?

 Matoky zahay fa matoa anao mamaky boky ty, tianao hahay raha ampianariny Baiboly. Han̈ampy anao amy zen̈y boky ty. Misy fan̈ontanian̈a isaka fehintsoratra, baka mazava aminao raha koran̈iny Baiboly. Efa antapitrisany olo tia mianatra izy ty miaraka amy Vavolombelon̈o Jehovah. Karaha zen̈y koa tianay hataonao. Hitahindran̈ahary anao, baka hahita raha mety ampianariny Baiboly anao!