1. Ino raha mety hiritriretinao, anao koa fa nianatra boky ty?

EFA maro fahamarin̈ana baka amy Baiboly nianaranao tamy boky ty. Efa hainao izioty fa Zan̈ahary han̈amia atsika fiain̈ana tsisy farany, olo maty tsisy raha hainy, ndreky olo maty mbala ho velon̈o. (Mpitoriteny 9:5; Lioka 23:43; Jaona 5:28, 29; Apokalypsy 21:3, 4) Anao mety efa man̈aton̈o fivorian̈any Vavolombelon̈o  Jehovah, fotony anao man̈eky fa iro io man̈araka fivavahan̈a marin̈y. (Jaona 13:35) Anao koa mety efa nanomboko mihavan̈a tsarabe amy Jehovah, ke mety ho efa nanapakevitry fa hanompo izy. Anao amy zay mety hieritreritry: ‘Ino raha tokony hataoko izioty hanompoan̈a Zan̈ahary?’

2. Nan̈ino ma lelahy etiopianin̈y io nangataka hatao batisa?

² Karaha zen̈y raha tan̈aty jeriny lelahy etiopianin̈y araiky tamy faha Jesosy. Tsy elany namiloman̈a Jesosy, nisy pianatra Jesosy araiky, Filipo an̈arany, nitory taminany. Nazavainy Filipo taminany fa Jesosy io Mesia. Niditry tsarabe tan̈aty fony lelahy io raha nianarany zen̈y, ke tio fo izy nivolan̈a: ‘Io misy rano, ke ino koa raha mbala tsy han̈anovan̈a batisa zaho?’—Asan’ny Apostoly 8:26-36.

3. a) Nirahiny Jesosy nan̈ino pianatranany aby io? b) Karakory tokony han̈anovana batisa io?

³ Ampianariny Baiboly mazava fa anao koa man̈iry hanompo Jehovah, anao tokony hatao batisa. Jesosy nivolan̈a tamy pianatranany aby io: “Mandihana mampianatra olo amy firenena jiaby, baka io iro ataova batisa.” (Matio 28:19) Jesosy koa nan̈amia modely, fotony izy natao batisa. Ain̈inany jiaby najibiky tandrano, fa tsy lohanany fo nidin̈ana rano. (Matio 3:16) Aminandra izioty koa, izikoa misy Kristianin̈y atao batisa, ain̈inany jiaby mila ajibiky andrano.

4. Ino ma raha hainolo maro, izikoa anao atao batisa?

⁴ Anao koa atao batisa, hainolo maro fa anao ten̈a man̈iry hanjary kamaradiny Zan̈ahary ndreky man̈iry hanompo izy. (Salamo 40:7, 8) Ke anao mety han̈ontany karaha ty: ‘Mila man̈ino ma zaho, zay vo mety atao batisa?’

5. a) Ino raha voanalohany tokony hataonao, alohany anao hatao batisa? b) Ino ma antony maventy nan̈anovan̈a fivorian̈a?

⁵ Alohany anao hatao batisa, tsy maintsy mianatra momba Jehovah ndreky Jesosy. Efa man̈ano zen̈y anao, fotony efa mianatra Baiboly. (Vakia Jaona 17:3.) Baiboly mivolan̈a fa anao koa tsy maintsy “hifinoan̈a fahaizan̈a ny marin̈y” momba sitrapony Jehovah. (Kolosianina 1:9) Fivorian̈a aby ataony Vavolombelon̈o Jehovah io hahavy anao hihavan̈a tsarabe amy Jehovah. Zen̈y an̈isany antony maventy tokony tsy hanapatapahanao fivorian̈a.—Hebreo 10:24, 25.

6. Ino raha mila hainao momba Baiboly, alohany anao hatao batisa?

⁶ Jehovah tsy mivolan̈a fa mila mahay raha jiaby amy Baiboly anao vo hatao batisa. Izy tsy nan̈iraka lelahy etiopianin̈y in̈y hahay raha jiaby, zay izy vo natao batisa. (Asan’ny Apostoly 8:30, 31) Atsika io koa mbala hianatra raha momba Jehovah fo mandrakizay. (Mpitoriteny 3:11) Ke anao koa fa mahay ndreky man̈eky raha ten̈a ampianariny Baiboly, anao efa mety hatao batisa.—Hebreo 5:12.

7. Nan̈ampy anao han̈ino fianaranao Baiboly?

⁷ Baiboly mivolan̈a: “Izikoa tsy raha baka amy finoan̈a, tsisy raha mety atao eky hazahoan̈a sitraka amy Zan̈ahary.” (Hebreo 11:6) Ke anao mila mino tsarabe, zay vo mety hatao batisa. Baiboly mivolan̈a fa olo sasany ta Korinto tan̈y naharen̈y raha nampianarindro pianatra Jesosy aby io, ke iro ‘nino ndreky natao batisa.’ (Asan’ny Apostoly 18:8) Fianaranao Baiboly koa nahavy anao hino fampan̈antinan̈any Zan̈ahary ndreky soron̈o nataony Jesosy, han̈adoso atsika amy fahotan̈a ndreky fahafatesan̈a.—Josoa 23:14; Asan’ny Apostoly 4:12; 2 Timoty 3:16, 17.

8. Ino raha tokony handrisiky anao hikoran̈a aminolo raha nianaranao?

⁸ Ho fatatra finoan̈anao, izikoa anao mianatra raha maro amy Baiboly io ndreky mizaha raha nahatsara fiain̈ananao baka tamy fianaranao izio. Ho tianao hikoran̈a aminolo raha nianaranao. (Jeremia 20:9; 2 Korintianina 4:13) Ke azovy aby olo tokony hikoran̈anao?

9, 10. a) Azovy aby mety hikoran̈anao raha nianaranao? b) Izikoa anao mba man̈iry hitory miaraka amy fiangonan̈a, ino raha tokony hataonao?

⁹ Anao mety han̈iry hikoran̈a raha nianaranao amy fianakavianao, kamaradinao, jiraninao na olo miaraka miasa aminao. Tsara zen̈y, fa anao fo tokony ho tsara fan̈ahy ndreky han̈aja fo, koa fa mikoran̈a amindro. Koa fa mandeha fotoan̈a, anao amy zay mety manomboko mitory miaraka amy fiangonan̈a. Anao koa fa von̈ono han̈ano zen̈y, koràn̈a Vavolombelon̈o Jehovah mampianatra Baiboly anao. Izikoa anao hitany fa von̈ono ndreky miain̈y mifan̈araka amy fitsipiky Baiboly, hisy antipan̈ahy aroe hikoran̈a aminaro.

¹⁰ Ino ma raha hikoran̈inaro io? Iro antipan̈ahy aby io hikoran̈a aminao, ahitandro izikoa mazava aminao ndreky inoanao raha ten̈a ampianariny Baiboly. Zahandro koa asa anao efa man̈araka raha koran̈iny Baiboly amy fiain̈ananao isanandra, ndreky asa ten̈a tianao hanjary Vavolombelon̈o Jehovah. Aza adin̈a fa iro antipan̈ahy aby io ten̈a mikarakara olo jiaby amy fiangonan̈a, an̈atinizen̈y anao. Ke aza mavozo hikoran̈a amindro. (Asan’ny Apostoly 20:28; 1 Petera 5:2, 3) Koa fa vita koran̈anaro io, iro antipan̈ahy aby io hivolan̈a aminao izikoa anao efa mety mitory miaraka amy fiangonan̈a.

11. Nan̈ino ma ten̈a mila miova anao, zay vo mety mitory miaraka amy fiangonan̈a?

 ¹¹ Iro antipan̈ahy aby io mety han̈azava aminao fa mbala misy raha tokony hivoanao, alohany anao hitory miaraka amy fiangonan̈a. Nan̈ino ma ten̈a ilain̈y zen̈y? Fotony anao misolo ten̈a Jehovah, koa fa mikoran̈a aminolo raha momba izy, ke tsy maintsy manan̈a fiain̈ana man̈amia voninahitry izy.—1 Korintianina 6:9, 10; Galatianina 5:19-21.

12. Nan̈ino ma olo jiaby mila mibebaka?

¹² Misy raha hafa koa tokony hataonao, alohany anao mety hatao batisa. Apostoly Petera nivolan̈a: ‘Ke mibibaha baka io mimpodiana hamonoan̈a fahotan̈anaro.’ (Asan’ny Apostoly 3:19) Ino ma dikany mibebaka zen̈y? Dikanizio, manen̈iny nan̈ano raha tsy mety. Ohatra, izikoa anao taloha nijangajanga, anao mila mibebaka. Ndray anao efa nan̈ano ny tsara taloha, anao mbala mila mibebaka fo, fotony atsika jiaby io panota aby, ke mila Jehovah man̈ambela hadisovan̈antsika.—Romanina 3:23; 5:12.

13. Ino dikany mimpody zen̈y?

¹³ Ke efa ampy edy ma izikoa fa manen̈iny amy raha natao taloha? Tsy ampy. Petera koa nivolan̈a fa anao mbala mila mimpody. Dikanizen̈y, anao mila miala amy fitondranten̈a ratsy, baka io man̈ano ny marin̈y. Karaha ty mety han̈azavan̈a zen̈y: Ohatra, anao amy lalan̈a handeha amy tany tsiary nimboanao. Koa fa loso lavidavitry, hainao fa anao very lalan̈a. Akory hataonao? Mijanon̈o moramora anao mangala onondraha, mimpody, baka io man̈araka lalan̈a ten̈a izy. Mira zen̈y koa anao, koa fa mianatra Baiboly. Mety ho hitanao fa misy raha  ratsy mahazatra anao, ke mila ivoan̈a. “Mimpodiana”, ke hivoà raha jiaby mila hivoan̈a, baka io man̈anova raha mifan̈araka amy fahamarin̈ana.

14. Karakory ataonao manokanten̈a amy Jehovah?

¹⁴ Fanokan̈anten̈a amy Jehovah io dingana farany maventy, alohany batisa. Dikanizen̈y, anao zaraiky mivavaka amy Jehovah, ke mivolan̈a aminany fa hanompo izy zaraiky fo ndreky han̈ano sitraponany voalohantoeran̈a amy fiain̈ananao.—Deoteronomia 6:15.

15, 16. Ino raha mandrisiky olo araiky hanokanten̈a amy Jehovah?

¹⁵ Izikoa mivolan̈a amy Jehovah fa hanompo izy zaraiky fo, mira anao mivolan̈a aminolo araiky tianao fa anao tsy hiala izy foeky. Aleva onon̈o lelahy ndreky man̈angy araiky miaraka. Arakaraka ahaizany lelahy io man̈angy io, mahay tiany fo izy, ke farany alainy vady mariazy. Hainy lelahy io fa fanapahankevitry maventy raha zen̈y, fotony hitombo andraikitrinany. Ndray zen̈y, hitany mahivan̈a fo izio, fotony man̈angy io ten̈a tiany.

¹⁶ Arakaraka ahaizanao Jehovah koa hampitombo fitiavanao izy, ke zen̈y mandrisiky anao hanompo izy eraka ny vitanao. Hahavy anao han̈ano vavaka manokan̈a zen̈y, hivolan̈ana aminany fa anao hanompo izy. Baiboly mivolan̈a fa lan̈iany olo man̈iry han̈aradia Jesosy, “tsy mila man̈eky ain̈inany.” (Marka 8:34) Ino ma dikanizen̈y? Zen̈y mivolan̈a fa anao han̈araka volan̈a Jehovah fo amy fiain̈ananao jiaby. Tsy raha tianao ndreky tanjon̈onao eky raha ho ten̈a maventy aminao, fa han̈ano raha tiany Jehovah.—Vakia 1 Petera 4:2.

17. Ino mahavy olo sasany tsy manokanten̈a amy Jehovah?

¹⁷ Olo sasany tsy mety manokanten̈a amy Jehovah, fotony iro mavozo mare tsao tsy hahavita hanompo izy. Tsy tiandro koa iro tsao hampalahelo Jehovah, na tsao hisaziny Jehovah amy raha ataondro.

18. Ino raha hahavy anao tsy havozo loatra tsao tsy hamparavoravo Jehovah?

¹⁸ Fitiavanao Jehovah han̈ampy anao tsy havozo loatra tsao tsy hamparavoravo izy. Fitiavanao izy handrisiky anao han̈ano eraka ny efanao, baka anao tsy hivadiky amy volan̈anao taminany. (Mpitoriteny 5:4; Kolosianina 1:10) Tsy ho hitanao sarotro loatra amy zen̈y man̈ano sitrapony Jehovah. Apostoly Jaona nanoratra karaha ty: “Dikany tia Zan̈ahary zen̈y, mitandrin̈y didinany, fa didinany io fo tsy mavesatra.”—1 Jaona 5:3.

19. Nan̈ino ma anao tsy tokony havozo hanokanten̈a amy Jehovah?

¹⁹ Tsy voatery ho lavorary anao, zay vo hahavita hanokanten̈a amy Jehovah. Izy tsiary nitaky raha tsy vitantsika. (Salamo 103:14) Izy han̈ampy anao han̈ano ny marin̈y. (Isaia 41:10) Matokisa Jehovah amy fonao jiaby, fa “hataony mandeha mahitsy fiain̈ananao.”—Ohabolana 3:5, 6.

20. Anao koa fa baka manokanten̈a amy Jehovah, ino raha mila hataonao?

²⁰ Ke akory anao, efa von̈ono hanokanten̈a amy Jehovah? Anao koa fa baka nanokanten̈a tamy Jehovah, anao efa von̈ono han̈ano dingana fan̈araka. Anao mila hatao batisa.

21, 22. Karakory han̈anovanao ‘fan̈ambaran̈a aminolo jiaby’ finoan̈anao?

 ²¹ Koràn̈a aminy antipan̈ahy pandamin̈y fa anao efa nanokanten̈a tamy Jehovah, ke man̈iry hatao batisa. Izy amy zay han̈ano programo baka hisy antipan̈ahy sasany hiaraka handiniky aminao raha ten̈a ampianariny Baiboly. Izikoa anao hitandro fa efa mety hatao batisa, iro hivolan̈a aminao fa anao hatao batisa amy fivoriambe. Pan̈ano kabarony batisa amy zen̈y han̈ontany  raha aroe anaro jiaby hatao batisa. Aminy anao mamaly fan̈ontanian̈a aby io ‘han̈anovanao fan̈ambaran̈a aminolo jiaby’ finoan̈anao.—Romanina 10:10.

²² Anao koa fa atao batisa, ain̈inao jiaby ajibiky andrano. Ho hitanolo jiaby fa anao efa nanokanten̈a tamy Jehovah, ke manomboko amy zen̈y anao manjary Vavolombelon̈o Jehovah.

23. Ino ma dikany atao batisa “aminy an̈arany Baba andan̈itry an̈y, ndreky aminy an̈arany Zanaka, ndreky aminy an̈arany fan̈ahy masin̈y”?

²³ Jesosy nivolan̈a fa pianatranany jiaby mila atao batisa “aminy an̈arany Baba andan̈itry an̈y, ndreky aminy an̈arany Zanaka, ndreky aminy an̈arany fan̈ahy masin̈y.” (Vakia Matio 28:19.) Ino ma dikanizen̈y? Zen̈y mivolan̈a fa olo hatao batisa io man̈eky fahifan̈any Jehovah ndreky toeran̈any Jesosy amy fikasan̈any Zan̈ahary, baka io man̈eky koa fa fan̈ahy masin̈y io ampiasainy Zan̈ahary an̈atantirahany sitraponany.—Salamo 83:18; Matio 28:18; Galatianina 5:22, 23; 2 Petera 1:21.

24, 25. a) Ino ma dikany batisa io? b) Ino raha hikoran̈iny toko farany amy boky ty?

²⁴ Batisa io misy dikany maventy. Anao koa fa ajibiky an̈aty rano, zen̈y mivolan̈a fa anao mira naty, fotony nialanao fiain̈ananao taloha. Anao ndraiky koa aboaka baka an̈aty rano, anao hanomboko fiain̈ana vaovao, han̈ano sitrapony Zan̈ahary. Zen̈y mivolan̈a fa anao hanompo Jehovah manomboko amy zen̈y. Aleva onon̈o fa anao tsy nanokanten̈a taminolo, na fikambanan̈a, na asa. Anao nanokan̈a fiain̈ananao tamy Jehovah.

²⁵ Anao koa manokanten̈a amy Jehovah, anao hanjary hinaman̈a tsarabe aminany. (Salamo 25:14) Zen̈y tsy mivolan̈a fa olo araiky koa fa vita batisa efa voavonjy edy. Apostoly Paoly nanoratra karaha ty: ‘Mifen̈a mare fo amy tahotro ndreky horohoro, hazahoanaro famonjian̈a anaro.’ (Filipianina 2:12) Batisa io mbala vo fanombohany fanompoan̈a Zan̈ahary fo. Ke akory tokony hataonao, baka anao hihavan̈a tsarabe amy Jehovah fo? Hamaly zen̈y toko farany amy boky ty.