TOKO 8
Ino ma Fanjakan̈any Zan̈ahary Zen̈y?
1. Ino vavaka hainolo maro hidinihintsika?
MARO olo mahay vavaka malaza Rainay Izay any An-danitra, na Vavaka Nampianariny Tompo in̈y. Izio nampiasainy Jesosy nampianaran̈a pianatranany aby io fomba tokony hivavahan̈a. Momba ino vavakanany io? Nan̈ino vavaka nataony io ten̈a ilaintsika izioty?
2. Ino raha telo maventy nirahiny Jesosy angatahin̈y, atsika koa fa mivavaka?
2 Jesosy nivolan̈a: “Karaha ty ataova koa fa mivavaka: ‘Anao Babanay andan̈itry an̈y, irarian̈a an̈aranao ho masin̈y. Irarian̈a ho avy Fanjakan̈anao. Irarian̈a hatao ambony tany eto koa sitraponao, karaha andan̈itry an̈y.’ ” (Vakia Matio 6:9-13.) Nan̈ino Jesosy nampianatra atsika hivavaka momba raha telo io?—Zahava Fan̈azavan̈a 20.
3. Ino raha mila haintsika momba Fanjakan̈any Zan̈ahary?
3 Efa nianarantsika fa Jehovah an̈arany Zan̈ahary. Efa nikoran̈intsika koa fikasan̈any Zan̈ahary momba tany ndreky olombelon̈o. Ino fo ma raha tiany Jesosy koran̈iny, taminizy nivolan̈a: “Irarian̈a ho avy Fanjakan̈anao”? Hianarantsika ino ma Fanjakan̈any Zan̈ahary io, ndreky raha hataonizio, baka io fomba hankamasinanizio an̈arany Zan̈ahary.
INO MA FANJAKAN̈ANY ZAN̈AHARY ZEN̈Y?
4. Ino ma Fanjakan̈any Zan̈ahary zen̈y, baka io azovy Panjakanizio?
4 Jehovah nanangana fanjakan̈a andan̈itry an̈y, ke Jesosy nifidiny natao Panjakanizio. Fanjakan̈any Zan̈ahary ikahiany Baiboly izio. Jesosy “Panjakany panjaka ndreky Tompony tompo.” (1 Timoty 6:15) Jesosy mahavita raha tsara lavitry mandilatra raha vitany pitondra olombelon̈o jiaby, baka io koa izy mbala mahery lavitry mandilatra iro jiaby.
5. Baka aia ma Fanjakan̈any Zan̈ahary io hanjaka? Hanjaka aia izio?
5 Efapolo andra tafarany Jesosy nivilomin̈y, izy nimpody tandan̈itry tan̈y. Tafaranizen̈y Jehovah nifidy izy hanjary Panjakany Fanjakan̈a io. (Asan’ny Apostoly 2:33) Baka andan̈itry an̈y Fanjakan̈any Zan̈ahary io hanjaka amy tany jiaby. (Apokalypsy 11:15) Zen̈y mahavy Baiboly mivolan̈a izio “fanjakan̈a andan̈itry an̈y.”—2 Timoty 4:18.
6, 7. Nan̈ino ma Jesosy io Panjaka tsara mandilatra panjaka jiaby?
6 Baiboly mivolan̈a fa Jesosy mahery mandilatra panjaka olombelon̈o jiaby, fotony “izy zaraiky fo tsy mahay maty.” (1 Timoty 6:16) Pitondra olombelon̈o jiaby mahay maty aby, fa Jesosy ndraiky efa tsy hofoaty eky. Dikanizen̈y, tsy ho hisy farany koa hatsaran̈a jiaby hataony Jesosy amintsika.
7 Jesosy io Panjaka tsara fan̈ahy ndreky mahay mahinakinaka olo. Karaha ty volan̈iny Baiboly momba zen̈y: “Fan̈ahy masin̈y Jehovah aminany, ke zen̈y mahavy izy misain̈y, mahazo onondraha, mahery, mahay raha, mahay man̈amia torohevitry ndreky matahotro Jehovah. Izy man̈ano raha mamparavoravo Jehovah, fotony izy matahotro Jehovah. Izy koa fa mitsara, mandiniky tsarabe fa tsy ankadalainy raha hitany masonany ndreky raha ren̈iny sofin̈inany. Izy koa fa hitsara olo masikiny, tsarainy eraka ny marin̈y.” (Isaia 11:2-4) Panjaka karaha zen̈y ten̈a tiantsika, sa karakory?
8. Akory ahaizantsika fa hisy olo hiaraka hanjaka amy Jesosy?
8 Zan̈ahary nifidy olombelon̈o sasany hiaraka hanjaka amy Jesosy andan̈itry an̈y. Ohatra, apostoly Paoly nivolan̈a tamy Timoty: “Atsika koa mahadin̈y miaritry, atsika hiaraka hanjaka aminany.” (2 Timoty 2:12) Olo firy ma hiaraka hanjaka amy Jesosy io?
9. Firy iro hiaraka hanjaka amy Jesosy? Rango ombian̈a Zan̈ahary nanomboko nifidy iro io?
9 Nianarantsika tamy Toko faha-7 fa apostoly Jaona nahita Jesosy Panjaka andan̈itry an̈y, baka io nisy panjaka 144 000 niaraka taminany. Azovy ma iro 144 000 aby io? Nazavainy Jaona fa ‘nisy an̈arany Jesosy ndreky an̈arany Baba andan̈itry an̈y tamy laharandro.’ Nivolan̈iny koa: “Iro nan̈araka zay tany nimboany [Jesosy] Zanaka Ondrikondriky io. Iro io nivangain̈y baka taminolombelon̈o.” (Vakia Apokalypsy 14:1, 4.) Iro 144 000 aby io Kristianin̈y tsy mivadiky nifidiny Zan̈ahary, “hanjary panjaka hitondra tany ty”, hiaraka hanjaka amy Jesosy. Iro io koa fa maty, iro hivilomin̈y hengo andan̈itry an̈y. (Apokalypsy 5:10) Rango tamy faha apostoly, Jehovah nanomboko nifidy Kristianin̈y tsy mivadiky ho an̈isandro panjaka 144 000 aby io.
10. Nan̈ino atsika mivolan̈a fa tia atsika Jehovah matoa nifidy Jesosy ndreky iro 144 000 aby io hitondra olombelon̈o?
10 Jehovah ten̈a mikarakara atsika, ke zen̈y nahavy izy nifidy olombelon̈o hiaraka hanjaka amy Jesosy. Panjaka tsara Jesosy, fotony hainy raha ilaintsika. Izy efa navy olombelon̈o ndreky efa nijaly. Paoly nivolan̈a fa Jesosy mahay raha mahazo atsika, “mahay mahinakinaka atsika amy raha mampalemy atsika, fotony izy efa nitsapain̈y tamy raha maro karaha atsika koa.” (Hebreo 4:15; 5:8) Iro 144 000 aby io koa mahay tsarabe karakory olombelon̈o zen̈y, fotony iro io efa navy tsy lavorary ndreky efa navy narary. Zen̈y mahavy atsika matoky fa hainy Jesosy ndreky iro 144 000 aby io raha mahazo atsika ndreky raha manahiran̈a iaretantsika.
INO RAHA HATAONY FANJAKAN̈ANY ZAN̈AHARY?
11. Nan̈ino Jesosy nampianatra pianatranany hivavaka baka sitrapony Zan̈ahary hatao andan̈itry an̈y?
11 Nan̈ino ma Jesosy nampianatra pianatranany hivavaka, baka sitrapony Zan̈ahary hatao andan̈itry an̈y? Nianarantsika tamy Toko faha-3 fa Satana Devoly nanohitry Jehovah. Tafaranizio, mbala nambelany Jehovah fo Satana ndreky iro anjely ratsy aby io, na demony aby io, nijanon̈o tandan̈itry tan̈y. Zen̈y mivolan̈a fa tsy anjely jiaby tandan̈itry tan̈y nan̈ano sitrapony Jehovah. Amy Toko faha-10 atsika hianatra raha maro momba Satana ndreky iro demony aby io.
12. Ino raha aroe maventy tantarainy Apokalypsy 12:10?
12 Baiboly man̈azava fa Jesosy koa fa nahazo fahifan̈a hitondra, izy niady tamy Satana. (Vakia Apokalypsy 12:7-10.) Andininy faha-10 mitantara raha aroe maventy nisy tamy zen̈y: Jesosy Kristy vo nanjaka tamy Fanjakan̈any Zan̈ahary taminio, baka io Satana natsipy tamy tany tatỳ. Mbala hianarantsika fa efa nandalo raha aby zen̈y.
13. Nan̈ano karakory tandan̈itry tan̈y, Satana koa fa natsipy baka tan̈y?
13 Koran̈iny Baiboly haravoan̈any anjely aby tsy nivadiky tandan̈itry tan̈y, Satana ndreky iro demony aby io koa fa natsipy baka tan̈y. Karaha ty raha vakintsika ao: “Miravoravoa anaro jiaby mipetraka andan̈itry an̈y!” (Apokalypsy 12:12) Ten̈a misy fiadanan̈a ndreky firaisantsain̈y andan̈itry an̈y izioty, fotony iro jiaby an̈y man̈ano sitrapony Zan̈ahary aby.
Feno antambo tambony tany tatỳ, Satana ndreky iro demony aby io koa fa niroasin̈y baka tandan̈itry tan̈y. Tsy ho ela raha jiaby zen̈y tsy ho hisy eky
14. Satana koa fa natsipy tambony tany tatỳ, nan̈ano karakory fiain̈ana teto?
14 Tsy mitovy amy zen̈y foeky fiain̈ana ambony tany eto. Maro haratsian̈a manjaka aminolo ‘fotony Devoly loso atỳ, meloko mare. Hainy baka fa hely fo andranany tavela.’ (Apokalypsy 12:12) Satana meloko mare. Izy natsipy baka tandan̈itry tan̈y, baka io hainy koa fa tsy ho ela izy hivonen̈y. Ke ataony raha jiaby baka hisiany korontan̈a, alahelo, ndreky jaly erantany.
15. Ino ma fikasan̈any Zan̈ahary amy tany ty?
15 Mbala tsy niova fikasan̈any Zan̈ahary amy tany ty. Tiany hisy olombelon̈o lavorary hiain̈y tsisy farany amy Paradisa ambony tany eto. (Salamo 37:29) Ke akory han̈anovany Fanjakan̈any Zan̈ahary zen̈y?
16, 17. Ino raha koran̈iny Daniela 2:44 amintsika momba Fanjakan̈any Zan̈ahary?
16 Faminanian̈a amy Daniela 2:44 mivolan̈a: “Aminandrandro panjaka aby io, Zan̈ahariny lan̈itry hanangana fanjakan̈a tsy ho ravan̈a mandrakizay, baka io fanjakan̈a io tsy ho azonolo hafa. Izio hanorotoro ndreky han̈afoan̈a fanjakan̈a jiaby io, ke izio zaraiky fo ho tavela mandrakizay.” Ino raha ianarantsika baka amy zen̈y momba Fanjakan̈any Zan̈ahary?
17 Voanalohany, Fanjakan̈any Zan̈ahary hanomboko hanjaka “aminandrandro panjaka aby io.” Dikanizen̈y, olombelon̈o mbala mitondra, efa manomboko manjaka edy Fanjakan̈any Zan̈ahary. Faharoe, Fanjakan̈any Zan̈ahary io tsy ho ravan̈a mandrakizay, ke tsy hisoloan̈a fanjakan̈a hafa eky. Fahatelo, hisy ady hataony Fanjakan̈any Zan̈ahary amy fanjakan̈anolombelon̈o. Handresy Fanjakan̈any Zan̈ahary, ke izio zaraiky fo hanjaka amy tany jiaby. Tsiary ho nisy Fanjakan̈a tsarabe karaha zen̈y ambony tany eto.
18. Ino an̈arany ady farany hataony Fanjakan̈any Zan̈ahary ndreky fanjakan̈anolombelon̈o?
18 Karakory hataony Fanjakan̈any Zan̈ahary hanjaka amy tany jiaby? Hisy ady farany, Haramagedona ikahiany Baiboly izio. Fa alohanizen̈y, iro demony aby io hamitaka “iro panjaka jiaby ambony tany baka iro havory aminandra maventy iadivany Zan̈ahary Farany Mahery.” Fanjakan̈anolombelon̈o amy zen̈y hiady amy Fanjakan̈any Zan̈ahary.—Apokalypsy 16:14, 16; zahava Fan̈azavan̈a 10.
19, 20. Nan̈ino ma atsika mila Fanjakan̈any Zan̈ahary hanjaka amy tany jiaby?
19 Nan̈ino ma atsika mila Fanjakan̈any Zan̈ahary? Misy antony telo farany hely ilantsika izio. Voanalohany, atsika mbala mety marary ndreky maty, fotony atsika tsy lavorary. Baiboly mivolan̈a fa Fanjakan̈any Zan̈ahary koa mitondra, atsika ho velon̈o tsisy farany. Karaha ty koran̈iny Jaona 3:16: “Be ankitin̈y fitiavany Zan̈ahary zao tontolo zao, ke namiany Zanany lahitokana baka tsy hofoaty olo jiaby man̈aboaka finoan̈a izy fa hahazo fiain̈ana tsisy farany.”
20 Faharoe, mila Fanjakan̈any Zan̈ahary atsika, fotony mahaimaro olo ratsy fan̈ahy. Maro olo mavandy ndreky mikatramo, baka io ratsy fitondranten̈a. Atsika tsy mahavita man̈adoso raha jiaby zen̈y, fa Zan̈ahary ndraiky han̈adoso izio. Ke lan̈iany olo man̈ano raha ratsy aby io, ho ripaka aminy Haramagedona. (Vakia Salamo 37:10.) Fahatelo, mila Fanjakan̈any Zan̈ahary io atsika, fotony fanjakan̈anolombelon̈o tsy mahavita raha, kafiry ndreky tia man̈ano risoriso. Tsy mahasofy iro foeky han̈ampy olo han̈araka lalàn̈any Zan̈ahary zen̈y. Volan̈iny Baiboly fa “olombelon̈o koa fa mitondra, mijaly olo indesiny.”—Mpitoriteny 8:9.
21. Akory hahavy Fanjakan̈a io hahazo antoko tsarabe fa hatao erantany sitrapony Zan̈ahary?
21 Ataony Fanjakan̈any Zan̈ahary azo antoko tsarabe fa atao erantany sitrapony Zan̈ahary, koa fa vita Haramagedona io. Ohatra, hadosonizio Satana ndreky iro demony aby io. (Apokalypsy 20:1-3) Amy zen̈y, tsisy olo harary na hofoaty eky, fotony baka amy vidipan̈avotan̈a, olo tsy mivadiky jiaby afaka hiain̈y tsisy farany amy Paradisa. (Apokalypsy 22:1-3) Hankamasin̈y an̈arany Zan̈ahary Fanjakan̈a io. Ino ma raha tianizen̈y koran̈iny? Dikanizio, Fanjakan̈any Zan̈ahary koa fa manjaka, olombelon̈o jiaby han̈amia voninahitry an̈aran̈a Jehovah.—Zahava Fan̈azavan̈a 21.
OMBIAN̈A JESOSY NANJARY PANJAKA?
22. Akory ahaizantsika fa tsendriky nanjaka Jesosy na mbala tambony tany teto, na niaraka izy nivilomin̈y?
22 Jesosy nampianatra pianatranany hivavaka karaha ty: “Irarian̈a ho avy Fanjakan̈anao.” Ho avy ankitin̈y Fanjakan̈any Zan̈ahary io. Jehovah nanangana Fanjakan̈anany io antsendriky, baka io Jesosy nataony Panjakanizio. Niaraka Jesosy navy tandan̈itry tan̈y ma efa nanjaka edy? Tsendriky. Izy mbala nila niambin̈y. Efa tafarany Jesosy nivilomin̈y, Petera ndreky Paoly nan̈azava fa tanteraka tamy Jesosy raha koran̈iny Salamo 110:1. Karaha ty raha koran̈iny Jehovah amy faminanian̈a io: “Mipitraha amy tan̈ana ankavanan̈anaka mandrapan̈anovako fahavalonao hanjary fipitrahany vitinao.” (Asan’ny Apostoly 2:32-35; Hebreo 10:12, 13) Firaka ombian̈a ma Jesosy niambin̈y Jehovah nan̈iraka izy hanjaka?
Hataony Fanjakan̈any Zan̈ahary azo antoko tsarabe fa hatao ambony tany eto sitrapony Zan̈ahary
23. a) Ombian̈a ma Jesosy nanomboko nanjaka tamy Fanjakan̈any Zan̈ahary? b) Ino raha hianarantsika amy toko fan̈araka ty?
23 Taon̈o maro talohany 1914, nisy Kristianin̈y vitsivitsy nahatakatra fa izio taon̈o miavaka koran̈iny faminanian̈a amy Baiboly. Nankamarin̈y zen̈y raha nisy erantany nanomboko taminy 1914. Nanomboko nanjaka Jesosy Panjaka tamy taon̈o io. (Salamo 110:2) Tsy ela tafaranizin̈y, Satana natsipy tambony tany tatỳ, ke “hely fo andranany tavela” izioty. (Apokalypsy 12:12) Amy toko fan̈araka ty atsika hahita raha maro mankamarin̈y fa efa miain̈y amy fotoan̈a io atsika izioty. Ho hitantsika ao koa fa tsy ho ela hataony Fanjakan̈any Zan̈ahary azo antoko tsarabe fa hatao ambony tany eto sitrapony Zan̈ahary.—Zahava Fan̈azavan̈a 22.
Mety ho Tianao Koa
TILIKAMBO FIAMBESAN̈A
Ombian̈a ma Fanjakan̈any Zan̈ahary Nikomansy Nanjaka? (Fizaran̈a 1)
Izikoa hainao valiny, asa mba hainao mampiasa Baiboly izikoa fa han̈azava izio aminolo?
