1. Baka aminjovy ma fahin̈ana io?

JEHOVAH io “Zan̈ahary velon̈o.” (Jeremia 10:10) Izy niasa atsika, ndreky nan̈amia atsika fahin̈ana. Baiboly mivolan̈a karaha ty: “Anao niasa raha jiaby. Izikoa tsy anao, raha jiaby io tsisy.” (Apokalypsy 4:11) Tiany Jehovah hiain̈y atsika. Fahin̈ana io kado tsara baka aminany.—Vakia Salamo 36:9.

2. Ino ma raha tokony hataontsika, izikoa tiantsika hitohy fo fiain̈anantsika?

² Jehovah nan̈amia raha jiaby ilaintsika amy fiain̈ana, karaha ataony hanin̈y ndreky rano. (Asan’ny Apostoly 17:28) Ten̈a tiany koa atsika hahazo hafizany fiain̈ana. (Asan’ny Apostoly 14:15-17) Izikoa tiantsika hitohy fo fiain̈anantsika, atsika mila man̈araka lalàn̈any Zan̈ahary.—Isaia 48:17, 18.

3. Nataony Jehovah karakory Kaina koa fa baka namono Abela?

³ Ampianariny Baiboly atsika fa raha ten̈a maventy amy Jehovah fahin̈anantsika ndreky ninolo. Ahitan̈a zen̈y tamy Kaina, zanaka Adama ndreky Eva, neloko mare taminy Abela zandriny. Jehovah nampitandrin̈y tsao Kaina tsy hahatana heloko. Tsy nijireny Kaina zen̈y fa nahaineloko fo izy, ke nivangoeny mare Abela, ke naty. (Genesisy 4:3-8) Nisaziny Jehovah Kaina, fotony namono Abela. (Genesisy 4:9-11) Hitantsika baka amy zen̈y fa ten̈a ratsy heloko mare loatra ndreky tsy fitiavan̈a naman̈a, fotony zen̈y mahavy olo kafiry ndreky mamono olo. Tsy hahazo fiain̈ana  tsisy farany olo karaha zen̈y. (Vakia 1 Jaona 3:15.) Izikoa tiantsika hamparavoravo Jehovah, tsy maintsy mianatra ho tia olo jiaby atsika.—1 Jaona 3:11, 12.

4. Izikoa zahan̈a lalàn̈a namiany Jehovah iro Israelita aby io, ino raha ianarantsika momba fahin̈ana io?

⁴ Andrivony taon̈o tafaranizen̈y, naboakany Jehovah fa ten̈a raha maventy aminany fahin̈ana io, taminizy nan̈amia Mosesy Didy Folo. Araiky amy lalàn̈a io: “Aza mamono olo.” (Deoteronomia 5:17) Izikoa misy olo kinia namono olo, tsy maintsy nivonen̈y koa izy.

5. Karakory fahitany Zan̈ahary fan̈adosoan̈a tsaiky?

⁵ Karakory fahitany Zan̈ahary fan̈adosoan̈a tsaiky? Ten̈a maventy aminany fahin̈ana tsaiky mbala an̈aty kibo. Tamy Lalàn̈a namiany Jehovah iro Israelita aby io, izy nivolan̈a fa izikoa nisy olo nandratra man̈angy mavesatra ke afaka anaka izy, hivonen̈y koa olo io. (Vakia Eksodosy 21:22, 23; Salamo 127:3.) Zen̈y ahaizantsika fa tsy mety man̈adoso tsaiky.—Zahava Fan̈azavan̈a 28.

6, 7. Akory han̈aboahantsika amy Jehovah fa ten̈a maventy amintsika fahin̈ana io?

⁶ Karakory han̈aboahantsika amy Jehovah fa ten̈a maventy amintsika fahin̈anantsika ndreky ninolo? Atsika tsy han̈ano raha mety handratra na hamono atsika na olo hafa. Zen̈y mahavy atsika tsy hihina lobaka ndreky sigarety, katy, jamala, fotony iro io mandrobaka ain̈intsika ndreky mamono.

⁷ Zan̈ahary nan̈amia atsika fahin̈ana ndreky vatan̈antsika io, ke izio tokony hampiasaintsika amy fomba itiavany izy. Mila karakaraintsika tsara vatan̈antsika, fotony atsika koa tsy man̈ano zen̈y, hanjary olo maloto atsika amy Zan̈ahary. (Romanina 6:19; 12:1; 2 Korintianina 7:1) Izikoa atsika tsy mijery fahin̈ana io, tsy hifan̈araka amy Jehovah nan̈amia izio fanompoan̈a ataontsika. Marin̈y ndraiky fa  mety ho sarotro miala amy mahazatra. Atsika ndraiky koa mifen̈y mare, Jehovah han̈ampy atsika, fotony ten̈a maventy amintsika koa fahin̈ana io.

8. Ino raha tokony hataontsika, baka atsika matoky fa man̈aja fahin̈anantsika ndreky ninolo?

⁸ Efa nianarantsika fa kado ten̈a maventy fahin̈ana io. Jehovah matoky fa atsika hifen̈y mare tsy han̈ano raha handrobaka fahin̈anantsika ndreky ninolo. Zen̈y mahavy atsika mikarakara mare raha anan̈antsika, karaha ataony tomabilintsika, na motontsika. Atsika koa tsy man̈ano spaoro mety handratra na hamono. (Salamo 11:5) Mitandrin̈y koa atsika, tsao fo tran̈ontsika mety handratra olo. Jehovah nan̈iraka iro Israelita aby io karaha ty: “Anao koa miasa tran̈o, asia valavala amy sisiny, baka tsy hahavy trosandio amy tran̈onao anao, fotony izikoa tsy atao zen̈y, mety handatsaka olo.”—Deoteronomia 22:8.

9. Karakory tokony ho fahitantsika fahin̈anany biby?

⁹ Misy dikany amy Jehovah koa fikarakarantsika biby aby io. Atsika imboany mamono biby, izikoa hoanin̈y na hatao lamba. Imboany koa atsika mamono biby, izikoa izio mila handratra na hamono atsika. (Genesisy 3:21; 9:3; Eksodosy 21:28) Tsy mety mamonomono biby ndreky mampijaly biby.—Ohabolana 12:10.

10. Ino ahaizantsika fa lio io mbala fahin̈ana?

¹⁰ Lio io masin̈y amy Jehovah, fotony izio fahin̈ana. Kaina koa fa namono Abela, Jehovah nivolan̈a taminany: “Mitarain̈y aminaka feony liony rahalahinao baka amy tany ao.” (Genesisy 4:10) Fahin̈any Abela raha tiany volan̈iny amy liony Abela io. Zen̈y nahavy Jehovah nan̈asazy Kaina. Koa fa vita safodrano tamy faha Noa in̈y, nimpody nikoran̈iny Jehovah ndraiky koa fa lio io fahin̈ana.  Nimboany nihina henany biby Noa ndreky vadiny ndreky ry zanany. Nivolan̈iny: “Anaro mahazo mihina raha jiaby mihetsiketsiky manampahin̈ana; iro jiaby zen̈y efa namiako anaro, karaha raha mahitso aby io.” Ndray zen̈y, iro tsy nimboany Jehovah nihina “nofotro mbala misy fahin̈ana, dikanizen̈y mbala misy lio.”—Genesisy 1:29; 9:3, 4.

11. Ino raha nivolan̈iny Jehovah tamindro Israelita aby io momba lio?

¹¹ Kadiriny 800 taon̈o nivolan̈any Jehovah fa Noa tsy mahazo mihina lio in̈y, izy nivolan̈a tamindro Israelita aby io: “Izikoa misy araiky aminy Israelita, na vahiny mipetraka aminaro mandeha mangoron̈o, ke mahazo voron̈o na biby mety hahanin̈y, lionany mila aidiny amy tany, baka io totofany fotaka.” Nivolan̈iny amy zay: “Anaro aza mihina lio.” (Levitikosy 17:13, 14) Mbala tiany Jehovah ho masin̈y taminolonany fo lio io. Iro nahazo nihina hena, fa tsy nahazo nihina lio. Iro koa fa namono biby hoanin̈y, lionany tsy maintsy nalatsaka antany.

12. Karakory tokony ho fahitany Kristianin̈y lio?

¹² Taon̈o maromaro tafarany nifatesany Jesosy, iro apostoly ndreky iro antipan̈ahy aby tamy fiangonan̈a ta Jerosalema tan̈y nivory, nanapakevitry amy raha koran̈iny Lalàn̈a namian̈a Israelita aby io, ke mbala mila arehany Kristianin̈y. (Vakia Asan’ny Apostoly 15:28, 29; 21:25.) Jehovah nan̈ampy iro hahita fa lio io mbala ten̈a maventy taminany, ke tokony ho masin̈y amindro koa. Iro Kristianin̈y taloha tan̈y tsy nahazo nihina ndreky nigiaka lio, tsy nahazo nihina biby tsy voalenta tsara. Iro koa nan̈ano zen̈y, nira nanompo sampy ndreky nijangajanga fo. Rango tamy zen̈y, ten̈a Kristianin̈y jiaby tsy man̈eky mihina ndreky tsy man̈eky migiaka lio. Aminandra izioty koa, mbala tiany Jehovah ho masin̈y amintsika koa lio io.

13. Ino mahavy Kristianin̈y tsy mety ampidiran̈a lio?

 ¹³ Ke dikanizen̈y Kristianin̈y tsy mety ampidiran̈a lio? Ia, tsy mety. Jehovah tsy man̈omba atsika mihina lio na migiaka lio. Izikoa ohatra, misy dokotera mivolan̈a aminao tsy mahazo migiaka toaka, mety anao izikoa ampidirin̈y aminy ain̈inao baka amy pikira toaka io? Anao tsy han̈eky. Mira zen̈y koa atsika. Izikoa atsika man̈araka volan̈a Jehovah tsy mahazo mihina lio ndreky migiaka lio in̈y, atsika tsy mety hampidiran̈a lio.—Zahava Fan̈azavan̈a 29.

14, 15. Nan̈ino raha ten̈a maventy amy Kristianin̈y man̈aja fahin̈ana ndreky man̈araka volan̈a Jehovah?

¹⁴ Akory ndraiky izikoa dokotera mivolan̈a fa hofoaty Kristianin̈y araiky, koa tsy ampidiran̈a lio? Olo tsiaraikiaraiky mila manapakevitry han̈araka lalàn̈any Zan̈ahary momba lio io sa tsy han̈araka. Kristianin̈y ten̈a man̈aja mare fahin̈ana namiany Zan̈ahary io, ke zen̈y mahavy atsika mifidy fitahan̈a ten̈a tsara baka ho lava haviloman̈a. Atsika fo tsy man̈eky hampidiran̈a lio.

¹⁵ Mifen̈y mare atsika mikarakara fahasalaman̈a. Ndray zen̈y, atsika tsy mety hampidiran̈a lio, fotony fahin̈ana io kado ten̈a tsara baka amy Zan̈ahary. Atsika mila man̈araka volan̈a Jehovah momba izio fa tsy han̈ano raha hankalava fiain̈ana, ke tsy han̈araka volan̈anany. Jesosy nivolan̈a: “Zay olo man̈iry hamonjy ain̈inany, tsy hahazo izy, fa lan̈iany mahatindry ain̈inany baka aminaka fo hahazo izy.” (Matio 16:25) Atsika man̈araka volan̈a Jehovah, fotony atsika tia izy. Jehovah ten̈a mahay raha mahatsara atsika. Fahin̈ana io raha maventy ndreky masin̈y aminany, ke tokony ho karaha zen̈y koa fahitantsika izio.—Hebreo 11:6.

16. Nan̈ino ma olony Zan̈ahary man̈araka volan̈anany?

¹⁶ Olo tsy mivadiky amy Zan̈ahary tapakevitry han̈araka lalàn̈anany momba lio. Iro tsy mety higiaka lio, iro tsy  hihina lio. Iro koa tsy han̈eky hampidiran̈a lio, ndray dokotera man̈iraka. * Iro ndraiky man̈eky fitahan̈a hafa, fotony iro ten̈a tia fahin̈ana. Iro man̈eky tsarabe fa Zan̈ahary niasa fahin̈ana ndreky lio io ten̈a mahay raha mahatsara iro. Asa anao mba mino fa izy mahay raha ten̈a mahatsara anao?

17. Tamy faha Israelita, ino raha araiky nirahiny Jehovah nampiasan̈a lio?

¹⁷ Tamy Lalàn̈a namiany Jehovah Mosesy, karaha ty nivolan̈iny Jehovah tamindro Israelita aby io: “Amy lio ao misy fahin̈anany nofondraha. Ke zen̈y nahavy zaho nan̈iraka anaro, ataova aminy alitara lio io handrakofan̈a fahotan̈anaro. Lio zaraiky fo mahavita mandrakotro fahotan̈a, fotony amy lio ao misy fahin̈ana.” (Levitikosy 17:11) Koa fa nanota iro Israelita aby io, iro mety nangataka familankeloko tamy Jehovah, ke nan̈ano soron̈o biby, baka io pisoron̈o namafy lionizio taminy alitara tamy tempoly. Io zaraiky fo raha nirahiny Jehovah nampiasandro Israelita aby io lio.

18. Ino raha nanjary ho azontsika baka tamy soron̈o nataony Jesosy?

¹⁸ Jesosy koa fa navy tambony tany teto, lalàn̈a momba fan̈anovan̈a soron̈o biby in̈y nisoloany ain̈inany na lionany, hazahoantsika familankeloko amy fahotan̈antsika. (Matio 20:28; Hebreo 10:1) Jesosy koa fa nivilominy Jehovah nandeha andan̈itry an̈y, nanjary niasa soron̈o nataony in̈y, fotony baka amizio nahavy Jehovah han̈amia fiain̈ana tsisy farany atsika.—Jaona 3:16; Hebreo 9:11, 12; 1 Petera 1:18, 19.

19. Ino raha mila ataontsika, baka ho “afaka amy lionolo jiaby”?

 ¹⁹ Atsika mankasitraka Jehovah nan̈amia fahin̈ana io! Tiantsika ho hainolo fa hiain̈y tsisy farany iro, izikoa mino Jesosy. Atsika tia olo, ke mitady hevitry fo hampianaran̈a iro raha tokony hatao hazahoan̈a fiain̈ana tsisy farany. (Ezekiela 3:17-21) Atsika koa man̈ano zen̈y, hahavita hivolan̈a karaha apostoly Paoly ty: “Zaho afaka amy lionolo jiaby, fotony tsy nirekireky zaho nivolan̈a taminaro sitrapony Zan̈ahary jiaby.” (Asan’ny Apostoly 20:26, 27) Man̈aja fahin̈ana ndreky lio atsika, izikoa mikoran̈a aminolo momba Jehovah ndreky man̈ambara amindro fa fahin̈ana io raha ten̈a maventy amy Jehovah.