1-3. Ino raha migadra atsika jiaby, baka io akory hataony Jehovah hankafaka atsika?

OHATRA anao nigadrain̈y mandrapahafaty tamy raha tsy nataonao. Tsisy hevitry mety hankafaka anao ao foeky. Efa tsisy raha mety hatao eky, ke anao efa tsy man̈anten̈a ho tafiboaka ao. An̈atiny anao efa malemy troko mare in̈y ndraiky misy olo von̈ono han̈avotro anao, ke izy nivolan̈a fa izy mahavita man̈aboaka anao ao! Misora ravoravo mare anao, sa karakory?

² Mira gadrainy fahafatesan̈a koa atsika io. Na ino na ino raha ataontsika, tsisy olo mahavita milefa izio. Jehovah ndraiky mahavita mankafaka atsika amy fahafatesan̈a io. Izy efa nivolan̈a fa ‘mbala hifoan̈ana fahafatesan̈a, fahavalo farany io.’—1 Korintianina 15:26.

³ Iritrireta hely baka haravoan̈anao, anao koa fa tsy hiasa lohany hofoaty zen̈y eky! Tsy fahafatesan̈a fo hadosony Jehovah, fa olo maty koa mbala hivilominy. Tsara raha zen̈y! Izy nampan̈anten̈a fa ‘olo efa maty tsy mahavita raha’, mbala ho velon̈o. (Isaia 26:19) Familoman̈a olo maty hivolan̈any Baiboly izio.

4. a) Atsika koa fa misy havan̈a na kamarady maty, ino raha mankahery atsika? b) Azovy aby kamaradiny Jesosy?

⁴ Karaha tsy ho din̈y alahelo, koa fa misy havan̈a na kamaradintsika maty. Mira tsisy angovo foeky atsika,  fotony tsy mahavita mamelon̈o izy. Baiboly ndraiky ten̈a mankahery atsika. (Vakia 2 Korintianina 1:3, 4.) Atsika hizaha ohatra araiky ahitan̈a fa Jehovah ndreky Jesosy ten̈a von̈ono hamelon̈o olo maty. Tamy Jesosy tambony tany teto, izy natetiky nandeha tamindry Lazarosy ndreky ry anabaviny aby io, Marta ndreky Maria. Iro telo io ten̈a kamaradiny Jesosy. Baiboly mivolan̈a: “Jesosy tia ry Marta ndreky rahavaviny baka io Lazarosy.” Tandraraiky, naty Lazarosy.—Jaona 11:3-5.

5, 6. a) Nan̈ano karakory Jesosy koa fa nahita havan̈a ndreky kamaradiny Lazarosy nalahelo? b) Nan̈ino mankahery atsika mahay fa Jesosy nalahelo, izikoa fa nisy olo naty?

⁵ Jesosy nandeha nankahery Marta ndreky Maria. Izikoa fa ren̈iny Marta fa Jesosy ho avy, nandeha tambelan̈a tanàna izy nitsena Jesosy. Nisava hely alahelonany izy koa fa nahita Jesosy, fa izy baka tio nivolan̈a: “Anao koa tio, tompoko anao, anadahiko in̈y tsy naty e.” Sambarany Marta efa tara loatra Jesosy. Tafaranizen̈y, Jesosy nahita Maria nitomoan̈y mare. Nalahelo mare Jesosy nahita iro nitomoan̈y, ke izy nitomoan̈y. (Jaona 11:21, 33, 35) Izy mba malahelo mare mira atsika, izikoa fa maty olo tiantsika.

⁶ Mankahery atsika mahay fa Jesosy koa mba malahelo mira atsika, izikoa fa misy olo maty. Jehovah koa malahelo karaha Jesosy, izikoa fa misy olo maty. (Jaona 14:9) Jehovah mahavita man̈adoso fahafatesan̈a mandrakizay, ke efa tsy ho ela izy han̈ano zen̈y.

7, 8. Jesosy koa fa nan̈iraka olo han̈adoso vato namody fasan̈a Lazarosy, nan̈ino Marta tsy nan̈eky? Ino amy zay raha nataony Jesosy?

⁷ Tamy Jesosy navy tamy fasan̈a Lazarosy, nisy vato  maventy namody fasan̈a io. Jesosy nivolan̈a: “Adosoanaro vato io.” Marta ndraiky tsy nan̈eky han̈adosoan̈a izio, fotony efa “efatra andra” taminio nandivenan̈a Lazarosy. (Jaona 11:39) Marta taminio tsendriky nahay raha handeha hataony Jesosy amy Lazarosy.

⁸ Jesosy nivolan̈a tamy Lazarosy: “Miboaha!” Nahagaga raha hitany Marta ndreky Maria baka tio. ‘Niboaka lelahy efa naty in̈y, tan̈anany ndreky vitinany ndreky soranany mbala nifehy lamba namon̈osan̈a izy in̈y.’ (Jaona 11:43, 44) Lazarosy velon̈o! Izy fanojy ry havany ndreky kamaradiny. Iro nitolon̈o izy, nikasiky izy ndreky nikoran̈a taminany. Ten̈a nahagaga taminio! Jesosy namelon̈o Lazarosy.

9, 10. a) Baka aminjovy nahavitany Jesosy namelon̈o olo maty? b) Nan̈ino tsara atsika mahay tantarandro naty nivilomin̈y in̈y?

⁹ Izio ma angovony Jesosy nahavitany namelon̈o olo maty aby in̈y? Ehe. Talohanizy hamelon̈o Lazarosy, izy nivavaka tamy Jehovah, ke nahazo angovo hamiloman̈a Lazarosy. (Vakia Jaona 11:41, 42.) Tsy Lazarosy zaraiky fo olo naty nivilomin̈y. Koran̈iny Baiboly koa momba tsaiky man̈angy hely kadiriny 12 taon̈o narary mare. Efa ten̈a nalemy troko Jairo babany taminy aretin̈inany, ke izy nandeha niangavy Jesosy han̈ajanga zanany io. Io zaraiky fo koa baka zanany. Taminizy mbala nikoran̈a tamy Jesosy, efa nisy lelahy araiky baka tan̈y nivolan̈a taminany: “Tsy nisy zanakanao in̈y! Efa tsisy varany eky anao mikaiky Jesosy.” Nivolan̈iny Jesosy tamy Jairo: “Anao aza mavozo, fa anao koa mino, izy mbala ho velon̈o.” Jairo ndreky Jesosy nandeha tantran̈ony Jairo tan̈y. Iro koa fa narikitry, hitany Jesosy olo jiaby nitomoan̈y. Izy  nivolan̈a: “Basy eky. Hitanaro, izy kony tsy maty fa mandry e!” Babany tsaiky io ndreky reniny lany fan̈ahy, fotony tsy nazava tamindro raha nivolan̈iny Jesosy io. Nirahiny Jesosy niboaka amy zay iro olo aby tantran̈o tao, baka io izy, Jairo fivadiany niditry tamy tany nisy faty io. Nalainy Jesosy moramora tan̈any tsaiky io, baka io izy nivolan̈a: “A tsaiky ty e, ren̈inao: ‘Mitsangàna!’ ” Misora ravoravo raimandreniny tsaiky io nahita zanakandro nahavita nitsangana ndreky nandeha! Jesosy namelon̈o zanaka Jairo. (Marka 5:22-24, 35-42; Lioka 8:49-56) Nanomboko tamy zen̈y, olo koa fa nahita tsaiky in̈y, tsaroandro edy fa Jehovah nampiasa Jesosy namelon̈o izy in̈y. *

¹⁰ Olo aby nivilominy Jesosy in̈y mbala naty fo. Tsara fo atsika mahay tantara aby in̈y, fotony atsika manjary matoky fa mbala ho velon̈o marin̈y olo maty. Tiany Jehovah hivilomin̈y ndraiky olo maty, ke zen̈y edy raha handeha hataony.

11. Ino raha ampianariny Mpitoriteny 9:5 atsika momba Lazarosy?

¹¹ Koran̈iny Mpitoriteny 9:5 mazava fa ‘olo maty tsisy raha hainy eky.’ Karaha zen̈y ankitin̈y Lazarosy koa fa naty. Jesosy nivolan̈a fa Lazarosy nira nandry mare. (Jaona 11:11) Lazarosy tampasan̈a tao, “tsisy raha hainy.”

12. Akory ahaizantsika fa Lazarosy velon̈o ankitin̈y?

 ¹² Maro olo nahita Jesosy namelon̈o Lazarosy. Ndray iro fahavalonany aby io nahay fa Jesosy nahavita namelon̈o izy. Lazarosy velon̈o. Zen̈y mivolan̈a fa hisy ankitin̈y familoman̈a olo maty zen̈y. (Jaona 11:47) Maro koa olo nandeha namangy Lazarosy, ke nanjary nino fa iraka Zan̈ahary ankitin̈y Jesosy. Tsy tiany fahavalony Jesosy aby io raha zen̈y, ke iro nitady fomba hamonoan̈a Jesosy ndreky Lazarosy.—Jaona 11:53; 12:9-11.

13. Ino mahavy atsika matoky tsarabe fa hivilominy Jehovah olo maty?

¹³ Jesosy nivolan̈a fa ‘iro jiaby ampasan̈a an̈y’ mbala hivilomin̈y. (Jaona 5:28) Dikanizen̈y, olo jiaby an̈aty fahatsiarovany Jehovah mbala ho velon̈o aby. Jehovah koa fa hamelon̈o olo araiky, tsaroany raha jiaby momba olo io. Mba marin̈y edy zen̈y va? Ia! Aleva onon̈o fa tsy voakontintsika lakintan̈a amy lan̈itry. Baiboly ndraiky mivolan̈a fa kahiany Jehovah aminy an̈arandro tsiaraikiaraiky iro lakintan̈a aby io. (Vakia Isaia 40:26.) Dikanizen̈y, tsy sarotro aminany koa mahatsiaro raha jiaby momba olo hivilominy. Jehovah niasa raha jiaby, ke atsika matoky fa izy manan̈a angovo hamiloman̈a olo maty.

14, 15. Izikoa volan̈a Joba zahan̈a, ino raha ianarantsika momba familoman̈a olo maty?

¹⁴ Joba, lelahy tsy nivadiky tamy Zan̈ahary, natoky fa olo maty mbala hivilomin̈y. Nan̈ontany karaha ty izy: “Izikoa lelahy matanjaka maty, mbala ho velon̈o fo va?” Izy amy zay nivolan̈a tamy Jehovah: “Anao hikaiky, zaho hanoin̈y, fotony efa tsy din̈inao hahita asany tan̈anao.” Dikanizen̈y, hainy Joba fa Jehovah efa miambin̈y fotoan̈a hamiloman̈a olo maty.—Joba 14:13-15.

 ¹⁵ Misora ravoravo anao mahay olo maty mbala hivilomin̈y zen̈y! Anao fo mety han̈ontany: ‘Ke akory ry havako ndreky ry namako efa naty aby in̈y, hivilomin̈y edy iro in̈y va?’ Mankahery atsika mahay fa Jehovah mbala hamelon̈o olo maty. Ho velon̈o aia ma iro io? Azovy aby olo hivilomin̈y? Hizahavantsika raha koran̈iny Baiboly momba zen̈y.

16. Olo maty aby io koa fa hivilomin̈y, efa karakory fiain̈ana ambony tany eto amy zen̈y?

¹⁶ Taloha tan̈y, iro aby nivilomin̈y in̈y fanojy havandro ndreky ry namandro tambony tany teto. Ho mira amy zen̈y koa aminy amaray an̈y, fa ho tsaratsaranizen̈y fo. Nan̈ino ma? Fotony olo hivilomin̈y ambony tany eto mety hahazo fiain̈ana tsisy farany, ke tsy hofoaty eky. Hiain̈y amy fiain̈ana tsara lavitriny hiain̈antsika izioty koa iro amy zen̈y, fotony tsy ho hisy ady, tsy ho hisy olo kafiry, baka io tsy ho hisy aretin̈y.

17. Azovy aby hivilomin̈y?

¹⁷ Azovy aby hivilomin̈y? Jesosy nivolan̈a fa ‘iro jiaby ampasan̈a an̈y haharen̈y feonany, ke iro hiboaka.’ (Jaona 5:28, 29) Karaha ty koa koran̈iny Apokalypsy 20:13: “Ranomasin̈y nan̈aboaka olo maty taminany tao, fahafatesan̈a ndreky Fasan̈a koa nan̈aboaka olo maty taminany tao.” Olo antapitrisany hivilomin̈y. Apostoly Paoly nivolan̈a fa “olo marin̈y ndreky tsy marin̈y samy mbala hivilomin̈y.” (Vakia Asan’ny Apostoly 24:15.) Ino ma dikanizen̈y?

18. Azovy ma iro “olo marin̈y” aby hivilomin̈y io?

¹⁸ An̈isany “olo marin̈y” iro olo aby nanompo Jehovah, velon̈o talohany Jesosy navy tambony tany teto. Hivilomin̈y hiain̈y ambony tany eto ry Noa,  Abrahama, Saraha, Mosesy, Rota, ndreky Estera. Anao mety mamaky aminy Hebreo toko faha-11 ao, misy tantarany sasany amindro lelahy ndreky man̈angy aby io. “Olo marin̈y” koa iro olony Jehovah tsy mivadiky aby maty aminandrantsika izioty, ke hivilomin̈y.

19. Azovy ma “olo tsy marin̈y” zen̈y? Ino fahafahan̈a hamiany Jehovah iro?

 ¹⁹ Tafiditry an̈atiny “olo tsy marin̈y” iro olo jiaby mbala tsiary nahay raha momba Jehovah. Ke iro in̈y ndray naty, iro tsy adin̈any Jehovah. Hivilominy iro io, ke hamiany fahafahan̈a hampianarin̈y raha momba izy ndreky hanompo izy.

20. Nan̈ino ma olo sasany tsy hivilomin̈y?

²⁰ Ke dikanizen̈y ma olo jiaby hivilomin̈y aby? Ehe. Jesosy nivolan̈a fa misy olo maty tsy hivilomin̈y foeky. (Lioka 12:5) Azovy hanapakevitry momba olo hivilomin̈y ndreky tsy hivilomin̈y? Jehovah Pitsara farany, fa izy nan̈amia fahifan̈a Jesosy “hitsara olo velon̈o ndreky maty.” (Asan’ny Apostoly 10:42) Tsy hivilomin̈y eky lan̈iany olo ratsy fan̈ahy ndreky tsy von̈ono niova foeky taminizy mbala velon̈o.—Zahava Fan̈azavan̈a 19.

21, 22. a) Karakory ma olo hivilomin̈y hengo andan̈itry zen̈y? b) Azovy olo voanalohany nivilomin̈y karaha zen̈y?

²¹ Baiboly koa mivolan̈a fa olo sasany hivilomin̈y hengo andan̈itry. Iro io tsy olo eky amy zen̈y fa hanjary fan̈ahy, ke hipetraka andan̈itry an̈y.

²² Jesosy olo voanalohany nivilomin̈y nengo andan̈itry. (Jaona 3:13) Telo andra tafarany Jesosy nivonenolo, Jehovah namelon̈o izy. (Salamo 16:10; Asan’ny Apostoly 13:34, 35) Jesosy koa fa nivilomin̈y, efa tsy olombelon̈o eky. Nazavainy apostoly Petera fa ‘nofotro izy koa fa naty, fa fan̈ahy izy koa fa nivilomin̈y.’ (1 Petera 3:18) Jesosy koa fa nivilomin̈y, nanjary fan̈ahy mahery ankitin̈y! (1 Korintianina 15:3-6)  Baiboly mivolan̈a fa tsy izy zaraiky fo hivilomin̈y hanjary fan̈ahy.

23, 24. Azovy iro “ondrikondriky vitsy” aby nikoran̈iny Jesosy in̈y, baka io firy iro io?

²³ Talohany Jesosy hofoaty, izy nivolan̈a tamindro pianatranany tsy nivadiky aby io: “Zaho handeha han̈amboatra tany hipitrahanaro.” (Jaona 14:2) Dikanizen̈y, pianatranany sasany hivilomin̈y hengo andan̈itry. Firy iro io? “Ondrikondriky vitsy” nivolan̈any Jesosy iro. Dikanizen̈y, vitsy fo olo hivilomin̈y hengo andan̈itry an̈y. (Lioka 12:32) Apostoly Jaona nivolan̈a isakandro io taminizy nahita Jesosy “nitsangana tamy Bongo Ziona [andan̈itry an̈y], baka io nisy zato efapolo efatra amby arivo koa niaraka taminany.”—Apokalypsy 14:1.

²⁴ Ombian̈a iro Kristianin̈y 144 000 aby io hivilomin̈y hengo andan̈itry an̈y? Baiboly mivolan̈a fa amy fotoan̈any Kristy mahazo fanjakan̈a andan̈itry an̈y. (1 Korintianina 15:23) Aminandra izioty, maro amindro 144 000 io efa andan̈itry an̈y. Sasany amindro io mbala ambony tany eto, ke iro koa fa maty, efa vilomin̈y mengo andan̈itry an̈y edy. Ankamarozanolo maty ndraiky hivilomin̈y ambony tany eto, hiain̈y amy tany paradisa.

25. Ino raha hianarantsika amy toko fan̈araka ty?

²⁵ Ten̈a efa tsy ho ela Jehovah hankafaka olo jiaby, ke tsy hisy olo hofoaty eky! (Vakia Isaia 25:8.) Han̈ino andan̈itry an̈y fo ma iro olo aby hivilomin̈y hengo an̈y io? Baiboly man̈azava fa iro io hiaraka hanjaka amy Jesosy. Amy toko fan̈araka ty atsika hianatra raha momba Fanjakan̈a zen̈y.