1, 2. Ino raha tokony hataontsika, baka atsika ho fatatra ndreky ho salama fo? Ino mahavy atsika man̈ano raha aby zen̈y?

ATSIKA ho fatatra ndreky ho salama fo, izikoa mihina hanin̈y mahasalama, ndreky man̈etsiketsiky ain̈y, baka io mitandrin̈y amy raha mety hamparary. Zen̈y tsy vitany andra araiky. Ndray tsy mora man̈ano zen̈y, mila mifen̈y fo atsika, fotony miankiny amy zen̈y fiain̈anantsika izioty ndreky aminy amaray an̈y. Tsy vatan̈antsika fo tokony ho tandremantsika, fa finoan̈antsika koa. Akory han̈anovan̈a zen̈y?

² Joda pianatra Jesosy koa fa baka nandrisiky iro Kristianin̈y aby io tsy hiala amy fitiavany Zan̈ahary, izy nivolan̈a: “Ataova fo raha hampafatatra finoan̈anaro.” (Joda 20, 21) Ino raha tokony hataontsika, baka finoan̈ansika ho fatatra? Misy raha telo ty han̈ampy atsika tsy hiala amy fitiavany Zan̈ahary.

3-5. a) Ino raha tiany Satana hampidirin̈y amy jerintsika momba lalàn̈any Zan̈ahary? b) Karakory tokony ho fahitantsika lalàn̈any Zan̈ahary? Man̈ameza ohatra.

³ Voanalohany, atsika mila man̈eky fa lalàn̈any Zan̈ahary io ten̈a mahatsara atsika. Efa maro fitsipiky Zan̈ahary momba fitondranten̈a nianarantsika tamy boky ty. Asa  karakory fahitanao iro in̈y? Satana man̈ano raha hahavy atsika hieritreritry fa manahiran̈a atsika lalàn̈any Jehovah. Tsy vo izioty izy man̈ano zen̈y, fa efa rango tamy faha Adama ndreky Eva tan̈y. (Genesisy 3:1-6) Mbala mety hahavoa atsika koa ma tetikinany io? Arakaraka toetsain̈intsika fo!

⁴ Ohatra anao izio mandeha amy tany araiky tsara be. Io fo anao mahita lakoro vy be. Anao mety hivolan̈a: ‘Ino koa ma raha ilan̈a lakoro be ty?’ Anao in̈y mbala nandiniky fo, tio fo anao nahita lion masiaka mijoko biby. Hainao amy zay fa kaiky hiarovan̈a olo dikany lakoro vy io. Misy fahavalo koa mijoko atsika. Baiboly mampitandrin̈y karaha ty: “Anaro mila mangala onondraha tsarabe, ke hiambin̈y fo, fotony Devoly fahavalonaro io mandehandeha mira lion mitreron̈o, mitady olo vonen̈a in̈y.”—1 Petera 5:8.

⁵ Satana fahavalontsika io koa ampitovisiny Baiboly amy lion mitady remby. Tsy tiany Jehovah atsika ho voafitaka Satana, ke izy nan̈amia lalàn̈a hiarovan̈a atsika amy ‘tetiky ratsiny Satana.’ (Efesianina 6:11) Atsika koa fa mandiniky lalàn̈any Zan̈ahary, tokony halentsika onon̈o fa ten̈a tia atsika Babantsika andan̈itry an̈y io. Atsika koa tokony ho resy lahatra fa natao hiarovan̈a ndreky hampasambatra atsika fo lalàn̈anany. Zen̈y nahavy Jakoba pianatra Jesosy nivolan̈a fa, ‘lan̈iany olo mandiniky lalàn̈a tsisy tsin̈iny baka amy Zan̈ahary ndreky man̈araka raha koran̈iny ao fo ho sambatra.’—Jakoba 1:25.

6. Ino raha tokony hataontsika baka atsika han̈eky marin̈y fa mahatsara atsika lalàn̈any Zan̈ahary ndreky toro lalan̈anany? Manameza ohatra.

⁶ Izikoa atsika man̈araka didiny Zan̈ahary Pan̈amia lalàn̈a atsika io, finoan̈antsika hatanjaka, baka io hazava amintsika antony nan̈amezany atsika lalàn̈a aby io,  an̈atinizen̈y “lalàn̈any Kristy.” Lalàn̈a io man̈iraka atsika ‘hampianatra olo hitandrin̈y zay raha nirahiny Jesosy tandremantsika.’ (Galatianina 6:2; Matio 28:19, 20) Miaraka mivory koa atsika, fotony izio an̈isany fanompoan̈a Jehovah ndreky hankahirezantsika namantsika. (Hebreo 10:24, 25) Jehovah koa man̈iraka atsika hivavaka amy fontsika jiaby. (Matio 6:5-8; 1 Tesalonianina 5:17) Atsika koa man̈araka lalàn̈a aby zen̈y, ho hitantsika fa Jehovah tia atsika ankitin̈y. Ho sambatra ndreky ho afapo koa atsika, fa tsy ho karaha olo amy donia ty. Atsika koa mieritreritry hatsaran̈a efa namiany Jehovah, atsika ho resy lahatra tsarabe fa ten̈a mahatsara atsika lalàn̈anany.

7, 8. Ino volan̈a mankahery hitantsika amy Baiboly ao momba fanompoantsika Jehovah?

⁷ Misy olo mieritreritry: ‘Raha mba ho vitako edy hanompo Jehovah zen̈y teteky an̈y?’ Maro olo mavozo tsao tafan̈ano fahotan̈a maventy. Izikoa zen̈y raha mampiasa loha anao, tsarova volan̈a ty: “Zaho Zan̈aharinao Jehovah, mampianatra anao raha hahatsara anao ndreky mampandeha anao amy lalan̈a tokony himboanao. Izikoa anao man̈araka tsarabe didinaka, ho loso karaha ten̈arano fiadan̈ananao, baka io fahamarin̈ananao hanjary  karaha darobandranomasin̈y!” (Isaia 48:17, 18) Mankahery volan̈a zen̈y! Asa anao mba efa nandiniky ino marin̈y raha tianizio koran̈iny?

⁸ Volan̈a Jehovah io mampatsiaro atsika fa hahita hatsaran̈a atsika, izikoa man̈araka didinany. Ino aby hatsaran̈a zen̈y? Voanalohany, fiadan̈anantsika ho mira ten̈arano in̈y. Karaha ataony rano mandeha tsisy farany in̈y, ho karaha zen̈y koa fiadan̈anantsika. Faharoe, fahamarin̈anantsika hanjary karaha darobandranomasin̈y. Anao koa mitsangana amy sisiny ranomasin̈y, ho hitanao fo daroba io tsy voly mantopa aminao. Tsy ho hisy farany karaha zen̈y koa fahamarin̈anantsika. Atsika koa tsy mivadiky amy Jehovah, atsika tsy ambelany ho lavo. (Vakia Salamo 55:22.) Fahaizantsika zen̈y mankafatatra finoan̈antsika, ndreky mahavy atsika han̈eky marin̈y fa mahatsara atsika lalàn̈any Jehovah.

9, 10. a) Nan̈ino ma atsika tokony hifen̈y hankatsara fihavan̈antsika amy Jehovah? b) Ino mahavy atsika mivolan̈a fa ho ravoravo atsika manompo Jehovah, izikoa man̈ano zen̈y?

⁹ Faharoe, Baiboly mandrisiky atsika han̈ano raha hampamatotro atsika fo. (Hebreo 6: 1) Sarotro aminolombelon̈o tsy lavorary hahavita raha lavorary. Fa atsika jiaby ndraiky izikoa samy mifen̈y, atsika hanjary ho matotro fo. Atsika koa man̈ano raha hampamatotro atsika na mankatsara fihavan̈antsika amy Jehovah, atsika ho ravoravo fo manompo izy. Fotony nan̈ino?

¹⁰ Kristianin̈y matotro zen̈y, olo mitovy fomba fisain̈ana amy Jehovah. (Jaona 4:23) Misy karazan̈olo aroe nikoran̈iny Paoly amy Romanina 8:5. Samy isany toetsain̈indro io: Araiky mieritreritry raha momba nofotro fo, fa araiky ndraiky mieritreritry raha momba fan̈ahy fo.  Eritreritrinolo araiky koa amy raha momba nofotro fo, izy tsy mety ho ravoravo, fotony ain̈inany fo hainy. Izy tsy mitsinjo lavitry zen̈y, fa rikian̈a amy fitadiavambola fo. Olo mieritreritry raha momba fan̈ahy ndraiky ho ravoravo ndray tojy raha sarotro, fotony izy tsy vitany mahatsiaro Jehovah “Zan̈ahary ravoravo” io, fa man̈iry han̈ano raha mamparavoravo izy koa. (1 Timoty 1:11) Tianolo io haboaka fa izy tsy mivadiky, baka io Satana mavandy. Tsisy raha mamparavoravo Jehovah mandilatra zen̈y!—Ohabolana 27:11; vakia Jakoba 1:2, 3.

11, 12. a) Ino raha nivolan̈iny Paoly momba fahaizan̈a misain̈y? Ino ma dikany volan̈a griky ‘nizarin̈y’ zen̈y? b) Karakory ma ataondro pan̈ano fan̈atanjahanten̈a aby io, baka iro zatra man̈etsiky ain̈indro tsarabe?

¹¹ Izikoa tiantsika ho tsara fihavan̈ana amy Zan̈ahary, misy raha tsy maintsy atao. Zen̈y nahavy Paoly nivolan̈a fa olo tsara fihavan̈ana amy Zan̈ahary zen̈y “manan̈a fahaizan̈a misain̈y efa nizariny han̈avaka ny tsara ndreky ratsy.” (Hebreo 5:​14) Volan̈a griky fampiasain̈y tamy tany fan̈anovan̈a fan̈atanjahanten̈a nampiasainy Paoly taminio. Mety hadika karaha ty koa izio: ‘Nizarin̈y karaha ataonolo pan̈ano fan̈atanjahanten̈a.’ Akory nataondro nan̈azatra ain̈indro?

¹² Tsaiky koa vo teraka, mbala tsy mahay mampiasa rantsambatan̈a. Tsy hainy foeky mandeha aia vitinany ndreky tan̈anany. Mahinihiny aby izy, koa fa mahavoa soranany tan̈anany. Izikoa fa mandeha fotoan̈a, mahaizatra fo izy mampiasa ain̈inany. Rango izy mandady, mianatra mandeha, ndreky farany, milomoay. * Karaha zen̈y koa  olo pan̈ano fan̈atanjahanten̈a. Iro mahavita mitsambokin̈y an̈abo be, baka io man̈odikodin̈y ain̈indro. Haindro tsarabe man̈etsiky ain̈indro. Tsy ho vitandro raha zen̈y, izikoa tsisy fan̈azaranten̈a. Koran̈iny Baiboly fa mahatsara atsika man̈etsiketsiky ain̈y. Fa mbala mandilatra zen̈y hatsaran̈a ho azontsika, izikoa atsika zatra mampiasa fahaizantsika misain̈y io.—1 Timoty 4:8.

13. Ino raha tsy maintsy ataontsika, baka atsika ho zatra mampiasa fahaizan̈a misain̈y?

¹³ Maro hevitry voakoran̈a tamy boky ty han̈azatra fahaizantsika misain̈y, baka atsika ho tsara fihavan̈ana amy Jehovah ndreky tsy hivadiky aminany. Ke isaka anao hanapakevitry, diniha tsarabe toro lalan̈a Zan̈ahary, baka io mivavaha. Iritrireta: ‘Ino lalàn̈a na toro lalan̈a amy Baiboly momba raha ty? Akory han̈arahako zen̈y? Akory ataoko, baka ho ravoravo Babako andan̈itry an̈y?’ (Vakia Ohabolana 3:5, 6; Jakoba 1:5.) Izikoa anao zatra man̈ano zen̈y, anao hahay han̈avaka ny tsara ndreky ratsy, baka io koa ho tsara fihavan̈ana amy Jehovah.

14. Ino raha tokony hataontsika, izikoa tiantsika ho tsara fo fihavan̈antsika amy Jehovah? Ino fo raha mila tandremantsika?

¹⁴ Mila man̈ano raha fo atsika, baka ho tsara fo fihavan̈antsika amy Jehovah. Tsaiky koa tsy mihina, tsy hitombo. Mila hanin̈y arapan̈ahy koa atsika, baka finoan̈antsika hatanjaka fo. Zen̈y nahavy Paoly nivolan̈a fa ‘olo tsara fihavan̈ana amy Zan̈ahary fo mahalany hanin̈y mahery.’ Izikoa arehantsika raha nianarantsika tamy  Baiboly, atsika hahazo fahendrena. Tsisy raha bebeny fahendrena io! Ke atsika tsy tokony ho voly han̈iry hihina hanin̈y arapan̈ahy. (Ohabolana 4:5-7; 1 Petera 2:2) Ndray maro raha haintsika ndreky fahendrena azontsika, atsika tsy tokony hipoerapoera na han̈ambony ten̈a. Mila mitandrin̈y fo atsika, tsao efa misy toetry ratsy aby io an̈aty fontsika. Paoly nivolan̈a: “Mandiniha ten̈a fo baka ho hitanaro na anaro mbala an̈aty finoan̈a na tsy an̈atiny, baka io tsapà jery fo ain̈inaro.”—2 Korintianina 13:5.

15. Izikoa tiantsika hanan̈a finoan̈a matanjaka, ino toetry tokony hanan̈antsika? Ino antony?

¹⁵ Mila mikarakara ain̈y ndreky mihina hanin̈y mahasalama fo anao, ndray anao olo fatatra. Ino koa raha ilaintsika, baka ho tsara fo fihavan̈antsika amy Jehovah ndreky ho fatatra finoan̈antsika? Fitiavan̈a. Mila mitombo fitiavantsika Jehovah ndreky olo miaraka mivory amintsika. Tsisy dikany izikoa atsika mahay raha na mahavita be amy fanompoan̈a, kanefa tsisy fitiavan̈a io, fotony manjary mira feondraha maresaka mandreraka sofin̈y in̈y. (1 Korintianina 13:1-3) Fitiavan̈a io mahavy atsika ho matotro ndreky hanan̈a finoan̈a matanjaka.

16. Ino ma toetsain̈y tiany Satana hanan̈antsika? Ino fitaovan̈a namiany Jehovah hindesintsika miaro ten̈a?

¹⁶ Fahatelo, atsika mila mangala onon̈o raha nampan̈antinainy Jehovah atsika fo. Dikanizen̈y, mila arovantsika fomba fisain̈anantsika, baka atsika tsy hivadiky ndreky hahavita han̈araka modeliny Kristy. Hainy Satana mare man̈ano raha hampakivy olo ndreky hahavy atsika hizaha toetry ratsiny namantsika. (Efesianina 2:2) Mety handrobaka toetsain̈intsika raha zen̈y, karaha ataony koroko  mihina tran̈o kakazo in̈y. Nahakiry izy, Jehovah efa nan̈amia atsika fan̈antinan̈a. Izio fitaovan̈a hindesintsika miaro ten̈a.

17. Izikoa Baiboly zahan̈a, nan̈ino ten̈a ilain̈y fan̈antinan̈a io?

¹⁷ Ino raha koran̈iny Baiboly, ke man̈ampy atsika hiaro ten̈a amy tetiky Satana ndreky donia ty? Fan̈antinan̈a “famonjian̈a.” Izio miaro lohantsika. (1 Tesalonianina 5:8) Haindro maramila taloha tan̈y fa hofoaty iro, izikoa tsisy raha miaro lohandro. Matetiky fiarovan̈a loha io namboarin̈y baka tamy vy. Alohany iro hanaron̈o izio, iro man̈ano satroko lamba na hoditry. Ke ndray misy raha mahery mikon̈o lohandro, iro tsy maharen̈y marary loatra. Karaha zen̈y koa, fan̈antinan̈a io miaro sain̈intsika ndreky fomba fisain̈anantsika.

18, 19. Ino modely nambelany Jesosy tokony harehantsika? Akory han̈anovantsika zen̈y?

¹⁸ Tsy nadin̈any Jesosy raha nampan̈antinainy Jehovah izy. Tokony ho karaha zen̈y koa ataontsika. Asa azonao onon̈o ino raha nisy, taminy alin̈y talohany nifatesany? Nisy namany nivadiky taminany, baka amy fitiavambola fo. Nisy namany hafa ndraiky nan̈ano tsy nahay izy foeky. Olo mitovy tany favian̈a taminany edy nan̈iraka maramila romanin̈y hamono izy taminy hazofijalian̈a. Tsiary nisy olo tojy raha karaha zen̈y! Ino raha nahavy izy niaritry ndreky ravoravo fo tamy zen̈y? Fan̈antinan̈a.—Hebreo 12:2.

¹⁹ Ravoravo Jesosy, fotony hainy fa izy koa miaritry, ho vitany hankamasin̈y an̈arany Jehovah ndreky han̈aboaka fa vandy areriky volan̈a Satana. Hainy Jesosy koa fa misy raha tsara hamiany Jehovah izy, izikoa izy tsy mivadiky aminany. Izy himpody ndraiky amy Babany an̈y. Zen̈y fo raha nataony tan̈aty jerinany, izy koa fa niaritry raha sarotro. Tsisy raha namparavoravo izy nandilatra zen̈y!  Atsika koa tokony han̈ano karaha zen̈y. Misy haravoan̈a karaha zen̈y koa man̈oloan̈a atsika. Jehovah man̈amia voninahitry atsika tsiaraikiaraiky, fotony atsika ambelany hankamasin̈y an̈aranany be voninahitry io. Ndray misy raha sarotro mahazo atsika, izikoa atsika man̈eky zony Jehovah hitondra ndreky tsy miala amy fitiavany, ho hita fa pavandy Satana.

20. Ino aby raha tokony hataonao, izikoa tianao hieritreritry raha tsara fo ndreky hanan̈a fan̈antinan̈a?

²⁰ Jehovah man̈iry han̈amia raha tsara olo tsy mivadiky aminany. Efa tsy din̈iny han̈ano raha zen̈y! (Isaia 30:18; vakia Malakia 3:10.) Tiany koa man̈amia raha tsara irinolo manompo izy. (Salamo 37:4) Ke aza adin̈a raha nampan̈antinainy Jehovah anao. Aza man̈araka toetsain̈inolo amy donia ty. Aza tia raha ratsy, baka io aza manan̈a jery ratsy aminolo na mieritreritry raha vetaveta. Izikoa hitanao fa manomboko misy toetsain̈y aby zen̈y an̈aty ­jerinao na an̈aty fonao, mivavaha mare, baka Jehovah han̈amia anao ‘fiadan̈ana Zan̈ahary bebeny eritreritry jiaby.’ Fiadan̈ana io hiaro fonao ndreky sain̈inao.—Filipianina 4:6, 7.

21, 22. a) Man̈anten̈a ino ma iro “vahoaka be” io? b) Ino amy raha antinaindro io ten̈a tianao? Ino ma raha tokony hataonao?

 ²¹ Asa mba efa niritriretinao hatsaran̈a ho azonao tsy ho ela? Izikoa anao an̈isany “vahoaka be”, anao ho tafitsaka amy “fahorian̈a be tsisy ambaka izy io”, baka io koa misy fiain̈ana tsara miambin̈y anao. (Apokalypsy 7:9, 14) Tsisy raha hampiasa loha anao eky, fotony efa tsisy Satana ndreky demony eky amy zen̈y. Karaha man̈inofy atsika mivolan̈a zen̈y, fotony atsika mbala tsiary niain̈y tamy donia tsisy Satana zen̈y. Ho ravoravo atsika hiaraka hiasa amy Jesosy ndreky iro 144 000 aby io, han̈ova tany ty paradisa. Aretin̈y ndreky karazan̈a antsa jiaby tsy ho hisy eky. Atsika hitsena iro havantsika efa maty aby in̈y. Zen̈y fiain̈ana tsara tiany Jehovah hamian̈a atsika. Jehovah koa nampan̈anten̈a fa atsika ho lavorary, ke hahazo “fahafahan̈a be voninahitry zanaka Zan̈ahary.”—Romanina 8:21.

²² Mbala mandilatra fahafahan̈a niritriretinao ho azo raha tiany Jehovah ho azonao, izikoa anao man̈araka volan̈anany. Ke rango izioty, atsika efa mila mifen̈y mare han̈araka volan̈anany isanandra. Ataova fo raha hampafatatra finoan̈anao, baka anao tsy hiala amy fitiavany Zan̈ahary mandrakizay!