Amy lera karakory ma man̈angy tokony hifon̈o loha? Ino antony? Alo zahantsika raha nambarany apostoly Paoly momba zen̈y. Han̈ampy atsika hanapakevitry tsarabe ndreky han̈amia voninahitry Jehovah torohevitry namiany. (1 Korintianina 11:3-16) Misy raha telo ty nirahiny Paoly dinihintsika: 1) Amy fotoan̈a karakory man̈angy tokony hifon̈o loha? 2) Aia izy tokony han̈ano zen̈y? 3) Ino mahavy izy man̈ano zen̈y?

Amy fotoan̈a karakory man̈angy tokony hifon̈o loha? Lera izy mivavaka ndreky maminan̈y. (Andininy 4, 5) Dikany mivavaka zen̈y mikoran̈a amy Jehovah, amy fomba man̈aja. Aminandra izioty, maminan̈y zen̈y mampianatra Baiboly. Andininy io tsy mivolan̈a fa tsy maintsy mifon̈o loha fo man̈angy isaka mivavaka na mampianatra Baiboly, fa arakaraka tany misy izy an̈anovany zen̈y.

Aia ma izy tokony han̈ano zen̈y? An̈atiny tokantran̈o ndreky amy fiangonan̈a. Paoly nivolan̈a: ‘Zay lelahy mivavaka na maminan̈y ke mifon̈o loha, izy man̈isy baraka Kristy. Fa izikoa ndraiky misy man̈angy mivavaka na maminan̈y kanefa tsy mifon̈o loha, izy man̈isy baraka  lelahy.’ (Andininy 3, 5) An̈atiny tokantran̈o, lelahy nataony Jehovah lohany man̈angy. Ke izikoa man̈angy man̈ano andraikitry tokony hataony lelahy, ke hita amy raha ataony fa izy tsy man̈eky fahifan̈a, izy man̈isy baraka vadiny. Ndraikindraiky, man̈angy mety ho voatery hampianatra Baiboly ankilany vadiny. Man̈aja fahifan̈any vadiny izy, izikoa mifon̈o loha, na vita batisa vadiny na tsy vita. Ino antony? Fotony lelahy lohany fianakavian̈a. * Ndray tsy ampy taon̈o zanany lelahy efa vita batisa, izy tokony hifon̈o loha fo izikoa fa mivavaka na mampianatra. Zen̈y tsy mivolan̈a fa tsaiky io lohany fianakavian̈a. Amy fiangonan̈a, lelahy koa fa vita batisa, izy efa namian̈a fahifan̈a edy.

Ke karakory fo amy fiangonan̈a? Paoly nivolan̈a karaha ty: ‘Izikoa misy olo manery olo hafa han̈araka fomba hafa, amy fitiavan̈a malo fo, tsara ho hainy fa na zahay na fiangonan̈a Zan̈ahary, samy tsy man̈araka fomba zen̈y.’ (Andininy 16) Lelahy vita batisa fo nitindreny Jehovah hitariky fiangonan̈a kristianin̈y. (1 Timoty 2:11-14; Hebreo 13:17) Dikanizen̈y, lelahy zaraiky fo mety tindren̈y hanjary antipan̈ahy ndreky pan̈ampy amy fanompoan̈a, ke hikarakara ondrikondriky Zan̈ahary. (Asan’ny Apostoly 20:28) Ndraikindraiky, ranabavy mety hirahin̈y han̈ano andraikitry rahalahy vita batisa, karaha ataony mitariky fivorian̈a alohany fanompoan̈a, izikoa tsisy rahalahy mahafeno fepetra. Mifon̈o loha koa izy izikoa miaraka mampianatra Baiboly amy lelahy vita batisa. * Raha aby io samy an̈isany asany fiangonan̈a, ke izy tokony hifon̈o loha. Izy koa man̈ano zen̈y, izy man̈eky fa tokony lelahy han̈ano andraikitry io.

Matetiky, ranabavy tsy voatery hifon̈o loha izikoa fa  man̈amia valinteny amy fivorian̈a, mitory isaka tran̈o miaraka amy vadiny na lelahy hafa vita batisa, mampianatra zanakanany na mivavaka miaraka aminany. Izikoa misy raha tiany han̈ontanian̈a, fotony tsy hainy tsarabe valiny, izy mety man̈ano fikahoran̈a. * Izikoa izy mbala misalasala amy raha tokony hatao, ke eritreritrinany man̈iraka izy hifon̈o loha, tsara aminany izy mifon̈o loha, karaha hita amy sary io.

Ino mahavy izy man̈ano zen̈y? Fotony Paoly efa nivolan̈a aminy andininy faha-10 fa fan̈ikiany man̈angy fahifan̈a napetraka Zan̈ahary zen̈y mampatsiaro iro anjely aby io, fa tokony han̈eky fahifan̈any Jehovah koa iro. Hitantsika baka amy zen̈y fa misy antony aroe mahavy man̈angy hifon̈o loha. Voanalohany, izio ahaizan̈a fa ‘man̈aja fahifan̈a’ namiany Jehovah lelahy vita batisa amy fiangonan̈a izy. Hita baka amy zen̈y koa fa izy tia Jehovah ankitin̈y ndreky man̈iry tsy hivadiky aminany. Faharoe, ‘baka amindro anjely aby io.’ Ino mahavy atsika mivolan̈a fa mahatsara iro anjely mahery aby io mahita man̈angy mifon̈o loha zen̈y?

An̈isany raha mamparavoravo iro anjely aby io mahita raha namboariny Jehovah man̈aja fahifan̈anany, na andan̈itry an̈y zen̈y na ambony tany eto. Mahatsara iro foeky mahita olombelon̈o tsy lavorary man̈eky fahifan̈any Jehovah. Iro koa mila man̈eky fahifan̈any Jehovah, kanefa ny raha misy, maro anjely tsy nan̈ano raha zen̈y. (Joda 6) Mety ho hitandro anjely aby io fa misy ranabavy  mahay raha sady nahita fianaran̈a mandilatra rahalahy amy fiangonan̈a, kanefa iro man̈eky fahifan̈anany. Mety Kristianin̈y voahosotro foeky ranabavy io, sady hiaraka mandova amy Kristy. Iro man̈angy aby io hanjary an̈abo mandilatra iro anjely aby io, sady hiaraka hanjaka amy Kristy andan̈itry an̈y. Modely tsara arahindro anjely aby io raha zen̈y! Amindro ranabavy aby io, voninahitry tsisy karaha izy man̈aboaka amindro anjely tsy mivadiky antapitrisany, fa iro manetry ten̈a ndreky man̈araka volan̈a Jehovah, baka io tsy mivadiky sady man̈eky olo mitariky iro!