1, 2. Ino mahavy Jehovah ravoravo, atsika koa fa man̈ano ny marin̈y? Man̈ameza ohatra.

MISY tsaiky araiky nirahiny reniny hividy labozy. Izy koa fa nimpody baka tan̈y, taitry, fotony nandilatra vola mimpody baka tamy pivarotro. Nalahelo mare izy. Koa fa nazavainy reniny taminany fa izy mety man̈ampody vola io tamy pivarotro tan̈y, izy nandeha. Ravoravo mare reniny tsaiky io sady mirehareha manan̈a izy. Fotony nan̈ino?

² Mamparavoravo raimandreny mahita zanany man̈ano ny marin̈y. Ravoravo karaha zen̈y koa Jehovah, “Zan̈ahariny fahamarin̈ana”, koa fa mahita atsika mifen̈y man̈ano ny marin̈y. (Salamo 31:⁠5) Ten̈a tiantsika han̈ano raha mamparavoravo izy ndreky tsy hiala amy fitiavany. Karaha nataony Apostoly Paoly, atsika koa ‘man̈iry han̈ano ny marin̈y amy raha jiaby.’ (Hebreo 13:18) Misy raha efatra ty hidinihintsika, ahitan̈a fa tsy mora man̈ano ny marin̈y. Hizahavantsika koa hatsaran̈a ho azontsika, izikoa atsika man̈ano zen̈y.

3-5. a) Amy fomba karakory han̈ampiany Baiboly atsika, baka atsika tsy hamitaka ain̈intsika? b) Ino raha mety han̈ampy atsika hahay ten̈a toetrintsika?

³ Atsika io tsy lavorary, ke ain̈intsika io mety hamitaka atsika. Mety tsy ho mora man̈ano ny marin̈y zen̈y, izikoa ain̈intsika mila man̈ano izio fa tsy olo hafa. Hangala  ohatra atsika han̈azavan̈a zen̈y: Iro Kristianin̈y ta Laodikia tan̈y nieritreritry fa iro efa pan̈arivo. Izikoa fahitany Jesosy fanompoan̈a nataondro koran̈iny, ‘masikiny ndreky jamba, baka io tsy amy sikin̈y.’ Ten̈a mampalahelo raha zen̈y! (Apokalypsy 3:17) Nankasarotro raha koa iro diso hevitry.

⁴ Asa tsaroanao volan̈a Jakoba pianatra Jesosy ty: “Izikoa misy olo mivolan̈a fa izy pivavaka, kanefa izy tsy man̈isy lamboridy lelanany, fa mbala mamitaka fonany fo, tsisy varany izy mivavaka.” (Jakoba 1:26) Manjary atsika fo mamitaka fontsika, izikoa atsika mivolan̈a fa tiany Jehovah fo fanompoan̈a ataontsika, ndray atsika tsy mitandrin̈y lelantsika. Tsy ho hisy dikany amy Jehovah foeky fanompoan̈a ataontsika, ke ho very boriny angovontsika. Ino fo basy raha tokony hataontsika?

⁵ Ampitovisiny Jakoba amy fitaratra fahamarin̈ana amy Volan̈a Zan̈ahary. Irahiny mandiniky lalàn̈a tsisy tsin̈iny baka amy Zan̈ahary io atsika, baka io han̈ova raha tokony hivoan̈a. ( Vakia Jakoba 1:23-25.) Baiboly afaka man̈ampy atsika hahay ten̈a toetrintsika ndreky hahita raha tokony hivoantsika. (Fitomaniana 3:40; Hagay 1:5) Atsika koa mety mivavaka, baka Jehovah handiniky atsika ndreky han̈ampy atsika hahita raha maventy mety mampalemy atsika. (Salamo 139:23, 24) Mety tsy ho azontsika onon̈o foeky fa atsika io efa mamitaka ain̈intsika. Ke atsika tokony hanan̈a fomba fisain̈any Jehovah momba raha mampalemy atsika io. Volan̈iny Ohabolana 3:32: “Mampangaroharo Jehovah olo fetsifetsy, fa olo man̈ano raha mahitsy fo ho tsara fihavan̈ana aminany.” Jehovah von̈ono han̈ampy atsika hanan̈a fomba fisain̈ananany. Ke atsika koa fa mandiniky ain̈intsika, hanjary hitovy amy fahitany atsika fo fahitantsika ain̈intsika. Aza adin̈a volan̈a Paoly ty: ‘Zahay man̈iry han̈ano ny marin̈y amy raha jiaby.’ Ndray atsika tsy lavorary, atsika man̈iry han̈ano ny marin̈y sady hifen̈y fo han̈ano zen̈y.

6. Nan̈ino ma olo manambady tokony hivolan̈a ny marin̈y amy vadiny? Ino raha tsy tokony hataonolo manambady, izikoa izy mivolan̈a ny marin̈y amy vadiny?

⁶ Fan̈anovan̈a ny marin̈y zen̈y raha ten̈a tokony hampiavaka tokantran̈o kristianin̈y. Olo manambady tokony hivolan̈a ny marin̈y amy vadiny fo. Kristianin̈y manambady tsy tokony hifankazatra loatra aminolo tsy vadiny, na hangalatra hifandray aminolo hafa aminy Internet. Izy koa tsy tokony hitandren̈y raha vetaveta na hizaha izio na hamaky boky misy izio. Ino antony? Fotony raha aby io tsy vitany maloto fa mamparary fo koa. Efa nisy Kristianin̈y nisitriky vadiny nan̈ano raha aby io. Olo karaha zen̈y tsy man̈ano ny marin̈y. Mba diniha hely baka volan̈a Davida, panjaka tsy nivadiky ty: “Zaho tsy miaraka mipetraka aminolo tsy marin̈y, baka io zaho tsy minaman̈a aminolo manitriky ny maha iro iro.” (Salamo 26:4) Ke ataova raha hahavy anao tsy hanitriky amy vadinao ny ten̈a maha anao anao.

7, 8. Ino aby tantara baka amy Baiboly mety hampiasainy raimandreny, koa fa mampianatra tsaiky han̈ano ny marin̈y?

⁷ Raimandreny koa fa mampianatra zanany han̈ano ny marin̈y, tsara iro zatra mampiasa tantara baka amy Baiboly. Ao misy tantaranolo maro tsy nan̈ano ny marin̈y. Karaha ataony Akana, izy tsy vitany nangalatra, fa nasitriny koa raha ratsy nataony. Gehazy koa karaha zen̈y. Izy navandy, baka amy  fitiavambola fo. Jodasy ndraiky nangalatra, baka io navandy hamangoan̈a Jesosy.—Josoa 6:17-19; 7:11-25; 2 Mpanjaka 5:14-16, 20-27; Matio 26:14, 15; Jaona 12:6.

⁸ Ndray zen̈y, maro olo aminandra izioty man̈ano ny marin̈y mira Jakoba. Zanaka Jakoba koa fa nahita vola tsy nindro tan̈aty lasakandro, Jakoba nan̈iraka iro han̈ampody vola io tamy tompiny, fotony hainy fa mety nisy hadisovan̈a nahavy vola in̈y tafindesindro. Karaha zen̈y koa Jefta ndreky zanany. Nifaindro fo voady nataony Jefta, ndray tsy mora raha zen̈y. Izikoa fa nisy vahoaka kafiry mila hanambotro Jesosy, izy tsy navozo foeky nivolan̈a fa izy olo tadiavindro io. Tiany han̈atanteraka faminanian̈a, ndreky hiaro iro pianatranany aby io. (Genesisy 43:12; Mpitsara 11:30-40; Jaona 18:3-11) Mbala olo sasany fo voakoran̈a tio in̈y. Kanefa tantara aby io han̈ampy raimandreny hahita hevitry, izikoa fa man̈ampy zanakandro ho tia man̈ano ny marin̈y ndreky hieritreritry izio ho an̈isany raha ten̈a maventy.

9. Ino raha tsy tokony hataony raimandreny? Han̈ano akory zanany, izikoa izy mifen̈y fo han̈ano ny marin̈y?

⁹ Zen̈y man̈ambara fa maventy andraikitry raimandreny. Volan̈iny Paoly: “Ke izikoa zen̈y izy, anao mampianatra olo io, asa anao mba mampianatra ain̈inao koa? Anao mivolan̈a aminolo: ‘Aza mangalatra’ io, tsy mangalatra ankitin̈y ma anao io?” (Romanina 2:21) Misy olo mifen̈y mampianatra zanany han̈ano ny marin̈y, kanefa izy tsy man̈ano. Manjary tsy hainy zanany foeky raha tokony hataony. Mety misy baba na reny mangalatra raha ampiasan̈a, kanefa mitady fialantsin̈y. Izy mety hivolan̈a: ‘Io anie efa hainy sefonay fa tsy maintsy misy hangala fo e!’ Na koa izy hivolan̈a karaha ty: ‘Vandy hely tsisy dikany zen̈y!’ Io na hely na be, izikoa fa halatra, efa halatra edy an̈arany. Karaha zen̈y koa vandy. Koa fa vandy, efa vandy zen̈y edy  an̈arany. * (Vakia Lioka 16:10.) Tsaiky tsy mety fitahin̈y. Mandrobaka jeriny tsaiky mahita raimandreny mitsaravelatsihy. (Efesianina 6:4) Raimandreny tokony hifen̈y fo han̈ano ny marin̈y, amy zen̈y zanany koa fa mahaibe, han̈ano ny marin̈y ndreky han̈amia voninahitry Jehovah fo, ndray miain̈y amy donia tsy man̈ano ny marin̈y ty.—Ohabolana 22:6.

10. Ino raha tokony hitandremantsika, izikoa fa mikoran̈a aminolo miaraka mivory amintsika?

¹⁰ Mety han̈ampy atsika han̈ano ny marin̈y koa fiarahan̈a amy Kristianin̈y hafa. Hitantsika tamy Toko faha-12 fa kado ten̈a tsara baka amy Jehovah fahaizan̈a mivolan̈a io, ke mila mitandrin̈y atsika amy fampiasan̈a izio, indraka eky aminolo miaraka mivory amintsika. Matetiky, tsy azontsika onon̈o foeky fa efa mivadiky fitsikoan̈a olo na fankaratsian̈a olo, koran̈antsika. Ke atsika tsy tokony hitantara raha tsy azo antoko, fotony mira man̈aparitaka vandy atsika izikoa man̈ano zen̈y. Atsika mila mahatana vava. (Ohabolana 10:19) Ndray marin̈y raha ren̈intsika na haintsika io, atsika tsy voatery hitantara zen̈y aminolo. Mety  raha tsy tokony hidirantsika foeky izio, ke atsika koa mitantara izio, atsika tsy tsara fan̈ahy aminolo io. (1 Tesalonianina 4:11) Misy ndraiky olo zatra man̈aboaka volan̈a tsy voadiniky, fotony zen̈y izy mivolan̈a ny marin̈y. Tokony ho volan̈a mamparavoravo ndreky misy hatsarampan̈ahy fo koran̈intsika.—Vakia Kolosianina 4:6.

11, 12. a) Ino raha mety hampasarotro fikarakaran̈a olo araiky nan̈ano fahotan̈a maventy? b) Ino ma vandiny Satana momba fahotan̈a maventy? Ino raha mety hahavy atsika tsy hino zen̈y? d) Karakory ma mivolan̈a ny marin̈y amy fandaminany Jehovah zen̈y?

¹¹ Ilain̈y koa mivolan̈a ny marin̈y amindro miandraikitry atsika an̈aty fiangonan̈a. Misy olo man̈ano fahotan̈a maventy, fa tsy ambarany antipan̈ahy. Izy koa fa an̈ontanian̈a, izy mavandy. Sasany man̈ano sary manompo Jehovah, kanefa iro mbala man̈ano fahotan̈a maventy fo. Vandy fo fiain̈ananany jiaby. (Salamo 12:2) Misy ndraiky sasany mivolan̈a ny marin̈y, fa raha ten̈a maventy tsy koran̈iny. (Asan’ny Apostoly 5:1-11) Ino mahavy iro man̈ano zen̈y? Fotony iro mino vandiny Satana.—Zahava efajoro “ Vandiny Satana Momba Fahotan̈a Maventy”.

¹² Ilain̈y koa mivolan̈a ny marin̈y amy fandaminany Jehovah, indraka eky izikoa fa mameno taratasy. Mila mitandrin̈y atsika izikoa fa mameno tatitry momba fanompoan̈a, ke tsy han̈ova raha ten̈a vitantsika. Karaha zen̈y koa atsika izikoa fa mameno taratasy fangatahan̈a hahazo tombontsoampanompoan̈a: Tsy tokony havandy foeky atsika izikoa fa mikoran̈a raha momba fahasalaman̈a na raha hafa momba atsika.—Vakia Ohabolana 6:16-19.

13. Karakory man̈ano ny marin̈y aminolo miaraka mivory amintsika zen̈y?

¹³ Tokony han̈ano ny marin̈y aminolo miaraka mivory amintsika koa atsika, amy raha momba varotro ndreky asa. Ndray zen̈y, mila mitandrin̈y atsika tsy hikoran̈a momba zen̈y amy Tran̈o Fivorian̈a, na lera atsika mandeha manompo, fotony varotro ndreky fivavahan̈a tsy tokony hiaraka.  Mila mitandrin̈y koa atsika, ke han̈ano ny marin̈y amy Kristianin̈y miasa amintsika. Tokony hamiantsika izy amy fotoan̈any fo karamanany, mifan̈araka amy zonany takiny lalàn̈a. (1 Timoty 5:18; Jakoba 5:1-4) Fa izikoa ndraiky atsika miasa amy rahalahy na ranabavy, tokony hataontsika tsara fo asantsika mifan̈araka amy karamantsika. (2 Tesalonianina 3:10) Atsika koa miasa aminolo miaraka mivory amintsika, atsika tsy tokony han̈araraotro hangala fotoan̈a tsy iasan̈a na tombontsoa hafa ankoatrany azonolo sasany.​—⁠Efesianina 6:​5-8.

14. Ino raha tokony hataony Kristianin̈y, izikoa fa mitrosa na mampitrosa vola olo miaraka mivory aminany? Nan̈ino izy tokony han̈ano zen̈y?

¹⁴ Akory ndraiky tokony hatao izikoa misy Kristianin̈y miaraka mivarotro na mitrosa aminao? Mahatsara atsika fo man̈araka toro lalan̈a amy Baiboly ty: Man̈anova taratasy! Nisy fotoan̈a, Jeremia paminan̈y nivanga tany. Ino raha nataony? Nirahiny natao taratasy ndreky nadika fan̈indroeny fan̈ikian̈a io, baka io izy nangala vavolombelon̈o. (Jeremia 32:​9-​12; zahava koa Genesisy 23:​16-​20.) Ke anao koa man̈ano fan̈ikian̈a aminolo miaraka mivory aminao, sorata tsiaraikiaraiky raha momba izio. Aza adin̈a mangala vavolombelon̈o ndreky man̈ano sin̈e taratasy io. Zen̈y tsy mivolan̈a fa atsika tsy matoky rahalahintsika. Ilain̈y izio afara an̈y, izikoa misy raha manahiran̈a na hevitry tsy mitovy. Tsy tokony hadin̈antsika fa tsisy raha tokony hambelantsika handrobaka fihavan̈antsika aminolo an̈aty fiangonan̈a. *—1 Korintianina 6:1-8.

15. Akory fahitany Jehovah olo pivarotro man̈ano raha tsy marin̈y? Karakory tokony hataony Kristianin̈y?

¹⁵ Tsy an̈aty fiangonan̈a zaraiky fo atsika tokony han̈ano ny marin̈y. Karaha ty nambarany Paoly: ‘Zahay man̈iry  han̈ano ny marin̈y amy raha jiaby.’ (Hebreo 13:18) Tiany Jehovah koa atsika han̈ano ny marin̈y, izikoa fa mitady vola. Amy bokiny Ohabolana ao, inefatra aby izy mivolan̈a fa tokony hampiasa balansy marin̈y atsika. (Ohabolana 11:1; 16:11; 20:10, 23) Taloha, olo koa fa nivanga na nandafo raha, nampiasa balansy ndreky vatony balansy, fotony nipizen̈y aby na raha nivangain̈y zen̈y na vola nivangan̈a raha io. Pivarotro sasany amy zay namitaka olo nivanga raha taminany, ke iro nampiasa vatony balansy aroe karazany ndreky balansy tsy marin̈y. * Halany Jehovah olo man̈ano raha karaha zen̈y! Tsy tiantsika hiala amy fitiavany Zan̈ahary, ke fady atsika man̈ano raha tsy marin̈y.

16, 17. Ankamarozanolo amy donia ty tsy man̈ano ny marin̈y. Ino aby raha ataondro? Tapakevitry han̈ino atsika Kristianin̈y?

¹⁶ Tsy tokony ho gaga atsika, izikoa manjaka fan̈anovan̈a ny tsy marin̈y amy donia ty, fotony Satana pitondra izy ty. Isanandra, maro raha mety hitsapa jery atsika tsy han̈ano ny marin̈y. Fataonolo, izikoa fa mameno taratasy fangatahan̈a hiasa, iro mavandy. Sasany mivolan̈a manan̈a diplomy be, kanefa vandy fo zen̈y. Matetiky koa olo mavandy, izikoa fa mameno taratasy momba tany hipitrahan̈a, na latety, na asiransy na raha miramira amy zen̈y, hazahoan̈a tombony fo. Maro koa pianatra mangala tahaka koa fa man̈ano fan̈adin̈ana. Iro koa fa irahin̈y mamoron̈o lahatsoratra na mitady fan̈azavan̈a momba raha araiky, iro mangala fan̈azavan̈a aminy Internet fo. Karaha iro in̈y namoron̈o raha io. Misy koa olo man̈ano risoriso amy manampahifan̈a, baka azony raha tadiaviny. Tsy mahagaga raha zen̈y, fotony ankamarozanolo amy donia ty, ‘tia ten̈a ndreky tia vola, baka io tsy tia ny tsara.’—2 Timoty 3:1-5.

¹⁷ Ten̈a Kristianin̈y ndraiky tapakevitry fo han̈ano ny marin̈y. Tsy mora raha zen̈y, fotony karaha miadan̈a ndreky efa  tafita iro olo aby man̈ano ny tsy marin̈y io. (Salamo 73:1-8) Atsika Kristianin̈y ndraiky mety ho sahiran̈a mare, fotony atsika tihan̈ano ny marin̈y “amy raha jiaby.” Ke mba misy varany edy han̈anovantsika ny marin̈y? Ia! Ino mahavy atsika mivolan̈a zen̈y? Ino hatsaran̈a ho azontsika, izikoa atsika man̈ano ny marin̈y fo?

18. Nan̈ino ma raha ten̈a maventy malaza man̈ano ny marin̈y zen̈y?

¹⁸ Tsisy raha tsara mandilatra malaza man̈ano ny marin̈y ndreky atokisan̈a. Olo jiaby mahavita man̈ano zen̈y aby, na pan̈arivo izy na masikiny, na mahay raha na tsy mahay raha, na tsara sora na ratsy sora. Ndray zen̈y, vitsy fo olo manan̈a laza tsara io. (Mika 7:2) Mety ho hisy olo hankadala anao, fotony anao man̈ano ny marin̈y. Ndray zen̈y, hisy fo koa olo hankasitraka anao, ke hatoky ndreky han̈aja anao. Maro Vavolombelon̈o Jehovah nahita hatsaran̈a baka amy fan̈anovan̈a ny marin̈y io. Ohatra, maro piasa nafaka asa, fotony iro tsy nan̈ano ny marin̈y, fa Vavolombelon̈o Jehovah ndraiky tsy tatrany raha karaha zen̈y. Misy amindro nanjary nahita asa, fotony olo man̈ano ny marin̈y fo tadiaviny orinasa araiky.—Zahava efajoro “ Zaho ty ma mba Man̈ano ny Marin̈y Edy?”.

19. Ino hatsaran̈a ho azontsika, izikoa atsika man̈ano ny marin̈y fo? Han̈ano akory fihavan̈antsika amy Jehovah, atsika koa man̈ano zen̈y?

¹⁹ Ho hitanao koa fa maro raha tsara ho azonao, izikoa anao man̈ano ny marin̈y. An̈isanizen̈y, eritreritrinao hilamin̈y fo. Paoly nivolan̈a: ‘Zahay masaky mivolan̈a aminaro fa eritreritrinay milamin̈y.’ (Hebreo 13:18) Tsy maintsy ho hitany Babantsika be fitiavan̈a io fo lazanao tsara zen̈y, fotony tiany mahita olo man̈ano ny marin̈y. (Vakia Salamo 15:1, 3; Ohabolana 22:1.) Tsy hiala amy fitiavany Zan̈ahary atsika, izikoa man̈ano ny marin̈y fo. Tsisy raha bebenizen̈y eky! Hidinihintsika ndraiky izioty fomba fisain̈any Jehovah momba asa.