1, 2. Ino aby safidy mety hataontsika, izikoa fangalan̈a diandian̈a koran̈iny?

DINIHA hely baka ty: Karakory ataonao izikoa anao tihinan̈a pomy, kanefa hitanao fa misy tapany amy pomy io lo? Hihoaninao fo pomy io sa harianao? Sa hadosonao tapany lo in̈y fa baka io ahaninao tapany mbala tsara?

² Fangalan̈a diandian̈a koa mety hampitovisin̈y amy pomy io. Mba tihangala diandian̈a atsika ndraikindraiky, kanefa maro fangalan̈a diandian̈a efa tsy mety amy Kristianin̈y. Ino raha tokony hataonao? Tsy mampan̈ino olo sasany mizaha raha ratsy, ke zay fangalan̈a diandian̈a misy amy donia ty ataondro aby. Sasany ndraiky tsy mangala diandian̈a foeky tsao tojy fangalan̈a diandian̈a tsy mendriky. Misy koa mangala diandian̈a fa mahalan̈a, fotony iro mitandrin̈y mare amy raha hataondro fangalan̈a diandian̈a. Izikoa tsy tiantsika hiala amy fitiavany Zan̈ahary, atsika mila mahay mifidy fangalan̈a diandian̈a atao.

3. Ino ma raha handeha hidinihintsika izio?

³ Ankamarozantsika mety hifidy araiky fahatelo io. Atsika jiaby samy man̈eky fa mila mangala diandian̈a, kanefa tsy tiantsika izikoa raha tsy mendriky hataontsika fangalan̈a diandian̈a. Dikanizen̈y, mila mahay man̈avaka atsika, fangalan̈a diandian̈a karakory mahatsara  atsika na tsy mahatsara atsika. Mety han̈ano akory fanompoantsika Jehovah izikoa atsika tsy mahay mifidy fangalan̈a diandian̈a? Zen̈y raha hidinihintsika izio.

4. Fangalan̈na diandian̈a karakory tokony fidintsika, izikoa atsika efa nanokanten̈a tamy Jehovah?

⁴ Misy Vavolombelon̈o Jehovah efa ela, vita batisa tamy taon̈o 1946 nivolan̈a: “Mifen̈y fo zaho han̈aton̈o kabaro momba batisa jiaby. Tandrin̈esako tsarabe fan̈azavan̈a. Ataoko mira zaho in̈y hatao batisa.” Ino antony? Karaha ty volan̈iny: “Kabaro aby zen̈y mampatsiaro zaho fa efa nanokanten̈a tamy Jehovah zaho, ke zen̈y nan̈ampy zaho tsy hivadiky.” Asa anao mba karaha zen̈y koa? Izikoa alenao onon̈o fo fa anao efa nanokanten̈a hanompo Jehovah mandrakizay, ho vitanao fo hiaritry. ( Vakia Mpitoriteny 5:4.) Zen̈y koa han̈ampy anao hanapakevitry, na amy raha momba fanompoan̈a zen̈y na amy raha hafa, an̈atinizen̈y fangalan̈a diandian̈a. Apostoly Paoly nivolan̈a: “Zay raha ataonaro, na mihinan̈a anaro na migiaka, na ino na ino raha ataonaro, ameza voninahitry fo Zan̈ahary.”—1 Korintianina 10:31.

5. Izikoa Levitikosy 22: 18-20 ndreky Romanina 12: 1 zahan̈a, ino raha maventy nampitandremin̈y atsika?

 ⁵ Zay raha ataontsika misy ifandraisany amy fanompoan̈a Jehovah. Zen̈y nahavy apostoly Paoly nampatsiaro hevitry maventy ty tamindro Kristianin̈y ta Roma: ‘Ain̈inaro ataova soron̈o velon̈o ndreky masin̈y, baka io ankasitrahiny Zan̈ahary.’ (Romanina 12:1) Tafiditry aminy ‘ain̈y’ zen̈y sain̈y ndreky fo, baka io angovo. Raha jiaby zen̈y tokony hampiasainao hanompoan̈a Zan̈ahary. (Marka 12:30) Fanompoan̈a Zan̈ahary io nampitovisiny Paoly tamy soron̈o, ke misy raha tiany Paoly hampitandremin̈y atsika. Tamy Lalàn̈any Mosesy, tsy nikeny Jehovah soron̈o araiky izikoa nisy antsa. (Levitikosy 22:18-20) Tsy hikeny Jehovah koa fanompoan̈a, na soron̈o, ataony Kristianin̈y izikoa maloto. Ino aby raha mety handoto fanompoan̈a ataontsika?

6, 7. Ino ma raha mety hahavy Kristianin̈y araiky handoto ain̈inany? Han̈ano akory fanompoany Jehovah izikoa izy man̈ano zen̈y?

⁶ Paoly koa fa nan̈anatra iro Kristianin̈y ta Roma, izy nan̈iraka iro ‘hamono asany nofotro jiaby’ baka tsy ‘hanjaka amy vatan̈dro eky fahotan̈a.’ (Romanina 6:12-14; 8:13) Fa talohany Paoly nanoratra tamindro, nazavainy antsendriky ino aby raha tafiditry aminy “asany nofotro” zen̈y. Karaha ty nambarany momba olo panota: ‘Vavanany feno ozon̈o.’ ‘Vitinany [mekimeky] hamono olo.’ ‘Amy masonany tsy ahitan̈a tahotro Zan̈ahary foeky.’ (Romanina 3:13-18) Izikoa Kristianin̈y araiky mampiasa ‘ain̈inany’ na rantsambatan̈anany amy raha ratsy, efa mira misy kilema ain̈inany. Izikoa izy kinia mizaha sary vetaveta na raha momba famonoan̈a olo, efa mira ‘nan̈ambela fahotan̈a hanjaka amy [masonany]’ izy, ke ain̈inany jiaby foeky maloto. Jehovah tsy han̈eky fanompoan̈a ataony, fotony soron̈o nataony efa tsy  masin̈y eky. (Deoteronomia 15:21; 1 Petera 1:14-16; 2 Petera 3:11) Atsika fo ho voa izikoa tsy mahay mifidy fangalan̈a diandian̈a karaha zen̈y!

⁷ Hitantsika baka amy zen̈y fa mifandray fanompoantsika Jehovah ndreky fangalan̈a diandian̈a ataontsika. Tokony fangalan̈a diandian̈a man̈ampy atsika hankatsara soron̈o amiantsika Jehovah fo fidintsika fa tsy araiky handro­baka fihavan̈antsika aminany. Fangalan̈a diandian̈a karakory mahatsara na tsy maha­tsara atsika? Zen̈y raha hidinihintsika izioty.

8, 9. a) Mety zarain̈y firy ma fangalan̈a diandian̈a? b) Fangalan̈a diandian̈a karakory tsy tokony hataontsika? Ino antony?

⁸ Mety zarain̈y aroe fangalan̈a diandian̈a io: Misy fangalan̈a diandian̈a tsy tokony hataony Kristianin̈y, fa misy ndraiky fangalan̈a diandian̈a mety hikeny sain̈y fotony miankiny aminolo tsiaraikiaraiky. Atsika izio hizaha araiky voanalohany, fangalan̈a diandian̈a tsy tokony hataony Kristianin̈y.

⁹ Hitantsika tamy Toko 1 fa misy fangalan̈a diandian̈a ahitan̈a raha tsy mifan̈araka amy Soratra Masin̈y, karaha ataony famonoan̈a olo, fifandraisan̈a amy demony, baka io sary vetaveta. Raha jiaby zen̈y mety ho hita aminy Internet, amy filma, hira ndreky lamoziky. Tsy mety amy Kristianin̈y fangalan̈a diandian̈a karaha zen̈y. Mety ho tsara fahitanolo raha aby io, kanefa tsy mifan̈araka amy toro lalan̈a ndreky lalàn̈any Zan̈ahary amy Baiboly ao. Ten̈a Kristianin̈y tsy mangala diandian̈a amy raha efa hita tsy mety karaha zen̈y. (Asan’ny Apostoly 15:28,29; 1 Korintianina 6:9, 10; Apokalypsy 21:8) Izikoa anao tsy man̈ano raha jiaby niton̈onin̈y tio in̈y, ho hitany Jehovah fo fa ‘halanao ankitin̈y raha ratsy’, ke ‘ialanao’ foeky.  Ho hita koa fa anao manan̈a “finoan̈a tsisy fitsarambelatsihy.”—Romanina 12:9; Salamo 34:14; 1 Timoty 1:5.

10. Ino hevitry diso mety hanan̈anolo? Ino mahavy atsika mivolan̈a fa voafitaka olo araiky izikoa mieritreritry raha karaha zen̈y?

¹⁰ Misy olo mieritreritry fa tsy mampan̈ino aby mizaha fitondranten̈a maloto amy filma amy tele. Volan̈indro: ‘Maso mahita tsy mitondra mody!’ Voafitaka olo araiky izikoa mieritreritry zen̈y. (Vakia Jeremia 17:9.) Izikoa raha efa haintsika fa halany Jehovah hataontsika fangalan̈a diandian̈a, mba ‘tsy tia raha ratsy’ edy atsika koa man̈ano zen̈y? Izikoa raha ratsy fo zahantsika na vakintsika na tandrin̈esantsika matetiky, ho donto eritreritrintsika. (Salamo 119:70; 1 Timoty 4:1, 2) Mety atsika foeky ho tafan̈ano raha tsy manjary io amy farany, na mety tsy ho taitry foeky atsika izikoa fa mahita olo man̈ano raha ratsy karaha zen̈y.

11. Izikoa fangalan̈a diandian̈a koran̈iny, ino ivolan̈ana fa marin̈y ankitin̈y raha koran̈iny Galatianina 6: 7?

¹¹ Matetiky misy raha karaha zen̈y. Nisy Kristianin̈y nanjary ratsy fitondranten̈a, fotony izy zatra nizaha raha ratsy koa fa nangala diandian̈a. Efa voa izy vo tontohitry fa “zay raha afafinolo fo hijinjainy.” (Galatianina 6:7) Atsika tsy voatery ho voa vo mahay. Ho maro hatsaran̈a ho azonao izikoa raha tsara fo ampidirinao amy jerinao.—Zahava efajoro “ Fangalan̈a Diandian̈a Karakory ma Tokony Fidiko?”

12. Akory han̈arahantsika toro lalan̈a amy Galatianina 6: 5 koa fa hangala diandian̈a? Ino raha mety han̈ampy atsika hanapakevitry?

¹² Atsika izio handiniky araiky faharoe, fangalan̈a diandian̈a tsy koran̈iny Baiboly mivantan̈a na mety na tsy mety. Izikoa zen̈y ny raha misy, anjarany Kristianin̈y  tsiaraikiaraiky mifidy na izy han̈ano izio na tsy han̈ano. (Vakia Galatianina 6:5.) Han̈ampy atsika hahay hanapakevitry tsarabe toro lalan̈a amy Baiboly ao, fotony amy Baiboly ao fo ahitantsika hevitry Zan̈ahary. Izikoa isaka atsika han̈ano raha, na hangala diandian̈a zen̈y, zatra mandiniky toro lalan̈a aby zen̈y, ho haintsika fo han̈avaka ino marin̈y raha mifan̈araka amy “sitrapony Jehovah.”—Efesianina 5:17.

13. Ino raha mety han̈ampy atsika tsy han̈ano raha halany Jehovah koa fa mangala diandian̈a?

 ¹³ Tsy voatery hitovy fahaizany Kristianin̈y man̈avaka ny tsara ndreky ratsy. (Filipianina 1:9) Olo koa samy amy raha tiany, na fangalan̈a diandian̈a zen̈y na raha hafa. Tsy voatery hitovy aby fanapahankevitry hataony Kristianin̈y. Fa izikoa toro lalan̈a amy Baiboly ao fo mameno fontsika ndreky sain̈intsika, atsika tsy mety han̈ano raha halany Jehovah izikoa fa mangala diandian̈a.—Salamo 119:11, 129; 1 Petera 2:16.

14. a) Ino koa raha mila dinihintsika izikoa fa hangala diandian̈a? b) Karakory man̈nano voalohantoeran̈a Fanjakan̈any Zan̈ahary zen̈y?

¹⁴ Fotoan̈a koa an̈isany raha maventy tokony dinihin̈y izikoa fa hangala diandian̈a. Arakaraka fangalan̈a diandian̈a ataonao ahaizanolo anao. Fa arakaraka fotoan̈a laninao han̈anovan̈a izio ndraiky ahitanolo raha ten̈a maventy aminao. Amintsika Kristianin̈y, raha jiaby mifandray amy fanompoantsika Jehovah fo ten̈a maventy amy fiain̈anantsika. (Vakia Matio 6:33.) Karakory ma man̈ano voalohantoeran̈a Fanjakan̈any Zan̈ahary zen̈y? Volan̈iny Paoly: “Mitandrema tsara fo anaro tsy hitondra ten̈a mira olo adala fa mira olo misy jery, ke hararaota tsarabe fotoan̈a, fa ratsy andra izioty.” (Efesianina 5:15, 16) Izikoa anao tsy mandany fotoan̈a be loatra amy fangalan̈a diandian̈a, ho vitanao han̈ano “raha ten̈a maventy”, tsy ino zen̈y fa raha mankatsara fihavan̈anao amy Jehovah.—Filipianina 1:10.

15. Nan̈ino atsika tokony hitandrin̈y mare koa fa hifidy fangalan̈a diandian̈a?

¹⁵ Himpody ndraiky aminy ohatra nalaintsika tamy voanalohany in̈y atsika. Izikoa misy lo amy pomy tianao hoanin̈y io, tsy tany misy lo fo hadosonao fa marikidrikitry izy io koa, baka anao tsy tafanelin̈y raha lo. Karaha  zen̈y koa tokony hataony Kristianin̈y, izikoa fa hifidy fangalan̈a diandian̈a. Tsy fangalan̈a diandian̈a mandika mivantan̈a toro lalan̈a amy Baiboly fo tsy ataontsika, fa raha jiaby mety handrobaka fihavan̈antsika amy Jehovah. (Ohabolana 4:25-27) Ho vitanao han̈ano zen̈y izikoa anao man̈araka tsarabe raha koran̈iny Baiboly.

16. a) Akory ahitan̈a fa mitovy hevitry amy Jehovah atsika izikoa fitondranten̈a koran̈iny? b) Karakory tokony hataontsika baka atsika ho zatra man̈araka toro lalan̈a Zan̈ahary amy Baiboly fo?

¹⁶ Kristianin̈y araiky koa fa hifidy fangalan̈a diandian̈a, hevitry Jehovah raha voanalohany tokony dinihiny. Amy Baiboly ao ahitantsika hevitrinany ndreky fitsipikinany zen̈y. Panjaka Solomona nivolan̈a fa halany Jehovah ‘lela mavandy, tan̈ana mandatsaka lionolo tsy manantsin̈y, fo miron̈o han̈ano ratsy, vity malaky milomoay han̈ano ny ratsy.’ (Ohabolana 6:16-19) Tokony handrisiky anao han̈ano ino fomba fisain̈any Jehovah zen̈y? Nivolan̈a panoratra Salamo fa ‘lan̈iany olo tia Jehovah tsy tokony ho tia raha ratsy.’ (Salamo 97:10) Tokony ho hita amy fangalan̈a diandian̈a ataonao fa ten̈a halanao raha halany Jehovah. (Galatianina 5:19-21) Aleva onon̈o fa raha ataonao amy mangingin̈y tsy hitanolo an̈y ten̈a ahitan̈a toetrinao. (Salamo 11:4; 16:8) Izikoa tianao hanan̈a fomba fisain̈any Jehovah amy raha jiaby  ataonao, anao mila man̈araka toro lalan̈anany, isaka anao hanapakevitry. Hanjary zatra man̈ano zen̈y foeky anao koa fa mandeha fotoan̈a.—2 Korintianina 3:18.

17. Ino aby fan̈ontanian̈a tsara dinihintsika alohany hifidy fangalan̈a diandian̈a?

¹⁷ Ino koa raha mety han̈ampy anao hitovy hevitry amy Jehovah, izikoa fa hifidy fangalan̈a diandian̈a? Diniha hely baka ty: ‘Han̈ano akory fihavan̈anao amy Zan̈ahary izikoa anao man̈ano izio?’ Alohany anao hizaha filma, iritrireta ty: ‘Han̈ano akory eritreritrinao, koa fa baka mizaha izio?’ Atsika izio hizaha toro lalan̈a momba zen̈y.

18, 19. a) Karakory han̈ampiany Filipianina 4: 8 atsika hahay hifidy fangalan̈a diandian̈a? b) Ino koa toro lalan̈a hafa mety han̈ampy anao? (Zahava lamariky amy pazy ambany.)

¹⁸ Misy toro lalan̈a araiky amy Filipianina 4:⁠8. Volan̈iny ao: “Zay raha marin̈y, raha maventy, raha mahitsy, raha madio, raha mampatsaratsara, tsara laza, misy hatsaran̈a ndreky man̈eva isaoran̈a, zen̈y fo iritrireta.” Marin̈y ndraiky fa Paoly tsy nikoran̈a mivantan̈a momba fangalan̈a diandian̈a, kanefa raha koa fa hampidirintsika an̈aty fontsika tokony hamparavoravo Zan̈ahary fo. (Salamo 19:14) Mahatsara atsika fo man̈araka toro lalan̈a io koa fa hifidy fangalan̈a diandian̈a. Amy karakory?

¹⁹ Ty raha tsara dinihinao: ‘Raha “madio” fo ma ampidiriko amy jerinaka, izikoa zahan̈a filma, na soma amy video, na lamoziky, na raha hafa ataoko fangalan̈a diandian̈a?’ Ino sary tavela amy jerinaka, zaho koa fa baka mizaha filma? Izikoa sary tsara ndreky madio tavela amy jerintsika, dikanizen̈y, tsara fangalan̈a diandian̈a nataontsika, fa izikoa ndraiky raha zahantsika mahavy atsika hieritreritry raha maloto, dikanizen̈y, ratsy fangalan̈a diandian̈a nataontsika, ke tsy mahatsara atsika foeky.  (Matio 12:33; Marka 7:20-23) Izikoa anao mieritreritry raha maloto, sain̈inao tsy hilamin̈y. Ho donto koa eritreritrinao efa zatra nan̈araka raha koran̈iny Baiboly in̈y, ke ho tapaka foeky fihavan̈anao amy Jehovah. (Efesianina 5:5; 1 Timoty 1:5, 19) Irarian̈a anao ho tapakevitry tsy han̈ano fangalan̈a diandian̈a karaha zen̈y. * (Romanina 12:2) Aleva tahaka raha nataony panoratra Salamo. Izy nivavaka tamy Jehovah karaha ty: ‘Aza ambela hizaha raha tsisy dikany masonaka.”—Salamo 119:37.

20, 21. Akory han̈ampiany 1 Korintianina 10: 23, 24 atsika hahay hifidy fangalan̈a diandian̈a?

²⁰ Ty raha nambarany Paoly izikoa fa anjaranolo tsiaraikiaraiky manapakevitry: “Mety hatao aby raha jiaby, fa tsy raha jiaby mankahery. Irarian̈a anaro tsiaraikiaraiky samy hizaha raha mahatsara namanaro, fa tsy raha mahatsara anaro tompiny fo.” (1 Korintianina 10:23, 24) Karakory han̈anovanao zen̈y? Isaka anao hangala diandian̈a, anao mandiniky tsara: ‘Mety han̈elingelin̈y olo ma fangalan̈a diandian̈a ataoko ty, sa karakory?’

²¹ Mety misy fangalan̈a diandian̈a hitanao “mety” sady tsy man̈enjiky eritreritrinao, fa mety tsy ho karaha zen̈y fahitanolo izio. Anao mety hanapakevitry tsy han̈ano izio foeky, fotony tsy tianao ‘hanota amy rahalahinao’, baka io tsy tianao koa ‘hanota amy Kristy’, karaha nivolan̈iny Paoly in̈y. Mety hanota amy Kristy atsika izikoa baka amy raha ataontsika fo hahavy rahalahintsika hivadiky amy Jehovah. Atsika tokony han̈araka  torohevitry feno fitiavan̈a baka amy Soratra Masin̈y, ke tsy han̈ano raha hampalahelo namantsika. (1 Korintianina 8:12; 10:32) Ten̈a Kristianin̈y man̈araka volan̈a zen̈y, ke izikoa misy fangalan̈a diandian̈a hitany “mety” aminany kanefa hainy fa tsy ‘hankahery’ namany, aleony tsy man̈ano zen̈y.—Romanina 14:1; 15:1.

22. Nan̈ino Kristianin̈y tsy tokony hanery namany han̈araka hevitrinany, izikoa fa anjaranolo tsiaraikiaraiky manapakevitry?

²² Ndray eritreritry Kristianin̈y araiky sarotiny, izy mety mizaha raha mahatsara namany fo. Izy tsy tokony hanery olo han̈araka hevitrinany momba fangalan̈a diandian̈a hitany fa tsara. Izikoa zen̈y raha misy, izy mira olo mandeha amy lalabe, kanefa tireny olo han̈araka dianany. Tsy mety zen̈y! Akory tokony hataony izikoa eritreritrinany sarotiny? Izikoa tiany ankitin̈y rahalahiny aby io, izy tokony han̈aja hevitrindro fo izikoa mbala tsy mifanohitry amy toro lalan̈a Zan̈ahary raha zen̈y. Izikoa izy man̈ano zen̈y, ‘ho hitanolo jiaby fo fa izy mahay mandanjalanja.’—Filipianina 4:5; Mpitoriteny 7:16.

23. Karakory hahaizanao fa mahatsara anao fangalan̈a diandian̈a fidinao?

²³ Fehiny raha jiaby zen̈y, atsika mila mangala toky fo fa mahatsara atsika fangalan̈a diandian̈a fidintsika. Aza mangala diandian̈a amy raha misy fitondranten̈a maloto. Izikoa tsisy torohevitry mivantan̈a, areha fo toro lalan̈a amy Baiboly ao. Aza mifidy fangalan̈a diandian̈a mety hahavy anao hinjehiny eritreritrinao. Fangalan̈a diandian̈a ataonao koa hainao tsy mety amy namanao, indraka fa rahalahinao, milifera fo. Irarian̈a anao ho tapakevitry fo han̈ano zen̈y, ke han̈amia voninahitry Zan̈ahary! Zen̈y han̈ampy anao ndreky ry havanao tsy hiala amy fitiavany Zan̈ahary.