1, 2. Ino ma raha tsara namiany Zan̈ahary atsika? Nan̈ino izio misy valera?

FAHIN̈ANA an̈isany raha tsara sady valera namiany Babantsika andan̈itry an̈y atsika. Baka amizio mahavy atsika mahavita mangala tahaka toetrinany ndreky mahay mandiniky. (Genesisy 1:27) Fahaizantsika raha zen̈y han̈ampy atsika han̈araka toro lalan̈a Zan̈ahary amy Baiboly ao. Atsika koa fa man̈araka toro lalan̈a aby zen̈y, atsika hanjary ho matotro, ho tia Jehovah, ndreky hampiasa ‘fahaizantsika misain̈y han̈avaka ny tsara ndreky ratsy.’—Hebreo 5:14.

² Mila haintsika fomba han̈arahan̈a toro lalan̈a aby zen̈y, fotony efa maro raha vitanolombelon̈o, kanefa amy Baiboly ao mety tsy hahitantsika lalàn̈a amy raha jiaby mety hiboaka. Zen̈y raha misy izikoa fa dinihin̈y raha momba fitahan̈a, aody na fitahan̈a ampiasan̈a lio. Mila mandiniky tsarabe atsika izikoa tiantsika han̈araka volan̈a Jehovah. Izikoa fa mazava amintsika toro lalan̈a Zan̈ahary momba raha aby io, ho haintsika hanapakevitry, ke eritreritrintsika hilamin̈y, baka io atsika tsy hiala amy fitiavany. (Ohabolana 2:6-11) Atsika izio hizaha sasany amy toro lalan̈a aby zen̈y.

3, 4. Nanomboko ombian̈a ma Jehovah nan̈aboaka tsarabe fa masin̈y lio? Ino toro lalan̈a amy Baiboly ao ahitantsika zen̈y?

³ Tafara heliny Kaina namono Abela in̈y, naboakany Jehovah tsarabe fa fahin̈ana ndreky lio io mifandray, fotony  masin̈y aby iro io. Karaha ty nambarany tamy Kaina: ‘Mitarain̈y aminaka liony rahalahinao baka amy tany ao.’ (Genesisy 4:10) Amy Jehovah, mira fahin̈ana Abela fo liony Abela. Mira mangataka valifaty liony Abela, fotony Kaina tsisy hinakinaka foeky namono izy.—Hebreo 12:24.

⁴ Tafarany Safodrano, nambelany Jehovah hihinan̈a hena olombelon̈o, fa lio fo tsy mety hoanin̈y. Volan̈iny: ‘Nofotro mbala misy lio fo tsy mahazo hoaninaro. Izikoa misy biby na olo mamono anaro, zaho hitsara izy amy lionaro nalatsany zen̈y.’ (Genesisy 9:4, 5) Taranaka Noa jiaby tokony han̈araka didy io, an̈isanizen̈y atsika. Volan̈a io koa mankamarin̈y volan̈a Zan̈ahary tamy Kaina, tsy ino zen̈y fa amy lio ao fahin̈ana raha jiaby manampahin̈ana. Hitantsika baka amy didy io koa fa hitsarainy Zan̈ahary zay olo tsy man̈aja fahin̈ana ndreky lio, fotony izy Loharanony fahin̈ana.—Salamo 36:9.

5, 6. Izikoa Lalàn̈any Mosesy dinihin̈y, ino ivolan̈ana fa lio io raha masin̈y ndreky valera? (Zahava koa efajoro “ Hajà Fahin̈ana Biby.”)

⁵ Hita amy Lalàn̈any Mosesy koa fa lio io raha masin̈y ndreky valera. Levitikosy 17:10, 11 mivolan̈a: ‘Izikoa misy olo mihinan̈a lio, na lionino zen̈y na lionino, hisaziko olo mihinan̈a lio io. Haripako tsy ho an̈isany firenena io izy, fotony amy lio ao misy fahin̈ana. Ke zen̈y nahavy zaho nan̈iraka anaro, ataova aminy alitara lio io handrakofan̈a fahotan̈anaro. Lio zaraiky fo mahavita mandrakotro fahotan̈a, fotony amy lio ao misy fahin̈ana.’ *—Zahava efajoro “ Lio Zaraiky Fo Mahavita Mandrakotro Fahotan̈a.”

⁶ Liony biby araiky koa fa tsy natao taminy alitara, tsy maintsy nararaka tamy tany. Namandraha nan̈ampody  fahin̈ana io tamy ten̈a Tompiny iro koa fa nan̈ano zen̈y. (Deoteronomia 12:16; Ezekiela 18:4) Zen̈y tsy mivolan̈a fa tsy maintsy niritrivindro liony biby io jiaby. Fa toromariky namian̈a iro izikoa fa hamono biby, mila lintain̈y zay vo mety hoanin̈y. Iro koa fa nan̈ano zen̈y, eritreritrindro efa nilamin̈y edy. Zen̈y koa fomba nan̈aboahandro fa iro nan̈aja Jehovah, Zan̈ahary Pan̈amia fahin̈ana io.

7. Karakory nan̈aboahany Davida fa masin̈y lio io?

 ⁷ Nazava tamy Davida toro lalan̈a naviany lalàn̈a momba lio io. Nifen̈y fo izy nan̈ano raha namparavoravo Jehovah. Indraiky andra izy sakara. (Asan’ny Apostoly 13:22) Nisy maramilanany telo lahy niditry ankeriny tamy tobiny fahavalo, nangala rano tamy vovondro tao, baka io nitondra zen̈y taminany. Fa volan̈iny Davida: “Tsy mety zaho koa higiaka liondro lelahy nitono ain̈y aby ty!” Taminany, rano io mira liondro telo lahy in̈y. Ke ndray izy sakara, “namiany Jehovah izio ke nararany tamy tany.”—2 Samoela 23:15-17.

8, 9. Izikoa fa nanomboko nisy fiangonan̈a kristianin̈y, niova ma hevitry Zan̈ahary momba fahin̈ana ndreky lio? Hazavà.

⁸ Kadiriny 2 400 taon̈o tafarany Jehovah nan̈amia didy io tamy Noa, tokotokony 1 500 taon̈o tafarany nan̈anovany Jehovah fifan̈ikian̈any Lalàn̈a, mbala tsy niova didy io. Ty raha nirahiny nisoratiny filankevipitantan̈ana tamy fiangonan̈a kristianin̈y voanalohany: ‘Tsy tiany fan̈ahy masin̈y ndreky zahay hampitondra anaro entan̈a mavesatra, izikoa tsy raha aby ty fo tsy maintsy tandremanaro: Fady raha natao soron̈o amy sampy, lio, biby nikindain̈y ndreky fijangajangan̈a.’—Asan’ny Apostoly 15:28, 29.

⁹ Nazava tamy filankevipitantan̈ana io fa raha masin̈y lio io, fotony olo araiky koa tsy man̈aja izio mira manompo sampy ndreky mijangajanga. Aminandra izioty, ten̈a Kristianin̈y mitovy hevitry amindro zen̈y koa. Iro man̈araka toro lalan̈a Zan̈ahary momba lio izikoa fa hanapahankevitry momba fampiasan̈a lio zen̈y, ke Jehovah ravoravo.

10, 11. a) Mety amy Vavolombelon̈o Jehovah ma mampiditry lio na taharo fototro lio io? b) Amy fotoan̈a karakory ma mety tsy hitovy karazan̈a fitahan̈a fidiny Kristianin̈y?

¹⁰ Amy Vavolombelon̈o Jehovah, dikany ‘fady lio’ zen̈y tsy man̈eky hampidiran̈a lio, baka io tsy man̈amia na  mikajy liondro hampiasain̈y amindro na aminolo hafa afara an̈y. Iro man̈aja Jehovah, ke zen̈y mahavy iro tsy man̈eky foeky hampidiran̈a taharo fototro lio, karaha ataony liomena, liofotsy, plakety, baka io plasma (ranony lio).

¹¹ Efa vitany dokotera mangala raha farany hely baka amy taharo fototro, baka io mampiasa zen̈y amy raha maro. Mety amy Kristianin̈y ma mampiditry raha aby zen̈y aminy ain̈indro? Sa raha aby io mbala mitovy “lio” fo? Anjaranolo tsiaraikiaraiky manapakevitry momba raha zen̈y. Maro karazan̈a fitahan̈a. Karaha ataony dializy, lionten̈a tompiny fo ampiasain̈y. Fa misy tekniky hafa koa ataony dokotera izikoa fa hampijanon̈o na hampihen̈y lio very aminolo maratra mare. Izikoa lio adoso amy marary io tsy akajìn̈y, anjaranany manapakevitry na izy han̈eky na izy tsy han̈eky fitahan̈a io.—Zahava Fan̈ampiny Fan̈azavan̈a, Raha Baka amy Taharo Fototro Lio Ndreky Tekniky Fandidian̈a Olo.”

12. Izio ma tsy mampan̈ino Jehovah raha ataontsika izikoa fa anjarany tsiaraikiaraiky manapakevitry? Akory tokony hataontsika izikoa fa hanapakevitry momba raha zen̈y?

 ¹² Misy olo mieritreritry fa izikoa fa anjaranolo tsiaraikiaraiky mifidy, tsy mampan̈ino Jehovah zay raha ataontsika. Tsy marin̈y zen̈y, fotony izy mandiniky raha an̈aty jerintsika ndreky antony mahavy atsika han̈ano zen̈y. ( Vakia Ohabolana 17:3; 24:12.) Isaka atsika hanapakevitry, tsara atsika mitady fan̈azavan̈a momba aody na fitahan̈a hatao amintsika io. Atsika koa mila mivavaka, baka io man̈ano raha mifan̈araka amy zen̈y. (Romanina 14:2, 22, 23) Atsika tsy tokony hanery olo han̈araka hevitrintsika, na han̈ontany karaha ty: ‘Izikoa anao tamy pilasinaka, ino raha nataonao?’ Fotony nan̈ino? “Samy hitondra entan̈anany aby olo tsiaraikiaraiky.” *—Galatianina 6:5; Romanina 14:12; zahava efajoro “ Masin̈y Aminao ma Lio Io?”

13. Ino ma toetriny Jehovah hitantsika izikoa fa mandiniky lalàn̈a ndreky toro lalan̈a namiany atsika? Ino man̈aporofo zen̈y?

¹³ Hita baka amy lalàn̈a ndreky toro lalan̈a amy Baiboly ao fa Jehovah Pan̈amia Lalàn̈a io ten̈a misain̈y, baka io izy mira Baba araiky tia sady mitady raha mahatsara zanany in̈y. (Salamo 19:7-11) Tsy baka amy raha momba fitahan̈a nahavy izy nan̈iraka atsika ho ‘fady lio’, kanefa miaro atsika aminy aretin̈y baka amy fampidiran̈a lio lalàn̈any Jehovah. (Asan’ny Apostoly 15:20) Amy zioty, mahaimaro fo dokotera mivolan̈a fa “tsisy tsaratsarany” fitahan̈a tsy ampiasan̈a lio. Zen̈y ahitan̈a fa Jehovah io ten̈a misain̈y sady tia atsika.—Vakia Isaia 55:9; Jaona 14:21, 23.

14, 15. a) Ino aby sasany amy lalàn̈a namiany Jehovah olonany ahitan̈a fa izy tia iro ankitin̈y? b) Karakory tokony hataontsika izikoa atsika man̈araka toro lalan̈a momba fiarovanten̈a?

¹⁴ Izikoa lalàn̈a namiany Zan̈ahary olonany dinihin̈y, izy  ten̈a nitady raha hahatsara iro fo. Ohatra izio, iro koa fa niasa tran̈o misy etazy, nirahiny iro han̈isy valavala man̈odidin̈y tran̈o io, baka tsisy raha havoa iro. (Deoteronomia 22:8; 1 Samoela 9:25, 26; Nehemia 8:16; Asan’ ny Apostoly 10:9) Izikoa olo araiky nanan̈a aomby masiaka, nirahiny niambesan̈a mare tsao hanoto na hamono olo. (Eksodosy 21:28, 29) Nahazo damby tamy Zan̈ahary zay olo tsy nan̈araka lalàn̈a io, ke nahafaty olo baka amy tsy fitandreman̈a.

¹⁵ Karakory han̈arahantsika toro lalan̈a io? Ty raha tsara dinihintsika: ‘Man̈ano akory ma tomabilinaka ndreky fomba fitondrasako izio? Karakory biby tarimiako, tran̈onaka, tany fiasako ndreky fangalan̈a diandian̈a ataoko?’ Amy tany sasany, maro tanora matiny tomabily, fotony iro koa fa mitondra tomabily, iro mandeha mare loatra. Fa izikoa tanora araiky tsy tihiala amy fitiavany Zan̈ahary, izy han̈aja fahin̈ana fo. Izy tsy tokony hieritreritry fa tsisy raha havoa izy fotony izy tanora. Sady hadalan̈a foeky zen̈y! Mila mitandrin̈y fo izy amy raha ataony, baka izy hankafy tsarabe fotoan̈a maha tanora izy.—Mpitoriteny 11:9, 10.

16. Izikoa Baiboly zahan̈a, mety ma man̈adoso tsaiky? (Zahava lamariky amy pazy ambany.)

¹⁶ Masin̈y amy Zan̈ahary koa fahin̈ana tsaiky an̈aty kibo. Tamy faha Israelita, izikoa nisy olo niady ke nahafaty man̈angy mavesatra na tsaiky an̈aty kibony, amy Jehovah mira namono olo fo izy, ke izy han̈amia fahin̈ananany ‘solony fahin̈ana’ nadosony io. * ( Vakia Eksodosy 21:22, 23.) Ndray zen̈y fo mampalahelo Jehovah, intsaka eky man̈adoso tsaiky! Maro man̈angy man̈adoso tsaiky, fotony iro tsy tihiteraka. Maro koa lelahy hiarahandro, kanefa fombandro tsy tiandro hialan̈a. Mampalahelo Jehovah raha zen̈y!

17. Izikoa man̈angy araiky nan̈adoso tsaiky talohany izy nianatra Baiboly, karakory hataonao hankahery izy?

 ¹⁷ Akory fo basy izikoa man̈angy araiky nan̈adoso tsaiky talohany izy nianatra Baiboly? Izikoa izy nanen̈iny amy  raha ratsy vitany, Jehovah hamindra fo aminany, baka io hamafa helokonany miorin̈y amy soron̈o nataony Jesosy. (Salamo 103:8-14; Efesianina 1:7) Zen̈y nahavy Jesosy nivolan̈a: “Antony naviako io tsy raha hikaiky olo marin̈y, fa hikaiky olo panota baka izy hibebaka.”—Lioka 5:32.

18. Izikoa Baiboly zahan̈a, ino mahavy olo hamono olo?

¹⁸ Tsy ampy tsy man̈ano ratsy olo. Tiany Jehovah hadosontsika an̈aty fontsika foeky tsy fitiavan̈a olo, fotony baka amy zen̈y mahavy olo hamono olo. Volan̈iny apostoly Jaona: “Zay olo tsy tia rahalahiny pamono olo.” (1 Jaona 3:15) Olo karaha zen̈y tsy raha vitany tsy tia fo fa tiany hofoaty foeky olo io. Mety hivolan̈a izy fa nan̈ano fahotan̈a maventy olo halany io, ke mendriky saziny Zan̈ahary. (Levitikosy 19:16; Deoteronomia 19:18-21; Matio 5:22) Mila mifen̈y mare atsika han̈adoso raha jiaby mety hahavy atsika tsy tia namantsika!—Jakoba 1:14, 15; 4:1-3.

19. Akory han̈arahantsika toro lalan̈a amy Salamo 11:5 ndreky Filipianina 4:8, 9?

¹⁹ Misy dikany amy Jehovah fahin̈ana io, ke izikoa tsy tiantsika hiala amy fitiavany, atsika tsy tokony ho kafiry amy namantsika. Salamo 11:5 mivolan̈a fa ‘ten̈a halany Jehovah olo kafiry.’ Andininy io tsy raha mikoran̈a amintsika momba toetriny Jehovah fo fa man̈amia atsika koa toro lalan̈a tokony harahin̈y. Izikoa olo araiky tia Jehovah, izy tsy mety han̈ano fangalan̈a diandian̈a mety hahavy izy hanjary kafiry. Tokony ho raha tsara, tsara laza, baka io raha mampisy fihavan̈ana fo hameno fontsika ndreky sain̈intsika, fotony atsika panomponany.—Vakia Filipianina 4:8, 9.

20-22. Ino raha tokony tandremany Kristianin̈y ndray izy miain̈y amy donia ty? Ino antony?

²⁰ Amy Jehovah, doniany Satana ty pamono olo, fotony  efa antapitrisany olo ndreky olony Zan̈ahary naty baka amy raha nataondro pitondra fanjakan̈a aby io. Ampitovisiny Baiboly amy bibidỳ masiaka iro io. (Daniela 8:3, 4, 20-22; Apokalypsy 13:1, 2, 7, 8) Iro amy sehatrany varotro ndreky siansa miaraka miasa mare amy pitondra aby io amy fan̈amboaran̈a raha findesin̈y miady. Zen̈y nampapan̈arivo iro, kanefa raha jiaby zen̈y nahafaty olo maro. ‘Donia ty ambany fahifan̈any Araiky ratsy’ in̈y ankitin̈y!—1 Jaona 5:19.

²¹ Pianatra Jesosy tsy ‘an̈isany donia ty’, ke zen̈y mahavy iro tsy man̈ano politiky na mandeha miady. Iro tsy nahazo damby amy Zan̈ahary, fotony iro tsy dia araiky ami­nolo pamono olo aby io. * (Jaona 15:19; 17:16) Iro koa tsy ­mamalifaty olo nan̈ano ratsy iro, karaha nataony Jesosy in̈y. Tiany Jesosy iro fahavalonany aby io, ke zen̈y nahavy izy nivavaka momba iro.—Matio 5:44; Romanina 12:17-21.

 ²² Ten̈a Kristianin̈y koa mitandrin̈y mare tsy hifandray amy “Babylony Be” na fivavahan̈a diso jiaby erantany, fotony maro lionolo nalatsakandro io ke mare dambindro amy Zan̈ahary. Baiboly mivolan̈a: “Hita taminany tao liony paminan̈y ndreky lionolo masin̈y, baka io lionolo jiaby nivonen̈y tambony tany ty.” Zen̈y mahavy Baiboly mandrisiky atsika karaha ty: “Anaro olonaka, miboaha baka aminany ao.”—Apokalypsy 17:6; 18:2, 4, 24.

23. Karakory miboaka baka amy Babylony Be zen̈y?

²³ Olo araiky miboaka baka amy Babylony Be zen̈y tokony hamafa an̈aranany ao. Izy koa tsy tokony handefitry na hankasitraka raha ratsy atao ao, karaha ataony fitondranten̈a maloto, fan̈anovan̈a politiky ndreky fitiavambola. ( Vakia Salamo 97:10; Apokalypsy 18:7, 9, 11-17) Matetiky, baka amy raha aby io mahavy olo hamono olo.

24, 25. a) Ino tokony hataonolo araiky baka Zan̈ahary hamindra fo aminany? b) Mampatsiaro atsika ino ma fiarovany Jehovah io?

²⁴ Talohany atsika nan̈araka fivavahan̈a marin̈y, atsika nanohan̈a doniany Satana ty. Mba an̈isany namono olo koa atsika. Kanefa atsika niova. Atsika nanjary nino soron̈o nataony Jesosy, ke nanokanten̈a tamy Jehovah. Zen̈y nahavy Jehovah namindra fo tamintsika ndreky miaro fihavan̈antsika aminany. (Asan’ny Apostoly 3:19) Fiarovany Jehovah io mampatsiaro atsika tanàna fiarovan̈a taminandrany Baiboly.—Nomery 35:11-15; Deoteronomia 21:1-9.

²⁵ Izikoa fa nisy Israelita nahafaty olo kanefa tsy kiniany, izy tsy maintsy nilefa tamy tanàna fiarovan̈a, baka io nidoko tao parapifatesany pisoron̈obe. Hitantsika baka amy zen̈y fa Jehovah ten̈a mamindra fo, baka io misy dikany aminany fahin̈ana. Ino koa raha mitovy amy tanàna fiarovan̈a io amy zioty? Fandaharan̈a ataony Jehovah hiarovan̈a atsika. Izikoa misy olo tafandika lalàn̈any Zan̈a­hary momba fahin̈ana na lio, fandaharan̈a io miaro izy tsy hofoaty. Baka amy soron̈o nataony Jesosy mahavy izio hananke- ry. Asa mba misy dikany aminao raha nataony Jehovah zen̈y? Anao koa mety mitaon̈o olo hafa han̈eky fandaharan̈a nataony Jehovah hiarovan̈a atsika io, fotony “fahorian̈a be tsisy ambaka izy” io efa marikitry mare.—Matio 24:21; 2 Korintianina 6:1, 2.

26-28. Ino raha itovizantsika amy paminan̈y Ezekiela? Ino tokony hataontsika izikoa tsy tiantsika hiala amy fitiavany Zan̈ahary?

²⁶ Aminandra izioty, mira raha tojy paminan̈y Ezekiela raha tojy olony Zan̈ahary. Ezekiela nataony Jehovah pitily, ke izy nirahiny nampitandrin̈y iro Israelita aby io. Jehovah nivolan̈a: “Tandrin̈esa volan̈a aboakany vavako ty, baka io ambarà iro raha jiaby ampitandremiko iro ty.” Izikoa tsy nataony tsara asa nan̈irahany Jehovah izy io, ho azony damby izy, fotony ho maro olo hofoaty koa fa hiravan̈iny Jerosalema. (Ezekiela 33:7-9) Ezekiela nan̈araka volan̈a Jehovah, ke zen̈y tsy navoazany damby tamy Zan̈ahary.

²⁷ Efa ho ravan̈a koa doniany Satana ty. Amy Vavolombelon̈o Jehovah, adidy ndreky voninahitry tsisy karaha izy man̈ambara aminolo ‘andra fitsarany Zan̈ahary’ ndreky hafatra momba Fanjakan̈a io. (Isaia 61:2; Matio 24:14) Asa anao mba man̈ano asa io tsarabe? Apostoly Paoly nan̈ano asa io tamy fonany jiaby, ke zen̈y nahavy izy nasaky nivolan̈a karaha ty: “Ataoko vavolombelon̈onaka anaro niany ty fa zaho afaka amy lionolo jiaby, fotony tsy nirekireky zaho nivolan̈a taminaro sitrapony Zan̈ahary jiaby.” (Asan’ny Apostoly 20:26, 27) Zen̈y koa tokony hataontsika!

²⁸ Izikoa tsy tiantsika hiala amy fitiavany Zan̈ahary, atsika tokony hanan̈a fomba fisain̈any Jehovah, ke hieritreritry fa raha maventy fahin̈ana ndreky lio io. Fa tsy ampy zen̈y. Tokony hadio na ho masin̈y koa fahitany atsika. Zen̈y raha ho hitantsika amy toko fan̈araka ty.