1-3. a) Karakory fahitanolo maro asandro? b) Mandrisiky atsika han̈ino ma Baiboly? Ino aby fan̈ontanian̈a hizahantsika?

MARO olo aminandra izioty miasa fa tsy ravoravo. Iro miasa rango maraindrain̈y firaka hariva, kanefa asa ataondro tsy tiandro aby. Mitseky amy zay iro handeha hiasa! Izikoa zen̈y raha mahazo anao, karakory tokony hataonao, baka anao ho afapo aminy asanao?

² Baiboly mandrisiky atsika hazoto hiasa, fotony atsika fo hahazo hatsaran̈a baka amy zen̈y. Solomona nivolan̈a: “Olo jiaby tokony hihina, higiaka ndreky ho ravoravo baka aminy asanany tompiny. Zen̈y kado baka amy Zan̈ahary.” (Mpitoriteny 3:13) Atsika tiany Jehovah ho afapo ndreky ho ravoravo aminy asa ataontsika, fotony izy tia atsika, baka io raha mahatsara atsika fo tadiaviny. Fa izikoa tsy tiantsika hiala amy fitiavany Jehovah, atsika mila mitovy hevitry aminany ndreky man̈araka toro lalan̈anany momba asa.—Vakia Mpitoriteny 2:24; 5:18.

³ Amy toko ty, atsika hizaha valiny fan̈ontanian̈a efatra aby ty: Ino raha hahavy atsika ho ravoravo fo aminy asa mare ataontsika? Karazan̈a asa karakory ma tsy tokony hataony Kristianin̈y? Akory hahaizantsika mampiaraka asantsika ndreky fanompoan̈a Zan̈ahary? Ino asa ten̈a maventy mila hataontsika? Fa alohanizen̈y, atsika handiniky modely namiany piasa aroe ten̈a mazoto miasa: Zan̈ahary Jehovah ndreky Jesosy Kristy.

4, 5. Izikoa Baiboly zahan̈a, ino ivolan̈ana fa Jehovah ten̈a mazoto miasa?

⁴ Jehovah Piasa Farany Mahay. Amy Genesisy 1:1 mivolan̈a karaha ty: “Tamy voanalohany tan̈y, Zan̈ahary namoron̈o lan̈itry ndreky tany.” Zan̈ahary koa fa baka namoron̈o tany ndreky raha jiaby amizio, izy nivolan̈a fa “tsara ankitin̈y” raha jiaby zen̈y. (Genesisy 1:31) Dikanizen̈y, izy ten̈a afapo taminy asa jiaby nataony momba tany ty! Misora ravoravo Jehovah nahita hatsaran̈any raha nataony!—1 Timoty 1:11.

⁵ Zan̈ahary mbala miasa fo. Efa ela be tafarany namoron̈any Zan̈ahary tany ty, Jesosy nivolan̈a fa “Babany tsy voly miasa firaka izioty.” (Jaona 5:17) Ino ma raha nataony Babantsika andan̈itry an̈y io? Izy nikarakara olombelon̈o ndreky nan̈amia taridalan̈a iro. Izy nifidy Kristianin̈y vitsivitsy voahosotro fan̈ahy masin̈y, hiaraka manjaka amy Jesosy andan̈itry an̈y. (2 Korintianina 5:17) Mbala miasa fo izy firaka izioty, baka fikasan̈anany tanteraka. Lan̈iany olo tia izy, ho velon̈o tsisy farany amy Paradisa. (Romanina 6:23) Haintsika fa mamparavoravo Jehovah raha jiaby zen̈y, fotony olo antapitrisany izioty mitandren̈y hafatra momba Fanjakan̈a io. Iro io nitaominy han̈aton̈o izy, ke iro nan̈ova fomba fiain̈anandro, baka iro tsy hiala amy fitiavany Zan̈ahary.—Jaona 6:44.

6, 7. Ino mahavy atsika mivolan̈a fa efa rango ela Jesosy tia miasa?

⁶ Efa rango ela, Jesosy efa tia miasa, talohany izy navy tambony tany teto. Jesosy “piasa ten̈a mahay”, fotony izy niaraka tamy Zan̈ahary niasa raha jiaby “andan̈itry an̈y ndreky ambony tany eto.” (Ohabolana 8:​22-​31; Kolosianina 1:15-17) Taminizy teto koa, izy niasa mare. Mbala hely izy efa nianatra asa momba fan̈amboaran̈a tran̈o, ke  “pandrafitry” nahaizanolo izy. * (Marka 6:⁠3) Mila angovo ndreky fahaizan̈a man̈ano asa zen̈y, fotony tamy zen̈y mbala tsendriky nisy fitaovan̈a fanapahan̈a kakazo na pivarotro kakazo. Diniha hely baka! Jesosy mandeha mangala kakazo an̈aty ala an̈y hiasany. Izy tsy maintsy nanapaka kakazo, baka io nitondra izio amy tany fiasany. Ohatra, koa tran̈o raha niasainy io, izy tsy maintsy nan̈aniky han̈apetaka kakazo amy tafotran̈o, baka io izy koa mety niasa entan̈a antran̈o. Misora afapo Jesosy taminy asa tsara ndreky asa mare nataony zen̈y!

⁷ Jesosy koa nazoto mare nan̈ano fanompoan̈a. Io asa ten̈a maventy nataony, tan̈atiny telo taon̈o sy tapany. Tiany ho maro olo maharen̈y hafatra nindesiny, ke izy nan̈ano asa io, rango maraindrain̈y firaka andra tsofotro. (Lioka 21:37, 38; Jaona 3:2) Ke “Jesosy nitety tanàna, baka io nandeha tambanivolo, nitory ndreky nan̈ambara vaovao tsara momba Fanjakan̈any Zan̈ahary.” (Lioka 8:1) Izy tamy zen̈y nandeha vity anjatony kilometara, tamy lalan̈a feno fotaka.

8, 9. Ino mahavy atsika mivolan̈a fa namparavoravo Jesosy asa mare nataony?

⁸ Mba ravoravo edy Jesosy tamy fanompoan̈a zen̈y? Ia! Jesosy namafy voany fahamarin̈ana momba Fanjakan̈a io. Izikoa fa nandeha fotoan̈a, natoe voa nafafiny io, ke efa tokony hitsongoen̈y. Fan̈anovany sitrapony Zan̈ahary zen̈y nan̈amia izy angovo nilainy, ke matetiky izy nahadin̈y tsy nihina, fotony tiany ho vita asa io. (Jaona 4:31-38) Misora afapo Jesosy tamy zen̈y! Fanompoan̈a nataony taminizy tambony tany teto koa fa vitany, izy nivolan̈a tamy Babany karaha ty: “Zaho efa nan̈amia  voninahitry anao, fotony efa vitako aby asa jiaby nan̈irahanao zaho tambony tany teto.”—Jaona 17:4.

⁹ Jehovah ndreky Jesosy ten̈a nan̈amia atsika modely tsara amy fahazotoan̈a miasa zen̈y. Baka amy fitiavantsika Jehovah mahavy atsika ‘tihangala tahaka toetrinany.’ (Efesianina 5:⁠1) Fitiavantsika Jesosy koa mandrisiky atsika han̈araka raha nataony. (1 Petera 2:​21) Karakory tokony hataontsika baka atsika ho afapo karaha iro koa, aminy asa mare ataontsika?

10, 11. Ino raha tokony hataontsika, baka atsika hanan̈a toetsain̈y tsara?

¹⁰ Atsika Kristianin̈y tsy maintsy mamelonten̈a. Tiantsika koa ho ravoravo ndreky ho afapo aminy asantsika. Kanefa, mety tsy mora raha zen̈y, fotony mety tsy ten̈a tiantsika asa io. Ino han̈ampy atsika ho ravoravo fo?

¹¹ Ataova raha hahavy anao hanan̈a toetsain̈y tsara. Mety tsy ho vitantsika han̈ova raha misy, fa ho vitantsika ndraiky han̈ova toetsain̈intsika. Ho tsara toetsain̈intsika, izikoa atsika mandiniky fomba fisain̈any Jehovah. Anao koa lelahy manambady, aleva onon̈o fa ndray asa ambany fahitanolo asanao io, izio ahavitanao mamelon̈o vadinao ndreky zanakanao. Ravoravo Jehovah izikoa anao mikarakara iro io, fotony amy Baiboly ao izy mivolan̈a fa “ratsy mandilatra olo tsy mino” olo araiky, izikoa izy tsy mamelon̈o vadiny ndreky zanany. (1 Timoty 5:⁠8) Aza adin̈a fa asanao io han̈ampy anao hanakatra tanjon̈o ke han̈ano andraikitry nankininy Zan̈ahary aminao. Anao koa man̈ano zen̈y, anao ho ravoravo fo, fa tsy karaha olo miaraka miasa aminao.

12. Ino aby hatsaran̈a ho azonolo mazoto miasa ndreky man̈ano ny marin̈y?

 ¹² Atsika tokony hazoto hiasa ndreky han̈ano ny marin̈y. Maro hatsaran̈a ho azontsika, izikoa atsika mazoto miasa ndreky man̈ano tsarabe asantsika. (Ohabolana 12:24; 22:29) Tsy maintsy man̈ano ny marin̈y koa atsika Kristianin̈y. Atsika tsy tokony hangalatra fotoan̈a, na fitaovan̈a, na volanolo mampiasa atsika. (Efesianina 4:28) Hitantsika tamy toko talohany araiky ty fa mahatsara atsika man̈ano ny marin̈y, fotony atsika koa malaza man̈ano ny marin̈y, atsika atokisanolo. Ho ravoravo olo mampiasa  atsika, izikoa atsika man̈ano zen̈y. Ndray tsy hitanolo mampiasa atsika asa mare ataontsika, atsika ho afapo fo. ‘Hilamin̈y koa eritreritrintsika’, fotony haintsika fa namparavoravo Zan̈ahary raha nataontsika.—Hebreo 13:18; Kolosianina 3:22-24.

13. Nan̈ino ma atsika tokony ho tsara fitondranten̈a fo amy tany fiasan̈a an̈y?

¹³ Man̈amia voninahitry Zan̈ahary fitondranten̈a tsara anan̈antsika. Izikoa tsara fo fitondranten̈antsika koa fa miasa, ho hitanolo raha zen̈y, ke handrisiky iro han̈amia voninahitry ‘fampianaran̈a baka amy Zan̈ahary.’ (Titosy 2:​9, 10) Tsy vitanizen̈y fo, fa mety ho voantsory amy fivavahan̈antsika koa iro. Mety ho tia fahamarin̈ana olo miaraka miasa aminao, izikoa anao tsara fitondranten̈a fo. Izikoa anao man̈ano zen̈y, anao han̈amia voninahitry Jehovah, ke Jehovah ho ravoravo aminao. Hatsaran̈a tsisy ambaka zay!—Vakia Ohabolana 27:11; 1 Petera 2:12.

14-16. Ino aby fan̈ontanian̈a tsara dinihintsika, alohany hifidy asa?

¹⁴ Baiboly tsy man̈amia lisitiny asa jiaby mety ndreky tsy mety amy Kristianin̈y. Zen̈y tsy mivolan̈a fa asa jiaby mety amindro. Baiboly tsy vitany man̈ampy atsika hifidy tsarabe asa mety amintsika ndreky mamparavoravo Zan̈ahary, fa izio koa man̈ampy atsika tsy hifidy asa halany Jehovah. (Ohabolana 2:6) Alohany hifidy asa, misy fan̈ontanian̈a aroe maventy tokony hidinihintsika.

¹⁵ Asa fidiko ty ma mifanohitry amy raha koran̈iny Baiboly? Koran̈iny mazava amy Baiboly ao fa halany Zan̈ahary resaka halatra, vandy, baka io fanompoan̈a sampy. (Eksodosy 20:4; Asan’ny Apostoly 15:29; Efesianina 4:28; Apokalypsy 21:8) Atsika tsy tokony han̈ano asa misy ifandraisany amy raha aby io. Izikoa tiantsika Jehovah, atsika  tsy han̈ano asa mety hahavy atsika handika didinany.—Vakia 1 Jaona 5:3.

¹⁶ An̈isany manohan̈a na mandrisiky olo han̈ano raha tsy manjary ma zaho koa man̈ano asa io? Misy ohatra ty: Tsisy maharatsy asany panjaitry. Karakory fo izikoa anao irahin̈y manjaitry lambany maramila? Marin̈y ndraiky fa anao tsy handeha hiady, kanefa tsao mba manohan̈a famonoan̈a olo fo anao, izikoa man̈ano zen̈y. Aleva onon̈o  fa mamono olo zen̈y halany Zan̈ahary. (Eksodosy 20:13) Tiantsika Jehovah, ke zen̈y mahavy atsika tsy man̈ano asa tsy mifan̈araka amy Soratra Masin̈y.

17. a) Ino koa raha hafa mila dinihintsika, izikoa fa hifidy asa? (Zahava efajoro “ Ataoko ma Asa Io?”) b) Akory han̈ampiany eritreritrintsika io atsika han̈ano fanapahankevitry mamparavoravo Jehovah?

¹⁷ Maro raha mety hanahiran̈a jerintsika izikoa hifidy asa, kanefa fan̈ontanian̈a aroe maventy nikoran̈intsika tio in̈y mety han̈ampy atsika hanapakevitry. Misy raha hafa koa tokony hidinihintsika. * Panompo atokisan̈a ndreky mahadiniky raha tsy voatery han̈aboaka lalàn̈a momba raha jiaby mety hiboaka. Ke mahaiza man̈avaka. Hitantsika tamy Toko faha-2 in̈y fa atsika tokony hampiasa eritreritrintsika. Ho vitantsika zen̈y, izikoa atsika  mianatra Baiboly, baka io man̈araka raha koran̈inizio amy fiain̈anantsika. ‘Mampiasa fahaizantsika misain̈y’ atsika, izikoa man̈ano zen̈y. Ke ho haintsika fo han̈ano fanapahankevitry mamparavoravo Zan̈ahary. Zen̈y koa han̈ampy atsika tsy hiala amy fitiavany.—Hebreo 5:14.

18. Nan̈ino ma tsy mora amintsika man̈ano voalohantoeran̈a fanompoan̈a Jehovah zen̈y?

¹⁸ Fanompoantsika Jehovah raha tokony hataontsika voalohantoeran̈a, ndray tsy mora raha zen̈y “aminandra farany” misy atsika izioty. (2 Timoty 3:⁠1) Mety tsy ho mora koa mitady asa ndreky hahita asa mahadin̈y ela zen̈y. Fa Kristianin̈y jiaby samy man̈eky fa tsy maintsy miasa izy hamilomany vadiny ndreky zanany. Atsika koa tsy mitandrin̈y, mety hisakana atsika amy fanompoan̈a Jehovah asa fidintsika io. Maro raha takin̈y amintsika amy tany fiasan̈a an̈y. Mora mifindra koa toetsain̈inolo tia vola amy donia ty. (1 Timoty 6:9, 10) Akory hahaizantsika handanjalanja fo, ke tsy han̈adin̈a “raha ten̈a maventy”? Zen̈y raha ho hitantsika izioty.—Filipianina 1:10.

19. Ino mahavy atsika mivolan̈a fa Jehovah mendriky atokisan̈a amy fo jiaby?

¹⁹ Matokisa Zan̈ahary amy fonao jiaby. ( Vakia Ohabolana 3:5, 6.) Jehovah mendriky atokisan̈a. Izy mikarakara atsika. (1 Petera 5:7) Izy mahay atsika mandilatra ain̈intsika tompiny, ke izikoa misy raha hitany mahatsara atsika, hamiany atsika fo. (Salamo 35:25) Ke tsara atsika man̈araka fampatsiarovan̈a baka amy Baiboly ty: ‘Mitandrema baka fomba fiain̈ananaro tsy hahitan̈a fitiavambola, fa irarian̈a anaro ho afapo amy raha efa anan̈anaro. Fotony Zan̈ahary efa nivolan̈a: “Zaho tsy hiala anao.  Zaho tsy han̈ary anao foeky.”’ (Hebreo 13:⁠5) Maro pisava lalan̈a mivolan̈a fa Jehovah ten̈a mahay mikarakara raha ilaintsika. Izikoa atsika matoky amy fontsika jiaby fa Jehovah hikarakara, atsika tsy hiasa loha be loatra amy velonten̈a. (Matio 6:25-32) Tsy tokony hambelantsika hisakana atsika amy fanompoan̈a Jehovah foeky asantsika,  ke hahavy atsika hanapatapaka fitorian̈a ndreky fivorian̈a.—Matio 24:14; Hebreo 10:24, 25.

20. Karakory ma manan̈a maso tsotra zen̈y? Ino hahavy anao hanan̈a maso tsotra fo?

²⁰ Manàn̈a maso tsotra. ( Vakia Matio 6:​22, 23.) Manan̈a maso tsotra zen̈y tsy man̈ano raha hankasarotro fiain̈ana fa mandiniky tanjon̈o araiky fo: Fan̈anovan̈a sitrapony Zan̈ahary. Izikoa fanompoan̈a Jehovah fo ataontsika tanjon̈o, atsika tsy han̈ian̈a asa hazahoan̈a volabe, na fiain̈ana mampiadan̈a. Atsika koa tsy ho varian̈a mitady entan̈a niboaka farany, na entan̈a farany tsara. Raha misy baka, iro pivarotro aby io man̈ano raha hahavy olo hieritreritry fa izikoa tsy azonao raha jiaby irinao, anao tsy ho sambatra. Ke ino raha han̈ampy atsika hanan̈a maso tsotra fo? Aza mitrosa amy raha tsisy dikany. Aza mamory fanan̈ana mandany fotoan̈a ndreky fikarakaran̈a be. Areha fo torohevitry Baiboly mivolan̈a fa ‘atsika koa fa misy hanin̈y ndreky lamba sikinin̈y, tokony hataontsika mahampy atsika edy zen̈y.’ (1 Timoty 6:⁠8) Ataova tsotra fo fiain̈ananao.

21. Nan̈ino ma atsika mila mandiniky raha ten̈a maventy? Ino raha tokony hataonao voalohantoeran̈a?

²¹ Raha mankatsara fihavan̈ana amy Jehovah fo ataova voalohantoeran̈a, baka io aza miovaova. Atsika mila mandiniky raha ten̈a maventy, fotony tsy ho vitantsika aby zay raha tiantsika hatao. Atsika koa mandiniky karaha zen̈y, fotoan̈antsika tsy ho lany amy raha tsisy dikany. Maro olo mivolan̈a fa fianaran̈a ambony raha ten̈a maventy, fotony izio hazahoan̈a volabe. Jesosy ndraiky nandrisiky iro pianatranany han̈ano voalohantoeran̈a Fanjakan̈any Zan̈ahary. (Matio 6:33) Fanjakan̈a io raha tokony hataony Kristianin̈y voalohantoeran̈a. Ke tokony ho hita amy safidy ataontsika ndreky tanjon̈ontsika, baka io raha ataontsika, fa asany Fanjakan̈a io ndreky sitrapony  Zan̈ahary raha ten̈a maventy amintsika, fa tsy vola na fanan̈ana, na asa, na raha hafa.

22, 23. a) Ino asa ten̈a maventy ataony Kristianin̈y? Akory han̈aboahantsika fa raha maventy amintsika asa io? (Zahava efajoro “ Tsy Nanin̈enako Foeky Fanapahankevitry Nataoko.”) b) Tapakevitry han̈ano ino ma atsika?

²² Haintsika fa atsika io efa loso lavitry aminandra farany, ke tokony fan̈anovan̈a fitorian̈a ndreky fampianaran̈a fo hiritriretintsika. (Matio 24:14; 28:19, 20) Karaha nataony Jesosy in̈y, atsika man̈ano asa mamonjy ain̈y io koa. Akory han̈aboahantsika fa raha ten̈a maventy amintsika asa io? Maro olony Jehovah man̈ano asa fitorian̈a io aminy angovondro jiaby. An̈isanizen̈y pisava lalan̈a aby io, fotony iro mandamin̈y fotoan̈a an̈anovandro velonten̈a ndreky hanompoan̈a. Io koa iro misionera mifen̈y mare amy fan̈anovan̈a asa io. Maro koa raimandreny mandrisiky zanany han̈ano pisava lalan̈a, fotony hitandro fa ilain̈y manan̈a tanjon̈o amy fanompoan̈a Jehovah. Marin̈y ndraiky fa miasa mare iro pitory mazoto aby io, fa iro ten̈a ravoravo aminy asa mare ataondro zen̈y. Matoky atsika fa zay olo manompo Jehovah amy fo jiaby ho ravoravo ndreky ho afapo, baka io hahazo hatsaran̈a maro.—Vakia Ohabolana 10:22.

²³ Ankamarozantsika voatery miasa lera maro, hamiloman̈a fianakavian̈a. Kanefa tiany Jehovah atsika ho ravoravo fo aminy asa mare ataontsika zen̈y. Atsika koa mitovy hevitry amy Jehovah ndreky man̈araka toro lalan̈anany momba asa, atsika ho afapo aminy asa ataontsika. Ke irarian̈a atsika ho tapakevitry han̈ano fitorian̈a vaovao tsara momba Fanjakan̈a io voalohantoeran̈a fo, alohany velonten̈antsika. Izikoa atsika man̈ano zen̈y, ho hita fa atsika tia Jehovah ankitin̈y, sady tsy hiala amy fitiavany.