1. Ino raha nampatsiaroviny Jesosy pianatranany, alin̈y talohany nifatesany?

ALIN̈Y talohany nifatesany, Jesosy niasa loha mare momba pianatranany. Izy koa fa nivavaka, karaha ty nivolan̈iny: “Zaho tsy mangataka aminao han̈adoso iro hiala amy donia ty, fa mba arova iro baka tsy ho voafitakany araiky ratsy in̈y. Iro tsy an̈isany donia ty, mira zaho tsy an̈isany ­donia ty.” (Jaona 17:​15, 16) Hita baka amy volan̈a zen̈y fa izy ten̈a tia pianatranany, baka io tiany hazava tamindro dikany ‘tsy an̈isany donia ty’ zen̈y. (Jaona 15:19) Matetiky izy nampatsiaro iro fa iro tokony hisaraka amy donia ty.

2. Ino ma raha tiany Jesosy koran̈iny amy “donia” io?

² Raha tiany Jesosy koran̈iny amy “donia” io, olo jiaby fiheziny Satana, ke ratsy fihavan̈ana amy Zan̈ahary. Iro io tia ten̈a, baka io man̈ambony ten̈a. (Jaona 14:30; Efesianina 2:2; 1 Jaona 5:19) Baiboly mivolan̈a fa olo araiky koa “minaman̈a amy donia ty mirafy amy Zan̈ahary.” (Jakoba 4:4) Ke izikoa tsy tiantsika hiala amy fitiavany Zan̈ahary, atsika tokony hisaraka amy donia ty. Miain̈y amy donia ty atsika, kanefa ho vitantsika han̈ano zen̈y izikoa atsika: 1) tsy mivadiky amy Fanjakan̈any Zan̈ahary ndreky tsy man̈ano politiky, 2) manohitry toetsain̈y manjaka amy donia ty, 3) man̈ano fisikinan̈a ndreky sanjy mendriky ndreky milamin̈y, 4) manan̈a maso tsotra, baka io 5) misikiny fitaovan̈a jiaby baka amy Zan̈ahary natao hiarovanten̈a.

3. a) Nan̈ino ma Jesosy tsy nan̈ano politiky? b) Ino raha mampitovy voahosotro ndreky ambasadera? (Zahava lamariky amy pazy ambany.)

³ Jesosy tsy nan̈ano politiky fa nan̈ambara raha momba Fanjakan̈any Zan̈ahary fo. Zen̈y raha nandaniany fotoan̈anany ndreky angovonany. Izy lasitio Panjaka amy Fanjakan̈a io. (Daniela 7:13, 14; Lioka 4:43; 17:20, 21) Zen̈y nahavy izy nasaky nivolan̈a tamy Pontio Pilato, Governera Romanin̈y, fa ‘fanjakan̈anany tsy an̈isany donia ty.’ (Jaona 18:36) Pianatra Jesosy mangala tahaka raha nataony zen̈y, ke tsy mivadiky aminany ndreky Fanjakan̈anany io, baka io mikoran̈a aminolo raha momba Fanjakan̈a io. (Matio 24:14) Apostoly Paoly nivolan̈a: ‘Zahay ambasadera solony Kristy, ke amy maha solony Kristy zahay zen̈y, mahavy zahay miangavy anaro karaha ty: “Mba mihavàn̈a amy Zan̈ahary anaro lahabiny e!”’ *—⁠2 Korintianina 5:20.

4. Akory han̈aboahany Kristianin̈y jiaby fa iro tsy mivadiky amy Fanjakan̈any Zan̈ahary? (Zahava efajoro “ Iro Kristianin̈y Tamy Voanaloahany Tan̈y Tsy Nan̈ano Politiky Foeky.”)

⁴ Ambasadera zen̈y olo misoloten̈a firenena, na pitondra amy firenena misy izy antany hafa. Iro ambasadera aby io tsy man̈ano politiky sady tsy miditry aminy antoko politiky amy tany io. Iro mandrisiky olo hanohan̈a fanjakan̈a amy tanindro an̈y. Karaha zen̈y koa iro voahosotro aby io, fotony iro io “olompirenenany lan̈itry.” (Filipianina 3:20) Iro mazoto mikoran̈a aminolo momba Fanjakan̈any Zan̈ahary, ke efa antapitrisany olo an̈isany “ondrikondriky hafa” manjary ‘mihavan̈a amy Zan̈ahary.’ (Jaona 10:16; Matio 25:​31-40) Iro ondrikondriky hafa aby io ndraiky solonten̈any ambasaderany Kristy, fotony iro man̈ampy iro  voahosotro aby io. Andiany araiky fo iro io, fotony iro samy tsy man̈ano politiky fa mandrisiky olo hanohan̈a Fanjakan̈any Mesia.—Vakia Isaia 2:2-4.

5. Ino tsy mampitovy Kristianin̈y ndreky Israelita aby io? Ino raha tsy tokony hataony Kristianin̈y?

⁵ Iro Israelita aby io nipetraka tamy tany araiky. Fa atsika Kristian̈iny ndraiky samy amy tany misy atsika, kanefa  efa mira olo pihavan̈a in̈y. (Matio 28:19; 1 Petera 2:9) Ten̈a Kristianin̈y tsy mivadiky amy Kristy. Zen̈y mahavy atsika tsy man̈ano politiky, sady mifanohitry aminy hafatra koran̈intsika raha zen̈y. Tsy vitanizen̈y fo fa atsika koa hanjary hifamono. (1 Korintianina 1:10) Atsika tokony ho tia rahalahintsika, fotony zen̈y raha nan̈irahany Jesosy pianatranany. (Jaona 13:34, 35; 1 Jaona 3:10-12) Iro nirahiny ho tia fahavalondro foeky.—Matio 5:44; 26:52; zahava efajoro “ Zaho ty ma Tsy An̈isany Donia ty Ankitin̈y?”

6. Karakory tokony han̈ajantsika Kaisara, izikoa atsika efa nanokanten̈a tamy Zan̈ahary?

⁶ Atsika nanokanten̈a tamy Zan̈ahary fa tsy taminolo na fikambanan̈a na firenena. Atsika tsy tompony ain̈intsika eky, fotony atsika efa nivangain̈y. (1 Korintianina 6:19, 20) Zen̈y mahavy atsika man̈amia “Kaisara” zay raha tokony hamian̈a izy, na fan̈ajan̈a zen̈y na latety. Kanefa tsy maintsy amiantsika Zan̈ahary zay “raha tokony hamian̈a Zan̈ahary”, an̈atinizen̈y fanompoan̈a izy. (Marka 12:17; Romanina 13:1-7) Atsika tokony ho tia Zan̈ahary amy fo jiaby, tsy hivadiky aminany ndreky han̈araka volan̈anany, firaka amy fahafatesan̈a, izikoa ilain̈y zen̈y.—Lioka 4:8; 10:27; vakia Asan’ny Apostoly 5:29; Romanina 14:8.

7, 8. Ino ma raha tiany Soratra Masin̈y koran̈iny amy “toetsain̈iny donia ty”? Han̈ano karakory olo araiky izikoa manan̈a izio?

⁷ Tsy an̈isany donia ty atsika. Zen̈y mahavy atsika mifen̈y mare hanohitry toetsain̈y ratsy manjaka aminany ty. Apostoly Paoly nivolan̈a: “Atsika tsy nahazo toetsain̈iny donia ty, fa toetsain̈y baka amy Zan̈ahary.” (1 Korintianina 2:12) Karaha ty koa nambarany tamindro Kristianin̈y ta Efesosy: “Mba karaha zen̈y koa nandihananaro taloha, nan̈araka sitrapony donia ty ndreky pitondra fahifan̈a amy tsiko, tsy  ino zen̈y fa toetsain̈y manjaka amy zioty amy zanakany araiky ratsy in̈y.”—Efesianina 2:2, 3.

⁸ Tsy ino raha tiany Baiboly koran̈iny amy “tsiko” io fa toetsain̈y manjaka amy donia ty na angovo ratsy mandrosoko olo tsy han̈araka volan̈a Zan̈ahary, ke han̈arampo amy “fan̈irian̈any nofotro ndreky fan̈irian̈any maso.” (1 Jaona 2:16; 1 Timoty 6:9, 10) Manan̈a “fahifan̈a” izio, fotony baka amizio mahavy olo voantsoriny fan̈irian̈any nofotro panota. Izio tsy hita maso, mahery, baka io zay tany andehanantsika misy izy fo, karaha ataony tsiko. Izio koa “miasa”, fotony olo araiky koa fa manan̈a toetsain̈y io, manjary tia ten̈a, poerapoera, mitady fahifan̈a, han̈ano zay raha tiany hatao, baka io tsy man̈eky anarin̈y. * Baka amizio mahavy toetriny Devoly hitombo tsihelihely an̈aty fonolo araiky.—Jaona 8:44; Asan’ny Apostoly 13:10; 1 Jaona 3:8, 10.

9. Ino aby raha mety hahavy toetsain̈iny donia ty ho tafiditry an̈aty fontsika ndreky jerintsika?

⁹ Toetsain̈iny donia ty mety ho tafiditry lalin̈y an̈aty fontsika ndreky jerintsika, izikoa atsika tsy mitandrin̈y. (Vakia Ohabolana 4:23.) Maro raha mety hamindra toetsain̈iny Satana ndreky donia ty, mety ho olo izio na raha hafa. Misy olo zahan̈a karaha tsara toetry, fa izy tsy tia Jehovah. Izikoa olo karaha zen̈y hataontsika naman̈a, atsika ho voafitaka. (Ohabolana 13:20; 1 Korintianina 15:33) Baka amy boky tsy mendriky ndreky sary vetaveta, na fan̈azavan̈a baka amy pivadipinoan̈a aminy Internet, na fangalan̈a diandian̈a tsy mety amy Kristianin̈y koa mety hahavy atsika hanan̈a toetsain̈y io. Maro koa izioty fan̈atanjahanten̈a mahavy olo ho kafiry, fotony iro tihandresy mare.

10. Karakory tokony hataontsika izikoa tsy tiantsika hanjaka amintsika toetsain̈iny donia ty?

 ¹⁰ Karakory tokony hataontsika baka tsy hanjaka amintsika toetsain̈y io? Atsika mila mahay man̈araraotro fomba jiaby han̈ampiany Jehovah atsika. Tokony hivavaka atsika baka izy han̈amia atsika fan̈ahy masin̈y. Jehovah mahery mandilatra Devoly ndreky donia ratsy ty. (1 Jaona 4:4) Izikoa tiantsika ho tsara fihavan̈ana amy Jehovah ndreky tsy hiala amy fitiavany, atsika mila mivavaka mare.

11. Karakory ma fomba fisikinan̈anolo amy donia ty?

¹¹ Baka amy fisikinan̈a, fisanjian̈a ndreky fahadiovan̈a ahitan̈a toetsain̈inolo araiky. Amy tany maro, efa tsy mendriky eky fisikinan̈a ataonolo. Ke misy olo pivolan̈a amy tele nivolan̈a fa teteky io efa tsy ho hay eky han̈avaka makorely. Tsaiky man̈angy mbala hely efa man̈ano fisikinan̈a karaha zen̈y. Misy gazety araiky nivolan̈a fa “efa tsisy raha misitriky aminy ain̈indro. Fisikinan̈a maotin̈y zen̈y efa tsy jirendro foeky.” Iro tsy tiandro volan̈iny. Iro koa tsy man̈aja ten̈a. Raha zen̈y hita amy fomba fisikinan̈anolo maro.

12, 13. Ino aby toro lalan̈a tokony harahintsika momba fisikinan̈a ndreky sanjy?

¹² Tokony hadio ndreky hilamin̈y fisikinan̈antsika, na lelahy atsika na man̈angy, fotony atsika manompo Jehovah. Tokony ho “maotin̈y ndreky mendriky” koa fisikinan̈antsika, baka io hifan̈araka tsarabe aminy “asa tsara” ataontsika. Tsy hiala amy fitiavany Zan̈ahary ten̈a tanjon̈ontsika, fa tsy han̈antsory masonolo amintsika. (1 Timoty 2:9, 10; Joda 21) Toetry tsara anan̈antsika ten̈a misy dikany amy Jehovah, fa tsy sanjy ataontsika.—1 Petera 3:3, 4.

¹³ Aleva onon̈o fa arakaraka fomba fisikinan̈a ndreky sanjy ataontsika hitsaranolo fivavahan̈a marin̈y arahintsika. Dikany “maotin̈y” zen̈y amy volan̈a griky, man̈aja eritreritrinolo ndreky mitandrin̈y amy raha mety hampameloko izy. Izikoa atsika man̈aja eritreritrinolo, atsika tsy hanery olo han̈araka raha tiantsika fa handefitry, fotony atsika man̈iry han̈amia voninahitry Jehovah ndreky olonany. Zay raha ataontsika tiantsika ‘han̈amia voninahitry Jehovah’, fotony atsika panomponany.—1 Korintianina 4:9; 10:31; 2 Korintianina 6:3, 4; 7:1.

14. Ino aby raha tokony dinihintsika, izikoa fisikinan̈a ndreky fahadiovan̈a koran̈iny?

 ¹⁴ Tokony hilamin̈y ndreky hadio koa fisikinan̈antsika izikoa fa mandeha mitory ndreky mivory. Ty raha tsara dinihintsika: ‘Fisikinan̈anaka ty ma man̈antsory masonolo? Mety hampamen̈atra olo ma mahita zaho misikiny izy ty? Madio tsarabe ma izy ty sa misy fofondraha mety han̈elingelin̈y olo? Marin̈y ndraiky fa anjarako mifidy fisikinan̈a tiako hatao, kanefa mety hahavy zaho tsy hahazo tombontsoampanompoan̈a amy fiangonan̈a ma fisikinan̈anaka?’—Salamo 68:6; Filipianina 4:5; 1 Petera 5:6.

15. Ino mahavy Baiboly tsy man̈amia lisity lalàn̈a momba fisikinan̈a, sanjy, baka io fahadiovan̈a?

¹⁵ Baiboly tsy man̈amia lisity lalàn̈a momba fisikinan̈a, sanjy, baka io fahadiovan̈a. Anjarantsika mifidy ndreky mampiasa fahaizantsika misain̈y. Tsy tiany Jehovah hadoso amintsika raha aroe zen̈y. Tiany Jehovah hanjary olo matotro atsika ke hampiasa ‘fahaizantsika misain̈y’ izikoa fa mandiniky toro lalan̈a amy Baiboly, amy zen̈y ‘ho haintsika han̈avaka ny tsara ndreky ratsy. (Hebreo 5:14) Fitiavan̈a ten̈a tiany Jehovah hibeko atsika, fitiavan̈a izy ndreky fitiavan̈a olo manodidin̈y atsika. (Vakia Marka 12:30, 31.) Izikoa toro lalan̈a aby io zahan̈a, mbala maro fomba fisikinan̈a ndreky sanjy mety hataonolo tsy mivadiky amy  Jehovah. Zahava fo karazan̈a sanjy maro tsara ataonolo manompo Jehovah erantany!

16. Ino tsy mampitovy toetsain̈iny donia ty amy raha nampianariny Jesosy? Ino aby fan̈ontanian̈a tokony dinihintsika?

¹⁶ Mamitaka toetsain̈iny donia ty, ke nanjary maro olo mieritreritry fa vola ndreky fanan̈ana fo mampasambatra. Kanefa Jesosy nivolan̈a: “Olo araiky ndray manandraha karakory, fanan̈ananany zen̈y tsy mahatana fahin̈ananany.” (Lioka 12:15) Zen̈y tsy mivolan̈a fa atsika tokony hampijaly ten̈a, fa raha tiany koran̈iny, zay olo ‘mahatsapa ten̈a mila Zan̈ahary’ fo ho sambatra ndreky ho velon̈o tsisy farany. Ho vitantsika han̈ano zen̈y, izikoa atsika manan̈a maso “tsotra.” Raha mampatsara fihavan̈antsika amy Jehovah fo tokony dinihintsika alohany raha jiaby. (Matio 5:3;  6:22) Ty fan̈ontanian̈a tokony dinihintsika: ‘Zaho ty ma ten̈a mino volan̈a Jesosy, sa zaho man̈eky fitahiny Satana “babany vandy” io? (Jaona 8:44) Ino raha hitanolo izikoa fa mandiniky raha volan̈iko ndreky raha ataoko voalohantoeran̈a, na tanjon̈o zen̈y na raha hafa?’—Lioka 6:45; 21:34-36; 2 Jaona 6.

17. Ino aby hatsaran̈a ho azonolo manan̈a maso tsotra?

¹⁷ Jesosy nivolan̈a fa baka amy raha ataonolo araiky ahitan̈a na izy misain̈y na tsy misain̈y. (Matio 11:19) Mba iritrireta hely baka hatsaran̈a ho azonolo manan̈a maso tsotra! Izy ho ravoravo fo amy fanompoan̈a ataony. (Matio 11:29, 30) Asalohanany ho kirikiry, ke hilamin̈y fonany ndreky jerinany. (Vakia 1 Timoty 6:9, 10.) Ho afapo amy raha anan̈any koa izy, ke hanan̈a fotoan̈a hiarahan̈a amy vady amanjanakanany ndreky Kristianin̈y hafa. Toromasonany hilamin̈y. (Mpitoriteny 5:12) Mahatsiaro sambatra izy, fotony mahita fomba hizaran̈a raha aminolo. (Asan’ny Apostoly 20:35) Man̈anten̈a raha tsara koa izy aminy amaray an̈y, ke zen̈y mahavy izy afapo ndreky milamintsain̈y. (Romanina 15:13; Matio 6:​31, 32) Tsisy hatsaran̈a mandilatra zen̈y!

18. Ino raha efa nambarany Baiboly momba fahavalontsika io? Karakory hataony koa fa hanafiky atsika?

¹⁸ Satana mitady fomba fo tsy hanompoantsika Jehovah, fotony atsika tsy tiany ho sambatra ndreky ho velon̈o mandrakizay. Izikoa atsika tsy miala amy fitiavany Zan̈ahary, atsika tsy ho voafitaka Satana. (1 Petera 5:⁠8) Apostoly Paoly nivolan̈a: “Atsika tsy mitolon̈o amy raha misy nofotro na misy lio, fa amy fanjakan̈a ndreky fahifan̈a, panjakany donia an̈atiny hiziky ty ndreky iro fan̈ahy ratsy amy faritriny lan̈itry an̈y.” (Efesianina 6:12) ‘Tolon̈o’ zen̈y ady ataonolo aroe fa iro fo mifampitana na  mifampitolon̈o. Zen̈y mivolan̈a fa tsy lavitry atsika koa fahavalontsika io, ke mety hisitrihan̈a. Nampitovisiny Paoly amy “fanjakan̈a” ndreky “fahifan̈a”, baka io ‘panjakany donia ty’ fahavalontsika io, fotony izy koa fa hanafiky tsy man̈ano anjoanjo fa dinihiny tsarabe fomba tiany hamangoan̈a atsika.

19. Ino aby fitaovan̈a hindesiny Kristianin̈y hiaro ten̈a?

¹⁹ Marin̈y ndraiky fa atsika io malemy ndreky tsy ampy angovo fa ho vitantsika fo handresy fahavalontsika io, izikoa anan̈antsika ndreky ampiasaintsika ‘fitaovan̈a jiaby nataony Jehovah hiarovan̈a’ atsika. (Efesianina 6:13) Karaha ty nambarany Efesianina 6:14-18: ‘Irarian̈a anaro tsy hivadiky. Fiheza amy vanian̈anaro fahamarin̈ana, baka io ataova fiarovan̈a tratranaro koa fahitsian̈a. Vitinaro ataova kirarony fahavon̈osan̈a hitory vaovao tsara momba fihavan̈ana. An̈abony raha jiaby zen̈y, aleva ampinga maventy, finoan̈a zen̈y, hindesinaro hamono zanapaly mirehitry alefany araiky ratsy in̈y. Ataova fiarovan̈a lohanaro koa famonjian̈a, baka io aleva sabatrany fan̈ahy, tsy ino zen̈y fa volan̈a Zan̈ahary. Mivavaha fo, na fotoan̈a karakory na fotoan̈a karakory, ambany fitarihany fan̈ahy, sady man̈anova vavaka ndreky fangatahan̈a karazany jiaby.’

20. Ino tsy mampitovy ady ataony Kristianin̈y ndreky ady ataony maramila?

²⁰ Baka amy Jehovah fitaovan̈a aby io. Matoky atsika fa mahavita miaro atsika ankitin̈y izio, izikoa tsy adosontsika amintsika. Mety hisy fotoan̈a maramila tsy hiady amy fahavalondro. Fa ady ataony Kristianin̈y ndraiky mitohy fo, izikoa tsy efa ravan̈a doniany Satana ty, ke efa migadra iro anjely ratsy aby io. (Apokalypsy 12:17; 20:1-3) Mety mbala misy raha hiadivanao amy zioty, karaha ataony raha mampalemy anao na fan̈irian̈a ratsy. Tohiza fo ady ataonao zen̈y, fotony atsika jiaby io samy mbala tsy maintsy miady aby, baka tsy hivadiky amy Jehovah. (1 Korintianina 9:27) Mampavozo izikoa atsika tsy miady karaha zen̈y!

21. Ino ma raha tsy maintsy ataontsika izikoa tiantsika handresy?

 ²¹ Izikoa angovontsika fo tsy ho vitantsika handresy. Zen̈y nahavy Paoly nivolan̈a fa mila mivavaka amy Jehovah atsika “na amy fotoan̈a karakory na amy fotoan̈a karakory, ambany fitarihany fan̈ahy.” Atsika mila mitandren̈y ndreky mianatra Volan̈a Jehovah, baka io miaraka amindro “maramila” namantsika aby io, tsy azovy zen̈y fa iro rahalahintsika aby io. Aza adin̈a fa atsika tsy miady manokan̈a. (Filemona 2; Hebreo 10:24, 25) Izikoa arehantsika tsarabe torohevitry jiaby zen̈y, atsika handresy, baka io ho vitantsika koa hiaro finoan̈antsika izikoa fa misy man̈aratsy izio.

22, 23. a) Nan̈ino ma atsika tsy maintsy von̈ono fo hiaro finoan̈antsika? Ino aby fan̈ontanian̈a mila dinihintsika? b) Ino raha ho hitantsika amy toko fan̈araka ty?

²² Jesosy nivolan̈a fa ho halany donia ty pianatranany, fotony iro tsy an̈isany donia ty. (Jaona 15:19) Atsika mila von̈ono fo hiaro finoan̈antsika. Fa ndray zen̈y, atsika tokony ho tsara fan̈ahy ndreky han̈aja olo. (Vakia 1 Petera 3:15.) Ty raha tokony hiritriretintsika: ‘Izio ma haiko tsarabe antony mahavy Vavolombelon̈o Jehovah ndraikindraiky tsy man̈ano raha fataonolo maro? Izikoa misy raha manahiran̈a zaho, asa zaho mba resy lahatra fa marin̈y ankitin̈y raha volan̈iny Baiboly ndreky panompo atokisan̈a? (Matio 24:45; Jaona 17:17) Izio ma tsy mampan̈ino zaho hitanolo miavaka, fotony zaho man̈ano raha mamparavoravo Jehovah? Mba mampirehareha zaho ma miavaka aminolo zen̈y?’—Salamo 34:2; Matio 10:32, 33.

²³ Donia ty koa mety hitaon̈o atsika ankolaka. Hitantsika tio fa fangalan̈a diandian̈a an̈isany fomba ampiasainy Satana, baka olo manompo Jehovah hanjary an̈isany donia ty. Karakory hahaizantsika mifidy tsarabe fangalan̈a diandian̈a mety sady mahatsara atsika, baka eritreritrintsika hadio fo? Zen̈y raha ho hitantsika amy toko fan̈araka ty.