1, 2. a) Ino ma raha mety ho sarotro amintsika ndraikindraiky? b)Ino aby ma fan̈ontanian̈a mila dinihintsika?

ALEVA onon̈o baka anao man̈iraka zanakanao hivanga raha, fa izy malain̈y handeha. Hita be amy soranany izy tsy ravoravo. Izy ndray efa rodon̈inao, volan̈anao ataony sary tsy ren̈y fo. Hainy tsarabe izy tokony han̈aja anao, fa izy tsy tihan̈araka volan̈anao. Tsy tsaiky fo mety han̈ano karaha zen̈y fa ndray olobe koa.

² Mety ho sarotro man̈aja fahifan̈a zen̈y. Asa anao mba man̈eky zen̈y? Tsy anao zaraiky fo karaha zen̈y fa ankamarozanolo koa. Mahaimaro fo olo tsy tia man̈aja fahifan̈a aminandra izioty. Kanefa, Baiboly mandrisiky atsika han̈aja olo manan̈a fahifan̈a. (Ohabolana 24:21) Izikoa tsy tiantsika hiala amy fitiavany Zan̈ahary, atsika mila man̈aja fahifan̈a fo. Ty fan̈ontanian̈a tsara dinihintsika: Nan̈ino ma tsy mora man̈aja fahifan̈a? Ino mahavy Jehovah man̈iraka atsika han̈aja fahifan̈a? Ino han̈ampy atsika han̈aja fahifan̈a? Akory han̈aboahantsika fa atsika man̈aja fahifan̈a?

3, 4. Karakory ma nahavy olombelon̈o nanjary panota? Nan̈ino ma raha zen̈y mampasarotro fan̈ajan̈a fahifan̈a?

³ Sarotro amintsika man̈aja fahifan̈a, fotony atsika tsy lavorary. Olo manan̈a fahifan̈a aby io koa tsy lavorary. Adama ndreky Eva olo  voanalohany nanohitry fahifan̈any Jehovah, taminy iro tamy zaridain̈y Edena tan̈y. Baka tamy raha nataondro zen̈y nahavy fahotan̈a. Nanjary panota ndreky tsy lavorary atsika. Zen̈y mahavy atsika firaka izio miron̈o han̈ano raha ratsy ndreky tsy han̈aja fahifan̈a io.—Genesisy 2:​15-​17; 3:1-7; Salamo 51:5; Romanina 5:12.

⁴ Mora amintsika koa man̈ambony ten̈a, fotony atsika tsy lavorary. Zen̈y mahavy atsika tsy maintsy miady mare, baka hanetry ten̈a. Efa vitsy olo manetry ten̈a zen̈y amy donia ty! Ndray efa ela nanompoantsika Jehovah, atsika mety ho voataon̈o han̈ambony ten̈a ndreky hanery olo han̈araka hevitrintsika fo. Aleva onon̈o Kora. Maro raha sarotro nandalovany olony Jehovah, fa izy tsy niala iro. Izikoa fa nandeha fotoan̈a, izy nan̈iry hahazo fahifan̈a mandilatra ny efa nazony. Izy nitaon̈o olo hafa nanohitry Mosesy, lelahy farany nandefitry tamy zen̈y. (Nomery 12:3; 16:1-3) Nan̈ambony ten̈a koa Panjaka Ozia. Indraiky andra izy niditry tamy tempoliny Jehovah nan̈ano asa masin̈y, kanefa Pisoron̈o zaraiky fo tokony han̈ano raha zen̈y. (2 Tantara 26:16-21) Nivangaindro lafo raha nataondro zen̈y! Tantara aby io mampatsiaro atsika fa ho sarotro amintsika koa han̈aja fahifan̈a izikoa atsika tsy manetry ten̈a.

5. Ino raha nataonolo sasany izikoa fa nahazo fahifan̈a? Ino mahavy atsika mivolan̈a zen̈y?

⁵ Maro olo tsy man̈aja fahifan̈a, fotony hitandro loatra raha tsy mety ataonolo manan̈a fahifan̈a aby io. Maro amindro io masiaka, tsy mahinakinaka naman̈a sady tia mampijaly olo. Izikoa dinihin̈y raha nandalo tamy tantaranolombelon̈o, maro tamindro manan̈a fahifan̈a aby io nanjakazaka taminolo nindesiny. (Vakia Mpitoriteny 8:9.) Jehovah koa fa nifidy Saoly ho panjaka, Saoly tsara toetry sady nanetry ten̈a. Kanefa izy nanjary nan̈ambony ten̈a sady nafana fo Davida, lelahy tsy nivadiky tamy Jehovah. (1 Samoela 9:20, 21; 10:20-22; 18:7-11) Davida koa  an̈isany panjaka tsara fan̈ahy tan̈y Israely, kanefa izy nanjary nanjakazaka. Nangalariny vadiny Oria Hetita. Nataony koa raha nahafaty Oria. (2 Samoela 11:1-17) Tsy lavorary atsika, ke zen̈y mahavy atsika tsy mahay mampiasa fahifan̈a io. Mbala mandilatra zen̈y ny raha ho hisy, izikoa olo tsy man̈aja Jehovah amian̈a izio. Nisy papa katolika izioty nampijaly olo tamy tany maro. Karaha ty nambarany pitondra fanjakan̈a britaniky araiky momba raha zen̈y: “Olo koa fa amian̈a fahifan̈a, mahairatsy jery fo. Mandilatra zen̈y raha ataony, izikoa fahifan̈a jiaby amian̈a izy.” Ke nan̈ino fo basy atsika mbala irahin̈y han̈aja fahifan̈a fo?

6, 7. a) Mandrisiky atsika han̈ano ino ma fitiavantsika Jehovah io? Ino antony? b) Akory han̈aboahantsika fa man̈aja fahifan̈a atsika ndray tsy mora amintsika man̈ano zen̈y?

⁶ Fitiavan̈a antony maventy mahavy atsika man̈aja fahifan̈a: Fitiavan̈a Jehovah, olo man̈odidin̈y atsika, baka io fitiavantsika ain̈intsika tompiny. Fitiavantsika Jehovah io mahavy atsika man̈iry han̈ano raha mamparavoravo izy. (Vakia Ohabolana 27:11; Marka 12:29, 30.) Jehovah manan̈a zo hanjaka amy raha jiaby niasainy. Kanefa nisy nanohitry zonany hitondra zen̈y izikoa fa tsy nan̈aja fahifan̈anany Adama ndreky Eva. Aminandra izioty koa, maro olo man̈araka raha ataony Satana, ke manohitry fahifan̈any Jehovah. Mahatsiaro sambatra atsika, fotony tsy man̈ano karaha iro. Atsika midera Jehovah amy fo jiaby, fotony haintsika fa izy zaraiky fo manan̈a zo hitondra. (Apokalypsy 4:11) Zen̈y koa mahavy atsika mifen̈y manohan̈a zonany hitondra, amy raha jiaby ataontsika.

⁷ Atsika von̈ono han̈araka zay raha volan̈iny Jehovah amintsika, fotony atsika tia izy. Zen̈y tsy mivolan̈a fa mora man̈ano zen̈y! Fa izikoa atsika man̈iry han̈aja fahifan̈any Jehovah, atsika mila mianatra man̈eky izy, karaha ataony  tsaiky voakoran̈a tamy fehintsoratra voanalohany in̈y! Ndraikindraiky tsy mora tamy Jesosy nan̈eky han̈ano sitrapony Babany, kanefa izy nivolan̈a karaha ty: “Tsy sitraponaka atao fa sitraponao.”—Lioka 22:42.

8. a) Akory han̈aboahantsika fa atsika man̈aja fahifan̈any Jehovah? Akory fahitany Jehovah atsika izikoa tsy man̈aja olo namiany fahifan̈a? b) Ino raha han̈ampy atsika han̈eky torohevitry izikoa fa misy man̈anatra atsika? (Zahava efajoro “ Tandrin̈esa Torohevitry, Man̈araha Anatra”)

⁸ Amy zioty, Jehovah efa tsy mikoran̈a amintsika mivantan̈a fa mampiasa Baiboly ndreky solonten̈anany ambony tany eto. Mitovy man̈aja fahifan̈any Jehovah fo atsika, izikoa man̈aja olo namiany fahifan̈a, na iro mbala ambelany mitondra amy zioty. Izikoa atsika tsy man̈aja solonten̈anany aby io, na tsy man̈araka torohevitry ndreky fan̈anaran̈a ataondro, Jehovah ho meloko amintsika. Tamy Jehovah, mira nin̈on̈on̈o taminany iro Israelita aby io izikoa fa nin̈on̈on̈o ndreky nanohitry Mosesy.—Nomery 14:26, 27.

9. Atsika koa tia olo man̈odidin̈y atsika, nan̈ino atsika tokony han̈aja fahifan̈a? Man̈ameza ohatra.

⁹ Man̈aja fahifan̈a koa atsika, fotony tiantsika olo man̈odidin̈y atsika. Ohatra, anao izio maramila an̈atiny tafiky araiky. Maramila tsiaraikiaraiky samy amy galon̈onany. Misy ny manan̈a fahifan̈a mandilatra ry namany. Karakory ndraiky hiafarany izikoa anao tsy nan̈araka bekony manamboninahitry araiky? Izikoa anaro handeha hiady edy, anaro ho resy na hofoaty foeky, fotony anao tsy nan̈aja fahifan̈a. Marin̈y ndraiky fa mampijaly olombelon̈o iro tafiky maramila aby io. Tsy karaha zen̈y ndraiky tafiky Jehovah, fotony izio mitady raha mahatsara olo indesiny fo. Matetiky Baiboly mivolan̈a fa “Jehovah Tompiny tafiky.” (1 Samoela 1:3) Jehovah mibeko iro anjely mahery maro be. Ndraikindraiky, ampitovisiny Baiboly amy tafiky koa olony Zan̈ahary ambony tany eto. (Salamo 68:11; Ezekiela 37:1-10) Izikoa atsika tsy man̈aja olo namiany Jehovah  fahifan̈a, ho azondraha koa iro rahalahintsika aby io. Izikoa misy Kristianin̈y araiky fo tsy man̈araka torohevitry baka aminy antipan̈ahy, olo jiaby an̈atiny fiangonan̈a ao mety hibaby vokatra raha nataony. (1 Korintianina 12:14, 25, 26) Tsaiky koa tsy man̈aja raimandreny, iro jiaby tran̈o araiky hijaly. Izikoa tiantsika olo man̈odidin̈y atsika, tokony ho von̈ono fo atsika han̈aja olo manan̈a fahin̈ana.

10, 11. Hahita hatsaran̈a atsika izikoa man̈aja fahifan̈a. Nan̈ino fahaizantsika zen̈y han̈ampy atsika han̈aja fahifan̈a?

¹⁰ Man̈aja fahifan̈a koa atsika, fotony atsika tompiny fo hahazo hatsaran̈a. Matetiky, Jehovah koa fa man̈iraka atsika han̈aja fahifan̈a, koran̈iny amintsika koa hatsaran̈a ho azontsika izikoa fa man̈ano zen̈y. Jehovah man̈iraka tsaiky han̈aja raimandreny, baka iro ho sambatra ndreky ho lava viloman̈a. (Deoteronomia 5: 16; Efesianina 6:2, 3) Izy koa man̈iraka atsika han̈aja iro antipan̈ahy aby io, baka atsika ho tsara fihavan̈ana aminany fo. (Hebreo 13:7, 17) Irahiny  man̈aja manampahifan̈a koa atsika, fotony iro io natao hiaro atsika.—Romanina 13:4.

¹¹ Izikoa haintsika antony mahavy Jehovah man̈iraka atsika han̈aja fahifan̈a, ho moramora amintsika han̈ano zen̈y. Sa karakory hevitrinao? Izioty atsika handiniky fomba telo mety han̈aboahantsika fa man̈aja fahifan̈a atsika.

12. Ino andraikitry lelahy an̈atiny tokantran̈o? Akory han̈anovany zen̈y?

¹² Jehovah namoron̈o fianakavian̈a io Zan̈ahariny filaminan̈a. Zen̈y nahavy izy nan̈ano raha hampilamin̈y fiain̈ana an̈atiny tokantran̈o. (1 Korintianina 14:33) Izy koa fa namoron̈o fianakavian̈a, lelahy nataony hitariky. Kristy ndraiky nataony hitariky lelahy. Man̈aja fahifan̈any Kristy io lelahy izikoa fa mangala tahaka fomba nitondrasany fiangonan̈a. (Efesianina 5:23) Lelahy tsy tokony hiala andraikitry, fa tokony ho tia ndreky hamelon̈o vadiny ndreky ry zanany. Izy koa tsy tokony hanjakazaka na hasiaka, fa tokony hahay handanjalanja, ndreky ho tsara fan̈ahy. Tsy tokony hadin̈any fa fahifan̈any Jehovah an̈abo mandilatra ninany.

13. Akory han̈anovany man̈angy andraikitrinany, izikoa tiany hamparavoravo Jehovah?

¹³ Man̈angy koa fa manambady zen̈y, izy manjary pan̈ampy na famenony vadiny. Baiboly  mikoran̈a momba ‘lalàn̈any reny.’ (Ohabolana 1:8) Zen̈y mivolan̈a fa namiany Jehovah fahifan̈a man̈angy, fa fahifan̈anany fo ambany izikoa ampitovisin̈y amy fahifan̈any vadiny. Man̈aja fahifan̈any vadiny man̈angy izikoa izy man̈ampy vadiny han̈ano andraikitrinany. Izy tsy tokony han̈ambany vadiny na hifan̈oesa aminany, na koa hamitaka izy. Izikoa fa misy fanapahankevitry raisiny vadiny tsy malaka aminany, izy mety man̈ambara hevitrinany, fa tokony hita amy fomba fivolan̈any fo fa izy man̈aja vadiny. Tsy tokony hadin̈any fa vadiny fo tompiny fanapahankevitry farany. Tsy mora zen̈y ndraikindraiky, indraka eky izikoa tsy Vavolombelon̈o vadiny. Fa izikoa man̈angy mifen̈y fo han̈aja vady, mety handrisiky vadiny han̈iry hanompo Jehovah raha zen̈y.—Vakia 1 Petera 3:1.

14. Ino raha tokony hataony tsaiky, baka Jehovah ndreky raimandrenindro ho ravoravo?

¹⁴ Tsy Jehovah zaraiky fo ho ravoravo izikoa tsaiky man̈a- ja raimandreny fa olobendro koa. (Ohabolana 10:1) Zanaka mila man̈aja raimandreny, na babany na reniny zaraiky fo mitarimy izy, fotony tsy mora mitaiza manokan̈a. Izikoa samy man̈ano andraikitrinany iro tran̈o araiky, iro ho ravoravo, baka io hifankatia tsarabe. Han̈amia voninahitry Jehovah Pamoron̈o fianakavian̈a koa iro, izikoa man̈ano zen̈y.—Efesianina 3:14, 15.

15. a) Akory han̈aboahantsika fa man̈aja fahifan̈any Jehovah atsika, an̈atiny fiangonan̈a? b) Ino aby toro lalan̈a man̈ampy atsika han̈aja iro natao hitariky atsika? (Zahava efajoro “ Man̈ikia Olo Mitariky Anaro.”)

¹⁵ Jehovah nifidy Jesosy Zanany hitondra fiangonan̈a. (Kolosianina 1:13) Jesosy ndraiky nanendry “panompo atokisan̈a ndreky mahadiniky raha” hikarakara raha ilainy olony Zan̈ahary ambony tany eto, baka iro ho tsara fihavan̈ana amy Jehovah. (Matio 24:45-47) Filankevipitantan̈ana ikahian̈a panompo io. Karaha tamy faha apostoly tan̈y, iro antipan̈ahy aby io mahazo toromariky ndreky torohevitry baka amy Filankevipitantan̈ana, na mivantan̈a zen̈y, na baka amy solonten̈andro, karaha ataony piandraikitry faritry. Man̈aja Jehovah atsika, izikoa man̈aja iro antipan̈ahy aby io.—Vakia 1 Tesalonianina 5:12; Hebreo 13:17.

16. Ino ivolan̈ana fa voatendriny fan̈ahy masin̈y iro antipan̈ahy aby io?

¹⁶ Iro antipan̈ahy ndreky pan̈ampy amy fanompoan̈a aby io tsy lavorary, ke iro mety han̈ano raha tsy mety karaha atsika fo. Kanefa, iro io ampiasainy Jehovah han̈ampy fiangonan̈a. (Efesianina 4:8) Iro io koa voatendriny fan̈ahy masin̈y. (Asan’ny Apostoly 20:28) Tsy maintsy fenondro raha takin̈y amindro, mifan̈araka amy raha koran̈iny Baiboly. Aleva onon̈o fa Baiboly baka amy fan̈ahy masin̈y Zan̈ahary. (1 Timoty 3:1-7, 12; Titosy 1:5-9) Alohany antipan̈ahy hafa hanendry antipan̈ahy vaovao, iro mivavaka  mare amy Jehovah, baka ho hitandro izikoa fenony rahalahy io raha takin̈y aminy antipan̈ahy na tsy fenony.

17. Nan̈ino ma man̈angy tokony hifon̈o loha izikoa fa man̈ano asa tokony hataony rahalahy vita batisa?

¹⁷ Ndraikindraiky, an̈atiny fiangonan̈a tsisy antipan̈ahy na pan̈ampy amy fanompoan̈a afaka man̈ano asa tokony hataondro, karaha ataony mitariky fivorian̈a alohany fanompoan̈a. Izikoa zen̈y ny raha misy, rahalahy hafa vita batisa han̈ano asa io. Izikoa tsisy rahalahy vita batisa, ranabavy matotro hitariky fivorian̈a io. Ndray zen̈y, tokony hifon̈o loha fo man̈angy, isaka izy man̈ano asa tokony hataony rahalahy vita batisa. * (1 Korintianina 11:3-10) Zen̈y tsy natao han̈ambanian̈a man̈angy fa han̈aboahan̈a fa man̈aja fahifan̈a napetraka Jehovah izy, na an̈atiny tokantran̈o zen̈y na amy fiangonan̈a.

18, 19. a) Ino raha tiany Romanina 13:1-7 koran̈iny? Hazavà. b) Karakory tokony han̈ajantsika iro manampahifan̈a aby io?

¹⁸ Ten̈a Kristianin̈y man̈araka toro lalan̈a amy Romanina 13:1-7. (Vakia.) Man̈ano zen̈y iro, fotony eritreritrindro efa nizarindro han̈araka raha koran̈iny Baiboly. Izikoa iro pitondra fanjakan̈a aby io mbala ambelany Jehovah misy, atsika tsy maintsy man̈aja iro. Misy aminy asa ataondro io ten̈a ilaintsika, karaha ataony mampisy filaminan̈a, na asa hafa hampatsara fiarahamonin̈y. Man̈aja iro atsika, izikoa man̈efa latety tokony hifaintsika, man̈ano ny marin̈y izikoa fa mameno taratasy amy fanjakan̈a, baka io man̈araka lalàn̈a mifandray amintsika ndreky fianakavian̈antsika, asantsika ndreky fanan̈anantsika. Fa izikoa ndraiky iro manery atsika handika lalàn̈any Zan̈ahary, atsika man̈ano ka- raha nataondro apostoly aby io. Nivolan̈indro: “Zan̈ahary fo tsy maintsy arehanay volan̈a fa tsy olo, fotony izy pitondra zahay.”—Asan’ny apostoly 5:28, 29; zahava efajoro “ Fahifan̈anjovy ma Tokony Hajaiko?”

¹⁹ Tokony ho hita amy fomba ifandraisantsika amy manampahifan̈a fa atsika man̈aja iro ankitin̈y. Atsika mety hifandray amindro mivantan̈a. Nisy fotoan̈a apostoly Paoly nikoran̈a taminy Heroda Agripa Panjaka ndreky Festosy Governera. Hainy tsarabe raha tsy nety nataondro io, kanefa zen̈y tsy nisakana izy tsy han̈aja iro. (Asan’ny apostoly 26:2, 25) Mangala tahaka raha nataony zen̈y atsika, izikoa fa mikoran̈a amy pitondra fanjakan̈a na polisy. Kristianin̈y mbala mianatra koa tokony han̈aja papianatra, tale, ndreky piasa hafa. Atsika man̈aja olo jiaby, na mankasitraka raha inoantsika iro na tsy mankasitraka. Tokony ho hitandro fo fa atsika man̈aja olo.—Vakia Romanina 12:17, 18; 1 Petera 3:15.

20, 21. Ino hatsaran̈a ho azontsika izikoa atsika man̈aja fahifan̈a?

²⁰ Apostoly Petera nivolan̈a: “Man̈ajà karazan̈olo jiaby.” (1 Petera 2:17) Irarian̈a atsika halaza man̈aja olo, baka ho maro olo ho lany fan̈ahy koa fa mahita zen̈y. Amy zioty, efa vitsy olo man̈ano zen̈y. Izikoa atsika man̈aja olo, ho hita fo fa atsika ten̈a man̈araka volan̈a Jesosy ty: ‘Irarian̈a jironaro hazava ndreky ho hitanolo fo. Anaro koa man̈ano zen̈y, ho hitandro asa tsara ataonaro, baka io iro han̈amia voninahitry Babanaro andan̈itry an̈y.’—Matio 5:16.

²¹ Amy zioty, mahaimaro olo manetry ten̈a manjary mianatra ny marin̈y momba Zan̈ahary. Izikoa atsika mifen̈y fo han̈aja fahifan̈a na an̈atiny tokantran̈o zen̈y, na an̈atiny fiangonan̈a, na manampahifan̈a, mety ho maro olo han̈iry hanompo Jehovah miaraka amintsika. Jehovah ho ravoravo amintsika, baka io atsika tsy hiala amy fitiavany. Tsisy raha mamparavoravo mandilatra zen̈y!