Malahelo atsika izikoa fa misy namantsika na havantsika voaroaka, fotony nanota ke tsy nibebaka. Misy toromariky momba zen̈y amy Baiboly. Izikoa arehantsika toromariky aby zen̈y, ho hita fa atsika tia Jehovah ndreky tsy mivadiky. * Atsika izio hamaly fan̈ontanian̈a sasany momba raha zen̈y.

Akory tokony hatao izikoa fa misy olo voaroaka? Baiboly mivolan̈a: ‘Aza mifanerasera aminolo karaha rahalahy kanefa pijangajanga, na olo tsy afapo amy raha anan̈any, na manompo sampy, na panihitihy, na pigiaka toaka, na pandrava. Aza miaraka mihina aminany foeky.’ (1 Korintianina 5:11) Karaha ty koa koran̈iny Baiboly momba olo “tsy man̈araka fampianaran̈a Kristy”: ‘Aza mampiditry izy antran̈o, baka io aza man̈ano mbala tsara izy foeky, fotony zay olo man̈ano mbala tsara izy, mankasitraka raha tsy manjary ataony.’ (2 Jaona 9-11) Atsika tsy tokony hifandray na hikoran̈a raha momba fanompoan̈a aminany. Karaha ty koran̈iny Tilikambo Fiambenana 1 Avrily 1982, pazy 23: “Ndray fan̈anovan̈a ‘akory naninao’ fo efa mety hitariky koran̈a sady mety hahavy olo ho loso kamarady. Tsy mety ho tiantsika han̈ano zen̈y aminolo voaroaka.”

Dikanizen̈y ma atsika tsy tokony hifandray aminany foeky? Zen̈y ankitin̈y! Fotony nan̈ino? Voanalohany, atsika man̈iry tsy hivadiky amy Jehovah ndreky amy Volan̈anany, na amy raha mora na amy raha sarotro. Zay raha volan̈iny Jehovah arehantsika, fotony atsika tia izy. Haintsika koa fa izy be fitiavan̈a ndreky man̈ano ny rariny. Tsy vitanizen̈y fa, mahatsara atsika koa lalàn̈anany io. (Isaia 48:17; 1 Jaona 5:3) Faharoe, fitsipiky io koa natao hiarovan̈a atsika ndreky fiangonan̈a. Izikoa arehantsika fo fitsipiky io, ho tsara fo  fihavan̈antsika amy Jehovah, ke atsika tsy ho voataon̈o han̈ano raha ratsy. Halaza tsara koa fiangonan̈a. (1 Korintianina 5:6, 7) Fahatelo, atsika koa man̈araka toro lalan̈a Zan̈ahary amy Baiboly ao, hahazo hatsaran̈a koa olo voaroaka io. Mety tsisy dikany taminany fan̈ampian̈a nataony antipan̈ahy, matoa izy voaroaka. Kanefa, atsika koa man̈eky fanapahankevitrindro, baka io tsy mitady fomba ifandraisan̈a aminany, mety “hampatontohitry” izy raha zen̈y, ke handrisiky izy himpody amy Jehovah, fotony hainy fa ratsy ankitin̈y raha nataony.—Lioka 15:17.

Karakory tokony hatao izikoa fa misy havan̈a voaroaka? Izikoa misy havantsika marikitry voaroaka, mety ho sarotro amintsika tsy hivadiky amy Jehovah, fotony havantsika io tiantsika. Tsy ho voakoran̈a eto raha jiaby mety ho hisy, kanefa misy raha aroe ty han̈ampy atsika.

Karakory izikoa havantsika tran̈o araiky amintsika voaroaka? Mitohy fo fifandraisan̈antsika ndreky raha fataontsika andavanandra. Fa raha momba fanompoan̈a Jehovah fo tsy hiarahantsika aminany. Fianakavian̈anany koa tsy tokony han̈ambela izy han̈ano zen̈y. Izikoa iro man̈ano fotoampivavahan̈a, izy mety miaraka amindro fa izy fo tsy tokony hivolan̈a. Fa izy ndraiky koa mbala tsy ampy taon̈o, mbala andraikitry raimandreninany fo mampianatra ndreky mikarakara izy. Mety mampianatra Baiboly zanany io raimandreny be fitiavan̈a. *—Ohabolana 6:20-22; 29:17.

Akory ndraiky izikoa tsy tran̈o araiky amintsika havan̈a voaroaka io? Ndraikindraiky misy raha tsy maintsy ifandraisan̈a aminany, karaha ataony fikarakaran̈a raha sasany momba fianakavian̈a. Kanefa, atsika tsy tokony hifandray be aminany izikoa mbala mety hatao. Kristianin̈y tsy mivadiky zen̈y tsy tokony hitady hevitry foeky hifandraisan̈a  aminy havan̈a voaroaka. Izikoa tiany ankitin̈y tsy hivadiky amy Jehovah ndreky fandaminan̈anany, izy han̈aja raha koran̈iny Soratra Masin̈y momba olo voaroaka. Izikoa atsika man̈ano zen̈y, mety hampiova izy raha zen̈y. Mety zen̈y koa hampatontohitry izy himpody amy Jehovah ndraiky. *—Hebreo 12:11.