1, 2. Azovy aby ma ravoravo, izikoa fa misy olo atao batisa?

METY efa ela anao nanompo Jehovah, ke mety efa tsy vaovao aminao eky maharen̈y kabaro momba batisa zen̈y amy fivoriambe. Mety namparavoravo anao mare koa mahita olo atao batisa mitsangana aloha arỳ. Endrakendraka mare olo jiaby amy fotoan̈a io, sady mandrombo mare. Mety ho latsaka foeky ranomasonao mahita fa mahaimaro fo olo man̈iry hanompo Jehovah. Amy fotoan̈a karaha zen̈y, haravoan̈antsika tsisy ambaka izy!

² Isaka taon̈o, kadiriny indroe na intelo fo atsika mahita olo atao batisa, fa iro anjely aby io ndraiky matetiky mahita. “Haravoan̈a” ma nindro anjely aby io “andan̈itry an̈y”! Isaka herin̈iandra, olo mandeha andrivony manjary an̈isany fandaminany Jehovah hita maso. (Lioka 15:7, 10) Misora ravoravo iro anjely aby io mahita raha zen̈y!—Hagay 2:7.

3. Ino mahavy Satana mandehandeha “mira lion mitreron̈o” in̈y? Ino tetikinany?

³ Tsy anjely jiaby ravoravo, izikoa fa misy olo atao batisa. Romotro mare Satana ndreky demony aby io mahita olo andrivony miala amy donia ratsy ty. Satana efa nivolan̈a fa fitiavanten̈a fo mahavy atsika manompo Zan̈ahary fa tsy ten̈a fitiavan̈a, ke hivadiky zen̈y atsika izikoa misy  raha hely fo mitsapa jery atsika. (Vakia Joba 2:4, 5.) Ke isaka misy olo araiky manokanten̈a hanompo Jehovah, voty Satana fotony tatra vandinany. Mira avoa hipy andrivony in̈y Satana, isaka herin̈iandra. Zen̈y mahavy izy “mandehandeha mira lion mitreron̈o, mitady olo vonen̈a in̈y.” (1 Petera 5:⁠8) Handrobaka fihavan̈antsika amy Jehovah fo ten̈a tetikinany.—Salamo 7:​1, 2; 2 Timoty 3:⁠12.

4, 5. a) Nasiany Jehovah fetriny raha mety ho vitany Satana. Misy fomba aroe an̈anovany zen̈y, ino aby iro io? b) Ino toky anan̈antsika Kristianin̈y?

⁴ Marin̈y ndraiky fa Satana io romotro mare, kanefa tsisy raha tokony hampavozo atsika, fotony efa nasiany Jehovah fetriny raha mety ho vitany. Ino mahavy atsika mivolan̈a zen̈y? Voanalohany, Jehovah efa nivolan̈a fa hisy  “vahoaka marobe” tafiboaka velon̈o ‘baka amy fahorian̈a be tsisy karaha izy’ ho avy io. (Apokalypsy 7:9, 14) Raha koa fa volan̈iny Zan̈ahary, tsy maintsy tanteraka fo. Ndray Satana mba mahay fa tsy ho vitany hampivadiky olo jiaby manompo Jehovah.

⁵ Ino amy zay antony faharoe? Hitantsika amy volan̈a Azaria, paminan̈y tsy nivadiky taloha tan̈y, valiny fan̈ontanian̈a io. Karaha ty nivolan̈iny tamy Panjaka Asa: “Jehovah han̈ampy anaro, izikoa anaro tsy mivadiky aminany.” (2 Tantara 15:2; vakia 1 Korintianina 10:13.) Izikoa tantara zahan̈a, tsy vitany Satana ankitin̈y nampivadiky olo jiaby nanompo Jehovah. (Hebreo 11:4-40) Aminandra izioty koa, Kristianin̈y araiky koa tsara fihavan̈ana amy Zan̈ahary, ho vitany fo hanohitry Devoly ndreky tetikinany. Ty toky namiany Jehovah atsika: “Tohera Devoly fa izy hilefa anaro edy.”—Jakoba 4:7.

6. Karakory ma ataony Satana izikoa fa hanafiky atsika?

⁶ Tsy ho vitany Satana handresy olony Jehovah jiaby. Kanefa, izikoa atsika tsy mitandrin̈y tsarabe, na mihen̈y fihavan̈antsika amy Jehovah, ho hitany Satana fo fomba hamangoan̈a atsika. Akory han̈anovany zen̈y? Izy koa fa manafiky, izy mamango mare. Tsy zen̈y fo fa atsika tsiaraikiaraiky tafihiny, baka io izy mampiasa hafitsian̈a. Hizahantsika tsiaraikiaraiky tetiky Satana aby io.

7. Ino mahavy Satana romotro mare aminolo manompo Jehovah?

⁷ Mamango mare. Karaha ty nambarany apostoly Jaona: ‘Donia misy atsika ty ambany fahifan̈any araiky ratsy in̈y.’ (1 Jaona 5:19) Izikoa fa dinihin̈y andininy io, misy raha mila tandremantsika. Olo jiaby ratsy fan̈ahy amy donia ty efa niny Satana. Izy mikendry mare olony Zan̈ahary, fotony iro mbala tsendriky ninany. (Mika 4:⁠1; Jaona 15:19; Apokalypsy 12:​12, 17) Izy izioty romotro mare. Hainy  tsarabe fa hely andranany tavela. Zen̈y mahavy izy mifen̈y mare, angovo jiaby, baka atsika hivadiky.

8. Ino nahavy apostoly Paoly nivolan̈a fa atsika “mitolon̈o” amy fan̈ahy ratsy?

⁸ Atsika tsiaraikiaraiky tafihiny Satana. Apostoly Paoly nampitandrin̈y iro Kristianin̈y aby io karaha ty: ‘Atsika tsy mitolon̈o amy raha misy nofotro ndreky lio, fa amy fan̈ahy ratsy amy lan̈itry.’ (Efesianina 6:12) Ino nahavy Paoly nivolan̈a fa ady ataontsika Kristianin̈y io mitovy amy ‘tolon̈o’? Olo aroe fo man̈ano ady tolon̈o zen̈y sady tsy mifankalavitry fa mifampitana tan̈ana. Dikanizen̈y, atsika tsiaraikiaraiky mila miady amy fan̈ahy ratsy io. Na mino fisiandro fan̈ahy ratsy aby io olo amy tany misy atsika na tsy mino, tsy tokony hadin̈antsika fa olo araiky koa fa nanokanten̈a tamy Jehovah, efa manomboko edy tolon̈o na ady ataony amy fahavalo io. Tsisy Kristianin̈y afaka miala amy zen̈y. Zen̈y nahavy Paoly nandrisiky iro ta Efesosy tan̈y “tsy hivadiky.” Intelo aby izy nandrisiky iro han̈ano zen̈y.—Efesianina 6:​11, 13, 14.

9. a) Ino mahavy Satana ndreky iro demony aby io mampiasa tetiky maro? b) Ino mahavy Satana mifen̈y mandrobaka jerintsika? (Zahava efajoro “ Tandrema Fa Satana Fetsy!”) d) Ino tetiky ratsy ampiasainy Satana hidinihintsika izioty?

⁹ Hafitsian̈a. Paoly nandrisiky iro Kristianin̈y aby io tsy hivadiky, ndray io “tetiky ratsy” ataony Satana. (Efesianina 6:11) Manondro raha maro volan̈a nampiasainy Paoly tio. Zen̈y mivolan̈a fa tsy araiky fo tetiky ampiasaindro fan̈ahy ratsy aby io, fa maro. Misy olo nahavita nanohitry raha araiky nitsapa jery iro, kanefa iro lavo izikoa fa nisy raha hafa nitsapa finoan̈andro. Tsy mahalany fan̈ahy raha zen̈y, fotony Devoly ndreky iro demony aby io mandiniky raha fataontsika ndreky raha mampalemy atsika. Araraotindro amy zay raha aby zen̈y handrobatan̈a fihavan̈antsika amy Zan̈ahary. Nahatsara izy, Baiboly efa man̈ambara  amintsika ankamarozany tetiky ampiasainy Devoly. (2 Korintianina 2:11) Efa hitantsika taloha tan̈y sasany amy tetikinany aby zen̈y, karaha ataony fitiavambola, naman̈a mandrisiky han̈ano ny ratsy, fitondranten̈a maloto. Fa atsika izio ndraiky hizaha tetiky hafa ampiasainy Satana: Fifandraisan̈a amy fan̈ahy ratsy.

10. a) Karakory ma ataonolo mifandray amy fan̈ahy ratsy zen̈y? b) Akory fahitany Jehovah olo mifandray amy fan̈ahy ratsy? Akory koa tokony ho fahitanao izio?

¹⁰ Mifandray amy fan̈ahy ratsy olo araiky, izikoa misoma aody. An̈atinizen̈y olo man̈ano sikidy, mizaha vintan̈a, man̈ozon̈o ndreky mamoriky, baka io mikoran̈a aminolo maty. Haintsika fa halany Jehovah olo man̈ano raha aby io. (Deoteronomia 18:10-12; Apokalypsy 21:8) Mila mitandrin̈y atsika, baka tsy ho tia raha ratsy. Tsy tokony atsika foeky hitady fomba hifandraisan̈a amy fan̈ahy ratsy. (Romanina 12:9) Atsika koa mifandray amy fan̈ahy ratsy, atsika mivadiky amy Jehovah, Babantsika andan̈itry an̈y.

11. Ino mahavy atsika mivolan̈a fa mandresy Satana, izikoa vitany mitariky atsika hifandray amy fan̈ahy ratsy? Man̈ameza ohatra.

¹¹ Hainy Satana fa olo araiky koa mifandray amy fan̈ahy ratsy, mivadiky amy Jehovah. Zen̈y mahavy izy mitaon̈o atsika han̈ano izio. Isaka misy Kristianin̈y araiky mifandray amy demony, Satana mandresy. Mba diniha hely baka ty: Akory ataony sefony maramila amy tafiky araiky, izikoa vitany nampivadiky maramila araiky amy tafiky fahavalonany? Misora ravoravo mare izy! Mety hipoerapoera foeky izy sady ataony hitany fahavalonany fa izy mahery. Karaha zen̈y koa haravoan̈any Satana, izikoa misy Kristianin̈y araiky manjary man̈ano sitraponany. Hipoerapoera amy Jehovah izy fa nazony araiky nivadiky io. Hay  be fa tsisy amintsika izio man̈iry han̈ano raha hahavy Satana handresy, fotony atsika tsy tihivadiky amy Jehovah!

12. Karakory ataony Satana baka atsika hieritreritry fa tsisy maharatsy mandeha amy moasy zen̈y?

¹² Tsisy Kristianin̈y kinia handeha amy moasy zen̈y. Hainy Satana raha zen̈y, ke izy mitady fomba maro hamangoan̈a atsika. Akory an̈anovany zen̈y? Jerintsika robatiny. Ataony raha hahavy atsika hieritreritry fa raha ratsy zen̈y tsara, baka io raha tsara zen̈y ratsy. (Isaia 5:20) Ataony koa raha hahavy atsika hisalasala. Efa zen̈y fo fataony letrizay.

13. Akory nataony Satana baka olo nanjary nisalasala?

¹³ Efa io edy fomba nampiasainy Satana, rango taloha tan̈y. Karaha ty nivolan̈iny taminy Eva: “Izio ma marin̈y ankitin̈y Zan̈ahary nivolan̈a taminaro fa anaro tsy mahazo mihina voany kakazo jiaby amy zaridain̈y ato?” Karaha ty koa nivolan̈iny tamy Jehovah momba Joba, izikoa fa nivory iro anjely jiaby tandan̈itry tan̈y: “Anao ma mieritreritry fa Joba io havozo anao izikoa tsisy hatsaran̈a amianao izy?” Mira zen̈y koa nataony tamy Jesosy vo nanomboko fanompoan̈anany tambony tany teto. Satana nivolan̈a: “Anao koa Zanaka Zan̈ahary ankitin̈y, ivoa mofo vato aby io.” Hitantsika baka amy zen̈y fa Satana tsy mifidy olo fitahin̈y. Izikoa zahan̈a volan̈a Satana io, izy karaha tihivolan̈a fa tsy marin̈y volan̈a Jehovah. Kanefa tsy ela talohanizen̈y, Jehovah nivolan̈a fa Jesosy io Zanany.—Genesisy 3:1; Joba 1:9; Matio 3:17; 4:3.

14. a) Akory ataony Satana, baka olo hisalasala fa ratsy ankitin̈y mifandray amy fan̈ahy ratsy zen̈y? b) Ino raha hidinihintsika izioty?

¹⁴ Mbala tsy miova Satana firaka izioty fa mbala mampiasa tetiky ratsy io fo. Ataony raha hahavy olo hivolan̈a fa tsisy maharatsy mifandray amy fan̈ahy ratsy zen̈y. Ny  raha mampalahelo, maro olo voafitaka. Isankarazany fomba an̈anovany Satana raha zen̈y, ke maro olo manjary misalasala. (2 Korintianina 11:⁠3) Akory han̈ampian̈a iro, baka iro tsy ho voafitaka eky? Akory tokony hataontsika, baka tsy hahavoa atsika tetiky Satana io? Alohany hamaliantsika fan̈ontanian̈a zen̈y, hidinihintsika antsendriky karakory ataony Satana baka olo hifandray amy fan̈ahy ratsy. Ohatra alaintsika amy zen̈y, momba fitahan̈a ndreky fangalan̈a diandian̈a.

15. a) Akory fahitanolo maro raha misy ifandraisany amy demony? b) Akory koa mety hampavoafitaka Kristianin̈y momba raha io?

¹⁵ Maro olo mivolan̈a fa tsy mampan̈ino mifandray amy fan̈ahy ratsy zen̈y, firaka iro amy tany manankarian̈a an̈y. Na amy tele, na amy boky, na amy soma video, samy ahitan̈a raha momba mazy aby. Ke nanjary maro olo mieritreritry fa tsy mampan̈ino mizaha raha aby io. Sasany ndraiky namoron̈o fikambanan̈a, fotony iro tia filma na video misy ifandraisany amy fan̈ahy ratsy. Zen̈y man̈ambara fa maro olo voafitakandro demony aby io. Misy Kristianin̈y koa tatrany raha zen̈y. Karaha ty nivolan̈iny Kristianin̈y araiky, izy koa fa baka nizaha filma nisy raha momba mazy: “Zaho kony mizaha fo fa tsy man̈ano raha ataondro amizio e!” Aleva onon̈o fa efa voafitaka atsika izikoa mieritreritry karaha zen̈y.

16. Ino maharatsy fangalan̈a diandian̈a misy ifandraisany amy demony?

¹⁶ Tsy mitovy marin̈y mifandray amy fan̈ahy ratsy ndreky mizaha olo man̈ano izio. Kanefa zen̈y tsy mivolan̈a fa tsy mampan̈ino mizaha raha karaha zen̈y. Koran̈iny Baiboly fa na Satana na iro demony aby io, samy tsy mahay  raha an̈aty jerintsika. *Akory fo basy hahaizandro raha an̈atiny jerintsika ndreky raha mampalemy atsika? Iro mandiniky raha ataontsika, an̈isanizen̈y fangalan̈a diandian̈a ataontsika. Mira mifandray amy fan̈ahy ratsy fo Kristianin̈y araiky, izikoa tia filma na boky momba mazy, na raha hafa mira zen̈y. Izikoa izy man̈ano zen̈y, mira mivolan̈a amy Satana: ‘Ty raha mampalemy zaho.’ Izikoa fa hainy Satana raha mampalemy olo io, ataony mahaimare fo fitakanany, firaka olo io resiny. Mampalahelo fa nisy Kristianin̈y nanjary zatra nizaha filma na mamaky boky misy ifandraisany amy demony, ke nanjary nifandray tamy fan̈ahy ratsy.—Vakia Galatianina 6:⁠7.

17. Ino tetiky tsy manjary ampiasainy Satana, izikoa fa misy Kristianin̈y marary?

¹⁷ Hainy Satana tsarabe fa atsika koa fa marary, mila mitaha. Misy Kristianin̈y mandany fanan̈ana indesin̈y mitaha, kanefa tsy mety janga. Mety hampakivy izy raha zen̈y. (Marka 5:25, 26) Fetsy Satana ndreky iro demony aby io, ke mety han̈araraotro zen̈y. Haindro tsarabe fa tsy tiany Jehovah atsika handeha amy moasy. (Isaia 1:​13) Ke ataony Satana raha hahavy olony Zan̈ahary handika fitsipiky io. Olo araiky koa fa marary tsy mety janga, Satana efa mitsapa jery izy edy, baka izy han̈ano fitahan̈a misy ifandraisany amy fan̈ahy ratsy. Izikoa ambelany handresy Satana ndreky iro demony aby io, ho robaka fihavan̈anolo io amy Jehovah. Akory han̈anovany zen̈y?

18. Fitahan̈a karakory tsy tokony hataony Kristianin̈y? Ino antony?

¹⁸ Karaha ty nivolan̈iny Jehovah tamindro Israelita nan̈ano mazy aby io: ‘Anaro koa mamelatra tan̈anaro,  masonaka tampenako tsy hizaha anaro. Ndray man̈ano vavaka maro anaro, zaho tsy hitandren̈y anaro.’ (Isaia 1:15) Izikoa atsika tia Jehovah ankitin̈y, atsika tsy mety han̈ano raha hahavy izy tsy hitandren̈y vavaka ataontsika na hahavy izy tsy han̈ampy atsika, indraka eky izikoa fa marary atsika. (Salamo 41:⁠3) Atsika tsy tokony han̈ano fitahan̈a efa haintsika fa misy ifandraisany amy fan̈ahy ratsy. * (Matio 6:13) Atsika koa man̈ano zen̈y, atsika ho tsara fihavan̈ana amy Jehovah fo.—Zahava efajoro “ Izy ty ma Misy Ifandraisany amy Fan̈ahy Ratsy Ankitin̈y?””

19. a) Ino ma raha iritriretinolo maro momba Satana ndreky angovonany? b) Tantara karakory ma tsy tokony hikoran̈iny Kristianin̈y?

¹⁹ Samy isany raha inoanolo momba Satana. Karaha ataony amy tany mandroso, maro olo mino fa misy ankitin̈y Satana, fa iro fo mieritreritry izy tsy mahavita raha. Tsy karaha zen̈y ndraiky amy tany sasany. Ataony Satana raha hahavy olo hieritreritry fa izy farany mahery, ke maro olo voafitaka. Zay raha ataondro ahitan̈a fahavozoan̈a fan̈ahy ratsy fo, na mihina zen̈y, na miasa, na mandry. Maro koa tantara man̈aboaka raha mahagaga vitandro demony  aby io, ke maro olo manjary varian̈a mizaha. Fa atsika Kristianin̈y ndraiky tsy tokony hitantara raha karaha zen̈y. Ino antony aroe maventy mahavy atsika tsy man̈ano zen̈y?

20. Mety ho tsy kiniantsika han̈ano sitrapony Satana, kanefa karakory mety hahavy atsika han̈ano zen̈y?

²⁰ Ty antony voanalohany: Miaraka miasa amy Satana atsika, izikoa mitantara raha mahagaga vitandro demony aby io. Marin̈y ndraiky fa Baiboly mikoran̈a momba raha mahagaga vitandro, kanefa ‘famantaran̈a vandivandy’ ndreky ‘fitaka’ fivolan̈any raha zen̈y. (2 Tesalonianina 2:​9, 10) Satana efa jaolahy amy famitahan̈a olo, ke hainy fo man̈odikodin̈y jerinolo araiky izikoa izy tia mizaha raha misy ifandraisany amy fan̈ahy ratsy. Vitany koa man̈ano raha hahavy izy hino raha tsy marin̈y. Zen̈y mahavy olo sasany karaha mahitahita na maharen̈iren̈y raha, ndreky  mitantara raha zen̈y aminolo hafa. Olo maharen̈y tantarandro in̈y koa mitantara aminolo hafa. Volan̈a koa fa mifindrafindra, efa miova edy. Ke izikoa Kristianin̈y araiky mitantara raha tsy marin̈y karaha zen̈y, izy mira man̈ano sitrapony Satana, “babany vandy” io.—Jaona 8:44; 2 Timoty 2:16.

21. Ino ma raha ten̈a tokony hikoran̈intsika aminolo?

²¹ Faharoe, Kristianin̈y atsika ke tokony ho raha momba Jesosy koran̈intsika aminolo fa tsy raha momba Satana. Ino antony? Soratra Masin̈y mampitandrin̈y atsika fa tokony Jesosy fo zahantsika, fotony izy Pitariky atsika, sady baka aminany koa mahavy finoan̈antsika hatanjaka. (Hebreo 12:2) Aleva onon̈o raha nataony Jesosy. Maro raha hainy momba Satana ndreky iro fan̈ahy ratsy aby io, fa izy tsy nandany fotoan̈a nitantara zen̈y tamy pianatranany. Talohany atsika nianatra Baiboly, mety nahitahita na naharen̈iren̈y raha. Kanefa atsika tsy tokony hitantara raha zen̈y aminolo eky. Momba Fanjakan̈any Zan̈ahary fo raha nikoran̈iny Jesosy ndreky iro apostoly aby io taminolo. Karaha zen̈y koa atsika. Tokony ho “raha mahagaga nataony Zan̈ahary” fo koran̈intsika aminolo.—Asan’ny Apostoly 2:11; Lioka 8:1; Romanina 1:11, 12.

22. Ino raha tokony hataontsika, baka iro ‘andan̈itry an̈y’ ravoravo?

²² Marin̈y ndraiky fa Satana mampiasa tetiky maro hamangoan̈a atsika, an̈isanizen̈y fifandraisan̈a amy fan̈ahy ratsy. Kanefa, atsika mila tapakevitry tsy han̈ano na hizaha raha momba izio. Aza ambela handrobaka jerinao Devoly, ke raha koa fa hainao ratsy, aza atao. Raha tsara fo ataova. (Vakia Efesianina 4:27.) ‘Haravoan̈a’ tsisy ambaka izy ‘andan̈itry an̈y’, izikoa atsika mifen̈y fo hanohitry tetiky tsy manjary ataony Devoly, firaka avy fotoan̈a han̈adosoany Jehovah izy.—Lioka 15:⁠7; Efesianina 6:⁠11.