Notenenin’i Jehovah mafy ny vahoakany ao amin’ny Ezekiela toko faha-23 satria nivadika taminy. Betsaka no itovizan’io toko io amin’ny toko faha-16. Mampitaha ny vahoakan’Andriamanitra amin’ny mpivaro-tena koa io toko io, ary resahina ao hoe hoatran’ny zandry vavin’i Samaria i Jerosalema. Na ny toko faha-16 na ny faha-23 dia samy miresaka hoe nivaro-tena ilay zokiny vavy, dia nanao hoatr’izany koa ilay zandriny fa mbola ratsy kokoa ny nataony tatỳ aoriana. Nomen’i Jehovah anarana izy roa vavy ao amin’ny toko faha-23. Ohola ilay zokiny, izany hoe i Samaria renivohitry ny fanjakan’ny foko folon’ny Israely. Oholiba kosa ilay zandriny, izany hoe i Jerosalema renivohitr’i Joda. a​—Ezek. 23:1-4.

Misy zavatra hafa koa mampitovy an’ireo toko ireo, fa ireto angamba no misongadina indrindra: Resahina ao hoe vadin’i Jehovah ireo vehivavy ireo fa nivadika taminy. Hita ao koa fa mbola nantenaina hoe hiova ny vahoakan’i Jehovah. Na dia tsy miresaka mivantana an’io hevitra io aza ny toko faha-23, dia misy tenin’i Jehovah momba an’izany hita ao, ary mitovitovy amin’izay voalaza ao amin’ny toko faha-16 ilay izy. Izao no nolazainy: “Hataoko mifarana hatreo ny fitondran-tenanao mamoafady sy ilay ianao mivaro-tena.”​—Ezek. 16:16, 20, 21, 37, 38, 41, 42; 23:4, 11, 22, 23, 27, 37.

Nilaza ny bokintsika taloha hoe i Ohola sy Oholiba dia mampiseho ny Fivavahana Milaza Azy ho Kristianina, izay mizara ho Fivavahana Katolika sy Fivavahana Protestanta. Rehefa nivavaka sy nikaroka bebe kokoa anefa isika, dia nisy fanontaniana mampieritreritra nipoitra. Efa nisy fotoana ve azo nolazaina hoe vadin’i Jehovah ny Fivavahana Milaza Azy ho Kristianina? Ary efa nisy fotoana ve izy io nanao fifanekena taminy? Tsia. Mbola tsy nisy akory ny Fivavahana Milaza Azy ho Kristianina, tamin’i Jesosy lasa mpanelanelana ny “fifanekena vaovao” nataon’i Jehovah sy ny Israely ara-panahy. (Jer. 31:31; Lioka 22:20) Tsy mbola anisan’ny Israely ara-panahy mihitsy koa izy io hatramin’izay. Efa ela be taorian’ny nahafatesan’ny apostoly vao nisy izy io, izany hoe tamin’ny taonjato fahefatra, ary efa Kristianina sandoka sy nivadi-pinoana no tao tamin’izany. Noharin’i Jesosy tamin’ny “tsimparifary” ireo Kristianina sandoka ireo.​—Mat. 13:24-30.

Ankoatra an’izany, dia nilaza i Jehovah fa mbola nantenaina hoe hiova i Jerosalema sy Samaria na dia nivadika aza. (Ezek. 16:41, 42, 53-55) Milaza ve anefa ny Baiboly fa mbola azo antenaina hoe hiova koa ny Fivavahana Milaza Azy ho Kristianina? Tsia! Tsy misy azo antenaina intsony ny amin’izy io sy ny amin’ny fivavahana hafa anisan’i Babylona Lehibe.

Tsy mampiseho ny Fivavahana Milaza Azy ho Kristianina àry i Ohola sy Oholiba. Misy zava-dehibe kokoa noho izany anefa ianarantsika rehefa mieritreritra an’ireo vehivavy ireo isika. Hitantsika hoe ahoana no fiheveran’i Jehovah an’izay miseho ho manompo azy nefa manala baraka ny anarany masina sady tsy mankatò ny fitsipika apetrany ho an’izay manaraka ny fivavahana madio. Tena meloka àry ny Fivavahana Milaza Azy ho Kristianina satria mihambo ho misolo tena an’ilay Andriamanitra resahin’ny Baiboly ny fivavahana rehetra ao amin’izy io. Ankoatra an’izay, dia lazain-dry zareo fa i Jesosy Kristy, ilay Zanaka malalan’i Jehovah, no mpitarika azy nefa mifanohitra amin’izany ny zavatra ataony. Mampianatra ry zareo hoe anisan’ny Andriamanitra telo izay iray i Jesosy. Tsy mankatò an’ilay baikon’i Jesosy hoe tsy tokony ho “anisan’izao tontolo izao” koa ry zareo. (Jaona 15:19) Mbola manompo sampy foana ry zareo sady mitsabaka amin’ny politika, ka hita hoe tena anisan’ilay “mpivaro-tena lehibe.” (Apok. 17:1) Tsy maintsy hihatra aminy koa àry ny sazy hihatra amin’ny fivavahan-diso rehetra!