‘Azovy Tokony Hinoako?’
An̈atiny lekoly ao Petera. Mitotoko fonany; tsy azoazony foeky ain̈inany, izy an̈abo sezinany iô. Papianatrandro taminio vo baka nan̈azava fa fampianaran̈any Charles Darwin momba evolision io ten̈a nampandroso siansy mare, sady izio koa nahavy olo tsy hinohino raha karaha io fo. Izy iziô amy zay man̈iraka pianatra aby io han̈ambara hevitrindro.
Ten̈a tsy mora fanapahankevitry tsy maintsy ataony Petera. Raimandreninany baka efa nampianatra izy fa fampianaran̈a momba evolision io tsy marin̈y foeky, fotony tsisy porofo. Nivolan̈indro taminany fa Zan̈ahary namoron̈o tany ndreky raha manampahin̈ana jiaby, sady ten̈a marin̈y ankitin̈y raha koran̈iny Baiboly momba famoron̈ana zen̈y. Na raimandreninany na papianatra in̈y, samby mitady raha hahatsara Petera. Ke azovy tokony hinoany?
Isaka taon̈o, misy pianatra maro sahirantsain̈y karaha zen̈y koa. Ino ma raha tokony hataondro? Tsara izikoa iro tsy man̈ekin̈eky zay raha ampianarin̈y iro. Fa iro tokony handiniky tsara ke han̈ano fanapahankevitrindro tompiny. Tokony dinihindro tsarabe antsendriky iro porofo momba evolision ndreky momba famoron̈ana, zay iro vo mifidy aia hinoandro.
Baiboly mivolan̈a fa tsy mety minomino raha jiaby ampianarinolo. Karaha ty baka ho izy: “Olo mbala tsy dia nandia fiain̈ana mino zay raha volan̈inolo, fa olo misy jery ndraiky mandiniky dianany tsiaraikiaraiky.” (Ohabolana 14:15) Baiboly mandrisiky Kristianin̈y hampiasa ‘sain̈y’ ndreky handiniky tsarabe raha ampianarin̈y iro.—Romanina 12:1, 2.
Dikany nan̈anaovan̈a bokikely ty tsy handeha handrisiky lekoly hampianatra momba famoron̈ana, fa izity natao, misy hahitan̈a asa marin̈y sa tsy marin̈y fampianaran̈anolo sasany mivolan̈a fa nisinisy hoazy fo raha jiaby ty, fa angano fo Zan̈ahary namoron̈o raha jiaby.
Momba selily raha ten̈a koran̈intsika ato, fotony izio ten̈a ilain̈y amy fisiany raha manampahin̈ana. Ho hitanao ato sasany amy raha mahavarian̈a an̈aty selily ao. Tsara koa izikoa dinihinao tsarabe asa marin̈y ankitin̈y porofo ampiasainolo hivolan̈ana fa evolision io misy.
Tsy niany tsy amaray, atsika tsy maintsy han̈apetraka fan̈ontanian̈a ty: Baka taminy evolision ma nampisy raha manampahin̈ana, sa izio nisy namoron̈o? Anao koa mety efa navy nieritreritry zen̈y. Ho hitanao an̈aty bokikely ty ato iro porofo sasantsasany nahavy olo maro nanjary nino fa fiain̈ana ty nisy namoron̈o.
