FAN̈ONTANIAN̈A 5

Tokony Hinoanao edy Raha Koran̈iny Baiboly?

ALIFASA

Anao ma efa navy diso hevitry momba olo araiky? Anao baka mety efa naharen̈y fankaratsian̈a momba izy, ke roso tsy azoazonao amy zay izy. Kanefa izikoa anao efa nahay izy tsarabe, hitanao fa kaiky vandy fo izin̈y. Karaha zen̈y koa, maro olo mankaratsy Baiboly io, ke manjary maro olo tsy mino raha koran̈inizio. Fa iro izikoa fa nandiniky raha koran̈inizio tao, iro nanjary niova hevitry.

Maro aminolo nahita fianaran̈a, tsy mino Baiboly aby. Matetiky baka misy olo mikoran̈a raha vandy na diso momba izio, ke zen̈y mahavy iro manjary mieritreritry fa tsy marin̈y, na mifanohitry amy siansy na diso raha an̈atinizio ao. Fa mba marin̈y edy zen̈y?

Hitanao baka tamy raha nivakinao tamy bokikely ty tato fa tsy mifanohitry amy siansy aby raha koran̈iny Baiboly. Maro olo nahita ndreky nahatsapa raha zen̈y. Gaga iro izikoa fa nahita fa kaiky fa tsy mifan̈araka amizio ao raha ampianariny fivavahan̈a sasany. Misy olo mivolan̈a fa tan̈atiny tsiota andra misy 24 lera aby namoron̈any Zan̈ahary raha jiaby, kanefa raha zen̈y diso. Raha koran̈iny Baiboly tsy mifanohitry amy fikarohan̈a hitandro siantifiky aby io. *

Karakory fo ma namoron̈any Zan̈ahary raha manampahin̈ana? Baiboly tsy mikoran̈a raha maro momba zen̈y, baka olo afaka mikaroko. Koran̈iny ao ndraiky fa Zan̈ahary namoron̈o raha manampahin̈ana jiaby, ke izio nataony “isankarazany.” (Genesisy 1:11, 21, 24) Raha zen̈y mety tsy hifan̈araka amy raha iritriretindro siantifiky aby io. Kanefa izio mifan̈araka amy vokatrany fikarohan̈a nataondro. Hitantsika baka amy zen̈y fa ndray iô raha mety iritriretindro siantifiky aby io, porofo fo ten̈a mikonty.

Kanefa maro olo tsy tia mandalin̈y Baiboly, fotony iro diso fan̈antinan̈a amy fivavahan̈a. Hitandro iro io mampirisiky olo hihatsaravelatsihy, han̈ano aferafera, avio mampirisiky olo hiady. Ke mba mety edy izikoa baka amy raha karaha zen̈y hitsaran̈a Baiboly io? Maro siantifiky nangaroaro nahita raha ataonolo sasany mampijaly olo tsy mitovy karazan̈a amindro, ke fampianaran̈any evolision io indesindro mankamarin̈y raha ataondro io. Ke mba mety edy izikoa baka amy raha karaha zen̈y hitsaran̈a fampianaran̈a momba evolision io? Azo antoko fa ny ten̈a tsara, mandalin̈y momba fampianaran̈a io, baka io mitady porofo mankamarin̈y zen̈y, sa karakory?

Ke zahay mandrisiky anao handiniky Baiboly koa. Mety ho gaga anao mahita fa raha ampianarinizio ao tsy mitovy amy raha ampianariny fivavahan̈a aby io foeky. Baiboly tsy mampirisiky olo hiady. Koran̈iny ao fa panompony Zan̈ahary zen̈y tsy tokony hifankalain̈y fotony zen̈y mampiady. (Isaia 2:2-4; Matio 5:43, 44; 26:52) Tsy mety izikoa man̈ekin̈ekyzay raha volan̈iny fivavahan̈a fo, ndreky mino raha tsisy porofo. Baiboly mampianatra fa porofo io raha ten̈a ilain̈y baka hanan̈ana finoan̈a, baka io ilain̈y mampiasa fahaizan̈a misain̈y izikoa fa manompo Zan̈ahary. (Romanina 12:1; Hebreo 11:1) Baiboly koa mandrisiky atsika hitady valiny fan̈ontanian̈a maro manahiran̈a sain̈inolo letrizay.

Anao ma efa nieritreritry karaha ty: ‘Izikoa misy marin̈y Zan̈ahary zen̈y, nan̈ino mbala misy fo raha ratsy?’ Baiboly mamaly fan̈ontanian̈a zen̈y ndreky fan̈ontanian̈a maro koa. * Zahay mandrisiky anao hazoto fo hitady ny marin̈y, fotony izio mahafapo sady mahavarian̈a avio misy porofo. Sady raha zen̈y tsy sendrasendra.

^ Anao koa mila fan̈azavan̈a fan̈ampiny, zahava bokikely naboakany Vavolombelon̈o Jehovah ty: Nisy Namorona ve Izao Rehetra Izao?

^ Zahava leson 26 amy boky Mankafiza Fiain̈ana Tsisy Farany!, naboakany Vavolombelon̈o Jehovah.