1, 2. Ino raha inoan’olo mikasiky olo aifa naty?

AFIRIKANIGNY an-tapitrisany mino fa fahafataisagna tsy faran’ny fiaignana, fa fifindragna amy fiaignana hafa. Maro amin-drô olobe taloha tagny mieritreritry fa irô olo jiaby naty igny lôso amy tany tsy takatra maso agny, nanjary fagnahy.

² Mino olo fa magnampy ndraiky mitahy ry havany mbala velogno irô razambe na fagnahin’ny razagna aby io. Dikan’izegny, fagnahin’ny razagna mahaifa mampavagnono raha atsabo, magnamia hariagna, boaka iô misakagna haratsiagna tsy hoavy. Mamparary na mampanjary masikiny zegny koa irô io, izikoa tsy jiriagna na tsy araihagna volagna.

3. Karakôry anompoan’ny sasany razagna?

³ Magnano faombafaomba maro ny velogno hagnamaizagna voninahitry razagna ndraiky hampatsara fihavanagna amin-drô. Hita raha zegny laira miambim-paty, miasa haragna ndraiky magnaokatra. Misy koa faomba hafa anompoagna razagna: magnidigny amy tany hely antsendriky amiagna razagna izikoa higiaka toaka. Karaha zegny koa laira mahamasaka loky, ataokagna antsendriky anjaran’ny razagna, beky irô mahita hanigny izikoa avy.

4. Ino raha inoan’olo maro mikasiky fagnahy?

⁴ Sasany mino fa olo managna fagnahy tsy mety maty mbala velogno afaran’ny fahafataisagna. Kay izikoa olo igny nagnano raha tsara tamin’izy mbala velogno, mandaiha an-dagnitry na amy paradisa zegny fagnahinany, fa izikoa ndraiky nagnano ratsy, mandaiha amy môtrobe. Matetiky aharon’olo irô hevitry aby io amy finoagnan-drazagna. Aohatra, hita agnaty gazety, amy filazagna manjo, volagna karaha ty: “lasa any ankoatra” na “nantsoin’ny Ray nody aminy.” Raha jiaby inoagna io boaka amy fihivairagna fa ndray maty vatagna, fagnahy tsy maty. Ino raha volagnin’ny Baiboly mikasiky izio?

5. Izikoa Baiboly zahagna, ino ma fagnahy zegny?

⁵ Izikoa dinihigny tsarabe volagna hebreo ndraiky griky nandikagna Baiboly tamy voanalohany tagny, maro dikan’ny “fagnahy” zegny. Izio ivolagnana raha tsy hita maso, mazava ho azy fa angôvo ampiasaigny, karaha ataon’ny 1) tsiko; 2) angôvo mamelogno olo ndraiky biby; 3) angôvo mampivolagna ndraiky ahifagna magnano raha; 4) anjely, ndraiky 5) angôvo ampiasain’ny Zagnahary, na fagnahy masigny. Sasantsasany amy dikan’ny “fagnahy” amy Baiboly fo jiaby zegny.

6. Ino ma fagnahy amin’olombelogno zegny?

 ⁶ Dikan’izegny, izikoa Baiboly mikoragna mikasiky fagnahy amin’olombelogno, matetiky raha tiany volagniny, angôvo ahavitagna magnano tabà jiaby amy fiaignana. Fagnahy, na angôvo mamelogno io miramiragna amin’asan’ny koran fo. Koran mahavita mampandaifa radiô na vantilataira, kanaifa izikoa izy zaraiky fo tsy mahavita mivolagna na magnamia tsitsiko. Fagnahy koa karaha zegny. Izio mahavy atsika mahita, maharegny ndraiky mieritreritry. Kanaifa, tsy nahavita zegny izy izikoa tsy tiô maso, sofigny ndraiky betro.

7. Ino raha miboaka izikoa fa tsy miasa amy vatagna eky fagnahy?

⁷ Dikan’izegny, olo tsiaraikiaraiky samy managna fagnahy, na angôvo mamelogno izy. Atsika miaigny igny mitana angôvo mamelogno io tsy ho rôso. Zegny antony ivolagnan’ny Baiboly karaha ty: “Maty vatagna izikoa tsisy fagnahy.”—Jakoba 2:26.

8. Ino iafaran’ny hevitrin’olo araiky izikoa tsy miasa fagnahy?

⁸ Magnazava Baiboly fa izikoa olo araiky maty, tsy vatagna zaraiky fo maty. Amy tapany voanalohany amy Salamo 146:4 atsika mamaky fa izikoa “fagnahin’olo araiky miala”, dikan’izegny mitsahatra tsy miasa fahignana, “mimpody faotaka izy.” Zahava amy zay baka tohiny: “Amin’andra zegny edy foagna raha tiany hatao.”

9. Tsy mahavita magnano ino fagnahy?

⁹ Karaha ty zegny raha tian’ny Baiboly volagniny: fagnahy tsy manohy miaigny agnabo tsy takatra maso agny izikoa olo araiky maty. Dikan’izegny, izio tsy mahavita mitahy na mampavozo na magnano ratsy atsika.

10. Ino raha volagnin’ny Baiboly mikasiky olo maty?

¹⁰ Karakôry basy olo araiky koa maty? Jehovah mahay raha jiaby mikasiky atsika, fôtony izy namôrogno atsika. Volagniny fa olo ka maty tsy miaigny, tsy maharegny, tsy mahita, tsy mivolagna na mieritreritry eky. Baiboly mivolagna:

• “Olo maty tsisy raha hainy eky.”—Mpitoriteny 9:5.

• “Samy aifa foagna aby ndray fitiavagnanany, ndray raha halany, ndray fialognananany.”—Mpitoriteny 9:6.

• “Tsisy asa, ndray hevitry, ndray fahaizagna, ndray fisaignana, amy [fasagna] ingoanao agny.”—Mpitoriteny 9:10.

11. Izikoa fa tsy nagnaraka volagna Adama, ino nivolagnin’i Jehovah taminany?

¹¹ Miniminia raha ambaran’ny Baiboly mikasiky Adama, olobetsika taloha. “Faotaka nagnamboaran’i Jehovah” i Adama. (Genesisy 2:7) Adama koa nagnaraka volagna Jehovah, velogno sady sambatra tsisy farany. Kanaifa izy tsy nagnaraka volagna Jehovah, kaila fahafataisagna sazinany. Lôso aia Adama laira naty? Nivolagnin’i Jehovah taminany: “Himpody amy tany anao, fôtony tany nagnamboaragna anao. Faotaka anao, aviô himpody faotaka ndraiky.”—Genesisy 3:19.

12. Nagnano akôry Adama izikoa fa naty?

¹² Taia Adama talohan’izy namboarin’i Jehovah boaka tamy faotaka? Tsendriky nisy izy. Kay izikoa Jehovah nivolagna tamin’Adama ‘himpody faotaka anao’, dikan’izegny, hanjary tsisy fahignana karaha faotaka koa izy. Fiaignanan’i Adama tsy nitohy an-tany tsy takatra maso agny. Tsy nandaiha ankoatra, tany misy fagnahin’ny razagna, zegny izy. Izy sady tsy an-dagnitry, tsy amy môtrobe. Nimpody tsisy fahignana karaha taloha fo izy; tsy nisy eky.

13. Ino mampamiragna olo ndraiky biby izikoa fa maty?

¹³ Karaha zegny fo koa ma olo jiaby naty igny? Ia. Baiboly magnazava karaha ty: “[Olo ndraiky biby] tany araiky ingoagna: boaka tamy faotaka irô jiaby, boaka iô himpody amy faotaka ndraiky.”—Mpitoriteny 3:19, 20.

14. Ino raha mbala antinaigny amin’olo maty aby igny?

 ¹⁴ Baiboly mampagnantaigna fa, laira tany ty paradisa, Zagnahary hamelogno ndraiky olo maty. (Jaona 5:18, 29; Asan’ny Apostoly 24:15) Tsendriky iziôty raha zegny, fa raha mbala hoavy. Kay irô iziô mbala matôro am-pasagna ao fo antsendriky. (Jaona 11:11-14) Atsika tsy tôkony havozo na hivavaka amin-drô, fôtony irô tsy afaka magnampy atsika sady tsy afaka magnano ratsy atsika.

15, 16. Ino raha ataon’i Satana beky olo mino fa tsy taigna maty olo?

¹⁵ Vandy boaka amy Satana fo fivolagnana fa atsika tsy taigna maty zegny. Izy ndraiky irô demony aby io magnano raha inoan’olo fa irô razagnatsika aby io fo mahavy atsika marary na sahiragna. Misy ra-manahiragna boaka amy demony. Kanaifa, tsy kila raha ra-manahiragna jiaby zay boaka amin-drô aby. Fa tsy marigny ndraiky fivolagnana fa boaka amin’olo maty fo mampijaly atsika.

¹⁶ Mbala misy faomba hafa koa ampinoan-drô demony aby io atsika fa vandy areriky volagna Baiboly maomba olo maty. Arisikin-drô olo hino fa olo aifa maty aby igny fo niboaka na nikoragna tamin-drô. Mety mampahita raha irô demony aby io, mampagninôfy, mampisy tromba olo, na raha hafa koa. Kay izikoa olo araiky mikoragna amin-drô igny, tsy olo naty igny mamaly izy fa demony mihaboko olo aifa maty agny. Zegny avian’i Jehovah tsy mandefitry foeky amin-drô mpisikidy ndraiky olo misy raha mipaitraka.—Deoteronomia 18:10-12; Zakaria 10:2.