1. Ino raha tsy maintsy ataotsika beky Zagnahary ravoravo?

ATSIKA tsy maintsy miala amy fivavahagna diso, tsy hiharoharo aminany foeky, izikoa ti ho tsara fihavagnana amy Zagnahary. Boaka iô, atsika tsy maintsy magnaraka fivavahagna marigny. Aifa mandaiha an-tapitrisany olo magnano zegny iziôty.

2. Aia aby tany misy Vavolombelogn’i Jehovah, ino asa ataon-drô?

² Baiboly aifa nagnambara fa ho “olo maro tsy voaisa”, boaka amy “firenena, fokom-pirenena ndraiky firazagnana aviô samy hafa fivolagnana”, mpivavaka marigny. (Apokalypsy 7:9) Vavolombelogn’i Jehovah an-tapitrisany iziô io miasa mare amy tany 235, magnampy olo hahay lalàgnan’i Jehovah ndraiky raha takiny amitsika.

3. Azôvy ivavahan’ny Vavolombelogno, boaka iô fanompoagna karakôry tsy ataon-drô?

³ Vavolombelogno magneky fa Jehovah zaraiky fo magnaiva ivavahagna. Irô tsy mety mankôhoko amy sampy na sary masigny. (1 Jaona 5:21) Irô tsy magnamia voninahitry olo maty, kay dikan’izegny, irô tsy magnaraka faombafaomba amy fiambaisam-paty na faomba hafa boaka amy fivavahagna diso ndraiky “fampianaragnan’ny demony.” (1 Timoty 4:1) Ndray izy magnano zegny, irô mankahery olo managna havagna naty, kaila azavain-drô fa mbala himpody vilômin’ny Zagnahary irô igny amy paradisa.—Jaona 5:28, 29; Asan’ny Apostoly 24:15.

4. Mpanompon’ny Zagnahary ma magnano aody, sa karakôry?

⁴ Vavolombelogno tsy magnano mazi, mamosavy na magnano aody, fôtony hain-drô fa boaka amy Devoly raha jiaby zegny. Irô tsy mitavandra aody fiambigny aigny, Jehovah zaraiky fo atokisan-drô.—Ohabolana 18:10.

5. Amy faomba karakôry aby Vavolombelogno “tsy dia araiky amy tontolo ty”?

⁵ Nambaran’i Jesosy fa mpianatranany “tsy dia araiky amy tontolo ty.” (Jaona 17:16) Jesosy tsy nety nagnano pôlitiky. (Jaona 6:15) Vavolombelogno koa tsy magnano pôlitiky, tsy manompo tanindrazagna, sady tsy magnavakavaka karaha fataon’olo tsy manompo Jehovah. Irô ndraiky magnaifa latety, sady magnaraka lalàgnan’ny tany misy irô.—Jaona 15:19; Romanina 13:1, 7.

6. Ino aby volagna Zagnahary araihan’ny mpanomponany mikasiky vadiagna ndraiky fisarahagna?

⁶ Vita saoratra amy fanjakagna vadiagnan-drô, fôtony magnaja lalàgnan’ny fanjakagna irô. (Titosy 3:1) Irô magnaraka volagna Jehovah, kaila tsy mampirafy. (1 Timoty 3:2) Mahalagna mpanompon’ny Zagnahary misaraka, fôtony irô magnaraka fitsipiky Baiboly.

7. Akôry ahitagna fa Vavolombelogno mifankatia ankitigny?

⁷ Vavolombelogno mifankatia. Fifankatiavagna ndraiky fitiavagna Zagnahary mampitambatra irô, ndray irô samy hafa tany fiaviagna ndraiky firazagnana. Izikoa fa misy amin-drô voa raha na sahiragna, malaky amin-drô mifagnampy. Hita amy fiaignanan-drô isan’andra fa irô tia olo.—Jaona 13:35.

8. Ino aby raha ratsy tsy ataon’olon’ny Zagnahary?

⁸ Olon’i Jehovah mifegny mare magnano ny marigny amy fiaignanan-drô jiaby. Irô tsy mangalatra, tsy mavandy, tsy maloto fitondrain-taigna, tsy mamolava, tsy magnano risoriso. Lelahy Vavolombelogno tsy kafiry amy vadiny. Tamin’irô tsendriky Vavolombelogno ndraiky, sasany tamin-drô io mety nagnano raha jiaby zegny, kanaifa Jehovah nagnampy irô hiaova. Fahitan’ny Zagnahary irô io “aifa voasasa madio tsara.”—1 Korintianina 6:9-11.

9. Ino raha nivolagnin’ny boky araiky mikasiky fivavahagna an’Afiriky?

⁹ Ankamaraozan’ny fivavahagna samy  mivolagna ninany marigny aby. Irô mety hitantara asa marobe vitan-drô ankamarignana zegny. Aohatra, boky araiky mikasiky fivavahagna an’Afiriky nivolagna karaha ty: “Irô [fivavahagna kristianigny vaovao] aby io kony mangala plasin’ny mpisikidy ndraiky mpamosavy ankitigny. ... Mivolagna irô fa mahavita maminagny ndraiky magnano fahagagagna. Misy mpaminagny amin-drô io, magnazava amin’olo dikan’ny raha niboaka taminany ndraiky dikan’ny nôfin’olo. Irô mampiasa rano voa hasigny, mainaka masigny, jôfo ndraiky labozy boaka iô emboko magnitry hitahagna olo na hiarivagna aretigny.”

10, 11. Nino ivolagnana fa tsy boaka amy Zagnahary fivavahagna magnano mahavita fahagagagna aby io?

¹⁰ Irô mpivavaka amy fivavahagna aby io mivolagna fa iken’ny Zagnahary fivavahagnan-drô matoa misy fahagagagna. Kanaifa raha volagnin-drô fa fahagagagna ataon-drô io tsy mivolagna fa iken’ny Zagnahary fivavahagnan-drô. Boaka amy Satana fo angôvo hagnanaovan-drô “asa mahery.” (2 Tesalonianina 2:9) Aifa nambaran’ny Baiboly koa fa ho “levogno” fagnamaizam-pahasoavagna boaka amy Zagnahary, karaha ataony faminaniagna, fivolagnana amy volagna maro samy hafa, boaka iô fahaizan-draha manaokana.—1 Korintianina 13:8.

¹¹ Jesosy nampitandrigny karaha ty: “Tsy zaigny olo mivolagna aminakahy: ‘Tômpoko anao, Tômpoko anao’, hiditry amy fanjakagnan’ny lagnitry, fa lagniany olo magnano sitrapôn’ny Babako an-dagnitry agny. Amin’andra io maro olo hivolagna aminakahy: ‘A Tômpoko anao, a Tômpoko anao, zahay karaha aifa naminagny, nagnaboaka demony, boaka iô nagnano asa mahagaga maro tamin’agnaranao?’ Karaha ty edy raha ambarako irô amy lairan’izegny: Anarô tsy haiko foeky; mialà agny anarô, tsy mpagnaraka lalàgna.”—Matio 7:21-23.

12. Azôvy hiditry amy Fanjakagnan’ny lagnitry?

¹² Azôvy fo basy hiditry amy fanjakagnan’ny lagnitry? Zaigny magnano sitrapôn’i Jehovah fo.

13. Ino asa nirahin’ny Zagnahary ataon’olonany? Azôvy magnano izio amy ziôty?

¹³ Ino raha tian’ny Zagnahary ataon’olonany amin’andra iziô? Jesosy nivolagna: “Hambara amy tany jiaby misy olo vaovao tsara mikasiky fanjakagna ty beky firenena jiaby ambony tany maharegny.” (Matio 24:14) Vavolombelogn’i Jehovah mazoto magnano asa io.

14. Ino Fanjakagnan’ny Zagnahary, boaka iô azôvy mpitaondra amy zio?

¹⁴ “Amy tany jiaby misy olo” agnambaran’ny Vavolombelogn’i Jehovah Fanjakagnan’ny Zagnahary. An-dagnitry agny fanjakana io, fa hitaondra tany jiaby ty amy fahamarignana. Irô mampianatra olo fa Kristy Jesosy nifidin’i Jehovah hitaondra amy zio, boaka iô misy koa olo, 144 000, hiaraka hitaondra aminany.—Daniela 7:14, 18; Apokalypsy 14:1, 4.

15. Ino raha hiravagnin’ny Fanjakagnan’ny Zagnahary?

¹⁵ Vavolombelogno mampiasa Baiboly agnaboahagna fa Fanjakagnan’ny Zagnahary io hanôrotôro Satana ndraiky raha jiaby mikasiky izy. Tsy ho hisy eky fivavahagna diso ndraiky fampianaragna diso mangala baraka Zagnahary, kanaifa magnamia voninahitry Devoly! (Apokalypsy 18:8) Karaha zegny koa fanjakagnan’olombelogno!—Daniela 2:44.

16. Azôvy hanjary olon’i Kristy Jesosy, boaka iô hipaitraka aia irô?

¹⁶ Ataon’ny Vavolombelogn’i Jehovah hain’olo koa fa teteky iô, Kristy Jesosy hagnamia hatsaragna ankitigny zaigny olo magnano raha takin’ny Zagnahary. Irô io hanjary olon’ny Fanjakagnanany ambony tany eto. Baiboly mampagnantaigna: “Izy hamonjy masikiny mitaraigny ndraiky mijaly tsisy mpamonjy; hahinakinaka olo rairaka ndraiky malahelo izy, sady hamonjy irô malahelo.”—Salamo 72:12, 13.

17. Azôvy zaraiky fo magnambara amin’olo Fanjakagnan’ny Zagnahary?

¹⁷ Tsisy antokon’olo hafa eky magnano sitrapôn’ny Zagnahary, mitory Fanjakagnan’i Jehovah zegny. Amy tany jiaby, Vavolombelogn’i Jehovah zaraiky fo magnano raha ahaizan’olo Fanjakagnan’ny Zagnahary.