1. Hagnano karakôry Zagnahary izikoa atsika ‘magnatogno izy’?

TIAN’I Jehovah zay olo manompo izy. Anao hahazo rady aminany rango iziôty ndraiky amin’afara agny izikoa mivavaka aminany. Baiboly nivolagna karaha ty: “Magnataogna Zagnahary, beky izy hagnatogno anao.”—Jakoba 4:8.

2. Amy faomba karakôry mety hagnataognatsika Zagnahary? Tôkony karakôry vavakatsika?

² Izikoa tianao hagnatogno Zagnahary, anao tsy maintsy mianatra ndraiky magnaraka raha Volagniny agnaty Baiboly ao. Anao koa mangataka raha mifagnaraka amy sitrapôny, tandrignaisany vavakanao sady hahazo valiny. Apostoly Jaona nivolagna karaha ty: “Ty fatokisagna anagnatsika mikasiky Zagnahary: Atsika koa mangataka raha mifagnaraka amy sitrapôny, izy mitandregny atsika. Izikoa haitsika fa izy mitandregny atsika, na ino na ino raha angatahatsika, haitsika fa hahazo atsika.”—1 Jaona 5:14, 15.

3-7. Akôry faomba azahoagna fahaizagna boaka amy Zagnahary, aviô akôry agnampian’izio atsika?

³ Fagnampin’izegny koa, Zagnahary hagnamia anao fahaizagna ilainao amy velon-taignanao isan’andra. Baiboly mivolagna karaha ty: “Izikoa misy aminarô tsendriky mahay magnavaka ny tsara ndraiky ratsy, izy tôkony tsy hitsahatra mangataka fahaizagna amy Zagnahary.”—Jakoba 1:5.

⁴ Akôry agnampian’ny fahaizagna boaka amy Zagnahary io anao? Voanalohany, izio indesinao magnavaka raha tsy tian’i Jehovah ndraiky dikany tsy itiavany izy. Amy zegny hainao faomba iarivagna raha ratsy. Fahaizagna boaka amy Zagnahary koa miaro anao tsy ho voa raha mahazo olo maro iziôty. Aohatra, izikoa anao managna fitondrain-taigna madio, tsy hanagnanaka tsy nirigny, tsy ho voan’ny aretigny boaka amy firaisagna, vadiagnanao ho sambatra sady haharitry.

⁵ Ino koa mety ho azonao izikoa anao managna fahaizagna boaka amy Zagnahary? Izio hagnampy anao hahay hanapa-kevitry amy fiaignana andavanandra, aohatra fahaizagna mitantagna vaola. Fahaizagna boaka amy Zagnahary koa hagnampy anao hanagna tanjogno tsara ndraiky tsy hagneky raha mety handrobaka fiaignananao.

⁶ Fahaizagna boaka amy Zagnahary io hagnampy anao hahay hiavagna amin’olo. Taokantragnonao ho tsaratsaran’ny tiô. Anao hahazo kamarady taigna tsy mahafoe anao, boaka iô anao hajain’olo, nata olo tsy manompo Zagnahary.

⁷ Fahaizagna boaka amy Zagnahary io hagnampy anao hahay dikan’ny fiaignana. Hagnampy anao laira misy ra-manahiragna ndraiky laira anao kaitraka izio. Hanjary agnantaigna raha tsara anao amin’amaray, kaila zegny hampasalama saigny ndraiky vatagna anao.—Ohabolana 14:30; Isaia 48:17.

8. Ino aby raha tsy avozoanao izikoa anao manompo Zagnahary?

⁸ Anao hanjary tsy havozo raha avozoan’olo tsy manompo Zagnahary, izikoa  manompo izy. Tsy havozo olo maty eky anao fôtony hainao fa olo maty tsisy raha hainy. Anao koa tsy mavozo maty, fôtony atokisanao volagna Zagnahary hamelogno olo maty. Anao tsy havozo mpagnano aody ndraiky mpamosavy eky, fôtony hainao tsarabe fa tsisy olo mahadigny angôvon’ny Zagnahary.—Jaona 8:32.

9-11. Azôvy hipaitraka amy Paradisa, azôvy ndraiky tsy hipaitraka ao?

⁹ Anao tsy avozo raha mbala hoavy izikoa magnatogno Zagnahary. Aifa hitatsika fa Baiboly aifa nagnambara ankamaraozan’ny ra-manahiragna hitatsika amin’andra iziôty. Jehovah mivolagna fa raha mandalo fo izio. Teteky iô, Fanjakagnan’ny Zagnahary hagnaova tany ty paradisa.—Lioka 21:10, 11, 31; 23:43.

¹⁰ Zay olo magnatogno Jehovah ndraiky manompo izy fo hipaitraka amy Paradisa. Baiboly mivolagna karaha ty: “Teteky iô, olo ratsy fagnahy tsisy eky; anao handiniky tany nipitrahany fa tsy hitanao eky. Fa olo tsara fagnahy handova tany, ho ravoravo amy fiadagnana.”—Salamo 37:10, 11.

¹¹ Tsy hahazo fiaignana tsisy farany olo tsy miraharaha lalàgna marignin’ny Zagnahary. (2 Tesalonianina 1:8, 9) Tsy hisy eky irô. Hofoaty miaraka amy Satana ndraiky demony aby io irô. (Apokalypsy 20:10, 14) Zay olo mianatra mikasiky Zagnahary ndraiky manompo izy fo hiravoravo amy Paradisa ambony tany eto.

12. Ino volagna Baiboly mikasiky ny amaray agny?

¹² Aifa nataon’i Jehovah pare raha tsara jiaby nin’olo tia izy! Zahava hely Volagnanany mikasiky fiaignana amy Paradisa ambony tany:

• Hanigny traika: “Hamoa vary be [na raha hafa mety ahanigny] tany, zisk’agnabon’ny bongo.”—Salamo 72:16.

• Tragno tsara: “Olo hagnamboatra tragno, boaka iô izy tômpiny fo hipaitraka ao.”—Isaia 65:21.

• Asa maharavoravo: “Olo finidiko hagnaram-pô amin’asan’ny tagnany. Irô tsy hiasa bôriny eky .”—Isaia 65:22, 23.

• Aretigny tsisy: “Tsisy amin’olo mipaitraka ao hivolagna: Zaho zegny marary.”—Isaia 33:24.

• Karazagn’antsa tsisy: “Olo gila manjary mahita, olo maregniny haharegny. Olo mitsokilaka hagnaniky, boaka iô olo moa hihira mare.”—Isaia 35:5, 6.

• Teoteoko, alahelo, fahafataisagna tsisy: “Ifaorany [Zagnahary] ranomaso jiaby amy mason-drô, boaka iô tsisy eky fahafataisagna, salakady tsisy eky alahelo ndray taraigny, ndray teoteoko, fa aifa kabaro taloha zegny.”—Apokalypsy 21:4.

• Lagaira tsisy: “Izy [Zagnahary] mampijanogno lagaira amy tany jiaby .”—Salamo 46:9.

• Fiaignana tsisy farany: “Olo marigny handova tany kay hipaitraka iô fo.”—Salamo 37:29.

13. Azôvy zaraiky fo mahavita magnano tany ty paradisa, boaka iô ino antony?

¹³ Tsisy olombelogno hahavita zegny. Jehovah fo mahavita izegny, fôtony Izy zaraiky fo managna angôvo hagnatantirahagna raha volagniny. Tsisy raha mahasakagna izy tsy hagnano raha tiany hatao. Karaha ty volagna Baiboly: “Zay raha volagnin’ny Zagnahary, tsisy tsy tantairaka.”—Lioka 1:37.

14. Akôry ahitanao lalagna mengo amy fiaignana tsisy farany?

¹⁴ Jehovah mampiasa Vavolombelognonany beky olo hiditry amy varavaragna maletry, boaka iô handaiha amy lalagna mengo amy fiaignana tsisy farany. Irariagna anao ho agnisan’olo sambatra magneky kaiky io. Irariagna anao hagnaraka fivavahagna marigny, kay hahazo fitahiagna tsisy farany boaka amy Jehovah!—Matio 7:13, 14.