LESON 22
Akory Hataonao Izikoa Tihitory Vaovao Tsara?
Izikoa fa mahaimaro raha hainao amy Baiboly, anao mety mieritreritry: ‘Olo jiaby tokony mahay raha ty e!’ Ten̈a marin̈y zen̈y! Kanefa mety hampiasaloha anao karakory hikoran̈anao aminolo raha nianaranao. Hidinihintsika raha mety han̈ampy anao, baka anao ho ravoravo hanomboko hikoran̈a aminolo vaovao tsara baka amy Baiboly.
1. Akory hahavitanao hikoran̈a aminolo hainao raha nianaranao tamy Baiboly?
Pianatrany Jesosy nivolan̈a: “Zahay tsy mety ho voly hivolan̈a raha efa hitanay ndreky ren̈inay.” (Asan’ny Apostoly 4:20) Ten̈a tiandro raha nianarandro baka tamy Jesosy, ke mba tiandro koran̈iny aminolo jiaby koa izio. Asa mba karaha zen̈y koa anao? Izikoa zen̈y, mitadiava fomba hikoran̈anao ampan̈ajan̈a raha nianaranao io amy fianakavian̈anao ndreky amy kamaradinao.—Vakia Kolosianina 4:6.
Fomba mety anombohan̈a izy
-
Anao koa mikoran̈a aminy havanao, karaha ty ampidiranao koran̈a momba Baiboly: “Nisy raha tsara nianarako taminy herin̈iandra ty.”
-
Ikoràn̈a raha mankahery baka amy Baiboly kamaradinao marary na miasaloha.
-
Ikoràn̈a raha hitanao tamy fianaran̈a Baiboly na tamy fivorian̈a olo miaraka miasa aminao, iro koa man̈ontany raha nataonao tamy farany herin̈iandra.
-
Aboaha kamaradinao tranonkala jw.org.
-
Kahia hianatra Baiboly miaraka aminao iro, na aboaha iro karakory atao mameno fangatahan̈a hianatra Baiboly amy jw.org ao.
2. Nan̈ino tokony hataonao tanjon̈o mitory miaraka amy fiangonan̈a?
Tsy iro olo haindro pianatrany Jesosy aby io fo nikoran̈andro vaovao tsara, fa olo hafa koa. Jesosy “nan̈iraka iro tsiaroeroe handeha alohanany tamy tanàna” hitoriandro. (Lioka 10:1) Fan̈anovan̈a fitorian̈a milamin̈y io ten̈a nan̈ampy olo maro haharen̈y vaovao tsara. Ravoravo mare koa pianatrany Jesosy izikoa fa niaraka nandeha nitory. (Lioka 10:17) Tsy mba tianao han̈ano tanjon̈o hitory miaraka amy fiangonan̈a?
ALEVA ONON̈O
Aleva onon̈o akory hataonao baka tsy hiasaloha loatra amy fomba hikoran̈ana aminolo vaovao tsara io. Zahava koa fa ho ravoravo anao izikoa mitory aminolo.
3. Jehovah tsy hiala anao
Misy olo sasany efa tihitory fa mavozo tsao tsy mahay mikoran̈a, avio tsao hankadalainolo na ho halanolo.
-
Anao ma miasaloha koa tsao tsy hahavita hikoran̈a aminolo raha nianaranao? Nan̈ino?
Alifasa VIDEO io, avio iaraha dinihin̈y fan̈ontanian̈a ambany io.
-
Akory nataondro tanora aby in̈y baka iro tsy navozo nitory?
Vakia Isaia 41:10, avio iaraha dinihin̈y fan̈ontanian̈a ty:
-
Izikoa anao mavozo hitory, nan̈ino anao mila mivavaka?
Asa mba hainao?
Maro Vavolombelon̈o Jehovah taloha nieritreritry fa iro tsy hahavita hitory vaovao tsara io. An̈isanizen̈y Sergey. Izy tsy natoky ten̈a, avio sarotro taminany hikoran̈a aminolo. Fa izikoa fa nandeha fianarany Baiboly, izy nivolan̈a: “Tamy voanalohany zaho navozo, fa zaho nifen̈y fo nikoran̈a taminolo raha nianarako. Tsy nampoiziko aby fa nanjary natoky ten̈a zaho koa fa nan̈ano zen̈y. Arakaraka nikoran̈ako taminolo raha nianarako, hitako nahaifatatra fo finoan̈anaka.”
4. Mikoràn̈a ampan̈ajan̈a
Anao koa fa hikoran̈a aminolo vaovao tsara io, tsy raha volan̈inao fo mila dinihinao fa fomba hikoran̈anao izio koa. Vakia 2 Timoty 2:24 ndreky 1 Petera 3:15, avio iaraha dinihin̈y fan̈ontanian̈a aby ty:
-
Akory han̈arehanao raha koran̈iny andininy aby io, izikoa anao fa mikoran̈a aminolo raha momba Baiboly?
-
Havanao sasany ndreky kamaradinao sasany mety tsy ho tia anao. Ke ino raha tokony hataonao? Ino fo raha tsy tokony hataonao?
-
Nan̈ino ma tsara anao koa tsy miforse izy, fa anao man̈apetraka fan̈ontanian̈a avoadiniky tsarabe aminany?
5. Mamparavoravo fitorian̈a vaovao tsara io
Jehovah nan̈iraka Jesosy hitory vaovao tsara. Akory ma fahitany Jesosy asa io? Vakia Jaona 4:34, avio iaraha dinihin̈y fan̈ontanian̈a aby ty:
-
Atsika koa mahazo hanin̈y tsara, atsika mahazo angovo ndreky ravoravo. Nan̈ino ma fan̈anovan̈a sitrapony Zan̈ahary, an̈isanizen̈y fitorian̈a, nampitovisiny Jesosy tamy fihinanan̈a hanin̈y?
-
Fahitanao izy, mety karakory haravoan̈a azonolo mitory vaovao tsara io?
Sosokevitry
-
Amy fivorian̈a andavanandra, aleva onon̈o akory atao mitariky koran̈a aminolo.
-
Volàn̈a aminolo mampianatra Baiboly anao karakory hatao izikoa anao tihan̈ano anjara amy fivorian̈a io. Tsy havozo hikoran̈a aminolo raha nianaranao anao, izikoa man̈ano anjarany pianatra amy fivorian̈a an̈y.
-
Ampiasà “Misy Olo Mivolan̈a” na “Izikoa Misy Olo Man̈ontany Anao” baka hainao karakory atao mamaly raha matetiky an̈ontanianolo ndreky raha mety ifamaranolo.
IZIKOA MISY OLO MAN̈ONTANY ANAO: “Ino vaovao?”
-
Akory mety han̈araraotanao zen̈y hikoran̈ana amindro raha ianaranao amy Baiboly?
INO RAHA NIANARANAO TATO?
Mitory vaovao tsara io mamparavoravo, avio tsy sarotro karaha niritriretanao izy aby.
Fan̈ontanian̈a Fameren̈ana
-
Nan̈ino ma atsika mila mitory vaovao tsara aminolo?
-
Akory mety han̈anovanao izio ampan̈ajan̈a?
-
Izikoa anao miasaloha tsao tsy hahavita hitory, ino raha mety hataonao?
ZAHAVA
Diniha fomba tsotra efatra mety han̈apitrahan̈a karty jw.org lera mitory vaovao tsara.
Diniha iro raha efatra han̈ampy anao hitory vaovao tsara.
“Von̈ono Hanjary Pan̈arato Olo ma Anao?” (Tilikambo Fiambesan̈a Septambra 2020)
Zahava tantaranolo amy Baiboly ao mety man̈ampy olo hasaky hitory vaovao tsara, nata izy mbala tsaiky.
Zahava akory mety hataonao, izikoa tihikoran̈a momba Baiboly aminy havanao mbala tsy mahay Jehovah.
“Mahaiza Manohin̈y Fony Havanao” (Tilikambo Fiambesan̈a 15 Marsy 2014)
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
