LESON 38
Ankasitraha Fahin̈ana Namezany Zan̈ahary Anao
Maro raha mamparavoravo amy fiain̈ana. Ndray atsika an̈atiny problemo, tsy maintsy mbala misy raha fo mamparavoravo atsika. Ke akory han̈aboahantsika amy Zan̈ahary fa atsika mankasitraka fahin̈ana namiany io? Ino antony ten̈a maventy han̈anovantsika zen̈y?
1. Nan̈ino ma atsika tokony hankasitraka fahin̈ana?
Tokony hankasitraka fahin̈ana io atsika fotony izio kadô baka amy Jehovah Babantsika, Zan̈ahary tia atsika. Izy “loharanony fahin̈ana.” Izy namoron̈o raha jiaby manampahin̈ana. (Salamo 36:9) “Izy nan̈amia olo jiaby ain̈y, fahin̈ana ndreky raha jiaby.” (Asan’ny Apostoly 17:25, 28) Namiany atsika koa raha jiaby ilaintsika, baka atsika ho velon̈o fo. Fa mandilatra zen̈y, izy koa man̈ano raha hamparavoravo atsika amy fiain̈ana.—Vakia Asan’ny Apostoly 14:17.
2. Akory han̈aboahantsika amy Jehovah fa atsika mankasitraka fahin̈ana namiany io?
Rango anao tan̈aty kibo, Jehovah efa nikarakara anao edy. Nisy panompony Jehovah, Davida an̈arany. Ho izy tamy Jehovah: “Masonao efa nahita zaho, rango zaho vo niforon̈o.” (Salamo 139:16) Ten̈a valera amy Jehovah fahin̈ananao. (Vakia Matio 10:29-31.) Ten̈a malahelo izy izikoa misy olo araiky man̈ano raha hampafohiky andra iain̈any. a (Eksodosy 20:13) Malahelo koa izy izikoa atsika manalisaly fahin̈ana ndreky tsy mijery fiarovan̈a fahin̈ananolo. Fa atsika koa mikarakara tsara ain̈intsika ndreky man̈aja fahin̈ananolo, mankasitraka Jehovah nan̈amia fahin̈ana io atsika.
ALEVA ONON̈O
Diniha raha sasany mety han̈aboahanao fa anao mankasitraka fahin̈ana namiany Zan̈ahary.
3. Karakarà fahasalaman̈anao
Kristianin̈y nanokanten̈a tamy Jehovah mampiasa fiain̈anandro jiaby hanompoan̈a Jehovah. Vatan̈andro io mira soron̈o amian̈a Zan̈ahary in̈y. Vakia Romanina 12:1, 2, avio iaraha dinihin̈y fan̈ontanian̈a aby ty:
-
Ino raha tokony handrisiky anao hikarakara fahasalaman̈anao?
-
Akory aby mety han̈anovanao zen̈y?
4. Tandrema raha jiaby mety handratra na hamono olo
Baiboly mampitandrin̈y atsika tsy han̈ano raha handratra na hamono olo. Alifasa VIDEO io ahitanao ino raha mety hataonao baka anao tsy ho voa raha.
Vakia Ohabolana 22:3, avio iaraha dinihin̈y akory ataonao hiaro ten̈a ndreky hiaro olo lera...
-
an̈atiny tran̈onao?
-
ampiasan̈a?
-
man̈ano sport?
-
anao sofera na anao indesin̈y?
5. Hajà fahin̈any tsaiky an̈aty kibo
Davida nan̈ano tononkalo, izikoa fa nikoran̈a fitiavany Jehovah tsaiky mbala vo iforon̈o an̈aty kibo. Vakia Salamo 139:13-17, avio iaraha dinihin̈y fan̈ontanian̈a ty:
-
Amy Jehovah ma lera tsaiky io teraka vo olo sa rango izy mbala vo iforon̈o an̈aty kibo?
Lalàn̈any Jehovah taminy Israely taloha tan̈y niaro reniny tsaiky ndreky tsaiky mbala an̈aty kibo. Vakia Eksodosy 21:22, 23, avio iaraha dinihin̈y fan̈ontanian̈a aby ty:
-
Akory fahitany Jehovah olo araiky tafamono tsinia tsaiky an̈aty kibo?
-
Karakory fo fahitany olo kinia mamono tsaiky an̈aty kibo? b
-
Akory fahitanao hevitriny Zan̈ahary zen̈y?
Misy olo man̈adoso tsaiky, fotony efa zen̈y fo hevitry hitany. Vakia Isaia 41:10, avio iaraha dinihin̈y fan̈ontanian̈a aby ty:
-
Izikoa misy olo forsenolo han̈adoso tsaiky, tokony hitady vonjy aminjovy izy? Nan̈ino?
MISY OLO MIVOLAN̈A: “Anjarany man̈angy manapakevitry han̈adoso tsaiky izy na tsy han̈adoso. Ain̈inany baka izio.”
-
Nan̈ino anao man̈eky fa valera amy Jehovah ain̈iny tsaiky an̈aty kibo ndreky niny reniny?
INO RAHA NIANARANAO TATO?
Baiboly mampianatra atsika ho tia, han̈aja ndreky hitandrin̈y fahin̈ana namiany Jehovah atsika ndreky ninolo hafa koa.
Fan̈ontanian̈a Fameren̈ana
-
Nan̈ino ma valera amy Jehovah fahin̈ana io?
-
Akory fahitany Jehovah olo mamono ten̈a na mamono olo?
-
Nan̈ino ma anao mankasitraka fahin̈ana namiany Zan̈ahary anao?
ZAHAVA
Akory mety han̈anovantsika mersy Jehovah nan̈amia fahin̈ana atsika?
Tadiava valiny fan̈ontanian̈a ty: Zan̈ahary ma mamela helokony man̈angy efa navy nan̈adoso tsaiky?
“Ino ma Raha Koran̈iny Baiboly Momba Fan̈adosoan̈a Tsaiky?” (Lahatsoratra aminy Internet)
Zahava fa fahitany Jehovah fahin̈ana io tokony hisy vokany amy fangalan̈a diandian̈a fidiantsika.
“Tokony Han̈ano ‘Sport Mahery’ ma Zaho?” (Mifohaza! 8 Oktobra 2000)
Zahava karakory han̈ampiany Baiboly olo araiky mieritreritry hamono ten̈a.
a Jehovah ten̈a mahinakinaka olo maratra fô. (Salamo 34:18) Hainy ino raha tsapandro ke mahavy iro tihofoaty, ke izy tihan̈ampy iro. Izikoa tianao ho hay zen̈y, vakia lahatsoratra “Zaho Tihofoaty—Baiboly ma Afaka Man̈ampy Zaho Izikoa Zaho Manan̈a Eritreritry Hamono Ten̈a?” Ho hitanao amy “Zahava” amy leson ty izio.
b Olo koa efa navy nan̈adoso tsaiky taloha, izy tsy tokony hiasaloha eky, fotony Jehovah efa nan̈ambela hadisovan̈anany. Izikoa tihahita fan̈azavan̈a momba zen̈y, vakia lahatsoratra “Ino ma Raha Koran̈iny Baiboly Momba Fan̈adosoan̈a Tsaiky?” amy “Zahava” amy leson ty ato.
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
