Ten̈a ilain̈a lio, fotony tsy velon̈o atsika koa tsisy izio. Zan̈ahary niasa atsika, ke izy manan̈a fahifan̈a hivolan̈a amintsika fomba tokony hampiasan̈a lio. Ino ma raha nivolan̈iny momba lio? Mety ma mihina lio ndreky mampiditry lio? Akory hataonao hahay hanapakevitry amy zen̈y?

1. Akory ma fiheverany Jehovah lio?

Taminy andrany Baiboly, ho Jehovah tamy panomponany aby io: “Lio io fahin̈ana karazan̈a nofotro jiaby.” (Levitikosy 17:14) Amy Jehovah, lio io fahin̈ana. Masin̈y aminany fahin̈ana io sady kadô baka aminany, ke masin̈y aminany koa lio.

2. Tsy imboany Jehovah atao karakory lio?

Jehovah nivolan̈a tamy panomponany talohany faha Kristianin̈y tan̈y fa iro tsy mahazo mihina lio. (Vakia Genesisy 9:4 ndreky Levitikosy 17:10.) Fa tafaranizen̈y, mbala nankamafisiny Filankevipitantan̈ana koa raha zen̈y, ke namezan̈a toromariky Kristianin̈y fa iro mbala mila ‘fady ... lio fo.’​—Vakia Asan’ny Apostoly 15:28, 29.

Ino ma dikany fady lio zen̈y? Izikoa dokotera mivolan̈a aminao fa anao mila fady toaka, anao tsy higiaka toaka. Fa izikoa hanin̈y misy toaka na toaka io hampidirin̈y baka amy lalandionao ke? Anao han̈eky? Ehe. Karaha zen̈y dikany volan̈a Zan̈ahary fa atsika fady lio. Atsika tsy tokony higiaka izio, tsy tokony hihina biby tsy nilintain̈y, avio tsy tokony hihina hanin̈y naloky miaraka amy lio.

Karakory fo basy fitahan̈a ampiasan̈a lio? Sasany amizio direkty hay fa mandika lalàn̈any Zan̈ahary, karaha ataony mampiditry lio, na taharo fototrony lio: Lio mena, lio fotsy, plakety, ndreky plasma. Fa misy fitahan̈a sasany ndraiky tsy mandika lalàn̈any Zan̈ahary. Ohatra izioty, fitahan̈a ampiasan̈a raha baka amy taharo fototrony lio. Misy koa fitahan̈a, liontena tompiny fo ampiasain̈a amintena. Anjarany tsiaraikiaraiky manapakevitry amindro fitahan̈a tsy mandika lalàn̈any Zan̈ahary io. a​—Galatianina 6:5.

 ALEVA ONON̈O

3. Man̈anova fanapahankevitry mamparavoravo Jehovah izikoa fa mitaha

Akory hataonao hanapakevitry mifan̈araka aminy hevitriny Jehovah momba lio? Alifasa VIDEO io, avio iaraha dinihin̈y ino mahatsara han̈anovan̈a iro dingana aby ambany io.

• Mivavaka, mangataka fahendrena.​—Jakoba 1:5.

• Man̈ano fikarohan̈a toro lalan̈a Baiboly momba lio ndreky fomba han̈arehan̈a iro io.​—Ohabolana 13:16.

• Mahay ino fomba fitahan̈a mety hatao amy tany misy anaro.

• Mahay ino aby fomba fitahan̈a tsy mety aminao foeky.

• Mangala toky fa hampilamin̈y eritreritrinao fanapahankevitry raisinao.​—Asan’ny Apostoly 24:16. b

• Tsisy olo tokony hanapakevitry amy plasinao, na vadinao, na antipan̈ahy, na olo mampianatra Baiboly anao, izikoa fa raha miankiny aminy eritreritriny tsiaraikiaraiky.​—Romanina 14:12.

• Sorata fanapahankevitrinao io baka hainolo hafa.

4. Vavolombelon̈o Jehovah mitady fitahan̈a farany tsara

Misy fitahan̈a sady tsy mandika lalàn̈any Jehovah, kanefa tsy ampiasan̈a lio. Alifasa VIDEO io.

Vakia Titosy 3:2, avio iaraha dinihin̈y fan̈ontanian̈a ty:

• Nan̈ino ma atsika koa mikoran̈a amy dokoterantsika tokony han̈aja ndreky tsy hasiaka foeky?

 5. Izikoa izio raha baka amy taharo fototrony lio

Misy raha efatra mahaforon̈o lio: Lio mena, lio fotsy, plakety ndreky plasma. Mbala misy raha madiniky koa azo baka amy raha efatra io. c Sasany amindro raha madiniky io ampiasainy dokotera hiadivan̈a amy valan̈aretin̈y ndreky hampijanonan̈a lio very.

Izikoa fa raha baka amy taharo fototrony lio io, anjarany tsiaraikiaraiky manapakevitry, miorin̈y aminy eritreritry efa nizarin̈y han̈araka toro lalan̈any Baiboly. Sasany mety hanapakevitry tsy han̈eky fitahan̈a ampiasan̈a raha baka amy taharo fototrony lio. Fa ertreritrinolo sasany ndraiky mety han̈eky fitahan̈a ampiasan̈a raha baka amy taharo fototrony lio.

Alohany anao hanapakevitry, diniha fan̈ontanian̈a ty:

• Akory han̈azavako amy dokotera antony mahavy zaho han̈eky na tsy han̈eky fitahan̈a ampiasan̈a raha baka amy taharo fototrony lio?

 INO RAHA NIANARANAO TATO?

Tsy tiany Jehovah atsika hampiasa lio io amy fomba ratsy.

Fan̈ontanian̈a Fameren̈ana

• Nan̈ino ma lio io masin̈y amy Jehovah?

• Akory hahaizantsika fa mbala an̈isany lalàn̈any Jehovah mivolan̈a fa fady lio io koa fampidiran̈a lio?

• Akory han̈anovanao fanapahankevitry tsara momba fitahan̈a misy ifandraisany amy lio?