LESON 40
Karakory Tokony Hataontsika Baka Atsika Madio Manoloan̈a Zan̈ahary?
Miniminia hely reniny tsaiky lelahy hely araiky man̈amboatra izy handeha lekoly. Efa baka nampisehany izy, avio nampan̈anoviny lamba madio. Mahasalama tsaiky io raha ataony mamany zen̈y, avio hitanolo baka amy zen̈y koa fa izy mahakarakara tsaiky. Karaha zen̈y koa Jehovah. Tiany hadio vatan̈antsika, eritreritrintsika, raha volan̈intsika ndreky raha ataontsika. Man̈amia voninahitry Jehovah sady hahazo hatsaran̈a maro atsika koa madio.
1. Akory hataontsika baka hadio vatan̈antsika?
Jehovah mivolan̈a amintsika: “Tsy maintsy masin̈y anaro.” (1 Petera 1:16) Dikany masin̈y zen̈y, mila madio vatan̈a, eritreritry, raha volan̈iny ndreky raha atao. Madio vatan̈a atsika izikoa miseky isanandra, madio lamba sikinin̈y, tran̈o ndreky fanan̈anantsika, karaha ataony tomobily na moto. Atsika koa mety mitatahy lera fan̈adiovan̈a Tran̈o Fivorian̈a. Vatan̈antsika ndreky fanan̈anantsika koa madio fo, Jehovah mahazo voninahitry.—2 Korintianina 6:3, 4.
2. Baka atsika hadio, ino fahazaran̈a ratsy mila ialan̈a?
Baiboly mandrisiky atsika “han̈adio ain̈intsika, baka atsika ho afaka amy raha jiaby mandoto nofotro ndreky sain̈y.” (2 Korintianina 7:1) Dikanizen̈y, atsika tsy tokony han̈ano raha handrobaka vatan̈antsika ndreky sain̈intsika. Tokony hamparavoravo Jehovah raha iritriretintsika, ke mila adosontsika malaky eritreritry ratsy mandalo an̈aty sain̈intsika ao. (Salamo 104:34) Mila mifen̈y koa atsika baka madio raha volan̈intsika.—Vakia Kolosianina 3:8.
Ino koa raha mety handoto vatan̈a ndreky fitondranten̈a? Misy raha sasany mety handrobaka vatan̈antsika. Zen̈y mahavy atsika tsy mihina lobaka, katy, sigarety ndreky jamala. Ho salama vatan̈a atsika koa tsy mihina iro io, avio haboakantsika amy zen̈y koa fa atsika man̈aja fahin̈ana namiany Zan̈ahary io. Mifen̈y koa atsika baka hadio eritreritry ndreky raha atao, ke atsika tsy misoma raha mahalelahy na mahaman̈angy, avio koa tsy mizaha sary vetaveta. (Salamo 119:37; Efesianina 5:5) Mety ho sarotro ialan̈a raha aby io, fa Jehovah man̈ampy.—Vakia Isaia 41:13.
ALEVA ONON̈O
Diniha nan̈ino man̈amia voninahitry Jehovah atsika koa madio vatan̈antsika, avio zahava akory ialan̈a amy fahazaran̈a ratsy.
3. Man̈amia voninahitry Jehovah vatan̈a madio
Atsika koa mamaky lalàn̈a namiany Jehovah iro Israelita taloha tan̈y, ho hitantsika fa ten̈a takiny Jehovah aminy olonany fahadiovan̈a io. Vakia Eksodosy 19:10 ndreky 30:17-19, avio iaraha dinihin̈y fan̈ontanian̈a aby ty:
-
Koa andininy aby io zahan̈a, akory fahitany Jehovah fahadiovany vatan̈a?
-
Ino raha mety hataonao isanandra, baka vatan̈anao hadio fo?
Mila fotoan̈a ndreky mila mifen̈y atsika baka hadio fo. Fa izio vitantsika fo na aia na aia misy atsika, avio nata atsika olo manan̈a na tsy manan̈a. Alifasa VIDEO io, avio iaraha dinihin̈y fan̈ontanian̈a ambany io.
-
Nan̈ino hahavy olo han̈aja Jehovah raha indesintsika mitory izikoa madio ndreky milamin̈y tsara?
4. Ialà raha ratsy mahazatra anao
Jehovah mahavita man̈ampy anao hiala amy fahazaran̈a ratsy
Izikoa anao mifima sigarety na jamala, mety ho hitanao sarotro miala amy mahazatra. Ke ino hevitry? Diniha ino vokatranizio aminao. Vakia Matio 22:37-39, avio iaraha dinihin̈y ino vokatrany fihinanan̈a sigarety na jamala...
-
amy fihavan̈anao amy Jehovah?
-
amy fianakavian̈anao ndreky olo man̈odidin̈y anao?
Man̈anova programo ialan̈a amy raha ratsy mahazatra anao. a Alifasa VIDEO io.
Vakia Filipianina 4:13, avio iaraha dinihin̈y fan̈ontanian̈a ty:
-
Nan̈ino han̈amia angovo olo hiala amy fahazaran̈a ratsy fahazaran̈a mivavaka, mianatra Baiboly, ndreky mivory?
5. Miadiva aminy eritreritry ratsy ndreky fan̈anovan̈a raha ratsy
Vakia Kolosianina 3:5, avio iaraha dinihin̈y fan̈ontanian̈a aby ty:
-
Akory hahaizantsika fa an̈isany raha maloto manoloan̈a Jehovah sary vetaveta, hafatra vetaveta, ndreky fahazaran̈a misoma raha mahalelahy na mahaman̈angy?
-
Fahitanao izy, mentitry loatra ma Jehovah koa man̈iraka atsika hadio fitondranten̈a? Nan̈ino?
Zahava akory hiadivan̈a aminy eritreritry maloto. Alifasa VIDEO io.
Jesosy nampiasa fan̈oharan̈a han̈aboahan̈a fa tsy maintsy man̈ano raha mentitry atsika baka hadio fitondranten̈a fo. Vakia Matio 5:29, 30, avio iaraha dinihin̈y fan̈ontanian̈a ty:
-
Jesosy ndray tsy man̈iraka atsika handratra ain̈intsika, hita baka amy volan̈anany io fa mila tapakevitry atsika han̈ano raha. Ino raha mety hataonolo araiky, izikoa izy tapakevitry tsy hieritreritry raha ratsy? b
Izikoa anao mifen̈y miady aminy eritreritry ratsy, ten̈a raha maventy amy Jehovah ezaka ataonao io. Vakia Salamo 103:13, 14, avio iaraha dinihin̈y fan̈ontanian̈a ty:
-
Izikoa anao izioty mifen̈y miala amy fahazaran̈a ratsy, nan̈ino mampisy korazy anao hanohy ezakanao andininy aby io?
Aza mora kivy!
Anao mety hivolan̈a: ‘Mbala tafan̈ano fo, ty zala tsy vita e.’ Fa diniha baka: Olo pilomoay koa lavo, zen̈y tsy mivolan̈a fa izy tsy handresy, avio izy ho voly han̈ano lakorsy. Ke anao koa tafimpody hely amy raha mila hialanao io, zen̈y tsy mivolan̈a fa anao tsy ho afaka eky, ke tsisy varany ezaka jiaby efa nataonao. Tsy man̈ino olo koa lavo, fotony fombanolo fo lavo. Ke aza mora kivy! Ho vitanao fo hiala amy fahazaran̈a ratsy io, fotony Jehovah man̈ampy.
MISY OLO MIVOLAN̈A: “Zaho fa zatra aminany io. Zaho fa tsy tafiala.”
-
Ino toko sy andininy aboakanao olo io, an̈aboahanao aminany fa Jehovah mahavita man̈ampy izy hiala amy fahazaran̈a ratsy io?
INO RAHA NIANARANAO TATO?
Mamparavoravo Jehovah atsika izikoa madio fo vatan̈a, sain̈y ndreky fitondranten̈antsika.
Fan̈ontanian̈a Fameren̈ana
-
Nan̈ino ma atsika mila madio?
-
Akory tokony hataonao baka vatan̈anao madio fo?
-
Karakory tokony hataonao baka madio fo sain̈inao ndreky fitondranten̈anao?
ZAHAVA
Izikoa anao olo tsy manan̈a, ino raha tsotra mety han̈ampy anao hadio vatan̈a?
Zahava ino aby dingana hatao baka hialan̈a amy sigarety.
Diniha ino vokatrany fizahan̈a sary vetaveta.
“Sary Vetaveta io ma Tsy Mampan̈ino sa Man̈andevo?” (Tilikambo Fiambesan̈a 1 Aoty 2013)
Zahava akory nataony lelahy araiky baka izy voly nizaha sary vetaveta.
“Natetiky Tafimpody Zaho Zay Vo Tafiala” (Tilikambo Fiambesan̈a No. 4 2016)
a “Karakory Hialan̈a amy Sigarety?” Izio man̈azava iro dingana mila atao ialan̈a amy sigarety. Amy “Zahava” amy leson ty ahitanao izio.
b Izikoa tihiala amy fahazaran̈a misoma raha mahalelahy na mahaman̈angy, zahava “Akory Hialako amy Fahazaran̈a Misoma Raha Mahalelahy Zaho?” amy boky Fan̈ontanian̈any Tanora—Valiny Pare Tsarabe, Boky 1, toko 25.
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
