1.  Ino ma Babylony Be Zen̈y?

2.  Ombian̈a ma Niboahany Mesia?

3.  Fitahan̈a Misy Ifandraisany amy Lio

4.  Fisintahan̈a

5.  Fety

6.  Aretin̈y Mifindra

7.  Varotro Ndreky Fitsaran̈a

 1. Ino ma Babylony Be Zen̈y?

Akory ahaizantsika fa “Babylony Be” io fivavahan̈a diso jiaby? (Apokalypsy 17:5) Diniha baka raha aby ty:

• Izio mahery amy tany jiaby. Koran̈iny Baiboly fa Babylony Be io mipetraka amy “vahoaka ndreky firenena maro.” Izio manan̈a “fanjakan̈a mamehy panjakany tany aby io.”​—Apokalypsy 17:15, 18.

• Izio tsy pan̈ano politiky sady tsy fahifan̈a arabarotro. Fotony baka “iro panjakany tany” ndreky “pivarotro” aby io tsy ho ravan̈a miaraka aminany.​—Apokalypsy 18:9, 15.

• Izio mangala baraka Zan̈ahary. Makorely ivolan̈ana izio, fotony izio miaraka miasa marikitry amy fanjakan̈a, baka azahoan̈a vola ndreky azahoan̈a ranondranony amindro. (Apokalypsy 17:1, 2) Izio mamitaka olo amy firenena jiaby. Izio koa tompinandraikitry amy fahafatesanolo maro.​—Apokalypsy 18:23, 24.

Himpody amy leson 13, hevitry 6

 2. Ombian̈a ma Niboahany Mesia?

Baiboly nan̈ambara tsialohaloha fa hiboaka Mesia, izikoa fa tapitry 69 herin̈iandra.​—Vakia Daniela 9:25.

• Nanomboko ombian̈a ma 69 herin̈iandra io? Tamy taon̈o 455 Talohany Kristy. Tamy zen̈y, Governera Nehemia navy ta Jerosalema ‘nan̈avao ndreky nan̈amboatra’ tanàna io.​—Daniela 9:25; Nehemia 2:1, 5-8.

• Nahadin̈y firy taon̈o ma 69 herin̈iandra io? Amy faminanian̈a sasany amy Baiboly, andra araiky zen̈y taon̈o araiky. (Nomery 14:34; Ezekiela 4:6) Dikanizen̈y, herin̈iandra araiky, fito taon̈o. Amy faminanian̈a io, 69 herin̈iandra io 483 taon̈o (69 herin̈iandra x 7 andra).

• Ombian̈a tapitry 69 herin̈iandra io? Izikoa 483 taon̈o io konten̈a baka amy 455 Talohany Kristy, atsika avy amy taon̈o 29. a Taminio ankitin̈y taon̈o nan̈anovan̈a batisa Jesosy, ke nanjary Mesia izy!​—Lioka 3:1, 2, 21, 22.

Himpody amy leson 15, hevitry 5

 3. Fitahan̈a Misy Ifandraisany amy Lio

Kristianin̈y tsy man̈eky hampidiran̈a lio ndreky tsy man̈amia lio olo foeky. Fa misy koa fitahan̈a ampiasan̈a lionany tompiny, karaha ataony lio akajin̈a herin̈iandra maromaro alohany olo araiky didian̈a. Tsy mety amy Kristianin̈y koa raha karaha zen̈y.​—Deoteronomia 15:23.

Amy fitahan̈a sasany ndraiky, anjarany tsiaraikiaraiky manapakevitry. Ohatra, lionao misy an̈adosoan̈a izikoa fa han̈ano analizy, avio koa lio idin̈ana raha. Misy koa fitaovan̈a ampiasain̈y, mampivily lio hiala amy vatan̈anolo, baka io lio in̈y soloan̈a ranondraha. Anjarany Kristianin̈y tsiaraikiaraiky manapakevitry amy fomba hampiasan̈a lionany tompiny izikoa fa an̈atinizy didian̈a in̈y, na lera man̈ano analizy, na lera misy fitahan̈a atao aminany. Iro dokotera aby io samy amy teknikinany. Ke alohany han̈anovan̈a fandidian̈a na han̈anovan̈a analizy, na misy karazan̈a fitahan̈a hafa hatao, Kristianin̈y araiky mila mahay karakory ma hampiasany dokotera lionany. Diniha iro fan̈ontanian̈a aby ty:

• Izikoa lionaka avily hiala amy vatan̈anaka, ke mety hajanon̈o hely fandihanany, asa ikeny sain̈inaka fa mbala ain̈inaka fo izio, ke tsy voatery ‘haidin̈y amy tany’?​—Deoteronomia 12:23, 24.

• Izikoa lionaka misy an̈adosoan̈a, idin̈ana aody, baka io ampody amy vatan̈anaka ndraiky, asa mbala mety aminy eritreritrinaka fo? Mifan̈araka amy raha nianarako tamy Baiboly, hinjehiny eritreritry ma zaho izikoa han̈eky fitahan̈a io sa hilamin̈y fo eritreritrinaka?

Himpody amy leson 39, hevitry 3

 4. Fisintahan̈a

Baiboly tsy mampirisiky olo fivadiany hisintaka, avio koran̈iny mazava ao koa fa izikoa misy araiky amindro io man̈ano zen̈y, izy tsy tokony hanambady olo hafa. (1 Korintianina 7:10, 11) Fa misy antony aby ty efa nidinihiny Kristianin̈y araiky alohany izy nanapakevitry hisintaka.

• Lelahy kinia tsy mamelon̈o fianakavian̈anany: Lelahy io tsy man̈eky han̈amia raha ten̈a ilainy fianakavian̈anany.​—1 Timoty 5:8.

• Vady kafiry mare: Araiky aminolo fivadiany mety mamopoko vady mare, ke mety hamparary na hamono vadiny io foeky.​—Galatianina 5:19-21.

•   Vady man̈enjiky mare vadiny amy fanompoan̈a Zan̈ahary: Olo man̈ano raha tsy ahavitany vadiny manompo Jehovah foeky.​—Asan’ny Apostoly 5:29.

Himpody amy leson 42, hevitry 3

 5. Fety

Kristianin̈y tsy man̈ano fety tsy mamparavoravo Jehovah. Fa izy ndraiky, anjarany tsiaraikiaraiky mampiasa raha nianarany tamy Baiboly, koa fa manapakevitry amy raha hataony, lera misy olo man̈ano fety. Diniha baka ohatra aby ty.

• Izikoa misy olo miarahaba anao aminy andra fety. Valia “mersy” fo. Izikoa izy mbala man̈ontany anao, hazavà aminany nan̈ino anao tsy man̈ano fety io.

• Izikoa vadinao tsy Vavolombelon̈o Jehovah mikaiky anao han̈ano fety miaraka amindry havany. Izikoa tsy mampan̈ino anao handeha hiaraka aminany an̈y, hazavà aminany sandra fa izikoa misy fomba ataondro tsy fan̈araka amy Baiboly, anao tsy han̈ano.

• Izikoa sefonao man̈amia kadô anao lera andra fety. Tsy hangala anao sa hangala? Arakaraka fo. Diniha ino antony nahavy izy nan̈amia izio, nohony fety sa fankasitrahan̈a asa tsara vitanao?

• Izikoa misy olo man̈amia kadô anao aminy andra fety. Olo man̈amia kadô anao io mety hivolan̈a: “Haiko ndraiky anao tsy man̈ano fety fa tiako hamian̈a anao fo izity.” Mety tsara fan̈ahy ankitin̈y olo io. Fa mila dinihinao koa, tsao izy mitsapa jery anao ke man̈amia anao kadô io, na anao tiany han̈ano fety. Izikoa zen̈y ny raha misy, anjaranao manapakevitry hangala sa tsy hangala kadô io. Tiantsika hampiasa tsarabe eritreritrintsika ndreky tsy hivadiky amy Jehovah, izikoa fa manapakevitry.​—Asan’ny Apostoly 23:1.

Himpody amy leson 44, hevitry 1

 6. Aretin̈y Mifindra

Mitandrin̈y mare atsika baka tsy hamindra aretin̈y aminolo, fotony atsika tia olo. Karaha zen̈y ataontsika izikoa haintsika fa atsika misy aretin̈y mifindra, na atsika mety hamindra aretin̈y aminolo. Man̈ano zen̈y atsika, fotony man̈araka raha koran̈iny Baiboly ty: “Tiava namanao karaha ataonao tia ain̈inao.”​—Romanina 13:8-10.

Akory ataonolo araiky misy aretin̈y mifindra, han̈arehan̈a didy zen̈y? Izy tsy tokony hitolon̈o olo ndreky hioroko olo. Izy tsy tokony ho meloko izikoa tsy ataonolo karibo antran̈o, fotony iro miaro fianakavian̈andro. Alohany izy hatao batisa koa, izy efa tokony hikoran̈a tsialohaloha aminy antipan̈ahy pandrindra, baka hiarovan̈a olo sasany hatao batisa miaraka aminany. Izikoa misy olo efa navy nisy aretin̈y mifindra mieritreritry hanambady, izy mila man̈ano testy lio. Izy koa man̈ano zen̈y, haboakany fa izy ‘mizaha raha mahatsara naman̈a, fa tsy raha mahatsara izy tompiny fo.’​—Filipianina 2:4.

Himpody amy leson 56, hevitry 2

 7. Varotro Ndreky Fitsaran̈a

Izikoa atsika tsy tihahita problemo amy namantsika amy raha momba vola ndreky varotro, tsara atsika man̈ano taratasy fo, ndray olo io Kristianin̈y namantsika. (Jeremia 32:9-12) Fa ndraikindraiky, mety hisy Kristianin̈y tsy fankahazo amy raha momba vola na raha hafa. Tokony halamin̈indro malaky kanefa tsisy ady raha zen̈y, avio tsy tokony hikoran̈indro aminolo hafa tsy tafiditry an̈atinizio.

Ino raha tokony hataonao izikoa misy problemo maventy, karaha ataony piaramanompo nan̈odihody raha tsy nataonao na namitaka anao? (Vakia Matio 18:15-17.) Jesosy nikoran̈a dingana telo mila arehan̈a:

1. Anaro roe fo antsendriky mandamin̈y problemonaro io.​—Zahava andininy 15.

2. Izikoa mbala tsy milamin̈y, mangalà vavolombelon̈o araiky na aroe matotro an̈ivony fiangonan̈a hiaraka aminao mandeha aminany an̈y.​—Zahava andininy 16.

3. Fa izikoa mbala tsy milamin̈y fo, iô anao vo tokony han̈aton̈o iro antipan̈ahy aby io.​—Zahava andininy 17.

Aminy ankamarozany problemo, atsika tsy tokony hitondra rahalahintsika amy tribinaly an̈y, fotony mangala baraka Jehovah ndreky fiangonan̈a raha zen̈y. (1 Korintianina 6:1-8) Fa ndray izy man̈ano zen̈y, misy raha sasany tsy maintsy indesintsika an̈y, karaha ataony divorsy, fitarimian̈a tsaiky, volanjaza, asiransy, na olo nindramanolo vola kanefa olo nindran̈a io nivolan̈a fa izy fahity. Kristianin̈y araiky koa mandamin̈y problemo amy fitsaran̈a an̈y, izy tokony ho tia fihavanan̈a fo fa tsy mila tia ady na handika torohevitriny Baiboly.

Izikoa afera maventy karaha ataony fangalaran̈a tsaiky, fan̈olan̈ana tsaiky, na halatra maventy, na famonoan̈a olo, tsy mandika fitsipikiny Baiboly atsika koa mivolan̈a zen̈y amy manampahifan̈a.

Himpody amy leson 56, hevitry 3