LESON 49
Akory Hampasambatra Fianakavian̈anao?—Fizaran̈a 1
Olo vo vita mariazy man̈anten̈a fa haravoan̈andro aminy andra io hitohy mandrakizay. Mety ho zen̈y. Mira zen̈y vadian̈any Kristianin̈y maro efa ela nanambadianan̈a, fotony iro nifen̈y fo nan̈araka torohevitriny Baiboly.
1. Ino ma torohevitriny Baiboly amy lelahy manambady?
Lelahy nataony Jehovah lohany fianakavian̈a. (Vakia Efesianina 5:23.) Tiany Jehovah izikoa izy mangala fanapahankevitry hahatsara fianakavian̈anany. Ho Baiboly amy lelahy manambady: “Tiava fo vadinaro.” (Efesianina 5:25) Ino ma dikanizen̈y? Lelahy tia vady zen̈y tsara fan̈ahy amy vadiny, na antran̈ondro ao, na amasonolo. Izy miaro vadiny io ndreky mifen̈y mikarakara izy tsarabe, na aminy arabatan̈a zen̈y na arapihetsehampo. (1 Timoty 5:8) Fa ny ten̈a raha maventy, izy man̈ampy vadiny hanan̈a fifandraisan̈a tsara amy Jehovah. (Matio 4:4) Ohatra izy mivavaka ndreky miaraka mamaky Baiboly amy vadiny. Izikoa lelahy manambady tia vady ndreky mikarakara vadiny, ho tsara fihavan̈ana amy Jehovah fo izy.—Vakia 1 Petera 3:7.
2. Ino ma torohevitriny Baiboly amy man̈angy manambady?
Baiboly mivolan̈a fa man̈angy “mila man̈aja vadiny mare.” (Efesianina 5:33) Akory han̈anovany zen̈y? Izy tokony hieritreritry toetry tsarany vadiny fo, ndreky ezaka ataony vadiny mikarakara izy ndreky zanakandro. Izy koa tokony hifen̈y fo man̈ano raha hampahomby fanapahankevitriny vadiny. Tokony ho tsara fan̈ahy fo koa izy, izikoa fa mikoran̈a amy vadiny ndreky mikoran̈a aminolo raha momba vadiny.
3. Akory tokony hataonolo fivadiany baka vadian̈andro ho fatatra?
Ho Baiboly momba olo fivadiany: “Iro roe hanjary nofotro araiky fo.” (Matio 19:5) Ke dikanizen̈y iro fivadiany mifen̈y mare baka hifankatia fo. Mifen̈y koa iro mandany fotoan̈a miaraka man̈ano raha ndreky tsy mihafahafa mifampikoran̈a hevitrindro ndreky raha an̈aty fondro. Ankoatrany Jehovah, efa vadian̈andro raha ten̈a tokony maventy amindro. Mila mitandrin̈y mare iro tsao mifankahazo loatra aminolo tsy vadindro.
ALEVA ONON̈O
Zahava nan̈ino man̈ampy anao hanan̈a tokantran̈o sambatra toro lalan̈a Baiboly.
4. Anaro lelahy, tiava ndreky karakarà vadinaro
Baiboly mivolan̈a fa “lelahy tokony ho tia vadiny karaha ataony tia ain̈inany in̈y.” (Efesianina 5:28, 29) Ino ma dikanizen̈y? Alifasa VIDEO io, avio iaraha dinihin̈y fan̈ontanian̈a ambany io.
-
Ino aby raha mety ataony lelahy, han̈aboahany fa izy tia ndreky mikarakara vadiny?
Vakia Kolosianina 3:12, avio iaraha dinihin̈y fan̈ontanian̈a ty:
-
Akory mety han̈aboahany lelahy manambady toetry aby io an̈atiny tokantran̈ondro?
5. Anaro man̈angy, tiava ndreky hajà vadinaro
Baiboly mandrisiky man̈angy han̈aja vady fo, nata tsy manompo Jehovah lelahy io. Vakia 1 Petera 3:1, 2, avio iaraha dinihin̈y fan̈ontanian̈a aby ty:
-
Izikoa vadinao tsy manompo Jehovah, azo antoko fa mba tianao hanompo Jehovah izy. Akory fomba mety tsara han̈ampian̈a izy: Mila an̈anovan̈a toriteny fo izy, sa anao mila man̈aboaka toetry tsara ndreky man̈aja izy mare fo? Nan̈ino?
Olo fivadiany mety miaraka mangala fanapahankevitry tsara. Ndraikindraiky man̈angy mety tsy hitovy hevitry amy vadiny. Izy mety mivolan̈a hevitrinany, fa tokony ho tsara fan̈ahy ndreky man̈aja vadiny fo izy. Tsara ho hainy koa fa vadiny namiany Jehovah andraikitry hanapakevitry an̈aty tokantran̈o. Izy tokony han̈eky fanapahankevitriny vadiny. Mampasambatra fianakavian̈anany izy koa man̈ano zen̈y. Vakia 1 Petera 3:3-5, avio iaraha dinihin̈y fan̈ontanian̈a ty:
-
Ino raha tsapany Jehovah, koa man̈angy mifen̈y man̈aja vadiny?
6. Afaka mandresy problemo an̈atiny tokantran̈o anaro
Tsisy tokantran̈o tsisy problemo zen̈y. Ke olo fivadiany mila mifen̈y miaraka mamaha problemondro. Alifasa VIDEO io, avio iaraha dinihin̈y fan̈ontanian̈a aby ambany io.
-
Tamy video tio in̈y, ino aby raha ahitan̈a fa efa tsy nifankahazo tsarabe iro fivadiany in̈y?
-
Ino raha nataondro baka tokantran̈ondro ho sambatra ndraiky?
Vakia 1 Korintianina 10:24 ndreky Kolosianina 3:13. Isaka baka mamaky andininy araiky, iaraha dinihin̈y fan̈ontanian̈a ty:
-
Akory han̈arehako torohevitry io, baka tokantran̈onaka ho sambatra?
Baiboly mivolan̈a fa atsika tokony hifan̈amia voninahitry, dikanizen̈y, samy tsara fan̈ahy ndreky mifan̈aja mare. Vakia Romanina 12:10, avio iaraha dinihin̈y fan̈ontanian̈a aby ty:
-
Lelahy tokony ho voanalohany han̈amia voninahitry vady sa man̈angy? Nan̈ino?
MISY OLO MIVOLAN̈A: “Zahay roeny vadiko tsy mifandanja foeky.”
-
Akory han̈azavanao amindro fa afaka man̈ampy iro toro lalan̈a Baiboly?
INO RAHA NIANARANAO TATO?
Ho sambatra olo fivadiany izikoa iro mifankatia, mifan̈aja baka io man̈araka toro lalan̈a Baiboly.
Fan̈ontanian̈a Fameren̈ana
-
Akory tokony hataony lelahy, baka ho sambatra tokantran̈ondro?
-
Akory tokony hataony man̈angy, baka ho sambatra tokantran̈ondro?
-
Anao koa manambady, mety han̈ampy anao hanan̈a tokantran̈o sambatra ma toro lalan̈a Baiboly?
ZAHAVA
Zahava ato sosokevitry mety han̈ampy anao hanan̈a tokantran̈o sambatra.
Zahava hira man̈aboaka olo sambatra fotony nan̈araka torohevitriny Zan̈ahary momba vadian̈a.
Zahava karakory ma man̈eky lelahy lohany fianakavian̈a zen̈y?
“Anaro Man̈angy, Ikia Fahifan̈any Vadinaro” (Tilikambo Fiambesan̈a 15 May 2010)
Akôry nataon’olo fivadiany niatriky problemo maro maventy tamy vadian̈andrô, anatin’izen̈y irô nisara-badian̈a?
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
