Atsika tsiaraikiaraiky samy amy sanjy tiantsika. Fa atsika koa man̈araka toro lalan̈any Baiboly, tsy sanjy tiantsika fo ataontsika, fa sanjy mamparavoravo Jehovah koa. Atsika handiniky toro lalan̈a vitsivitsy momba zen̈y.

1. Ino toro lalan̈a mety han̈ampy atsika hifidy sanjintsika?

Atsika mety mifidy lamba ‘mety tsarabe, man̈aja, ndreky feno fahendrena.’ Tokony hadio koa izio, ke ho hitanolo baka amizio fa atsika ‘panompony Zan̈ahary.’ (1 Timoty 2:9, 10) Iritrireta toro lalan̈a efatra ty: 1) Lambantsika tokony ho “mety tsarabe.” Mety efa hitanao raha zen̈y amy tran̈o fivorian̈a an̈y. Olo an̈y samy amy sanjinany, kanefa izio samy man̈amia voninahitry Jehovah. 2) Lamba “man̈aja” zen̈y, tsy hahavy olo hieritreritry hila atsika na misariky masonolo. 3) “Feno fahendrena” koa lambantsika, izikoa atsika tsy man̈araka zay lamody miboaka. 4) Sanjintsika koa tokony ‘hifan̈araka aminolo manompo Zan̈ahary.’ Dikanizen̈y, olo koa fa mahita atsika tokony direkty haindro fa panompony Zan̈ahary marin̈y atsika.​—1 Korintianina 10:31.

2. Nan̈ino atsika koa fa mifidy sanjy ataontsika mba tokony hieritreritry iro rahalahy ndreky ranabavintsika aby io koa?

Marin̈y fa atsika tsiaraikiaraiky afaka mifidy sanjintsika, kanefa ten̈a ilain̈y mieritreritry olo hafa koa. Atsika mifen̈y fo baka tsy hanafintohin̈y olo, fa han̈ano raha ‘mamparavoravo iro, fotony zen̈y mankahery iro.’​—Vakia Romanina 15:1, 2.

3. Nan̈ino ma sanjintsika tsara io mety hahasariky olo hanompo Jehovah?

Marin̈y ndraiky fa atsika mifen̈y man̈ano lamba mifan̈araka amy zay raha ataontsika. Fa izikoa ndraiky atsika mandeha mivory ndreky man̈ano fanompoan̈a, ten̈a mila mitandrin̈y atsika. Tsy tiantsika foeky izikoa baka amy sanjintsika hahavy olo tsy hitandren̈y atsika. Ke baka amy sanjintsika tsara mety hahavy olo han̈eky fahamarin̈ana, avio izio koa “mampisanjy fampianaran̈any Zan̈ahary Pamonjy atsika.”​—Titosy 2:10.

 ALEVA ONON̈O

4. Koa tsara sanjintsika, zen̈y man̈aboaka fa atsika man̈aja Jehovah

Ino ma antony ten̈a maventy mahavy atsika man̈ano sanjy mety tsara? Vakia Salamo 47:2, avio iaraha dinihin̈y fan̈ontanian̈a aby ty:

• Atsika io misolo ten̈a Jehovah, ke ino tokony ho fanapahankevitrintsika, izikoa atsika fa mifidy sanjy hataontsika?

• Araka dinikinao, ten̈a ilain̈a ma mandiniky tsarabe sanjintsika koa fa han̈aton̈o fivorian̈a ndreky han̈ano fanompoan̈a? Nan̈ino?

 5. Ino han̈ampy atsika hahay hifidy sanjy ataontsika?

Alifasa VIDEO io.

Na mora na lafo nivangan̈a lambantsika io, tokony hadio fo izio ndreky hifan̈araka amy raha jiaby ataontsika. Vakia 1 Korintianina 10:24 ndreky 1 Timoty 2:9, 10. Iaraha dinihin̈y nan̈ino anao tsy tokony han̈ano lamba aby ty:

• lamba maloto ndreky tsy milamin̈y?

• lamba maletry loatra na mifin̈y loatra?

Kristianin̈y ndray tsy ambaniny lalàn̈any Mosesy, iro mbala afaka mangala fianaran̈a baka amizio fo, fotony izio ahitan̈a fomba fisain̈any Jehovah. Vakia Deoteronomia 22:5, avio iaraha dinihin̈y fan̈ontanian̈a ty:

• Nan̈ino ma atsika tsy tokony han̈ano sanjy tsy ahaizan̈a atsika lelahy sa man̈angy?

Vakia 1 Korintianina 10:24 ndreky 1 Jaona 2:15, 16, avio iaraha dinihin̈y fan̈ontanian̈a aby ty:

• Nan̈ino atsika tokony handiniky tsao sanjintsika manafintohin̈y olo tanàna araiky amintsika, ndreky olo miaraka mivory amintsika?

• Karakory sanjy mamalan̈a aminaro an̈y?

• Fahitanao izy ma sanjinolo aby io mety amy Kristianin̈y aby jiaby? Nan̈ino?

 INO RAHA NIANARANAO TATO?

Man̈aja Jehovah ndreky olo hafa atsika koa mahay manapakevitry tsara lera mifidy lamba sikinintsika.

Fan̈ontanian̈a Fameren̈ana

• Nan̈ino ma ten̈a raha maventy amy Jehovah sanjintsika?

• Ino aby ma toro lalan̈a Baiboly tokony harehantsika, atsika koa fa hanapakevitry momba sanjintsika?

• Nan̈ino ma sanjintsika misy vokany amy fiheveranolo fivavahan̈a marin̈y?