Miniminia hely baka ty: Koa fa nisoma laboly niaraka tamy kamaradiny Tomy, laboly nalefany in̈y namaky lavitara lafenetranolo tankila tio.

Izikoa anao Tomy, akory hataonao?

MISY SAFIDY TELO ANAO:

1. A. Milefa.

2. B. Man̈amia tsin̈y olo hafa.

3. D. Mivolan̈a ny marin̈y amy tompintran̈o, ndreky von̈ono han̈efa zay raha robaka.

Anao mety tihan̈ano Safidy A io. Kanefa tsara fo anao mivolan̈a ny marin̈y na ino na ino hadisovan̈a vitanao.

1. Fotony efa zen̈y edy ny tokony hatao.

   Baiboly mivolan̈a: ‘Zahay man̈iry han̈ano ny marin̈y amy raha jiaby.’—Hebreo 13:18.

2. Fotony tsy ho sarotro aminolo hafa han̈ambela hadisovan̈anao izikoa anao mivolan̈a ny marin̈y.

   Baiboly mivolan̈a: “Zay olo tsy nan̈araka lalàn̈a ke manitriky raha ratsy nataony tsy hahomby, fa zay olo man̈ambara hadisovan̈a ke miala amy raha ratsy nataony, hahazo famindrampo.”—Ohabolana 28:13.

3. Fotony mamparavoravo Jehovah zen̈y ke raha ten̈a maventy.

   Baiboly mivolan̈a: “Mampangaroharo Jehovah olo fetsifetsy, fa olo man̈ano raha mahitsy fo ho tsara fihavan̈ana aminany.”—Ohabolana 3:32.

Karina, 20 taon̈o, nanitriky tamy papany lamandy nifainy taminizy tatrany polisy nitondra tomabily mare loatra. Tatra fo raha nataony io “kadiriny taon̈o araiky tafaranizen̈y.” Hoizy: “Hitany Papa lamandy nifain̈y taminy an̈arako io, ke navoasiaka mare zaho tamy zen̈y!”

Ino fianaran̈a hita amy zen̈y? Ho Karina: “Hidiranandra anao koa manitriky hadisovan̈a. Mbala ho tatra fo izio, ke hivangainao lafo!”

Baiboly mivolan̈a fa: ‘Atsika jiaby samy matetiky man̈ano diso aby.’ (Jakoba 3:2) Manetry ten̈a ndreky matotro olo araiky izikoa izy tsy miambin̈y ela man̈eky hadisovan̈anany.

Ataova anatra aminy ain̈inao izio, baka io diniha ny hoavy. Karaha ty nivolan̈iny Vera: “Izikoa zaho fa diso, ataoko anatra amy ten̈anaka raha zen̈y. Ke dinihiko tsarabe raha handeha hatao amy man̈araka izikoa fa misy raha mira in̈y ndraiky. Sady ilain̈y koa zen̈y izikoa anten̈a tihahay ho matotro fo.” Alo zahantsika fomba han̈anovan̈a zen̈y.

Nindran̈a bisikiletiny papanao anao, ke nirobatinao izio. Akory hataonao?

• Tsy hivolambolan̈a sady man̈anten̈a tsy ho tatrany papanao.

• Hamosa amy papanao raha jiaby.

• Hikoran̈a amy papanao raha nisy, fa ataonao olo hafa nandrobaka izio.

Tsy nafaka fan̈adin̈ana anao fotony anao tsy nianatra tsara. Akory hataonao?

• Hivolan̈a fa sarotro fan̈adin̈ana io.

• Han̈eky fa baka amy raha nataonao nahavy anao tsy nafaka.

• Hivolan̈a fa papianatranaro tsy tia anao.

 Aleva onon̈o ndraiky baka ohatra aroe tio in̈y, baka io anao mipitraha amy pilasiny 1) papanao ndreky 2) papianatranao. Akory hataondro izikoa anao direkity mamosa hadisovan̈anao? Akory ndrai- ky hataondro izikoa anao manitriky hadisovan̈anao?

Aleva onon̈o amy zay zioty hadisovan̈anao tamy taon̈o loso ke valia fan̈ontanian̈a aby ty:

Ino hadisovan̈a nataonao io? Karakory nataonao koa fa baka nan̈ano izio?

• Nasitriko tan̈y.

• Zaho nan̈amia tsin̈y olo hafa.

• Zaho direkity namosa.

Nan̈ano karakory amy zay anao izikoa fa tsy namosa raha zen̈y?

• Ravoravo anao tsy tatra.

• Nanen̈iny tsy nivolan̈a ny marin̈y.

Ke ino raha ten̈a tokony ho nataonao tamy zen̈y?

Ino raha nianaranao taminy hadisovan̈anao io?

Nan̈ino olo sasany tsy von̈ono han̈eky hadisovan̈andro?

Akory fahitanolo anao izikoa anao tsy mety man̈eky diso? Akory ndraiky fahitandro anao, izikoa anao man̈eky fa diso?—Lioka 16:10.