Miniminia hely baka ty: Koa fa navy hely tamy fety tio Karen, nisy feonolo hainy ren̈iny.

Nitodiky Karen, kaiky izio Jessica kamaradiny. Nitondra tavoahanginy toaka aroe vo nibiafin̈y izy. Natondrony tamy Karen araiky, baka io izy nivolan̈a: “Han̈ano hivolan̈a tsy ampy taon̈o io koa anao niany. Sa anao fady migiaka toaka?”

Karen tsy tihangala, fa izy tsy tiho ratsy fihavan̈ana amy Jessica, fotony iro kamarady. Ke tan̈atiny jeriny Karen: ‘Sady Jessica anie tsy raha olo maditry e. Ndray izy fo mba migiaka ke! Zaho tsy raha olo hihina jamala fa raha migiagiaka fo!’

Izikoa anao Karen, akory hataonao?

Ho vitanao han̈ano safidy tsara izikoa hainao olo karakory anao, ino raha tianao hatao, avio hevitry tohan̈anao. Anao fo hifehy fiain̈ananao amy zen̈y fa tsy raha volan̈inolo.—1 Korintianina 9:26, 27.

Ino han̈ampy anao hatoky ten̈a mira zen̈y? Valia antsendriky fan̈ontanian̈a aby ty.

Tsara mahay zen̈y fotony han̈ampy anao hatoky ten̈a tsarabe.

OHATRA AMY BAIBOLY: Apostoly Paoly nivolan̈a: ‘Marin̈y fa zaho tsy mahery amy fivolan̈ana, fa tsy karaha zen̈y ndraiky zaho amy fahaizan̈a.’ (2 Korintianina 11:6) Nahay Soratra Masin̈y tsara Paoly, ke nahavita nitana hevitrinany koa fa nisy nanohitry izy. Tsy niovaova izy ndray nisy olo nampakivy izy. —2 Korintianina 10:10; 11:5.

MANDINIHA TEN̈A: Sorata ambany io zay talenta na fahaizan̈a anan̈anao.

Sorata eto koa toetry tsara anan̈anao. (Ohatra, tsara fan̈ahy, tsy matity, mafatoky, man̈aja lera)

Hahairatsy fo toetry ratsinao io izikoa anao tsy mifen̈y hiala amizio. Karaha ataony vy, izikoa tsy pindarin̈y ho robaka tatrany arafesin̈y.

OHATRA AMY BAIBOLY: Hainy Paoly fa izy misy toetry ratsy. Ke izy nivolan̈a: ‘Ten̈a maharavoravo zaho lalàn̈any Zan̈ahary, izikoa toetry maha izy zaho zahan̈a, kanefa amy vatan̈anaka ao ahitako lalàn̈a hafa miady amy lalàn̈any sain̈inaka sady mitondra zaho ho andevony lalàn̈any fahotan̈a.’—Romanina 7:22, 23.

MANDINIHA TEN̈A: Ino toetry ratsy anan̈anao ke mila risenao mare?

Akory izikoa misy olo mangala taxi, kanefa tsy hainy aby tany imboany fa raha mila mandehandeha fo? Hadalan̈a zen̈y sady handany vola fo!

Mitovy amy zen̈y olo tsy manan̈a tanjon̈o. Tsisy dikany fiain̈ananany fotony izy raha mirenireny fo. Dikanizen̈y, mila hainao antsendriky ino raha tianao hatao ndreky fomba havitanao zen̈y.

OHATRA AMY BAIBOLY: Karaha ty nivolan̈iny Paoly: ‘Zaho koa fa milomoay, tsy raha milomoay be tsisy dikany fo.’ (1 Korintianina 9:26) Paoly nanan̈a tanjon̈o ndreky nifen̈y nanakatra zen̈y, fa tsy nipetraka niambin̈y zay raha ho hisy fo.—Filipianina 3:12-14.

MANDINIHA TEN̈A: Sorata tanjon̈o telo tianao ho takarin̈y amy taon̈o ho avy.

Ilain̈y mahay zen̈y amy zay anao tsy hiovaova hevitry. Ho mira tarondro mora miovaova kolera in̈y anao izikoa tihan̈ano raha hitovizan̈a amy namanao fo. Ho hita amy zen̈y koa fa anao tsisy maha anao anao foeky.

Fa izikoa anao efa manan̈a raha inoanao, baka io tsy miala amy zen̈y, anao tsy hiovaova hevitry ndray ino raha volan̈inolo.

OHATRA AMY BAIBOLY: Daniela ‘tapakevitry tamy fonany tao’ han̈araka lalàn̈any Zan̈ahary, taminizy mbala tanora, ndray lavitry fianakavian̈anany ndreky olo piaraka mivavaka taminany izy. (Daniela 1:8) Tsy niovaova hevitry foeky izy, baka io nan̈ano raha nifan̈araka tamy raha inoany fo.

MANDINIHA TEN̈A: Ino aby raha inoanao? Asa anao mba mino Zan̈ahary? Ino mahavy anao matoky fa misy ankitin̈y izy?

Mino ma anao fa mahatsara anao fitsipiky Zan̈ahary mikasiky fitondranten̈a? Nan̈ino?

Ke olo karakory amy zay ma anao? Karaha ravindraha mora tsofiny tsiko in̈y, sa karaha kakazo tsy avaohombotro sikilony mare in̈y? Hamahatra tsarabe mira kakazo io anao, izikoa tsy miala amy raha inoanao. Farany, ho hainao fo olo karakory ma anao.