Nan̈inofy Nebokadnezara alin̈y araiky zay. Nanahiran̈a jerinany raha io, ke tsy tafandry izy. Nikaiky pan̈ano mazy aby io izy, ke hoizy: ‘Hazavà aminaka nofinaka.’ Ho iro: ‘Panjaka, volàn̈a aminay nofinao.’ Ho Nebokadnezara tamindro: ‘Aha! Volàn̈a aminaka ino nofinaka, koa tsy zen̈y anaro voneko.’ Iro mbala nivolan̈a taminany: ‘Volàn̈a aminay nofinao zen̈y, misy han̈azavanay izy aminao.’ Volan̈iny: ‘Anaro jiaby io raha havandy aminaka fo. Ino nofinaka zen̈y?’ Ho iro tamy panjaka: ‘Raha volan̈inao zen̈y, tsisy olo mahavita zen̈y.’

Neloko mare Nebokadnezara, ke nirahiny hivonen̈a olo jiaby mahay raha, an̈isanizen̈y koa Daniela, Sadraka, Mesaka, ndreky Abednego. Daniela nangataka tamy panjaka fotoan̈a hely. Daniela ndreky namany aby io amy zay nivavaka nangataka fan̈ampian̈a tamy Jehovah. Akory eky nataony Jehovah?

Naboakany Jehovah Daniela tamy fahitan̈a nofiny Nebokadnezara io ndreky dikanizio. Kiaka andra, Daniela nandeha tamy piasany panjaka tan̈y nivolan̈a: ‘Aza vonen̈a iro olo mahay raha aby io, fa hazavaiko amy panjaka dikany nofinany.’ Daniela nindesiny piasa io tamy Nebokadnezara. Ho Daniela tamy panjaka: ‘Naboakany Zan̈ahary anao raha handalo aminy hoavy. Nan̈inofy anao, ke sarivongana raha hitanao. Volamena lohanany, volafotsy tratranany ndreky baontan̈ananany, varahin̈y kibonany ndreky fenany, vy pekinany, baka io vy ndreky tanimanga vitinany. Nisy vato nipoahan̈a baka tamy bongo nikon̈o vitiny sary io. Potipotiky sarivongana io, baka io nindesiny tsiko. Vato in̈y nanjary bongo be, ke nameno tany jiaby.’

 Daniela amy zay nivolan̈a: ‘Ty dikany nofinao io: Fanjakan̈anao raha tiany volan̈iny amy loha volamena in̈y. Volafotsy io fanjakan̈a handimby anao. Baka io hisy araiky karaha varahin̈y koa hanjaka amy tany jiaby. Fanjakan̈a fan̈araka izio hatanjaka mira vy. Farany amy zay, hisy fanjakan̈a mirasarasa ke sasany karaha vy fa sasany ndraiky karaha tanimanga. Vato nanjary bongo io Fanjakan̈any Zan̈ahary. Izio hanorotoro fanjakan̈a jiaby, sady haharitry mandrakizay.’

Nebokadnezara nankohoko tamy tany nan̈oloan̈a Daniela. Hoizy: ‘Zan̈aharinao nan̈ambara nofy io taminao. Tsisy Zan̈ahary mira izy foeky.’ Tsy nivoneny Nebokadnezara Daniela, fa izy nataony sefonolo jiaby nahay raha tao, baka io izy nataony pitondra tamy faritaniny Babylony. Jehovah ten̈a namaly vavaka Daniela.