Koa fa nandeha fotoan̈a, Belsazara nanjary panjakany Babylony. Alin̈y araiky zay, izy nan̈ano fety sady nikaiky olo ambony 1 000. Izy nan̈iraka piasanany nangala bakoly volamena nalainy Nebokadnezara tamy tempoliny Jehovah in̈y. Ke nigiaka tamy bakoly aby io Belsazara ndreky vahininany, sady nidera zan̈aharindro. Tio fo, nisy tan̈ana nanoratra raha hafahafa tamy riba.

Belsazara navozo mare, ke nikahiny olo pan̈ano mazy taminany tao. Hoizy: ‘Lan̈iany olo mahavita man̈azava dikany soratra aby io, izy hataoko pitondra fahatelo a Babylony eto.’ Namango iro nan̈azava, fa tsisy nahavita. Navy amy zay mamany panjaka io nivolan̈a: ‘Misy lelahy zay an̈y, Daniela an̈arany. Izy nahavita nan̈azava raha karaha io tamy Nebokadnezara. Izy mahavita man̈azava izio aminao.’

Nandeha tamy panjaka tao Daniela. Ho Belsazara taminany: ‘Koa hainao dikany soratra aby io, hamiako ravaka volamena anao, sady hataoko olo pitondra fahatelo a Babylony eto.’ Ho Daniela: ‘Zaho tsy mila kado aby io, fa hivolan̈iko aminao ndraiky dikany volan̈a aby io. Nebokadnezara papanao in̈y nan̈ambony ten̈a, ke Jehovah nampiondriky izy. Hainao raha jiaby nandalo, kanefa mbala tsy najainao fo Jehovah, fotony anao nigiaka divain tamy bakoly volamena baka tamy tempolinany. Zen̈y nahavy Zan̈ahary nanoratra volan̈a aby ty: Mene, Mene, Tekela, baka io Parsina. Dikanizio: Medianin̈y ndreky Persianin̈y handresy Babylony, baka io tsy ho panjaka eky anao.’

Karaha tsy ho resinolo foeky Babylony. Nisy riba matevin̈y ndreky rano lalin̈y niaro izy. Zen̈y tsy  nisakana Medianin̈y ndreky Persianin̈y aby io nanafiky Babylony, alin̈y io fo. Naviliny Kyrosy panjakany persianin̈y lalan̈a rano io, ke nafaka nitsaka, baka io nan̈aton̈o varavaran̈a maramilanany, sady varavaran̈a io nibian̈a taminio! Nidirandro maramila aby io tao, resindro tanàna io, baka io nivonendro panjaka. Kyrosy amy zay nanjary panjakany Babylony.

Taon̈o araiky tafaranizen̈y, Kyrosy nivolan̈a: ‘Jehovah nan̈iraka zaho han̈amboatra ndraiky tempolinany a Jerosalema. Mety mandeha aby lan̈iany vahoakanany tihan̈amboatra izio.’ Maro Jiosy nody ta Jerosalema, 70 taon̈o tafarany nandravan̈ana izio. Marin̈y ankitin̈y volan̈a Jehovah! Nampodiny Kyrosy bakoly volamena ndreky volafotsy aby in̈y, ndreky fitaovan̈a jiaby nalainy Nebokadnezara tamy tempoly tao. Nampiasa Kyrosy han̈ampy vahoakanany Jehovah, sa karakory?