Diany Jesosy tambony tany teto hitory vaovao tsara momba Fanjakan̈any Zan̈ahary. Jehovah nan̈amia fan̈ahy masin̈y Jesosy han̈anovany fahagagan̈a, an̈aboahan̈a aminolo raha handeha hataony lera izy manjaka. Janga olo jiaby nitahany. Olo jamba nahita, olo maren̈iny naharen̈y, olo tsy afaka nandeha nahavita nandeha. Izy nan̈adoso demony taminolo. Nata olo nitosy lambanany fo efa janga edy. Olo nan̈araka zay tany nimboany. Ndray Jesosy efa kajo, izy tsy nandroaka olo nan̈aton̈o izy.

Tandraraiky, nisy olo tsy nafaka nandeha nindesinolo tantran̈o nisy Jesosy. Tran̈o io tamy zen̈y feno olo, ke iro tsy tafiditry tamy varavaran̈a. Nisy nadosodro tafony tran̈o io, ke najotsondro baka tio lelahy io. Jesosy amy zay nivolan̈a tamy lelahy io: ‘Mitsangàna anao, mandihana.’ Izy koa fa nitsangana, izy nahavita nandeha. Gaga olo jiaby.

Jesosy nandeha tamy tanàna araiky zay. Nisy olo boka folo nitsangana baka lavitry nandronton̈o izy: ‘Zahava zahay Jesosy e.’ Tamy zen̈y, olo boka tsy mahazo man̈aton̈o olo. Iro mbala tsendriky janga, iro efa nirahiny Jesosy nandeha tamy tempoly tan̈y edy. Zen̈y baka raha volan̈iny Lalàn̈a. Iro mbala tamy lalan̈a fo, iro efa janga edy. Araiky tamindro  nimpody nan̈ano mersy Jesosy ndreky nidera Jehovah. Izy zaraiky fo mba nan̈ano mersy Jesosy.

Nisy man̈angy araiky narary mare tan̈atiny 12 taon̈o. Nalahelo mare izy. Namakivaky olo maro izy nan̈aton̈o tafarany Jesosy. Izy koa fa nitosy lambany Jesosy, izy efa janga edy. Jesosy nan̈ontany: ‘Azovy nitosy zaho tio in̈y?’ Navozo man̈angy io, fa izy baka tio nan̈aton̈o nivolan̈a raha nataony. Jesosy tsy nasiaka izy, fa izy nivolan̈a: ‘Mandihana zanako. Aza miasa loha eky.’

Nisy lelahy sefony maramila nan̈aton̈o Jesosy. Izy nivolan̈a: ‘Mba mavia antran̈onaka an̈y, fa marary mare zanako hely zay ao.’ Jesosy mbala tamy lalan̈a fo, tsaiky viavy io efa naty. Izy koa fa navy, zahany olo jiaby mitomoan̈y. Ho Jesosy tamindro: ‘Basy eky fa izio mandry fo.’ Nalainy tan̈any tsaiky io, baka io izy nivolan̈a: ‘A tsaiky ty e, mifohaza!’ Nitsangana tsaiky io. Jesosy amy zay nan̈iraka olobeny tsaiky io, han̈amia hanin̈y izy. Misora ravoravo mare ry olobeny!