Nan̈inofy Farao panjakany Ezipta, fa tsisy olo nahay dikany nofy io. Mbala nigadra Josefa taminio. Nisy piasany Farao araiky nivolan̈a taminany, fa Josefa mahavita man̈ambara dikany nofinany io. Nirahiny Farao nikahian̈a Josefa.

Ho Farao tamy Josefa: ‘Hainao man̈azava nofinaka?’ Hoizy tamy Farao: ‘Fito taon̈o ho maro hanin̈y a Ezipta eto, fa fito taon̈o man̈araka, hisy mosary. Mifidiana olo araiky mahay mandiniky raha hamory hanin̈y, baka vahoakanao tsy hofoatiny mafo.’ Farao nivolan̈a: ‘Anao fidiko! Anao hanjary lelahy faharoe ten̈a manampahifan̈a a Ezipta eto!’ Akory nahaizany Josefa dikany nofiny Farao? Jehovah nan̈ampy izy.

Fito taon̈o Josefa namory hanin̈y. Baka tio nisy mosary tamy tany jiaby, karaha nivolan̈iny Josefa in̈y. Maro olo baka tantany hafa navy hivanga hanin̈y tamy Josefa. Ren̈iny Jakoba, papany Josefa, fa nisy hanin̈y ta Ezipta, ke izy nan̈iraka zanany folo lahy nandeha tan̈y.

Koa fa navy tamy Josefa tan̈y zanaka Jakoba aby io efa hainy Josefa edy iro, fa iro tsy nahay izy foeky. Iro nandohaliky taminany mira nofinany taminizy mbala hely in̈y. Tiany Josefa ho hay asa mbala ratsy jery fo zokiny aby io! Ke hoizy tamindro: ‘Anaro pitsikilo. Tianaro ho hay mombamomba tanànanay ty.’ Iro nivolan̈a: ‘Ehe! Tsy zen̈y. Zahay io 12 mirahalahy ta Kanana. Araiky aminay fo fa naty, baka io faralahy aminay amy babanay an̈y.’ Josefa baka tio nivolan̈a:  ‘Indesa aminaka atỳ zandrinaro faralahy zen̈y, zen̈y zaho vo mino raha volan̈inaro.’ Nody tamy babandro tan̈y iro.

Izikoa fa lany hanin̈indro, babandro nan̈iraka iro nimpody ta Ezipta tan̈y ndraiky. Nindesindro nan̈araka iro Benjamina, faralahy tamindro. Josefa tihitsapa jery iro, ke nasitriny tan̈atiny entan̈a Benjamina tao vera volafotsinany, baka io nataony nangalarindro. Piasany Josefa koa fa nahita vera in̈y taminy entan̈a Benjamina, taitry mare rahalahiny aby io. Iro niangavy Josefa han̈asazy iro fa tsy Benjamina.

Hitany Josefa iziô fa niova iro zokiny aby io. Tsy navoatanany Josefa raha tan̈aty fonany. Izy tafitomoan̈y, baka io izy nivolan̈a: ‘Zaho kony Josefa rahalahinaro in̈y e! Mbala velon̈o an̈y ma babako?’ Lany fan̈ahy iro. Hoizy tamindro: ‘Anaro aza malahelo tamy raha nataonaro zaho in̈y. Zan̈ahary nandefa zaho tatỳ han̈avotan̈a fahin̈ananaro. Mindao malaky, indesa atỳ babako.’

Nandeha nody iro nitantara vaovao tsara zen̈y tamy babandro, ndreky nitondra izy ta Ezipta. Ela ny ela, fa nifanojy ndraiky Josefa ndreky papany.